ကဝ

ကဝ၊ စက်တင်ဘာ ၂၂၊ ၂၀၂၅။

ပဲခူးတိုင်းအခြေစိုက် ကဝမြို့နယ်ပြည်သူ့ကာကွယ်ရေးအဖွဲ့မှ တပ်စိတ်မှူး ၂ ဦးအပါအဝင် ၃ ဦး တပ်ရင်းကနေ ထွက်ပြေးသွားတယ်လို့ စက်တင်ဘာ ၂၁ ရက်မှာ အဲ့အဖွဲ့ကသတင်းထုတ်ပြန်လာပါတယ်။

ထွက်ပြေးသူတွေဟာ ဒုတပ်စိတ်မှူး သန့်ဇင်ဦးနဲ့ ချစ်မင်းကို၊ တပ်ဖွဲ့ဝင် ပြည်ဖြိုးအောင်တို့ ၃ ဦးဖြစ်ပြီး သူတို့ ၃ ဦးဟာ အခုနှစ် ဧပြီ ၁ ရက်၊ ဇွန် ၂၃ ရက်နဲ့ ဩဂုတ် ၁၀ ရက်တို့မှာ တဦးချင်းထွက်ပြေးသွားတာလို့ ဆိုပါတယ်။

“ပုဂ္ဂလိက အကြောင်းပြချက်အမျိုးမျိုးပါပဲ၊ မိန်းမနဲ့ သွားတွေ့ဖို့၊ ရည်းစားနဲ့ လက်ထပ်ဖို့၊ အလုပ်လုပ်ဖို့ ဆိုပြီး ထွက်သွားကြတာ။ တပ်တာဝန်ရှိသူတွေကိုအကြောင်းကြားပြီး ထွက်သွားတာမျိုးမဟုတ်ဘူး။ မြို့နယ်ပကဖတွေက ရဲဘော်တွေကို ထုတ်ပယ်တာ၊”လို့ ကဝမြို့နယ်ပကဖ သတင်းနဲ့ပြန်ကြားရေး တာဝန်ရှိသူတဦးက ပြောပါတယ်။

ထွက်ပြေးသွားသူ ၃ ဦးဟာ ၂၀၂၃ နှစ်ကုန်ပိုင်းလောက်မှာ တပ်ဖွဲ့ကိုရောက်ရှိလာတာဖြစ်ပြီး တပ်ဖွဲ့မှာ နေထိုင်ချိန် ပြစ်မှုကျူးလွန်တာ၊ စည်းကမ်းချိုးဖောက်တာမျိုးတွေလည်းမရှိဘဲ အခုလို ထွက်ပြေးတာဟာလည်း ၎င်းတို့ရဲ့ ပုဂ္ဂလိက လိုအင်ဆန္ဒတွေကြောင့် ဖြစ်နိုင်တယ်လို့ သူကဆက်ပြောပါတယ်။

တပ်ကနေထွက်ပြေးချိန်မှာလည်း တပ်ဖွဲ့ပိုင်ငွေကြေး၊ လက်နက်တွေ ယူဆောင်သွားတာ၊ စစ်ကော်မရှင်ဘက်ကို ဘက်ပြောင်းခိုလှုံသွားတာမျိုးတွေမရှိဘူးလို့ သိရကြောင်း သူကဆိုပါတယ်။

ကဝမြို့နယ်ပြည်သူ့ကာကွယ်ရေးအဖွဲ့ စတင်တည်ထောင်ခဲ့တဲ့ ၂၀၂၂ ခုနှစ်ကနေ ယနေ့အချိန်ထိ တပ်ဖွဲ့ကနေ ထွက်ပြေးသွားသူဟာ အထက်ပါ ၃ ဦးသာရှိသေးတယ်လို့ သိရပါတယ်။

စာတည်း- လင်း

ပဲခူး၊ ဒီဇင်ဘာ ၃၀၊ ၂၀၂၂။

ပဲခူးတိုင်း၊ ကဝမြို့နယ် စစ်ကောင်စီအဖွဲ့ဝင်တွေနဲ့ မမောက်ကျေးရွာအုပ်ချုပ်ရေးမှူးတို့ပေါင်းပြီး စစ်တောင်းမြစ်အတွင်း တရားမဝင်နည်းလမ်းတွေနဲ့ ငါးဖမ်းနေသူတွေကို ခွင့်ပြုပေးနေတယ်လို့ သိရပါတယ်။

စစ်အာဏာသိမ်းပြီးနောက်ပိုင်းကစလို့ ကဝမြို့နယ်စစ်ကောင်စီအဖွဲ့ဝင် ကဝမြို့နယ်ကြံခိုင်ရေးပါတီဥက္ကဌ ဦးမျိုးမြင့်၊ နယ်မြေတာဝန်ခံ စစ်ကောင်စီဗိုလ်မှူး ထွန်းလင်းအောင်၊ မမောက်ကျေးရွာအုပ်ချုပ်ရေးမှူး မင်းစိန်တို့က ငွေယူပြီး တရားမဝင်နည်းလမ်းနဲ့ငါးဖမ်းနေသူတွေကို ခွင့်ပြုပေးနေတာလို့ ငါးဖမ်းလှေလုပ်ကိုင်နေသူတဦးက ပြောပါတယ်။

“စကစ အာဏာသိမ်းပြီးကတည်းက စစ်တောင်းမြစ်ထဲမှာ ငါးလုပ်ငန်းဦးစီးဌာနက ကန့်သတ်ထားတဲ့ သံဇကာပိုက်တွေနဲ့ ငါးဖမ်းတဲ့သူများလာတယ်။ ဒါတွေကို ခွင့်ပြုပေးနေတာက ကဝက စကစ နဲ့ပတ်သက်နေတဲ့အဖွဲ့တွေ။ သူတို့က ငွေယူထားပြီး စစ်တောင်းမြစ်ထဲ ကြိုက်သလိုလုပ်ဖို့ ခွင့်ပြုထားတယ်။ သူတို့ကို ငွေပေးထားတဲ့အဖွဲ့တွေက အခြားတရားဝင်နည်းလမ်းနဲ့ ငါးဖမ်းသူတွေရဲ့နေရာကို အုပ်စုလိုက် ဝင်လုတယ်။ ပြသနာရှာတယ်။ ကြာလာတော့ တရားဝင်လုပ်တဲ့သူတွေက နေရာတွေပျောက်ပြီး လုပ်စားကိုင်စားလို့မရတော့ဘူး” လို့ ပြောပါတယ်။

အဆိုပါ တရားမဝင်ငါးဖမ်းလှေတွေကို စစ်တောင်းမြစ်နဲ့ ထိစပ်နေတဲ့ ကဝ၊ သနပ်ပင်၊ ဝေါ၊ ကျိုက်ထို၊ ဘီးလင်း ရေပိုင်နက်တွေအထိ သွားလာခွင့်ပြုထားတယ်လို့ သိရပါတယ်။

ဒါ့အပြင်စစ်တောင်းမြစ်ထဲမှာ တရားမဝင်နည်းလမ်းနဲ့ ငါးဖမ်းနေသူတွေကို မမောက်ကျေးရွာအုပ်ချုပ်ရေးမှူးကတဆင့် ဦးမျိုးမြင့်နဲ့ ဗိုလ်မှူးထွန်းလင်းအောင်ဆီကို လှေ ၁ စီးလျင် ငွေကျပ် ၅ သိန်းမှ ၁၀ သိန်းထိ ပေးရတယ်လို့ ဆိုပါတယ်။

တရားမဝင် သံဇကာပိုက်တွေနဲ့ ငါးဖမ်းတဲ့အတွက် ငါးအမှုန်အမွှားကအစ ပါသွားလို့ ရေရှည်မှာ ငါးမျိုးစိတ် ပြုန်းတီးတာတွေ ဖြစ်လာနိုင်တယ်လို့ သိရပါတယ်။

NLD အစိုးရလက်ထက်က စစ်တောင်းမြစ်အတွင်း တရားမဝင် သံဇကာပိုက်တွေနဲ့ ငါးဖမ်းနေသူတွေကို ဖမ်းဆီးမှုတွေရှိခဲ့လို့ တရားမဝင်နည်းလမ်းနဲ့ ငါးဖမ်းသူတွေ မရှိသလောက် နည်းပါးသွားခဲ့ပြီး အခုချိန်မှာတော့ ဦးရေ ၅၀ ထက်မနည်း ပြန်တိုးလာတယ်လို့ ဆိုပါတယ်။