ကျော်ကြီး 
မကွေး၊ မတ် ၂၆၊ ၂၀၂၆။
မကွေးမြို့၊ နတ်မောက်လမ်းပေါ်ရှိ စစ်ကော်မရှင်တပ်ရဲ့မကွေးလေတပ်စခန်းဌာနချုပ် ယမန်နေ့ညပိုင်းက ရှော့တိုက်ဒုံးနဲ့ပစ်ခံခဲ့ရတယ်လို့ မြို့ခံတွေထံက သိရပါတယ်။
မတ်လ ၂၅ ရက် ည ၁၁ နာရီခန့်မှာ မကွေးလေတပ်နဲ့ စစ်မှုထမ်းဟောင်းအိမ်ရာတွေအနီးမှာ ရှော့တိုက်ဒုံး ၄ လုံးခန့် ကျရောက်ပေါက်ကွဲခဲ့တာလို့ ဆိုပါတယ်။
“ကလခ(မကွေးလေတပ်)ဝန်းထဲကို ၃ လုံးကျပါတယ်။ ဘာတွေဖြစ်လဲတော့ အသေးစိတ်တော့ မသိသေးဘူး” လို့ မကွေးလေတပ်နဲ့နီးစပ်တဲ့သတင်းရင်းမြစ်တဦးက မြေလတ်အသံကို ပြောပါတယ်။
ယမန်နေ့ည ၁၁ နာရီခန့်မှာ မကွေးမြို့၊ လေတပ်နဲ့ စစ်မှုထမ်းဟောင်းအိမ်ရာတွေအနီးဝန်းကျင်ကနေ ပေါက်ကွဲသံအများအပြားကြားရကြောင်း နောက်ထပ်မြို့ခံတဦးက ပြောပါတယ်။
” ပစ်သံကတော့အနည်းဆုံး ၈ ချက်ကြားတယ်။ ကျွန်းဘက်(ဧရာဝတီမြစ်အတွင်း သောင်ခုံပေါ်)ကနေလာပစ်တာ။ အောင်ဘုံနဲ့လေတပ်က ၁ မိုင်လောက်ဝေးတယ်။ ထိခိုက်တော့မသိရဘူး။ သတင်းဖုံးထားတာလည်းဖြစ်မယ်”လို့ ဆိုပါတယ်။
ပေါက်ကွဲသံတွေထွက်ပေါ်ပြီးနောက် မြို့တွင်းရှိ စစ်ကော်မရှင်အဖွဲ့ဝင်အများအပြား မကွေးလေတပ်ဘက်ကို ကားတွေနဲ့ထွက်ခွာသွားတယ်လို့ မကွေးမြို့ခံသတင်းရင်းမြစ်တဦးကလည်း အခုလိုပြောပါတယ်။
” မြို့ထဲကထိ အသံကြားရတယ်။ တုန်တောင်တုန်တာကို။ ပျမ်းမျှအသံတော့ ၄ ချက်ကြားရတယ်။ ထိခိုက်တော့မသိဘူး။ ဖြစ်ပြီးတာနဲ့ အနိမ့်ချောင်းဘက်ကို စစ်တပ်ကားတွေဆင်းသွားတာတွေ့တယ်” လို့ ပြောပါတယ်။
အဆိုပါပစ်ခတ်မှုနဲ့ပတ်သက်ပြီး ဒီကနေ့အထိ တော်လှန်ရေးတပ်ဖွဲ့တွေဘက်က ထုတ်ပြန်ချက်တွေတော့ မတွေ့ရသေးပါဘူး။
စစ်ကော်မရှင်ရဲ့မကွေးလေတပ်က တိုက်လေယာဥ်တွေဟာ အထက်မြန်မာပြည်ဒေသတွေကို လေကြောင်း တိုက်ခိုက်မှုတွေမှာ အဓိကထားအသုံးပြုနေတာပါ။
စစ်ကော်မရှင်ရဲ့လေတပ်တွေဟာ မကြာခဏရှော့ဒုံးတွေနဲ့တိုက်ခိုက်ခံနေရပြီး အခုလအစောပိုင်းမှာလည်း တောင်ငူလေတပ်စခန်း ရှော့တိုက်ဒုံးတွေနဲ့တိုက်ခိုက်ခံခဲ့ရပါသေးတယ်။