တပ်ထောက်ဗိုလ်ကြီးအဖြစ်ခန့်အပ်ခံရလို့ CDM မဝင်ဖြစ်တော့ရာက သေဆုံးခဲ့ဟုဆို

မြေလတ်အသံ၊ မေ ၁၂၊ ၂၀၂၅။

ပဲခူးတိုင်း၊ ရွှေကျင်မြို့၊ ဇလုတ်ကြီးရွာအခြေစိုက် ခမရ ၅၉၈ က ဗိုလ်ကြီး ရှိုင်းပြည့်အောင် တိုက်ပွဲတွင်းသေဆုံးသွားတယ်လို့ ၎င်းမိသားစုနဲ့နီးစပ်သူတွေထံက သိရပါတယ်။

ဗိုလ်သင်တန်းကျောင်း(ဗသက) အပတ်စဥ် ၁၂၃ ဆင်း ဗိုလ်ကြီး ရှိုင်းပြည့်အောင် ဟာ ခမရ ၅၉၈ တပ်ရင်းရဲ့ တပ်ထောက်ဗိုလ်ကြီး တာဝန်ယူထားသူဖြစ်ပြီး တပ်ရင်း သိမ်းပိုက်ခံခဲ့ရတဲ့ မေ ၈ ရက်မှာ တိုက်ပွဲကျသေဆုံးသွားတာလို့ ဆိုပါတယ်။

“ ကရင်(ဘော်စဲခို)မှာ ၈ လကျော် ငတ်ပြတ်စုတ်ပြတ် ‌ခြေထောက်မှာလည်း ကျည်ထိ၊ ဒါကိုတောင် ရှေ့ပြန်ပို့ မသေမချင်းကို ပေးဆပ်လိုက်ရတာကွာ “ လို့ ၎င်းနဲ့နီးစပ်သူတဦးက သူ့ရဲ့ ဖေ့စ်ဘွတ်လူမှုကွန်ယက်မှာ ရေးသားထားပါတယ်။

မကွေးတိုင်းဇာတိ ဗိုလ်ကြီး ရှိုင်းပြည့်အောင်ဟာ ၂၀၂၄ ဒီဇင်ဘာလအတွင်း CDM ဝင်ရောက်ဖို့ဆိုကာ မကွေးတိုင်းအတွင်းက တော်လှန်ရေးအင်အားစုဝင်တဦးကတဆင့် ဆက်သွယ်လာခဲ့ပေမယ့် ခမရ ၅၉၈ မှာ တပ်ထောက်ဗိုလ်ကြီးအဖြစ် တာဝန်ပေးအပ်ခံရပြီးနောက် CDM မဝင်လာတော့ခြင်းဖြစ်ကြောင်း CDM တပ်မတော်သား ဗိုလ်ကြီး ဇင်ယော်က ပြောပါတယ်။

“ တပ်ထောက်ဗိုလ်ကြီးဖြစ်တာမကြာသေးဘူး၊ ထောက်ဗက(တပ်ထောက်ဗိုလ်ကြီး) က နောက်တန်းအထိုင်လေ၊ ရှေ့တန်းမလိုက်ရတော့ဘူးဆိုတော့ (CDM) ဝင်မလာတော့တာ” လို့ ၎င်းက ဆိုပါတယ်။

ခမရ ၅၉၈ ကို တိုက်ခိုက်သိမ်းပိုက်နိုင်ခဲ့ပြီး တပ်ရင်းအတွင်းဝင်ရောက်ရှင်းလင်းစဥ်မှာ စစ်ကောင်စီတပ်ဖွဲ့ဝင် ၃၀ ဦးရဲ့ရုပ်အလောင်းတွေ့ရှိရပြီး စစ်သုံ့ပန်း ၆ ဦး နဲ့ တပ်မိသားစုဝင် ၇ ဦးကို ဖမ်းဆီးရမိခဲ့တယ်လို့ အမျိုးသားညီညွတ်ရေးအစိုးရ- NUG ကာကွယ်ရေးဝန်ကြီးဌာနက မေ ၁၁ ရက်မှာ ထုတ်ပြန်ပါတယ်။

တိုက်ပွဲအတွင်း လက်နက်ငယ်မျိုးစုံ ၈၃ လက် ၊ စိန်ပြောင်းလက်နက်ကြီး ၃လက် ၊ ပွိုင့် 5 စက်သေနတ် ၁ လက် ၊ ဂျန်မာစက် ၃ လုံးနဲ့ ခဲယမ်းအများအပြားကို သိမ်းပိုက်နိုင်ခဲ့တယ်လို့ ဆိုပါတယ်။

မေလဆန်းပိုင်းက စတင်ကာ ခမရ ၅၉၈ အခြေစိုက်တဲ့အနီးဝန်းကျင်ရှိ ညောင်ခြေထောက်၊ ကွမ်းဆိပ်ရွာတွေက စစ်ကောင်စီတပ်စခန်းတွေကို တော်လှန်ရေးပူးပေါင်းတပ်တွေက တိုက် ခိုက်ခဲ့ပြီး မေ ၈ ရက်မှာ ခမရ ၅၉၈ ကို အပြီးသတ်တိုက်ခိုက်သိမ်းပိုက်နိုင်ခဲ့တာလည်း ဖြစ်ပါတယ်။

ရွှေကျင်၊ မေ ၁၂၊ ၂၀၂၅။

တော်လှန်ရေးတပ်တွေသိမ်းပိုက်ထားတဲ့ ပဲခူးတိုင်း၊ ရွှေကျင်မြို့နယ်က ခမရ ၅၉၈ တပ်ရင်းကို ပြန်လည်ထိန်းချုပ်ထားနိုင်တယ်လို့ မေ ၁၂ ရက်ဒီနေ့မှာ စစ်ကောင်စီကသတင်းထုတ်ပြန်လာပါတယ်။

မေ ၈ ရက်မနက် ၅ နာရီခန့်မှာ တော်လှန်ရေးပူးပေါင်းတပ်တွေက ခမရ ၅၉၈ တပ်ကိုစတင် တိုက်ခိုက်ရာ မေ ၁၀ ရက်ထိတိုက်ပွဲပြင်းထန်ခဲ့ပြီးနောက် စစ်ကောင်စီတပ်ဖွဲ့ဝင်တွေအနေနဲ့ ထိခိုက်ကျဆုံးများတဲ့အတွက် တပ်ရင်းဌာနချုပ်ကနေဆုတ်ခွာပေးခဲ့ပြီး မေ ၁၁ ရက်မှာ တန်ပြန်တိုက်ခိုက်ကာ တပ်ရင်းကိုပြန်လည်ထိန်းချုပ်နိုင်ခဲ့တယ်ဆိုပြီး ဖော်ပြထားတာပါ။

တိုက်ပွဲအတွင်း ၎င်းတို့ဘက်ကစစ်ကောင်စီတပ်ဖွဲ့ဝင်တချို့ ထိခိုက်ကျဆုံးပြီး KNLA ပူးပေါင်းတပ်တွေဘက်က သေဆုံး ၆ ဦးအလောင်း၊ လက်နက်မျိုးစုံ ၁၀ လက်၊ ဆက်စပ်ပစ္စည်းတွေ သိမ်းဆည်းရမိတယ်လို့ ထုတ်ပြန်ချက်မှာ ရေးသားထားပါတယ်။

ဒီထုတ်ပြန်ချက်နဲ့ပတ်သက်ပြီး မြေပြင်တိုက်ခိုက်ရေးပါတော်လှန်ရေးတပ်ဖွဲ့ဝင်တဦးကတော့ စစ်ကောင်စီတပ်ဖွဲ့ဝင် တချို့တဝက်လောက် တပ်ရင်းထဲပြန်ရောက်သွားတာဖြစ်နိုင်တယ်လို့ ပြောပါတယ်။

“ကာတော့ကာထားကြတယ်။ အဲ့ဒီနေ့ (မေ ၁၁) က ပိတ်ထားတဲ့နေရာတခုက ပေါက်သွားတယ်လို့ ကြားတယ်။ ကိုယ့်ဘက်က ပေါက်သွားလို့ ဝင်လို့ရသွားတာနေမယ်။ လေယာဥ်နဲ့လည်း တအားဖိပစ်တာတွေ ရှိတယ်။ ပေါက်လဲ ကြာကြာနေလို့ရမှာမဟုတ်ဘူး။ ဒီဘက်က ရိက္ခာလမ်းကြောင်း ဖြတ်ထားတာဆိုတော့”လို့ မြေပြင်တိုက်ခိုက်ရေးပါတပ်ဖွဲ့ဝင်တဦးကပြောပါတယ်။

နောက်ထပ် PDF ထောက်လှမ်းရေးတဦးကလည်း “(စစ်ကောင်စီဘက်က) ပြန်တိုးလာတယ်။ ပစ္စည်းတွေသိမ်းဆည်းပြီး တပ်ရင်းထဲကနေဆုတ်ပေးလိုက်တယ်။ သူတို့ ပြန်ထိုင်မယ်ထင်တယ်။ ကားတာယာ အဟောင်းတွေ ပို့နေတာရှိတယ်။” လို့ ပြောပါတယ်။

လက်ရှိမှာ ခမရ ၅၉၈ နဲ့ နဲ့အနီးတဝိုက်ကို တော်လှန်ရေးတပ်တွေဘက်က ပိတ်ဆို့ထားဆဲဖြစ်ပြီး စစ်ကောင်စီတပ်ကလည်း စစ်ကူအင်အား ၅၀၀ ဝန်းကျင်နဲ့ မြေပြင်စစ်ကြောင်းထိုးတိုက်ခိုက်နေကာ လေကြောင်းကနေလည်း ဗုံးကြဲတိုက်ခိုက်မှုတွေ အများအပြားပြုလုပ်နေတယ်လို့ သိရပါတယ်။

ဒီမနက်ပိုင်းမှာလည်း ကွမ်းဆိပ်၊ ညောင်ခြေထောက် ကျေးရွာအနီးဝန်းကျင်မှာ တိုက်ပွဲတွေဆက်လက်ဖြစ်ပွားနေကြောင်းသိရှိရပြီး သိမ်ဇရပ်အခြေစိုက် ခမရ ၂၀၇၊ အမတ ၃၁၀ တပ်တွေနဲ့ သူရဲသမိန်နဲ့ လက်ပန်ကျေးရွာမှာတပ်စွဲနေတဲ့ စစ်ကောင်စီတပ်တွေကနေ လက်နက်ကြီးနဲ့ ဆက်တိုက်ပစ်ခတ်နေပြီး တိုက်ပွဲနဲ့ပတ်သက်တဲ့ နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေပါတယ်။

အမျိုးသားညီညွတ်ရေးအစိုးရ – NUG ရဲ့ မေ ၁၁ ရက် ထုတ်ပြန်ချက်အရ အဆိုပါတိုက်ပွဲအတွင်းမှာ စစ်ကောင်စီတပ်သား ၃၀ သေဆုံးပြီး စစ်ကောင်စီတပ်သား ၆ ဦး၊ မိသားစုဝင် ၇ ဦးအရှင်ဖမ်းမိပြီး ပွိုင့် 5 စက်သေနတ်၊ ၇၅ နောက်ပွင့်၊ ၈၁ မမ၊ ၆၀ မမ လက်နက်ကြီးများအပါအဝင် လက်နက်မျိုးစုံနဲ့ ခဲယမ်းတွေ သိမ်းနိုင်ခဲ့တယ်လို့ NUG ရဲ့ထုတ်ပြန်ချက်မှာ ဖော်ပြထားပါတယ်။

စာတည်း – လင်း

မင်းလှ၊ မေ ၁၊ ၂၀၂၅။

ပဲခူးတိုင်း၊ မင်းလှမြို့နယ်၊ ငမိုးရိပ်နဲ့ ဇရစ်မြောင်ကျေးရွာတို့ကို စစ်ကောင်စီတပ်က ၂ ရက် ဆက်တိုက်မီးရှို့ခဲ့တာကြောင့် လူနေအိမ် ၁၂၀ ကျော်မီးလောင်ပျက်စီးခဲ့တယ်လို့ ဒေသခံ တော်လှန်ရေးတပ်ဖွဲ့တွေက ပြောပါ တယ်။

ဧပြီ ၃၀ ရက်မှာ အိမ်ခြေ ၁၀၀ ကျော်ရှိတဲ့ ဇရစ်မြောင်ကျေးရွာနဲ့ မေ ၁ ရက်ဒီကနေ့မနက် ၇ နာရီကျော်မှာ အိမ်ခြေ ၅၀ ကျော်ရှိတဲ့ ငမိုးရိပ်ကျေးရွာတို့ကို မီးရှို့ဖျက်ဆီးခဲ့တာလို့ဆိုပါတယ်။

“နှစ်ရွာပေါင်း ၁၂၀ ကျော်ပျက်စီးတယ်။ ဇရစ်မြောင်ကတော့ရွာလုံးကျွတ်နီးပါးပေါ့ ပျက်စီးများတယ်။ စစ်ကောင်စီအကျအဆုံးများလို့ ပြန်ပြီးစစ်ကြောင်းထိုးလာပြီးတော့ တိုက်ပွဲဖြစ်တဲ့ နေရာကရွာတွေ မီးရှို့ဖျက်ဆီးနေတာ”လို့ ဒေသခံတော်လှန်ရေးတပ်ဖွဲ့ဝင်တဦးက ပြောပါတယ်။

ဇရစ်မြောင်က နေအိမ် ၉၀ ခန့်နဲ့ ငမိုးရိပ်ရွာက နေအိမ် ၃၀ ခန့်မီးလောင်ပျက်စီးခဲ့တယ်လို့ ဆိုပါတယ်။

အဆိုပါကျေးရွာ ၂ ရွာကိုမီးရှို့ဖျက်ဆီးတဲ့ စစ်ကောင်စီတပ်စစ်ကြောင်းဟာ အင်အား ၁၅၀ ခန့်ပါရှိပြီး ငမိုးရိပ်ကျေးရွာကိုမီးရှို့ပြီးနောက် ချီပါတောင်ဘက်ကိုတက်သွားခဲ့ကြတယ်လို့ အထက်ပါတပ်ဖွဲ့ဝင် ကဆက်ပြောပါတယ်။

“တိုက်ပွဲဖြစ်တာက တပ်မ ၉၉ နဲ့ပေါင်းစပ် အင်အားပေါ့။ အဲဒီအဖွဲ့တွေနဲ့တိုက်ပွဲဖြစ်တာပေါ့။ အဓိက ငမိုးရိပ်ရွာနဲ့ ဇရစ်မြောင်ရွာကြားမှာတိုက်ပွဲဖြစ်ကြတယ်။ တိုက်ပွဲဖြစ်တဲ့အချိန်မှာ သူတို့(စကစ)ဘက်က အထိနာပြီးအကျအဆုံးများတော့ ကစဥ့်ကလျားနဲ့ တပ်တွေပြန်ဆုတ်ပြီးတော့ အခုဟာက အရံစစ်ကြောင်း ပြန်ထိုးလာတာ”လို့ သူကဆိုပါ တယ်။

ပြီးခဲ့တဲ့ဧပြီ ၂၇ ရက်က မင်းလှမြို့ပေါ်ကနေ စစ်ကြောင်းထိုးလာတဲ့ အင်အား ၇၀ ခန့် ပါခြေလျင်စစ်ကြောင်းကို ငမိုးရိပ်နဲ့ဇရစ်မြောင်ကျေးရွာအကြားမှာ တော်လှန်ရေးပူးပေါင်းအဖွဲ့တွေက ကြားဖြတ်တိုက်ခိုက်ခဲ့ရာ စစ်သား ၁၀ ဦးသေဆုံးပြီး ၁ ဦးအရှင်ဖမ်းမိကာ လက်နက်ခဲယမ်းတွေလည်း သိမ်းဆည်းရရှိခဲ့တယ်လို့ သိရပါတယ်။

စာတည်း – လင်း