ချယ်ရီ

တန့်ဆည်၊ မတ် ၂၀၊ ၂၀၂၃။

စစ်ကိုင်းတိုင်း၊ တန့်ဆည်မြို့နယ်ထဲက ကျေးရွာတရွာမှာ မကြာခင်ကျရောက်တော့မယ့် သင်္ကြန်ကာလမှာ အပျော်မလွန်ကြဖို့ တောင်းဆိုဆန္ဒပြခဲ့ကြပါတယ်။

ဒါ့အပြင် စစ်ကောင်စီက ကျင်းပမယ့်သင်္ကြန်မှာပါဝင်မယ့် အနုပညာရှင်တွေကို ဆန့်ကျင်ကြဖို့ ဆန္ဒပြခဲ့ကြတယ်လို့ သိရပါတယ်။

အဲဒီဆန္ဒပြပွဲကို ယမန်နေ့ မတ်လ ၁၉ ရက်နေ့ ညနေပိုင်းက တန့်ဆည်ပင်မသပိတ်နဲ့ တန့်ဆည်အမျိုးသမီးသပိတ်တို့ ပူးပေါင်းပြုလုပ်ခဲ့ကြတာဖြစ်ပြီး စစ်ကောင်စီကြောင့် သေဆုံးခဲ့တဲ့ရဲဘော်တွေ၊ အိုးမဲ့အိမ်မဲ့ဖြစ်သွားတဲ့ စစ်ရှောင်တွေနဲ့ နိုင်ငံရေးအကျဉ်းသားတွေကို စာနာပြီး သင်္ကြန်မှာမပါဝင်ကြဖို့ ဆန္ဒထုတ်ဖော်ခဲ့ကြတယ်လို့ ဆန္ဒထုတ်ဖော်သူများထံက သိရပါတယ်။

ဆန္ဒထုတ်ဖော်ပွဲမှာ “စကစရဲ့ အတုအယောင်သင်္ကြန်မှာ ဖျော်ဖြေကြမယ့်အနုပညာရှင်များအား ကန့်ကွက်ရှုတ်ချပါသည်”၊ “အပျော်လွန်ကြူးတဲ့သင်္ကြန် မဖြစ်ပါစေနဲ့ တော်လှန်သင်္ကြန်ပဲဖြစ်ပါစေ၊ တိုင်းပြည်က ခွေးရူးကိုက်ခံရတာ များနေပြီ” စတဲ့ ဘန်နာတွေ ကိုင်စွဲပြီး ‌ဆန္ဒထုတ်ဖော်ကာ ကြွေးကြော်ခဲ့ကြပါတယ်။

စာတည်း – 007

ပခုက္ကူ၊ မတ် ၁၈၊ ၂၀၂၃။

မကွေးတိုင်း၊ ပခုက္ကူမြို့နယ်၊ တင်းဂတ်ကျေးရွာအနီးက ထန်းရည်ဆိုင်မှာ ထန်းရည်သောက်နေတဲ့ ပျူစောထီး ၃ ဦးကို ပစ်ခတ်တိုက်ခိုက်ခဲ့ပြီး လက်နက်တွေ သိမ်းဆည်းရရှိခဲ့တယ်လို့ Special Guerrilla Force-Pakokku တပ်ဖွဲ့က ထုတ်ပြန်ပါတယ်။

မတ်လ ၁၅ ရက်နေ့ နေ့လည် ၂ နာရီလောက်က ပခုက္ကူ ကွန်ပျူတာတက္ကသိုလ်နဲ့ တင်းဂတ်ရွာအကြား ပျူစောထီးတွေ အထိုင်ချတဲ့ဂိတ်အနီးမှာရှိတဲ့ ထန်းရည်ဆိုင်မှာ ပျူစောထီး ၃ ဦး ထန်းရည်သောက်နေတဲ့ သတင်းရရှိလို့ ဝင်ရောက်ပစ်ခတ်ခဲ့တာဖြစ်ပြီး ၃ ဦးလုံး ပွဲချင်းပြီးသေဆုံးတယ်လို့ တပ်ဖွဲ့ဝင်တဦးက မြေလတ်အသံကို ပြောပါတယ်။

“ပျူဂိတ်နဲ့ မလှမ်းမကမ်း ထန်းရည်ဆိုင်မှာ ထိုင်နေတယ်သတင်းရလို့ ဝင်ပစ်ခဲ့တာဗျ။ ပစ္စတိုကိုင်တဲ့တယောက်က တင်းဂတ်ရွာ စကစခန့်အုပ်ကြီး ပျူ မြင့်ကြည်ရဲ့တူလို့ သိရတယ်” လို့ ပြောပါတယ်။

ပစ်ခတ်ခံရသူတွေဟာ တင်းဂတ်ရွာက ပျူစောထီးအဖွဲ့ဝင်တွေဖြစ်တဲ့ လင်းထိုက်၊ ဝင်းလှိုင်ဌေး၊ ကျော်စိုးဦး တို့ ၃ ဦးဖြစ်ပြီး သူတို့ကိုဆီကနေ စစ်ကောင်စီကထုတ်ပေးထားတဲ့ ကာဘိုင် ၁ လက်၊ MA 1 ၁ လက်၊ ပစ္စတို ၁ လက်နဲ့ ၅.၅၆ မမ ကျည်အတောင့် ၆၀တို့ကို သိမ်းဆည်းနိုင်ခဲ့တယ်လို့ ဆိုပါတယ်။

တင်းဂတ်ရွာဟာ ယခင်က စစ်ကောင်စီလက်အောက် ပျူစောထီးတွေမရှိပေမယ့် ပြီးခဲ့တဲ့နှစ် နိုဝင်ဘာလလောက်ကစပြီး ပခုက္ကူ တပ်မ ၁၀၁ က စစ်ကောင်စီတပ်တွေ ဝင်ရောက်ကာ တအိမ်ကို ၂ ယောက်နှုန်းနဲ့ ပျူစောထီးသင်တန်း မတက်မနေရ တက်ခိုင်းခဲ့ပြီးတဲ့နောက် စစ်ကောင်စီလက်အောက် ပျူစောထီးတွေ ပေါ်ပေါက်လာတာလို့ သိရပါတယ်။

ပြီးခဲ့တဲ့ ဖေဖော်ဝါရီလ ၂၄ ရက်နေ့ကလည်း ရွှေချောင်းတံတားထိပ်မှာရှိတဲ့ ပြည်သာယာခန်းမထဲက စစ်ကောင်စီတပ်ဖွဲ့ကို ဝင်ရောက်ပစ်ခတ်ခဲ့လို့ ၆ ဦး သေဆုံးကာ ၅ ဦး ဒဏ်ရာရရှိခဲ့တယ်လို့ သိရပါတယ်။

တန့်ဆည်၊ မတ် ၁၈၊ ၂၀၂၃။

စစ်ကိုင်းတိုင်း၊ တန့်ဆည်မြို့နယ်ထဲက ကျေးရွာတရွာမှာ မတ်လ ၁၈ ရက်ဒီမနက်ပိုင်းက တန့်ဆည်ပင်မသပိတ်စစ်ကြောင်းက ဦးဆောင်ပြီး ရေပေါ်ဆီအနုပညာရှင်တွေ အလိုမရှိကြောင်း ကြွေးကြော်ကာ ဆန္ဒပြခဲ့ကြတယ်လို့ သိရပါတယ်။

ပြည်သူ့ဘက်က မရပ်တည်တဲ့ အနုပညာရှင်တွေ၊ ရေပေါ်စီ အနုပညာရှင်တွေ၊ ကြားနေ အနုပညာရှင်တွေကို လုံးဝအလိုမရှိကြောင်း ဘန်နာတွေကိုင်စွဲပြီး ဆန္ဒပြခဲ့ကြတာလည်း ဖြစ်ပါတယ်။

ဒါ့အပြင် “စစ်ကောင်စီတပ်နဲ့ပူးပေါင်းတဲ့ အနုပညာရှင်မှန်သမျှ ဆန့်ကျင်ကြ” စာတန်းပါ ဘန်နာတွေ ကိုင်စွဲပြီး စစ်အာဏာရှင် ဆန့်ကျင်ရေး ကြွေးကြော်သံတွေနဲ့အတူ သပိတ်စစ်ကြောင်းထွက်ခဲ့တယ်လို့ သိရပါတယ်။

စခန်းစီးနင်းခံရလို့ ရဲဘော်တဦးအပါ ၄ ဦးကျည်ထိမှန်ပြီး တဦးသေဆုံး

မြောင်၊ မတ် ၁၆၊ ၂၀၂၃။

စစ်ကိုင်းတိုင်း၊ မြောင်မြို့နယ်ထဲမှာ စစ်အုပ်စုက စစ်ကြောင်း ၂ ကြောင်းထိုးကာ ဝင်ရောက်လာပြီးနောက် ကာကွယ်ရေးတပ်ဖွဲ့ရဲ့ ပင်မစခန်းတခုကို စီးနင်းခဲ့ရာ ရဲဘော်တဦးအပါ ၄ ဦးကျည်ထိမှန်ကာ ရဲဘော်တဦး သေဆုံးခဲ့တယ်လို့ သိရပါတယ်။

မတ်လ ၁၅ ရက်မနေ့ကမနက် ၆ နာရီလောက်မှာ ကျောက်ရစ်ရွာက ထွက်လာတဲ့စစ်ကြောင်းဟာ ကာကွယ်ရေးရဲဘော်တွေ ခေတ္တရှောင်တိမ်းနေတဲ့နေရာကို ပစ်ခတ်ဝင်ရောက်ခဲ့ပြီး ဖမ်းဆီးခံလိုက်ရတဲ့ ရဲဘော်တွေလည်း ရှိတယ်လို့ ဆိုပါတယ်။

“စိုးရိမ်ရတဲ့ ရဲဘော်တဦး ပါတယ်။ ရဲဘော်တယောက်က ကာပစ်ရင်း ရင်ဘတ်ရှပ်မှန်တယ်။ တယောက်က ဦးခေါင်းရှပ်မှန်တယ်။ စုထားတာတွေအကုန်ပါသွားတော့ အခက်အခဲဖြစ်နေတယ်။ ရိက္ခာတွေရောပဲ။ ရိက္ခာက လုံးဝကိုမရှိတော့တာမို့ အရေးပေါ်လိုအပ်နေတယ်” လို့ လွတ်မြောက်လာတဲ့ ရဲဘော်တဦးက ပြောပါတယ်။

မန္တလေးခရိုင် အမှတ် ၅ တပ်ရင်း MNPDF Myit Nge နဲ့ ဇာမဏီပြောက်ကျားတပ်ဖွဲ့ (ငါန်းဇွန်)တို့ရဲ့ ပူးပေါင်းပင်မစခန်း စီးနင်းခံခဲ့ရပြီး အသက် ၄၅ နှစ်အရွယ် ရဲဘော်တဦး ကျဆုံးကာ၊ ၄ ဦး ဒဏ်ရာရပြီး ၃ ဦး ဖမ်းဆီးခံလိုက်ရတယ်လို့ သိရပါတယ်။

စခန်းစီးနင်းခံရလို့ ကာလတန်ဖိုး သိန်းတထောင်ကျော် ဆုံးရှုံးခဲ့ပြီး၊ ယူနီဖောင်း အထည် ၃၀၀၊ ဦးထုပ် ၁၅၀၊ အီကွေ့မန့် ၂၅စုံ၊ လက်လုပ်စိန်ပြောင်း ၂ လက်၊ အူစီသေနတ် ၃ လက်၊ ကိုးလုံးကျည် ၁၀ လက်၊ ကာဘိုင် ၁၀ လက်၊ လက်ပစ်ဗုံး ၂၀၊ ယမ်း ၅ ပိဿာ၊ ထိကွဲလောင်စာဗုံး အလုံး ၃၅၀၊ G3 ကျည် ၂၀၀၊ 7.62 ကျည် ၂၅၀၊ 5.56 ကျည် ၁၅၀၊ 9 MM ကျည် ၂၀၀၊ ဖုန်း အလုံး ၅၀၊ ဆိုင်ကယ် ၁၀ စီး၊ ဒရုန်း ၃ စီး၊ အီနာဂါ ၅ လုံး၊ ၉ လုံးကျည် ၂၅၀၊ မိုင်း အလုံး ၂၀၊ ရှေ့ထွက်ပြောင်း ၁၅ လုံး၊ အတို ၁ လက်၊ ကျည်ကာ ၁၀ ထည်၊ မီးစက်၊ ကျောက်စက်၊ တွင်ခုံ၊ အဝတ်အစား၊ ရိက္ခာ စတာတွေ ဆုံးရှုံးခဲ့တယ်လို့ ဆိုပါတယ်။

စခန်းစီးနင်းမခံရခင် တရက်အလို မတ်လ ၁၄ ရက်ကလည်း အဆိုပါစစ်ကြောင်း ၂ ကြောင်းထဲက ဘီလူးစစ်ကြောင်းလို့ခေါ်တဲ့ စစ်ကြောင်းတခုကို ဒေသခံကာကွယ်ရေးတပ်တွေက မိုင်းဆွဲတိုက်ခိုက်ခဲ့တာကြောင့် စစ်သား ၂၀ ကျော် သေဆုံးခဲ့ပါသေးတယ်။

စာတည်း – လင်း

ရေစကြို၊ မတ် ၁၅၊ ၂၀၂၃။

မကွေးတိုင်း၊ ရေစကြိုမြို့နယ်၊ နေရင်းရွာအနီးက ဧရာဝတီမြစ်ကြောင်းမှာ စစ်ကောင်စီတပ်တွေက သင်္ဘော ၂ စီးနဲ့ ကျောက်ချတပ်စွဲထားလို့ တံငါလုပ်ငန်း လုပ်ကိုင်တဲ့ပြည်သူတွေ ဒုက္ခရောက်နေကြတယ်လို့ သိရပါတယ်။

ပြီးခဲ့တဲ့နှစ် အောက်တိုဘာလလောက်ကတည်းက အင်အား ၇၀ ဝန်းကျင်နဲ့ နေရာယူထားတာဖြစ်ပြီး၊ တံငါသည်တွေကလည်း သူတို့နဲ့နီးတဲ့နေရာကိုသွားပြီး ငါးရှာဖွေရမှာကြောက်တဲ့အတွက် တံငါလုပ်ငန်းကိုစွန့်ကာ တခြားအလုပ်တွေကို လုပ်ကိုင်နေကြရတယ်လို့ ဆိုပါတယ်။

“ကိုယ် ပိုက်ချချင်တဲ့နေရာနဲ့ သူတို့နေရာနဲ့က ကိုက်ညီနေတာဆိုတော့ သူတို့နဲ့ဝေးရာကို သွားလုပ်ရတော့ ငါးကလည်း အဆင်မပြေဘူးလေ။ အခုတော့ ကုန်းပေါ်မှာ ပဲရိတ်တာမျိုး၊ နေ့စားလိုက်လုပ်တာမျိုး၊ တောင်သူနောက်လိုက် လုပ်စားနေရတယ်” လို့ ဒေသခံအမျိုးသားတဦးက ပြောပါတယ်။

စတင်တပ်စွဲချိန်ကတည်းက သင်္ဘောပေါ်က ဆင်းတာ၊ ကမ်းကပ်တာမျိုး လုံးဝမတွေ့ရဘဲ ရိက္ခာအတွက်ကတော့ မြစ်ကြောင်းအောက်ဖက်ကနေ သင်္ဘောနဲ့ဆန်တက်ပြီး လာပို့ပေးတယ်လို့ ဆိုပါတယ်။

အဆိုပါ ကျောက်ချသင်္ဘောတွေဟာ မြင်းခြံဘက်ခြမ်းကို လက်နက်ကြီးနဲ့ ပစ်ခတ်လေ့ရှိပြီး၊ မတ်လ ပထမပတ်တုန်းကလည်း မင်းရွာကို စစ်ကြောင်းဝင်ချိန်မှာ မီးကျည်နဲ့ ကူညီပစ်ခတ်ပေးတာတွေ ရှိခဲ့တယ်လို့ သိရပါတယ်။

စာတည်း – လင်း

ရွှေဘို၊ မတ် ၁၄၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်မှာ ပြီးခဲ့တဲ့ဖေဖော်ဝါရီလပိုင်းက ယက်ကန်းစင်တွေ မီးရှို့ခံလိုက်ရတဲ့အတွက် လက်မှုပညာနဲ့ မြန်မာ့ယဥ်ကျေးမှုတွေ မပျောက်ပျက်အောင် အသစ်ပြန်လည်လှူဒါန်းတာတွေ လုပ်နေတယ်လို့ S&C အဖွဲ့ကတဆင့် သိရပါတယ်။

မတ်လ ၁၄ ရက်ဒီကနေ့မှာ လက်ယက်ကန်း ၂ စင်လှူတန်းနိုင်ခဲ့ပြီး နောက်ရက်တွေမှာလည်း ဆက်လက်လှူတန်းသွားဖို့ရည်မှန်းထားကာ မတ်လ တလအတွင်း ယက်ကန်းစင် ၁၀ စင်လှူဒါန်းသွားမှာဖြစ်တယ်လို့ သိရပါတယ်။

“အလှူရှင်တွေလည်း တချို့တဝက်ရှိတယ်၊ လိုတဲ့ဟာလည်း ကျနော်တို့ ရန်ပုံငွေကနေ စိုက်ထုတ်လှူတန်းမှာပေါ့နော်၊ သယ်ယူပို့ဆောင်ရေးကြောင့် ၂ စင်ပဲရောက်သေးတာ၊ ကျနော်တို့လည်း ကိုယ်ပိုင်ယာဉ်မရှိသေးလို့ ထော်လာဂျီငှားပြီး မီးလောင်ပြင်ထိသွားပို့ရတာ၊ စင်တွေကရှိနေပြီ”လို့ S&C အဖွဲ့တာဝန်ခံ ကိုစိုးမိုးအောင်က ပြောပါတယ်။

လက်ယက်ကန်းစင် ၁ ခုကို ၆ သိန်းခွဲကုန်ကျပြီး၊ ယက်ကန်းစင်ဆောက်လုပ်တာဟာ တခြားပစ္စည်းဆောက်လုပ်ပုံတွေနဲ့မတူဘဲ အနုစိတ်ကာလက်ဝင်တဲ့အတွက် တော်ရုံလူဆောက်လုပ်ဖို့ခက်ခဲပြီး စင်လုပ်တဲ့နေရာမှာလည်း လုပ်ကိုင်ရတာ နှောင့်နှေးတာတွေရှိတယ်လို့ ဆိုပါတယ်။

ပြီးခဲ့တဲ့ ဖေဖော်ဝါရီလ ၂၀ ရက်မှာ ရွှေဘိုနယ်မှာရှိတဲ့ ကျေးရွာ ၄ရွာက လက်ယက်ကန်း ၁၈၀ ကျော်နဲ့ စက်ယက်ကန်းတွေ စစ်ကောင်စီတပ်တွေရဲ့ မီးရှို့ဖျက်ဆီးတာကို ခံခဲ့ရတာလည်း ဖြစ်ပါတယ်။

စာတည်း – လင်း

ကနီ၊ မတ် ၁၃၊ ၂၀၂၃။

စစ်ကိုင်းတိုင်း၊ ကနီမြို့နယ်မှာ စစ်ကောင်စီက ကျင်းပပြုလုပ်တဲ့ ဆယ်တန်းစာမေးပွဲကို ဝင်ရောက်ဖြေဆိုတဲ့ ကျောင်းသားဦးရေ ၄၀ သာရှိတယ်လို့ သိရပါတယ်။

ကနီမြို့ပေါ်က ကျောင်းသား၊ ကျောင်းသူတချို့နဲ့ ရေလည်ကျွန်း ပျူစောထီးစခန်းက ကျောင်းသားတွေ စုစုပေါင်း ၆၀ ဦး ဖြေမယ်လို့ စာရင်းတင်ထားပေမယ့် ၄၀ ဦးသာ လာရောက်ဖြေဆိုခဲ့ကြတာလို့ ကနီဒေသခံတဦးက ပြောပါတယ်။

“ကနီ အ.ထ.က ကျောင်းမှာ ဖြေနေတယ်။ စစ်အုပ်စုကို ထောက်ခံတဲ့သူနဲ့ ပျူစခန်းက လူတွေပဲ လာဖြေတာ၊ တခြား ဘယ်သူမှမဖြေဘူး။ ခုဖြေတဲ့ပမာဏနဲ့ ကျောင်းသားအရေအတွက် နှိုင်းဆကြည့် ၁၀ ရာခိုင်နှုန်းတောင် မရှိဘူး။ အရင်ကဖြေရင် ထောင်ချီဖြေတာ။ ကနီနယ်တနယ်လုံး အတိုင်းတာနဲ့ဆို ကျောင်းသားတွေရဲ့ CDM၊ ဆရာမတွေရဲ့ CDM ကောင်းနေတယ်လို့ ပြောလို့ရတယ်။ လုံးဝကို အောင်မြင်နေတာ” လို့ ပြောပါတယ်။

ကနီမှာ အာဏာမသိမ်းခင်ကာလ ဆယ်တန်းစာမေးပွဲဖြေဆိုရင် မြို့ပေါ် အ.ထ.ကကျောင်းအပြင်၊ ကျေးရွာဘက်တွေမှာလည်း Center တွေ ဖွင့်လှစ်ကာ ဖြေဆိုကြပြီး၊ အခုကတော့ ဖြေဆိုသူ နည်းပါးတဲ့အတွက် မြို့ပေါ်က အ.ထ.က ကျောင်းတခုထဲမှာပဲ ဖြေဆိုနေကြကာ စစ်ကောင်စီတပ်တွေကလည်း လုံခြုံရေးအပြည့် ယူပေးထားတယ်လို့ သိရပါတယ်။

ဒါ့အပြင် အာဏာမသိမ်းခင်နှစ်တွေကတော့ ကနီမြို့နယ်မှာ စာမေးပွဲဖြေဆိုသူ ကျောင်းသားဦးရေ ၂၅၀၀ ကျော်ရှိပြီး၊ အခုနောက်ပိုင်းမှာတော့ ရာဂဏန်းတောင် မပြည့်ဘူးလို့ ဆိုပါတယ်။

၂၀၂၂ ခုနှစ် မနှစ်က စစ်ကောင်စီကျင်းပတဲ့ ဆယ်တန်းစာမေးပွဲမှာလည်း ဖြေဆိုသူနည်းပါးတဲ့အပြင် ကနီတနယ်လုံးမှာမှ ၁၂ ဦးပဲ အောင်မြင်ခဲ့တယ်လို့ သိရပါတယ်။

ပုံစာ – စစ်ကိုင်းတိုင်းအတွင်းက စာမေးပွဲဖြေဆိုနေသည့် ကျောင်းသားအချို့။

စာတည်း – လင်း

ပြည်၊ မတ် ၁၃၊ ၂၀၂၃။

ပဲခူးတိုင်း(အနောက်ခြမ်း)၊ ပြည်မြို့မှာ ကျဆုံးခဲ့တဲ့ ရေကြောင်းတက္ကသိုလ်ကျောင်းသား ထက်မြတ်အောင်ရဲ့ ကျဆုံးခြင်း ၂ နှစ်ပြည့် လှုပ်ရှားမှုကို ရေကြောင်းပညာတက္ကသိုလ် ကျောင်းသားများသမဂ္ဂက ကျောင်းပရဝုဏ်အနီးမှာပဲ ပြုလုပ်ခဲ့တယ်လို့ သိရပါတယ်။

ဒီကနေ့ မတ်လ ၁၃ ရက်နေ့မှာ ကျရောက်မယ့် ကျဆုံးခြင်း ၂ နှစ်ပြည့်အတွက် မတ်လ ၁၂ ရက် မနေ့ မနက် ၇ နာရီလောက်မှာ အကြိုလှုပ်ရှားမှု ပြုလုပ်ခဲ့တာဖြစ်တယ်လို့ ရေကြောင်းပညာတက္ကသိုလ် ကျောင်းသားသမဂ္ဂအဖွဲ့ဝင် တဦးက မြေလတ်အသံကို ပြောပါတယ်။

“မနှစ်ကတော့ ဘန်နာကပ်တယ်။ ဒီနှစ်ကတော့ အမှတ်တရသဘောမျိုး တခုခုလုပ်ကြမယ်ဆိုပြီး အမှုဆောင်တွေတိုင်ပင်ပြီး လုပ်ဖြစ်တာပါ။ ထက်မြတ်အောင်က ဝမ်းဗိုက်နေရာနားကို ကျည်ဆံထိမှန်တာရယ်၊ ပထမနှစ်ကျောင်းသားလည်း ဖြစ်တာရယ်ကြောင့် ကျနော်တို့ ကျောင်းယူနီဖောင်း ပထမနှစ်ဘားနဲ့ အင်္ကျီပေါ်မှာ ဆေးနီတွေပက်ပြီး လုပ်လိုက်တာပါ” လို့ ပြောပါတယ်။

ထက်မြတ်အောင်ဟာ ၂၀၂၁ ခုနှစ်၊ မတ်လ ၁၃ ရက်နေ့က ပြည်မြို့၊ ခရမ်းကုန်းရပ်ကွက်မှာ ပြုလုပ်ခဲ့တဲ့ စစ်အာဏာရှင်ဆန္ဒပြသပိတ်စစ်ကြောင်းကို စစ်ကောင်စီတပ်က ကျည်အစစ်တွေနဲ့ ပစ်ခတ်ဖြိုခွင်းစဉ်မှာ ရှေ့တန်းကနေ ဒိုင်းနဲ့အကာအကွယ်ပေးရင်း ဝမ်းဗိုက်ကျည်ထိမှန် ကျဆုံးခဲ့တာ ဖြစ်ပါတယ်။

အဲ့ဒီနေ့ ပစ်ခတ်ဖြိုခွင်းခံရတဲ့ ပြည်မြို့သပိတ်စစ်ကြောင်းမှာပဲ အသက် ၂၀ ဝန်းကျင် ဖြိုးဝေယံကျော် ဆိုသူ လူငယ်လည်း ဦးခေါင်းကျည်ထိမှန်ခဲ့ကာ စစ်ကောင်စီတပ် ကုတင် ၁၀၀ စစ်ဆေးရုံကို ပို့ဆောင်ကုသစဉ်မှာ ကျဆုံးခဲ့ပါတယ်။

“ထက်မြတ်အောင် ကျဆုံးမှုအတွက်ကို ကျနော်က ဝမ်းနည်းတာထက် ဂုဏ်ယူတာက ပိုပါတယ်။ သေသွားတဲ့လူအတွက် ခဏကလေး ဝမ်းနည်းပြတာဟာ လုံလောက်မှုမရှိဘူးလို့ ထင်ပါတယ်။ သူ့သေဆုံးမှုဟာ တရားမမျှတဘူးလို့ ယုံကြည်ရင် တော်လှန်ပါ။ ဒီနည်းလမ်းပဲ ရှိပါတယ်။ အပြင်ပန်းကနေ ဝမ်းနည်း ကြေကွဲ ပြရတာ ဘာအဓိပ္ပာယ်မှ မရှိပါဘူး” လို့ ကျောင်းသားတဦးက ပြောပါတယ်။

ပြီးခဲ့တဲ့ ၂၀၂၂ ခုနှစ် မတ်လ ၁၃ ရက်နေ့ ၁ နှစ်ပြည့်တုန်းကလည်း ကျဆုံးလူငယ် ၂ ဦးအတွက် သူတို့ အုတ်ဂူမှာ အထိမ်းအမှတ်ပန်းခွေ လာချတာနဲ့ပတ်သက်ပြီး မီးသဂြိုလ်စက်ဝန်ထမ်းတဦး စစ်ကောင်စီရဲ့ ဖမ်းဆီးခြင်းကို ခံခဲ့ရပါသေးတယ်။

စာတည်း – ရင်ငြိမ်း

မြောင်၊ မတ် ၁၁၊ ၂၀၂၃။

စစ်ကိုင်းတိုင်း၊ မြောင်မြို့နယ်၊ ကင်းကျေးရွာထဲကို စစ်ကောင်စီတပ်သားတွေက မတ်လ ၁၁ ရက် ဒီမနက် ၆ နာရီလောက်မှာ ဝင်ရောက်လာကာ အမျိုးသားတဦးကို သေနတ်နဲ့ ပစ်သတ်သွားတဲ့အပြင် ရွာထဲက ပစ္စည်းတွေကိုလည်း ယူသွားခဲ့တယ်လို့ သိရပါတယ်။

ကျောက်ရစ်ရွာစခန်းက ထွက်လာတဲ့ အင်အား ၄၀ ဝန်းကျင်ပါ စစ်သားတွေဟာ ကင်းကျေးရွာထဲကို ဝင်ရောက်ချိန် အထက်ပါအမျိုးသားနဲ့ ထိပ်တိုက်တွေ့ပြီး ပစ်သတ်ခဲ့တာလို့ Myaung Union Army-003 အဖွဲ့မှ တာဝန်ရှိသူတဦးက ပြောပါတယ်။

“အင်အားကတော့ ၄၀ လောက်ပါတယ်။ ရွာထဲကို သေနတ်တွေ ပစ်ဖောက်ပြီးဝင်လာတာ။ အဲ့မှာ ပြည်သူတဦးက သူတို့နဲ့ ထိပ်တိုက်တွေ့လိုက်တော့ ပြေးတာပေါ့။ အဲ့မှာ လှမ်းပစ်လိုက်တာ ကျသွားတယ်။ သူတို့ဘက်ကလည်း ထွက်လာတုန်းက ၄၀ (အင်အား)၊ ပြန်ဝင်တော့ ၄၀ လုံး မဝင်နိုင်ဘူး” လို့ ပြောပါတယ်။

သေဆုံးသူဟာ မကွေးမြို့ကနေ ကင်းရွာမှာ အခြေချနေထိုင်နေတဲ့သူလို့သာ သိရပြီး၊ သူနဲ့ပတ်သက်တဲ့ အသေးစိတ်အချက်အလက်ကိုတော့ မသိရှိရသေးပေမယ့် အလောင်းကိုတော့ စစ်ကောင်စီတပ်တွေက ပစ်တဲ့နေရာမှာပဲ ထားခဲ့တယ်လို့ ဆိုပါတယ်။

အဲ့ဒီနောက် ရွာထဲက ပစ္စည်းတွေကိုပါ ယူလာတဲ့ အဆိုပါစစ်သားတွေကို မနက် ၇ နာရီလောက်မှာ ကျေးရွာ Local တပ်ပေါင်းစုတွေနဲ့ နယ်မြေခံတပ်ရင်းတပ်ဖွဲ့တွေက ကျောက်ရစ်စခန်းကို ပြန်တဲ့လမ်းပိုင်းမှာ မိုင်းဆွဲတိုက်ခိုက်ခဲ့ရာ စစ်သား ၃ ဦး ဒဏ်ရာရခဲ့တယ်လို့ Myaung Union Army-003 အဖွဲ့မှ တာဝန်ရှိသူတဦးက ပြောပါတယ်။

ကျောက်ရစ်စခန်းက စစ်သားတွေဟာ နယ်မြေစိုးမိုးမှုရဖို့အတွက် မကြာခဏဆိုသလို အနီးနားကျေးရွာတွေကို စစ်ကြောင်းထိုးကာ ဝင်ရောက်ဖျက်ဆီးလေ့ရှိသလို ကာကွယ်ရေးအဖွဲ့တွေက လက်နက်ကြီး၊ လက်နက်ငယ်တွေ အဲ့ဒီစခန်းကို တိုက်ခိုက်လေ့ရှိတယ်လို့ သိရပါတယ်။