ကောလင်း၊ မတ် ၆၊ ၂၀၂၆။
စစ်ကိုင်းတိုင်း၊ ကောလင်းမြို့နယ်အရှေ့ခြမ်းရှိ ကချင်ကုန်းရွာကို စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် ကိုယ်ဝန်သည်အမျိုးသမီးအပါအဝင် အမျိုးသမီး ၂ ဦးသေဆုံးပြီး အမျိုးသား ၂ ဦး ဒဏ်ရာရခဲ့တယ်လို့ ဒေသခံတွေက ပြောပါတယ်။
မတ်လ ၅ ရက် မနေ့ကညနေ ၄ နာရီ ၄၀ မိနစ်မှာ စစ်ကော်မရှင်တပ်က စစ်ရေးလှုပ်ရှားမှုမရှိဘဲ ဂျက်ဖိုက်တာနဲ့ ရွှေဘို- မြစ်ကြီနား ကားလမ်းဘေးရှိ ကချင်ကုန်းရွာကို ဗုံးကြဲချိန် အမျိုးသား ၁ ဦးဒဏ်ရာရပြီး ဆိုင်ကယ်နဲ့စျေးရောင်းနေတဲ့ အသက် ၄၀ အရွယ်ကိုယ်ဝန်သည်အမျိုးသမီး ၁ ဦး သေဆုံးခဲ့တယ်လို့ ဆိုပါတယ်။
” (ကိုယ်ဝန်သည်အမျိုးသမီးကို) ဆေးမကုလိုက်ရဘူး။ လမ်းမှာတင်သေသွားတာ”လို့ ဒေသခံတဦးက ပြောပါတယ်။
အဲ့ဒီဂျက်ဖိုက်တာဟာ ကချင်ကုန်းရွာကိုဗုံးကြဲပြီးနောက် ရှောက်ပင်ချုံရွာဘုန်းကြီး ကျောင်းကိုလည်း သုံးကြိမ်ဗုံးကြဲရာ ကျောင်းစောင့်လင်မယားကို ဗုံးစထိမှန်ခဲ့ပြီး ၄၀ ကျော်အရွယ်အမျိုးသမီးဖြစ်သူဟာ နေရာမှာတင်ပွဲချင်းပြီး သေဆုံးခဲ့တာလို့ သိရပါတယ်။
ပြီးခဲ့တဲ့ မတ်လ ၁ ရက်ကလည်း စစ်ကော်မရှင်တပ်က ပင်လည်ဘူးမြို့နယ်တောင်ခြမ်းရှိ လိပ္ပုတ်ရွာကို လေကြောင်းတိုက်ခိုက်ခဲ့တာကြောင့် ပြည်သူ ၈ ဦး သေဆုံးခဲ့ပါသေးတယ်။
သတင်း – MG