ကျော်ကြီး 
မတ္တရာ၊ ဧပြီ ၂၇၊ ၂၀၂၅။
မန္တလေးတိုင်း၊ မတ္တရာမြို့နယ်၊ ရုံးပင်ကျေးရွာမှာ စစ်တပ်က လေကြောင်းကနေဗုံးကြဲလို့ အမျိုးသမီး ၁ ဦးသေဆုံးပြီး နေအိမ် ၂ လုံးပျက်စီးခဲ့တယ်လို့ မတ္တရာမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။
ဧပြီ ၂၆ ရက်ည ၉ နာရီကျော်ခန့်မှာ ဂျက်ဖိုက်တာ ၁ စီးနဲ့ ရုံးပင်ကျေးရွာအနီးကို လေကြောင်းကနေ ဗုံးကြဲတိုက်ခိုက်မှု ၂ ကြိမ်ပြုလုပ်ခဲ့တယ်လို့ ဆိုပါတယ်။
“ဂျက်ဖိုက်တာနဲ့ပဲ။ ဗုံးသီးက ၃ လုံး။ တပြိုင်တည်းကို ဝေ့ဝေ့ပြီးပစ်သွားတာ။ အဲ့နားမှာတော့ တိုက်ပွဲမရှိဘူး။ ကျောက်တံတားတို့ မြကန်သာဘက်တို့တော့ တိုက်ပွဲနေ့တိုင်းရှိတယ်။ တိုက်ပွဲဖြစ်တဲ့နေရာနဲ့ အခုရွာနဲ့က ၅ မိုင်လောက်ဝေးတယ်။ တမင်သက်သက်လာကြဲတာ။”လို့ မတ္တရာမြို့နယ်ပကဖ တာဝန်ရှိသူတဦးကပြောပါတယ်။
လေကြောင်းကနေ ဗုံးကြဲခံရလို့ အသက် ၆၀ ဝန်းကျင်အရွယ် အမျိုးသမီး ၁ ဦးသေဆုံးပြီး နေအိမ် ၂ လုံးလည်း ပျက်စီးသွားတယ်လို့ ဆိုပါတယ်။
ရုံးပင်ကျေးရွာက လေကြောင်းကနေ ဗုံးကြဲခံရတာ ယခုအကြိမ်ပါဆို နှစ်ကြိမ်မြောက်ဖြစ်ပြီး ၂၀၂၄ ဇူလိုင် ၇ ရက်က ပထမအကြိမ်ဗုံးကြဲခံရပြီး အမျိုးသမီး ၁ ဦးသေဆုံးကာ ၄ ဦးဒဏ်ရာရခဲ့ပါသေးတယ်။
အိမ်ခြေ ၂၀၀ ကျော် လူဦးရေ ၁,၀၀၀ ဝန်းကျင်ရှိတဲ့ ရုံးပင်ကျေးရွာက ဒေသခံတချို့လည်း လေကြောင်းကနေဗုံးကြဲခံရလို့ ရွာကနေတိမ်းရှောင်ကြတယ်လို့ ဆိုပါတယ်။
ဧပြီ ၂၅ ရက်နေ့ကလည်း မတ္တရာမြို့နယ်၊ ရှမ်းကျေးရွာမှာ မတ္တရာမြို့ပေါ်က စစ်ကောင်စီတပ်ကနေပစ်ခတ်တဲ့ လက်နက်ကြီးဟာ ကျေးရွာဘုန်းကြီးကျောင်းအနီး ကျရောက်ပေါက်ကွဲပြီး သံဃာ ၃ ပါးထိခိုက်ဒဏ်ရာရခဲ့သေးတယ်လို့ သိရပါတယ်။
စာတည်း – လင်း