ဈာန်မြင့် 
စစ်ကိုင်း၊ မတ် ၂၆၊ ၂၀၂၃။
စစ်ကိုင်းတိုင်း၊ မုံရွာခရိုင်အတွင်းက ပြည်သူ့ကာကွယ်ရေးတပ်ရင်းတခုမှာ စစ်ကိုင်းတိုင်းအတွင်း ပြည်သူလူထု၊ ပြည်သူ့အုပ်ချုပ်ရေး၊ ပြည်သူ့ကာကွယ်ရေးအဖွဲ့တွေကို နိုင်ငံရေးအသိပညာတွေ မျှဝေတဲ့လှုပ်ရှားမှုတခု မုံရွာလူထုသပိတ်တိုက်ပွဲဦးဆောင်ကော်မတီက မတ်လ ၂၆ ရက်ဒီကနေ့မနက်ပိုင်းမှာ ပြုလုပ်ခဲ့တယ်လို့ သိရပါတယ်။
မုံရွာခရိုင်PDFလက်အောက်မှာရှိတဲ့ PDF တပ်ရင်းတခုကို မြန်မာ့နိုင်ငံရေးသမိုင်းကြောင်း၊ ဒီမိုကရေစီ၊ ဖက်ဒရယ်၊ နိုင်ငံရေးလမ်းပြမြေပုံနဲ့ COC ၂ ရပ်ကို ဟောပြောပို့ချခဲ့တယ်လို့ ဆိုပါတယ်။
“ဒီတော်လှန်ရေးမှာ ထောက်တိုင်အသီးသီးရှိကြတယ်။ ဒီထောက်တိုင်တွေအတူယှဉ်တွဲ သွားကြဖို့လိုအပ်တယ်။ အထူးသဖြင့်နိုင်ငံရေးနဲ့စစ်ရေးပေါ့။ ပထမတခုကရဲဘော်တွေအနေနဲ့ အင်တာနက်လိုင်းဖုန်းလိုင်း မရတဲ့အခြေနေမှာ လက်ရှိဖြစ်နေတဲ့တော်လှန်ရေးအခင်းအကျဉ်းတွေဘယ်လိုဖြစ်နေပြီလဲ၊ ဘာတွေလုပ်ဆောင်ကြမလဲဆိုတာ ပြန်မျှဝေလိုတဲ့ရည်ရွယ်ချက်နဲ့လုပ်ဆောင်တာပါ” လို့ မုံရွာလူထုသပိတ်တိုက်ပွဲ ဦးဆောင်ကော်မတီအဖွဲ့ဝင် မချောစုစံက မြေလတ်အသံကိုပြောပါတယ်။
ဒါ့အပြင် ရဲဘော်တွေသွားချင်တဲ့ စနစ်အကြောင်းနဲ့ အဲ့ဒီစနစ်ကိုဖော်ဆောင်တဲ့အခါမှာ ပြည်သူကိုရှေးရှုဖို့၊ စစ်ရေးဆိုင်ရာကျင့်ဝတ်တွေရဲ့ အရေးကြီးပုံတွေကို မျှဝေလိုတဲ့ရည်ရွယ်ချက်နဲ့ ဟောပြောတာဖြစ်တယ်လို့ သူကဆက်ပြောပါတယ်။
ဒီလိုဟောပြောမှုတွေကို ၂၀၂၂ ခုနှစ်အစပိုင်းက စတင်လုပ်ဆောင်ခဲ့တာဖြစ်ပြီး မုံရွာခရိုင်နဲ့အနီးတဝိုက်က ဒေသကာကွယ်ရေးတပ်ရင်းတွေ စခန်းတွေအများအပြားကို အလှည့်ကျသွားရောက်ဟောပြောမှုတွေ လုပ်ဆောင်နေတာလို့သိရပါတယ်။