နတ်တလင်း၊ ဧပြီ ၁၀၊ ၂၀၂၃။

ပဲခူးတိုင်းအနောက်ခြမ်း၊ သာယာဝတီခရိုင်၊ နတ်တလင်းမြို့မှာ သင်္ကြန်ပွဲကျင်းပဖို့အတွက် စစ်ကောင်စီက လောင်းကစားဒိုင်တွေနဲ့ လုပ်ငန်းရှင်တွေဆီကနေ ငွေကြေးတောင်းခံနေတယ်လို့ သိရပါတယ်။

ဧပြီလ ပထမအပတ်ကစတင်ကာ နတ်တလင်းမြို့က ဘောလုံးဒိုင်၊ ၂ လုံးဒိုင်နဲ့ ချဲဒိုင်တွေအပြင် လုပ်ငန်းရှင်တွေဆီကနေ စစ်ကောင်စီလက်အောက်ခံ ထွေအုပ်စာရေးတွေက တောင်းခံခဲ့တာလို့ မြို့နယ်ထွေအုပ်ရုံးနဲ့ နီးစပ်သူတဦးက ပြောပါတယ်။

“သင်္ကြန်မဏ္ဍပ်မှာ ကုန်မယ့်ငွေကို သက်ဆိုင်ရာထွေအုပ်စာရေးတွေက အုပ်ကြီးတွေဆီမှာ လောင်းကစားဒိုင်စာရင်းနဲ့ လုပ်ငန်းရှင်စာရင်းယူပြီး သူ့ရပ်ကွက်ကျေးရွာအလိုက် လိုက်တောင်းပေးရတာ” လို့ ပြောပါတယ်။

လောင်းကစားဒိုင်တွေကို အကြီးအသေးအလိုက် ကျပ် ၅ ထောင်ကနေ ကျပ်၂ သိန်းအထိတောင်းပြီး၊ ရွှေလုပ်ငန်းရှင်နဲ့ တခြားလုပ်ငန်းရှင်တွေကို ကျပ် ၂ သောင်းကနေ ကျပ် ၅ သိန်းအထိ တောင်းတယ်လို့ သူကဆက်ပြောပါတယ်။

လက်ရှိမှာတော့ နတ်တလင်းမြို့၊ ဇီးကုန်းကလေးရပ်ကွက်၊ ရန်ကုန်-ပြည်လမ်း ဘုရားကြီးရှေ့မှာ သင်္ကြန်မဏ္ဍပ် ဆောက်လုပ်ထားပြီး၊ ခုလို စစ်ကောင်စီက ကျင်းပမယ့် သင်္ကြန်ပွဲမှာ မြို့ခံပြည်သူတွေအနေနဲ့ စိတ်ဝင်စားမှုရှိမှာ မဟုတ်သလို စစ်တပ်ထောက်ခံသူတွေသာ ပါဝင်နိုင်တယ်လို့ နတ်တလင်း ဒေသခံတဦးက သုံးသပ်ပါတယ်။

“မနှစ်ကလည်း ရေကစားတာသိပ်မရှိဘူး။ အခုနှစ်လည်း ပြည်သူ လုံးဝ စိတ်မဝင်စားဘူး။ သင်္ကြန်သီချင်းတောင် ဖွင့်သံမကြားဘူး။ သင်္ကြန်အတွက်လည်း အစိမ်းနဲ့ဘောမ ဝန်ထမ်းတွေပဲ လုပ်မဲ့ကိုင်မဲ့သူရှိတယ်။ သာမန်ပြည်သူက သင်္ကြန်ရက်မထွက်ဖို့ များတယ်” လို့ ပြောပါတယ်။

နတ်တလင်းမြို့နယ် ပြည်သူ့ကာကွယ်ရေးတပ်ဖွဲ့ကလည်း စစ်ကောင်စီက ပြုလုပ်မယ့် သင်္ကြန်ပွဲတော်အပါအဝင် ဘယ်လိုပျော်ပွဲရွှင်ပွဲမဆို ဒေသခံပြည်သူတွေအနေနဲ့ မပါဝင်ကြဖို့ ပြီးခဲ့တဲ့ဧပြီလ ၆ ရက်က ထုတ်ပြန်တိုက်တွန်းထားပါတယ်။

ဒါ့အပြင် နတ်တလင်းမြို့နဲ့ မြို့ချင်းကပ်လျက် ပေါင်းတည်မြို့မှာလည်း စစ်ကောင်စီက သင်္ကြန်မှာ စည်ကားဖို့အတွက် မဏ္ဍပ်တွေဆောက်လုပ်လျှက်ရှိရာ၊ ဧပြီလ ၉ ရက်မနေ့က မနက် ၅ နာရီလောက်မှာတော့ ပေါင်းတည်မြို့၊ စျေး ၂ ရပ်ကွက်၊ ဘုရားကြီးလမ်းပေါ်က ဆောက်လုပ်ဆဲမဏ္ဍပ်ကို ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ တပ်ရင်း-၃၆၀၁ တပ်ခွဲ – ၅ နွေဦးတပ်ဖွဲ့က ဗုံးခွဲသတိပေးခဲ့ပါသေးတယ်။

မုံရွာ၊ ဧပြီ ၇၊ ၂၀၂၃။

စစ်ကိုင်းတိုင်း၊ မုံရွာမြို့နယ်၊ ကံသာဦးရပ်ကွက်မှာ ပြုလုပ်မယ့် ကန်သာယာသင်္ကြန်မှာ ရုပ်ရှင်သရုပ်ဆောင် အယောက် ၂၀ ဖိတ်ထားပြီး လမ်းလျှောက်သင်္ကြန်ကျင်းပဖို့ ကြိုးစားနေတယ်လို့ ဒေသခံတွေကတဆင့် သိရပါတယ်။

အရှေ့ကန်သာယာနဲ့ အနောက်ကန်သာယာကြားမှာ ဗဟိုမဏ္ဍပ်တခု ဆောက်လုပ်နေပြီး၊ ဘေးလျှောက်လမ်းတွေမှာတော့ လမ်းလျှောက်သင်္ကြန်နဲ့ စတုဒီသာအတွက် မဏ္ဍပ် ၂ ခုဆောက်လုပ်နေကာ သင်္ကြန်ကိုလာရောက်မယ့် သရုပ်ဆောင်တွေကိုတော့ မသိရသေးဘူးလို့ ဆိုပါတယ်။

“ကျတော်တို့ကြားတာတော့ ရန်အောင်က အကြိုနေ့လာမယ် ကြားတာပဲ။ ကျန်တဲ့အနုပညာရှင်တွေတော့ မကြားမိဘူး။ ဒါကလည်း အတိကျတော့ ပြောလို့မရဘူး။ ထွက်လာတဲ့သတင်းတွေအရပေါ့။ သင်္ကြန်လူစည်အောင်ဆိုရင်တော့ သူတို့တပ်မိသားစုတွေ၊ ဌာနဆိုင်ရာဝန်ထမ်းတွေကို ထုတ်လာပြီးမှပဲ စည်ကားအောင် လုပ်လိမ့်မယ်။ ပြည်သူတွေကတော့ လည်ဖို့ မဖြစ်နိုင်ဘူး။” လို့ မုံရွာဒေသခံတဦးက ပြောပါတယ်။

ဒါ့အပြင် မုံရွာမြို့ပေါ်မှာရှိတဲ့ လုပ်ငန်းရှင်တွေကို သင်္ကြန်မဏ္ဍပ်နဲ့ အစီစဉ်တွေအတွက်ဆိုပြီး ၃ သိန်းကနေ ၅ သိန်းအထိ ငွေကြေးကောက်ခံတာတွေ လုပ်နေတယ်လို့ ဆိုပါတယ်။

“အခုလက်ရှိ မဏ္ဍပ်အဆောက်အဦး ၃ ခု ဆောက်နေတယ်။ ဝင်းယူနတီဟော်တယ်ရှေ့နဲ့ တင်ဝင်းထွန်းဟော်တယ်ရှေ့မှာ၊ အနုပညာရှင်တွေက အဲ့ hotel တွေမှာပဲ နေဖို့များတယ်။” လို့ မုံရွာဒေသခံတဦးက ပြောပါတယ်။

စစ်ကောင်စီဘက်က မဟာသင်္ကြန်ဖြစ်မြောက်ရေးကော်မတီဝင်တွေကတော့ မုံရွာသင်္ကြန်ကို လာရောက်လည်ပတ်ဖို့နဲ့ ရေကစားမယ့်သူတွေအတွက် စတုဒီသာမဏ္ဍပ်တွေလည်း ဆောက်လုပ်ထားပြီး ယိမ်းအကယှဉ်ပြိုင်ပွဲတွေ၊ ဆုချီးမြှင့်ပွဲတွေ ကျင်းပဖို့လည်း စီစဉ်ထားတယ်လို့ ဆိုပါတယ်။

ပြည်သူတွေအနေနဲ့ သင်္ကြန်မှာ အပျော်မလွန်ကြဖို့၊ စစ်ကောင်စီက ကျင်းပတဲ့သင်္ကြန်ကို မပါဝင်ကြဖို့ ပြည်သူ့ကာကွယ်ရေးအဖွဲ့တွေက တားမြစ်ထားတာတွေလည်းရှိလို့ လည်ပတ်မယ့်အခြေနေက‌ နည်းပါးတယ်လို့ သိရပါတယ်။

စာတည်း – 007

စစ်ကိုင်း၊ မတ် ၂၉၊ ၂၀၂၃။

စစ်ကိုင်းတိုင်း၊ ကနီမြို့နယ်၊ ကျေးရွာတရွာက ပြည်သူ့အခြေပြု မူလတန်းကျောင်းတကျောင်းမှာ ပညာရည်ချွန်ဆုပေးပွဲကို မတ်လ စတုတ္ထအပတ်အတွင်းမှာ ပြုလုပ်ခဲ့တယ်လို့ သိရပါတယ်။

ဒီဆုပေးပွဲမှာ ပညာရည်ချွန်ဆုပေါင်း ၁၅ ဆုကို ပေးအပ်ချီးမြှင့်ခဲ့ကာ ကလေးတွေအနေနဲ့ ပိုပြီးစာကြိုးစားချင်စိတ်ဖြစ်လာအောင် ကျင်းပပေးခဲ့တာလို့ ကနီသပိတ်အင်အားစုမှတာဝန်ရှိသူက ပြောပါတယ်။

“စာမေးပွဲ ပညာရည်ချွန်ဆုပါ။ ပထမ၊ ဒုတိယ၊ တတိယ ဆုတွေပေါင်းပြီး ဆုပေါင်း ၁၅ ဆုပါ။ ဆုပေးပွဲမှာ ဖျော်ဖြေရေးတွေလည်း ပါပါတယ်။ အခုလို ကျင်းပပေးရတာဟာ ကလေးတွေကို စာကြိုးစားလာအောင် ကျောင်းဆက်တက်ချင်တဲ့စိတ်ပေါက်အောင်၊ မိဘ ဆရာ ကျောင်းသားတွေနဲ့လည်း တွေ့ဆုံလို့ရအောင် ရည်ရွယ်ချက်နဲ့ လုပ်ဆောင်ပေးရတာပါ” လို့ ပြောပါတယ်။

အဲဒီကျောင်းမှာ KG တန်းကနေ Grade – 4 အထိရှိပြီး ကျောင်းသား၊ ကျောင်းသူ ၅၇ ဦးရှိကာ CDM ဆရာ၊ဆရာမ ၂ ဦးနဲ့ စေတနာ့ဝန်ထမ်း ဆရာ၊မ ၅ ဦးတို့က ပညာသင်ကြားပေးနေတာလည်း ဖြစ်ပါတယ်။

ဒါ့အပြင် မတ်လ ၂၈ ရက်မနေ့ကလည်း မုံရွာလူထုသပိတ်မှာ ကျဆုံးသွားတဲ့ CDM သူနာပြုကျောင်းသူ မသဉ္ဇာဟိန်းအတွက် အောက်မေ့ဖွယ် ၂ နှစ်ပြည့်အခမ်းအနားကို ကနီမြို့နယ်က ဒေသခံပြည်သူတွေနဲ့ ဒေသတွင်း တော်လှန်ရေးအင်အားစုတွေ ပူးပေါင်းပြီး ပြုလုပ်ခဲ့ပါသေးတယ်။

စာတည်း – လင်း

မကွေး၊ မတ် ၂၉၊ ၂၀၂၃။

ပြည်သူ့ကာကွယ်ရေးတပ်မတော် အမှတ် ၁ စစ်ဒေသဖြစ်တဲ့ မကွေးတိုင်း တနေရာမှာ မတ်လ ၂၇ ရက်နေ့ မနက်ပိုင်းက မွမ်းမံသင်တန်းဆင်းပွဲနဲ့ လက်နက်ပေးအပ်ပွဲ အခမ်းအနားကျင်းပခဲ့တယ်လို့ သိရပါတယ်။

အပတ်စဉ် ၄ ခုမြောက် သင်တန်းဆင်းပွဲဖြစ်ပြီး လက်နက်ကြီး၊ လက်နက်ငယ်၊ ဒရုန်းစတဲ့လက်နက်ပေးအပ်ပွဲလည်း ကျင်းပခဲ့ကာ အခမ်းအနားကိုတော့ နယ်မြေလုံခြုံရေးကြောင့် အခက်ခဲတွေကြားကနေ အချိန်တိုအတွင်းပြီးအောင် အကျဉ်းချုပ်ပြီး လုပ်ခဲ့တယ်လို့ ဆိုပါတယ်။

“အဓိက ဦးစားပေးတာတော့ လေ့ကျင့်ရေးပိုင်း သင်တန်းပိုင်းကို ဦးစားပေးတယ်။ လေ့ကျင့်မှုတွေက အတွေ့ကြုံရှိတဲ့ဆရာတွေကနေပြီး သင်ကြားပေးတာဖြစ်တယ်။ တနိုင်ငံလုံးမှာလည်း အင်တိုက်အားတိုက်နဲ့ သင်တန်းတွေ လုပ်နေကြပါတယ်။ မကြာတော့တဲ့ကာလမှာ အရည်ချင်းပြည့်ဝတဲ့ စစ်သားကောင်းတွေ ပေါ်ထွက်လာတော့မှာပါ။” လို့ တက်ရောက်ခဲ့တဲ့ တပ်ရင်းတခုက တာဝန်ရှိသူတဦးက ပြောပါတယ်။

အဆိုပါ သင်တန်းဆင်းပွဲအခမ်းအနားကို မကွေးတိုင်းကွပ်ကဲရေးရုံးက တာဝန်ရှိသူတွေ၊ သက်ဆိုင်ရာ ခရိုင်တာဝန်ရှိသူတွေနဲ့ တပ်ရင်းအသီးသီးက တပ်ရင်းမှူး၊ ဒုတပ်ရင်းမှူးတွေတက်ရောက်ခဲ့ပြီး သင်တန်းဆင်း ရဲဘော်တွေကလည်း ဖျော်ဖြေရေးအစီစဉ်တွေနဲ့ ပါဝင်ခဲ့တယ်လို့ သိရပါတယ်။

စာတည်း – 007

မြိုင်၊ မတ် ၂၁၊ ၂၀၂၃။

မကွေးတိုင်း၊ မြိုင်မြို့နယ်ထဲမှာ ယနေ့မတ်လ ၂၁ ရက်နေ့မှာ ကျရောက်တဲ့ ကမ္ဘာ့ကဗျာနေ့ကို နံနက် ၁၀ နာရီကနေ ၁၂ နာရီထိ လွတ်လပ်စွာ ကျင်းပခဲ့ကြတယ်လို့ သိရပါတယ်။

မြိုင်ဒေသဟာ လက်နက်ကိုင်ကဗျာဆရာ၊ လက်နက်ကိုင်ပန်းချီဆရာနဲ့ အခြား တော်လှန်သော အနုပညာရှင်များအားကောင်းသလို PDF တပ်ဖွဲ့ဝင်တွေအဖြစ်ကော တပ်ဖွဲ့ခေါင်းဆောင်နေရာတွေမှာပါ ပါဝင်နေကြတယ်လို့ ဆိုပါတယ်။

“ပြီးခဲ့တဲ့နှစ်မှာ ကျနော်တို့ မလုပ်နိုင်ခဲ့ဘူး။ အခြေချတာ နယ်မြေမစိုးမိုးသေးတာတွေကြောင့်ပါ။ ဒီနှစ်မှာတော့ ကျနော်တို့စိုးမိုးမှု အထိုက်အလျှောက်ရလို့ တော်လှန်ရေးအင်အားစုအားကောင်းလာလို့ လုပ်နိုင်ခဲ့တယ်။ လက်နက်ကိုင် ကဗျာဆရာတယောက်အနေနဲ့ဆိုရင်တော့ ကဗျာမရွတ်ရတာ လေးနှစ်လောက်ရှိပြီ။ အခုတော့ပျော်တာပေါ့” လို့ မြေလတ်ဒေသပြောက်ကျားတပ်ဖွဲ့ – MRG ရဲ့ တာဝန်ခံလည်းဖြစ်၊ ကဗျာဆရာလည်းဖြစ်သူ ကိုပြေဇော်က မြေလတ်အသံကို ပြောပါတယ်။

ကဗျာရွတ်ပွဲကို ကဗျာဆရာနဲ့ကဗျာချစ်သူတွေ ယင်းမာပင်ခရိုင်တပ်ရင်း-၁၀၊ ပုလဲမြို့နယ်တပ်ရင်း-၄ တပ်ရင်းမှူးများတက်ရောက်သလို တပ်ရင်း-၆ က ရဲဘော်တွေ ပကဖတွေနဲ့ ပအဖ ခေါင်းဆောင်တွေအပါအဝင် အင်အား ၅၀ ခန့် တက်ရောက်ခဲ့ကြတယ်လို့ ဆိုပါတယ်။

“ကဗျာဆရာတွေ ပြန်တွေ့ရတယ်။ သူတို့လုပ်နေကြတဲ့ အကြောင်းအရာတွေ ကျနော်တို့လုပ်နေကြတဲ့ အကြောင်းအရာတွေ ပြောကြတယ်။ တော်လှန်ရေးထဲမှာ စိတ်တူကိုယ်တူကဗျာဆရာတွေ ပြန်တွေ့ကြတယ်။ ကဗျာတွေ ရွတ်ကြပျော်ပါတယ်” လို့ ကိုပြေဇော်က ပြောပါတယ်။

ပြီးခဲ့တဲ့ ၂၀၂၂ ခုနှစ် ကမ္ဘာ့ကဗျာနေ့ကို မပြုလုပ်နိုင်ခဲ့ဘဲ ယခုကဗျာရွတ်ပွဲကိုတော့ မြေလတ်ဒေသပြောက်ကျားတပ်ဖွဲ့- MRG က ကမကထပြုလုပ်ပြီး ကဗျာမရွတ်ခင် ကျဆုံးရဲဘော်နဲ့ကဗျာဆရာတွေကို ငြိမ်သက်အလေးပြုတာ၊ တော်လှန်ကဗျာတွေကို ရွတ်ဖတ်တာတွေ ပြုလုပ်ခဲ့ကြတယ်လို့ သိရပါတယ်။