ရေတာရှည်၊ ဧပြီ ၄၊ ၂၀၂၅ ။

ပဲခူးတိုင်း၊ ရေတာရှည်မြို့နယ်၊ ရန်ကုန်-မန္တလေးအမြန်လမ်းမှာ ငလျင်ဘေးကူညီဖို့သွားတဲ့ ကား ၁ စီးတိမ်းမှောက်လို့ ၅ ဦးဒဏ်ရာရခဲ့တယ်လို့ ကူညီကယ်ဆယ်ရေးလုပ်ဆောင်ပေးခဲ့သူတွေထံက သိရပါတယ်။

ဧပြီ ၃ ရက် ယမန်နေ့ မနက် ၇ နာရီကျော်က အမြန်လမ်းမိုင်တိုင်အမှတ် ၁၈၀/၇ အနီးမှာ ရန်ကုန်မှ နေပြည်တော်ဘက်ကို ဦးတည်မောင်းနှင်လာတဲ့ ငလျင်ဘေးကူညီရေယာဉ်တန်း ၅ စီးအနက် လူ ၆ ဦး လိုက်ပါလာတဲ့ PAJERO ယာဉ် ၁ စီး တိမ်းမှောက်သွားခဲ့တာလို့ ဆိုပါတယ်။

” ကားကရှေ့ဘီးပေါက်ပြီး လမ်းဘေးထိုးကျတိမ်းမှောက်သွားတာ။ မွန်ဘက်နေ မန္တလေးဘက် ငလျင်ဘေးလှူဖို့သွားတဲ့ကားလို့ သိရတယ်။ သေဆုံးတာတော့မရှိဘူး။” လို့ ကူညီကယ်ဆယ်ရေးလုပ်ဆောင်ပေးခဲ့သူတဦးက မြေလတ်အသံကို ပြောပါတယ်။

ယာဉ်တိမ်းမှောက်တာကြောင့် ယာဉ်ပေါ်ပါ အသက် ၂၀ ကနေ ၆၅ နှစ်ကြား အမျိုးသား ၁ ဦး နဲ့ အမျိုးသမီး ၄ ဦးဒဏ်ရာရရှိပြီး ကား ရှေ့၊ နောက် လေကာမှန်ကွဲအက်၊ အမိုးပိန်ချိုင့် ပျက်စီးခဲ့ကာ ဒဏ်ရာရသူတွေကို နေပြည်တော်ကုတင် ၁၀၀၀ ဆေးရုံကို ပို့ဆောင်ပေးခဲ့ရတယ်လို့ ဆိုပါတယ်။

ယာဉ်တိမ်းမှောက်ဒဏ်ရာရသူတွေဟာ မွန်ပြည်နယ်၊ သထုံမြို့ကဖြစ်ပြီး မန္တလေး ငလျင်ဘေးသင့်ပြည်သူတွေအတွက် စားသောက်စရာတွေ သွားရောက်လှူဒါန်းဖို့လာကြသူတွေလို့ သိရပါတယ်။

မတ် ၂၈ ရက်က လှုပ်ခတ်ခဲ့တဲ့ အင်အားပြင်းငလျင်ကြီးကြောင့် ရန်ကုန်-မန္တလေးအမြန်လမ်းပိုင်း နေရာအများအပြားမှာ လမ်းနဲ့တံတား ပျက်စီးမှုတွေ အများအပြားဖြစ်ပွားခဲ့ပြီး လက်ရှိမှာ လမ်းပိုင်းပျက်စီးမှုရှိတဲ့နေရာတွေမှာ ရန်ကုန်-မန္တလေး လမ်းဟောင်းကို အသုံးပြုမောင်းနှင်နေရတယ်လို့ သိရပါတယ်။

စာတည်း – ဟိန်းစံ

ရမည်းသင်း၊ မတ် ၃၀၊ ၂၀၂၅။

မန္တလေးတိုင်း၊ ရမည်းသင်းမြို့၊ ရမည်းသင်းမြို့မရဲစခန်းက ရဲတပ်ကြပ်ကြီးအဆင့်ရှိသူ ၁ ဦး သေနတ်ပစ်ခတ်ခံရပြီး သေဆုံးခဲ့တယ်လို့ တိုက်ဒေါင်းပြည်သူ့တော်လှန်ရေးအင်အားစုဆီက သိရပါတယ်။

သေဆုံးသူမှာ အသက် ၄၅ ဝန်းကျင်အရွယ် ရဲတပ်ကြပ်ကြီး သန်းထိုက် ဖြစ်ပြီး မတ် ၂၈ ရက် မနက် ၉ နာရီခွဲဝန်းကျင်မှာ ရမည်းရဲစခန်းကနေ ဆိုင်ကယ်နဲ့ထွက်လာချိန် အမြန်လမ်းမိုင်တိုင် ၂၅၆ အနီးအရောက်မှာ ပစ်ခတ်ခဲ့တာလို့ ဆိုပါတယ်။

“ အမြန်လမ်း မိုင်တိုင် ၂၅၄၊ ၂ ဖာလုံခန့်မှာ ပစ်ခတ်ရှင်းလင်းခဲ့တာ။ ဆိုင်ကယ်နဲ့ တဦးတည်းလာတာ။ ၄ ချက်ပဲပစ်ခတ်လိုက်ရတာ၊ ခေါင်း ၂ ချက်၊ ရင် ဘတ် ၂ ချက် ပစ်ခတ်ခဲ့တာ။” လို့ တိုက်ဒေါင်းပြည်သူ့တော်လှန်ရေးအင်အားစုတာဝန်ခံက မြေလတ်အသံကို ပြောပါတယ်။

ပစ်ခတ်ပြီးတဲ့နောက် ရဲတပ်ကြပ်ကြီး သန်းထိုက် ထံကနေ WY စိတ်ကြွမူးယစ်ဆေးပြား ၃၀ ပြား၊ မိုဘိုင်းလ် ဖုန်း ၃ လုံး၊ ပါဝါဘန့် ၁ ခုတို့ကို သိမ်းဆည်းရမိခဲ့တယ်လို့ သိရပါတယ်။

ပစ်ခတ်မှုကို တိုက်ဒေါင်းပြည်သူ့တော်လှန်ရေးအင်အားစုနဲ့ ရမည်းသင်းခရိုင် ပကဖ တို့က ပူးပေါင်းလုပ်‌ဆောင်ခဲ့တာဖြစ်ပါတယ်။

မတ် ၃ ရက်ကလည်း တောင်သာမြို့နယ်၊ ဗိဿနိုးအထိုင်စခန်းနဲ့ မကျည်းတန်းစစ်ဆေးရေးဂိတ်တွေကို တိုက်ဒေါင်းပြည်သူ့တော်လှန်ရေးအင်အားစုက ဒရုန်းနဲ့ဗုံးကြဲချခဲ့ပါသေးတယ်။

စာတည်း – ဟိန်းစံ

မြေလတ်အသံ၊ မတ် ၂၇၊ ၂၀၂၅။

ပဲခူးတိုင်းအတွင်းက ရန်ကုန်-မန္တလေးလမ်းဟောင်းပေါ်မှာ ပြည်သူ့ကာကွယ်ရေးတပ်မတော် – PDF ဗျူဟာ ၂၃ တပ်ဖွဲ့ဝင်တွေ ဒီကနေ့ မတ် ၂၇ ရက် မှာ လမ်းသွားလမ်းလာကားတွေကို စစ်ဆေးရေး ဆောင်ရွက်နေတဲ့ ပုံရိပ်တွေကို အမျိုးသားညီညွတ်ရေးအစိုးရ-NUGMOD က ထုတ်ပြန်လာပါတယ်။

ဒီကနေ့ မတ် ၂၇ ရက်မှာ စစ်ကောင်စီတပ် နှစ် ၈၀ ပြည့်တပ်မတော်နေ့အခမ်းအနားကို နေပြည်တော် ၊ ဇေယျာသီရိမြို့နယ် စစ်ရေးပြကွင်းးမှာ လုပ်ဆောင်ဖို့ရှိနေတာကြောင့် နေပြည်တော်နဲ့ အနီးတဝိုက်နယ်မြေတွေကို ဝင်ရောက်တဲ့ ရန်ကုန်-မန္တလေး အမြန်လမ်းနဲ့ လမ်းဟောင်းတွေမှာ လုံခြုံရေးတိုးမြှင့်တင်းကျပ်ထားတယ်လို့လည်း စစ်ကောင်စီတပ်အသိုင်းအဝိုင်းထံက သိရပါတယ်။

ဓာတ်ပုံ – NUGMOD

ကျောက်တံခါး၊ မတ် ၁၇၊ ၂၀၂၅ ။

ပဲခူးတိုင်း၊ ကျောက်တံခါးမြို့နယ်အပိုင် ရန်ကုန်-မန္တလေး အမြန်လမ်းပေါ်မှာ လူမှုကူညီရေးအသင်းယာဉ် တိမ်းမှောက်လို့ လူနာအပါ ၂ ဦးသေဆုံးပြီး ၃ ဦးဒဏ်ရာရခဲ့တယ်လို့ ကူညီကယ်ဆယ်ရေးလုပ်ဆောင်ပေးခဲ့သူတွေထံက သိရပါတယ်။

မတ် ၁၆ ရက် ယမန်နေ့မနက် ၉ နာရီခန့်မှာ ရန်ကုန်ကနေ နေပြည်တော်ဘက်ကို အမြန်လမ်းအတိုင်း ဦးတည်မောင်းနှင်လာတဲ့ ရန်ကုန်မြို့အခြေစိုက်၊ အောင်ဇေလူမှုကူညီရေးအသင်းယာဉ်ဟာ မိုင်တိုင်အမှတ် ၉၇ အရောက်မှာ တိမ်းမှောက်ခဲ့တာလို့ ဆိုပါတယ်။

“လမ်းအတိုင်းမောင်းလာရင်းကနေ အဲ့ဒီမိုင်တိုင်အရောက်မှာ ခွေးက ကားအရှေ့ကနေဖြတ်သွားတာကို ရှောင်လိုက်တာ။ လမ်းလယ်ကြောမှာရှိတဲ့ ထန်းပင်တွေ ခရေပင်တွေကို ဝင်တိုက်ပြီးတော့ သုံးလေးပတ်လောက်လိမ့်သွားတာ။”လို့ ကူညီကယ်ဆယ်ရေးလုပ်ဆောင်ပေးခဲ့သူတဦးက မြေလတ်အသံကို ပြောပါတယ်။

လူမှုကူညီရေးကားပေါ်မှာ အသင်းဝင် ၂ ဦးအပါအဝင် ၅ ဦးလိုက်ပါလာတာဖြစ်ပြီး ယာဉ်တိမ်းမှောက်မှုကြောင့် အသက် ၅၀ ကျော်အရွယ် ဦးခင်မောင်ထွန်းနဲ့ ဒေါ်စိုးစိုးတို့ ၂ ဦး သေဆုံးသွားကာ လူမှုကူညီရေးအသင်းဝင် ၂ ဦးနဲ့ မအိမ့်မြတ်နိုးတို့ ဒဏ်ရာရရှိခဲ့တယ်လို့ သိရပါတယ်။

သေဆုံးသူတွေဟာ မကွေးမြို့နေထိုင်သူတွေဖြစ်ပြီး ရန်ကုန်မြို့မှာ ဆေးကုသပြီးနောက် မကွေးမြို့ကို လူမှုကူညီရေးယာဉ်နဲ့ ပြန်လည်ပို့ဆောင်စဉ် ယာဉ်တိမ်းမှောက်သေဆုံးခဲ့တာဖြစ်ကာ သေဆုံးဒဏ်ရာရသူတွေကို မြို့ချောင်းတိုက်နယ်ဆေးရုံကို ပို့ဆောင်ပေးခဲ့ကြတယ်လို့ သိရပါတယ်။

ပြီးခဲ့တဲ့မတ် ၃ ရက်ကလည်း လှည်းကူးမြို့နယ်အပိုင် အမြန်လမ်းမိုင်တိုင်အမှတ် ၆ မိုင် ၁ဖာလုံအနီးမှာ ISUZU အမျိုးအစားယာဉ် ၁ စီး လမ်းလယ်ကျွန်းအတားအဆီးတွေကိုတိုက်မိခဲ့လို့ ယာဉ်ပေါ်ပါအမျိုးသမီး ၁ ဦး သေဆုံးခဲ့သေးတယ်လို့ သိရပါတယ်။

သတင်း – ကျော်ကြီး၊ စာတည်း – ဟိန်းစံ

ဖြူး၊ မတ် ၁၄၊ ၂၀၂၅။

ပဲခူးတိုင်း၊ ဖြူးမြို့နယ်အပိုင် ရန်ကုန်-မန္တလေး အမြန်လမ်းပေါ်မှာ ခရီးသည်တင်ယာဥ်တိမ်းမှောက်လို့ ၁၀ ဦးဒဏ်ရာရသွားတယ်လို့ ကူညီကယ်ဆယ်ရေးလုပ်ဆောင်ပေးခဲ့သူတွေထံက သိရပါတယ်။

မတ် ၁၃ ရက်ညနေ ၆ နာရီကျော်ခန့်မှာ နေပြည်တော်ဘက်ကနေ ရန်ကုန်ဘက်ကို မောင်းလာတဲ့ မနောတံခွန်ခရီးသည်တင်ယာဥ်ဟာ ကားလမ်းမိုင်တိုင်အမှတ် ၁၁၇/၃ အရောက်မှာ တိမ်းမှောက်ခဲ့တာလို့ဆိုပါတယ်။

“ကားက အရှိန်မထိန်းနိုင်ဘဲ မှောက်တယ်လို့တော့ သိထားရတယ်။ ကားပေါ်မှာက ၁၃ ဦးပါတာ ၁၀ ဦးဒဏ်ရာရသွားတယ်”လို့ ကူညီကယ်ဆယ်ရေးလုပ်ဆောင်ပေးခဲ့သူတဦးက ပြောပါတယ်။

အဆိုပါ ယာဥ်တိမ်းမှောက်မှုမှာ ယာဥ်မောင်း၊ ယာဥ်နောက်လိုက်အပါအဝင် အမျိုးသား ၅ ဦး၊ အမျိုးသမီး ၄ ဦးနဲ့ ကလေးငယ် ၁ ဦး စုစုပေါင်း ၁၀ ဦးမစိုးရိမ်ရဒဏ်ရာရသွားပါတယ်။

ယာဥ်တိမ်းမှောက်လို့ ထိခိုက်ဒဏ်ရာရသွားသူတွေကိုတော့ အမြန်လမ်းမီးသတ်၊ ဒေသကြက်ခြေနီအသင်းတွေနဲ့လူမှုကူညီရေးအသင်းဝင်တွေက ဖြူးဆေးရုံကို ပို့ဆောင်ပေးခဲ့ကြရတယ်လို့ သိရပါတယ်။

ပြီးခဲ့တဲ့ ဇန်နဝါရီ ၂၃ ရက်ကလည်း ဖြူးမြို့နယ်အပိုင် ရန်ကုန်-မန္တလေး အမြန်လမ်းမှာ ပုဂံကနေ ဘုရားဖူးပြန်လာတဲ့ သံဃာတော်တွေလိုက်ပါလာတဲ့ကား လမ်းဘေးထိုးကျလို့ ၃ ပါးဒဏ်ရာရသွားတယ်လို့ သိရပါတယ်။

စာတည်း – လင်း