ရှင်းလင်းခံရ

ပဲခူး၊ မတ် ၃၁၊ ၂၀၂၃။

ပဲခူးတိုင်းအရှေ့ခြမ်း၊ တောင်ငူမြို့နယ်က စစ်တပ်သတင်းပေးဆိုသူ ၃ ဦးကို အခုမတ်လအတွင်းမှာ ရှင်းလင်းခဲ့တယ်လို့ ပြည်သူ့ကာကွယ်ရေးတပ်ဖွဲ့ (ရေတာရှည်)က သတင်းထုတ်ပြန်ထားပါတယ်။

တောင်ငူမြို့နယ်၊ ကျီးအင်းကျေးရွာက အသက် ၃၈ နှစ်အရွယ် ကိုနိုင်လင်းစိုး၊ ၄၁ နှစ်အရွယ် ကိုအောင်ကျော်ဇောနဲ့ ၃၅ နှစ်အရွယ် ကိုဖြိုးတို့ကို စစ်တပ်နဲ့ ပတ်သက်ဆက်နွယ်ပြီး သတင်းပေးတယ်ဆိုတာ ပြစ်မှုထင်ရှားတဲ့အတွက် ခုလို ရှင်းလင်းခဲ့တာလို့ ပြည်သူ့ကာကွယ်ရေးတပ်ဖွဲ့ (ရေတာရှည်)ရဲ့တာဝန်ရှိသူက ပြောပါတယ်။

“ကျနော်တို့ ပျူစောထီးအယောက် ၃၀ လောက် ခေါ်စစ်တာမျိုးရှိတယ်။ ၂၀ ကျော်ကို ပြန်လွှတ်ပေးတယ်။ ခံဝန်ကတိ ထိုးခိုင်းတယ်။ အေးဆေးနေရင် ဘာမှပြဿနာမရှိဘူး။ အခုကောင်တွေက ပြစ်မှုထင်ရှားလို့ပါ” လို့ ပြောပါတယ်။

သူတို့ ၃ ဦးကို မတ်လ ၂၉ ရက်ညနေ ၆ နာရီလောက်က ကျီးအင်းရွာထိပ်မှာ ဖမ်းဆီးခဲ့ပြီး၊ မတ်လ ၃၀ ရက်မနေ့ကမနက် ၅ နာရီလောက်မှာ ရှင်းလင်းခဲ့တာလို့ ဆိုပါတယ်။

သူတို့ ၃ ဦးဟာ တော်လှန်ရေးရဲဘော်တွေရဲ့ စစ်မြေပြင်လှုပ်ရှားမှုနဲ့ပတ်သက်ပြီး စစ်တပ်ကိုသတင်းပေးတာ၊ လမ်းပြနဲ့ရိက္ခာထောက်ပို့လုပ်တာ၊ သစ်စက်တွေကနေ ရဲကို ဆက်ကြေးတောင်းပေးတာအပြင် PDF နဲ့ဆက်သွယ်ပါက အရေးယူခံရမယ်လို့ခြိမ်းခြောက်တာတွေအပြင် လောင်းကစားဝိုင်းထောင်တာ၊ ပရဟိတအမည်ခံကာ ပြည်သူ့ငွေတွေကို အလွဲသုံးစားလုပ်တာတွေကိုလည်း စစ်ဆေးတွေ့ရှိရတယ်လို့ ထုတ်ပြန်ချက်မှာ ဖော်ပြထားပါတယ်။

ဒါ့အပြင် ပျူစောထီးသင်တန်းဆင်းစာရင်းကိုလည်း ပြုစုထားကာ စစ်ဆေးမှုတွေနဲ့ ပတ်သက်တဲ့ မှတ်တမ်းတွေအပြင် အသံဖိုင်တွေကိုလည်း ပြုစုထားတယ်လို့ ပြည်သူ့ကာကွယ်ရေးတပ်ဖွဲ့(ရေတာရှည်)ရဲ့တာဝန်ရှိသူက ပြောပါတယ်။

ရေတာရှည်ပြည်သူ့ကာကွယ်ရေးအဖွဲ့ဟာ ပြီးခဲ့တဲ့မတ်လ ၂၈ ရက်ကလည်း တောင်ငူခရိုင်၊ ရေတာရှည်မြို့နယ်၊ ကျွဲရိုင်းပြင်အုပ်စု၊ ကရင်ချောင်ရွာက စစ်တပ်သတင်းပေးဆိုသူ ကိုမင်းလွင်ဦးကိုလည်း ရှင်းလင်းခဲ့ပါသေးတယ်။

စာတည်း – လင်း

ပဲခူး၊ မတ် ၃၀၊ ၂၀၂၃။

ပဲခူးတိုင်း၊ ရေတာရှည်မြို့နယ်က စစ်တပ်သတင်းပေးသူ တဦးကို ရှင်းလင်းခဲ့တယ်လို့ People Defence Force – Yedesheက သတင်းထုတ်ပြန်ထားပါတယ်။

ရေတာရှည်မြို့နယ်၊ ကျွဲရိုင်းပြင်အုပ်စု၊ ကရင်ချောင်ရွာက အသက် ၂၈ နှစ်အရွယ် ကိုလွင်မင်းဦး ဖြစ်ကာ စစ်ဆေးမေးမြန်းအပြီး မတ်လ ၂၈ ရက်နေ့လယ်က ရှင်းလင်းခဲ့တာလို့ ဆိုပါတယ်။

“မင်းလွင်ဦးကို စစ်ဆေးပေါ်ပေါက်လို့ ရှင်းလင်းခဲ့တာပါ။ သူနဲ့အတူ ဖမ်းဆီးခဲ့တဲ့ ကရင်ချောင်းရွာသား ၂ ဦးကိုတော့ အမှုပေါ်ပေါက်မှု မရှိတာရယ် သတင်းပေးအလုပ် ဆက်မလုပ်တဲ့အပြင် ရွာသားတွေရဲ့အာမခံမှုနဲ့ ခံဝန်ထိုးပြီး ပြန်လွှတ်ပေးခဲ့ပါတယ်” လို့ People Defence Force-Yedeshe အဖွဲ့က ပြောပါတယ်။

ကိုမင်းလွင်ဦးနဲ့အတူ ကရင်ချောင်းရွာသား အခြား၂ ဦးကို သူတို့ရွာရဲ့မြောက်ဘက်အထွက်မှာ မတ်လ ၂၇ ရက်ညနေ ၅ နာရီကျော်လောက်က ဖမ်းဆီးခဲ့တာလို့ ဆိုပါတယ်။

အကြိမ်ကြိမ်သတိပေးမှုတွေရှိခဲ့ပေမယ့် လိုက်နာမှုမရှိတဲ့အပြင် မကွေးတိုင်းအတွင်းက PDF တဖွဲ့ လက်နက်သယ်တာကို သတင်းပေးခဲ့သလို တောင်ငူမြို့နယ် စစ်တောင်းမြစ်တလျောက်က ကျေးအင်းရွာ၊ ထုံးဘိုရွာ၊ ကရင်ချောင်းရွာ၊ ကျွဲရိုင်းပြင်ရွာတွေကို စစ်တပ်က စစ်ကြောင်းထိုးရာမှာ လမ်းပြလုပ်ဆောင်ခဲ့တာတွေကိုလည်း စစ်ဆေးပေါ်ပေါက်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

ပြီးခဲ့တဲ့ မတ်လ ၅ ရက်မနက်အစောပိုင်းက ရေတာရှည်မြို့နယ် ကျောက်အိုးရွာက PDF ထောက်ပံ့တဲ့မိသားစုကို တရွာတည်းနေ အသက် ၄၆ နှစ်အရွယ် ဦးကြည်နိုင်နဲ့ အသက် ၄၉ နှစ်အရွယ် ဦးမောင်နိုင်တို့ ၂ ဦးက နေအိမ်အတွင်း ဝင်ရောက်ကာ သေနတ်ပစ်ခတ်ခဲ့မှု စစ်ဆေးပေါ်ပေါက်တဲ့အတွက် မတ်လ ၂၄ ရက်က ရှင်းလင်းခဲ့ပါသေးတယ်။

စာတည်း – 007

ပခုက္ကူ၊ မတ် ၁၈၊ ၂၀၂၃။

မကွေးတိုင်း၊ ပခုက္ကူမြို့နယ်၊ တင်းဂတ်ကျေးရွာအနီးက ထန်းရည်ဆိုင်မှာ ထန်းရည်သောက်နေတဲ့ ပျူစောထီး ၃ ဦးကို ပစ်ခတ်တိုက်ခိုက်ခဲ့ပြီး လက်နက်တွေ သိမ်းဆည်းရရှိခဲ့တယ်လို့ Special Guerrilla Force-Pakokku တပ်ဖွဲ့က ထုတ်ပြန်ပါတယ်။

မတ်လ ၁၅ ရက်နေ့ နေ့လည် ၂ နာရီလောက်က ပခုက္ကူ ကွန်ပျူတာတက္ကသိုလ်နဲ့ တင်းဂတ်ရွာအကြား ပျူစောထီးတွေ အထိုင်ချတဲ့ဂိတ်အနီးမှာရှိတဲ့ ထန်းရည်ဆိုင်မှာ ပျူစောထီး ၃ ဦး ထန်းရည်သောက်နေတဲ့ သတင်းရရှိလို့ ဝင်ရောက်ပစ်ခတ်ခဲ့တာဖြစ်ပြီး ၃ ဦးလုံး ပွဲချင်းပြီးသေဆုံးတယ်လို့ တပ်ဖွဲ့ဝင်တဦးက မြေလတ်အသံကို ပြောပါတယ်။

“ပျူဂိတ်နဲ့ မလှမ်းမကမ်း ထန်းရည်ဆိုင်မှာ ထိုင်နေတယ်သတင်းရလို့ ဝင်ပစ်ခဲ့တာဗျ။ ပစ္စတိုကိုင်တဲ့တယောက်က တင်းဂတ်ရွာ စကစခန့်အုပ်ကြီး ပျူ မြင့်ကြည်ရဲ့တူလို့ သိရတယ်” လို့ ပြောပါတယ်။

ပစ်ခတ်ခံရသူတွေဟာ တင်းဂတ်ရွာက ပျူစောထီးအဖွဲ့ဝင်တွေဖြစ်တဲ့ လင်းထိုက်၊ ဝင်းလှိုင်ဌေး၊ ကျော်စိုးဦး တို့ ၃ ဦးဖြစ်ပြီး သူတို့ကိုဆီကနေ စစ်ကောင်စီကထုတ်ပေးထားတဲ့ ကာဘိုင် ၁ လက်၊ MA 1 ၁ လက်၊ ပစ္စတို ၁ လက်နဲ့ ၅.၅၆ မမ ကျည်အတောင့် ၆၀တို့ကို သိမ်းဆည်းနိုင်ခဲ့တယ်လို့ ဆိုပါတယ်။

တင်းဂတ်ရွာဟာ ယခင်က စစ်ကောင်စီလက်အောက် ပျူစောထီးတွေမရှိပေမယ့် ပြီးခဲ့တဲ့နှစ် နိုဝင်ဘာလလောက်ကစပြီး ပခုက္ကူ တပ်မ ၁၀၁ က စစ်ကောင်စီတပ်တွေ ဝင်ရောက်ကာ တအိမ်ကို ၂ ယောက်နှုန်းနဲ့ ပျူစောထီးသင်တန်း မတက်မနေရ တက်ခိုင်းခဲ့ပြီးတဲ့နောက် စစ်ကောင်စီလက်အောက် ပျူစောထီးတွေ ပေါ်ပေါက်လာတာလို့ သိရပါတယ်။

ပြီးခဲ့တဲ့ ဖေဖော်ဝါရီလ ၂၄ ရက်နေ့ကလည်း ရွှေချောင်းတံတားထိပ်မှာရှိတဲ့ ပြည်သာယာခန်းမထဲက စစ်ကောင်စီတပ်ဖွဲ့ကို ဝင်ရောက်ပစ်ခတ်ခဲ့လို့ ၆ ဦး သေဆုံးကာ ၅ ဦး ဒဏ်ရာရရှိခဲ့တယ်လို့ သိရပါတယ်။

ပေါင်းတည်၊ မတ် ၁၅၊ ၂၀၂၃။

ပဲခူးတိုင်း၊ ပြည်ခရိုင်၊ ပေါင်းတည်မြို့နယ်က စစ်တပ်သတင်းပေးလို့ လူသိများသူ တဦးကို မတ်လ ၁၄ ရက်မနေ့ညက နန်းထိုက်အောင် စစ်ဆင်ရေးအဖြစ် ရှင်းလင်းခဲ့တယ်လို့ ပေါင်းတည်မြို့နယ် ပြည်သူ့ကာကွယ်ရေး တပ်ဖွဲ့ ၃၆၀၁ တပ်ရင်း – တပ်ခွဲ ၅ နွေဦးအဖွဲ့က သတင်းထုတ်ပြန်ထားပါတယ်။

ကြိုပင်သာအုပ်စု၊ လက်ပံပါးပျဉ်းရွာ သင်္ချိုင်းကုန်းအနီးမှာ အဲဒီရွာသား အသက် ၆၀ နှစ်အရွယ် ကိုမောင်ဝင်းဆိုသူကို ည ၈ နာရီခွဲလောက်က ပစ်ခတ်ရှင်းလင်းခဲ့တာလို့ ဆိုပါတယ်။

“သူက ကျွဲတဲရွာ လောင်းကစားဝိုင်းကနေ ဆိုင်ကယ်နဲ့အိမ်ပြန်လာတာကို သေနတ်နဲ့ ၅ ချက် ပစ်ခတ်ခဲ့တာပါ။ နေရာမှာပဲ ပွဲချင်းပြီး သေသွားတယ်။ ခေတ်အဆက်ဆက် လောင်းကစားဝိုင်းထောင်ပြီး အခုထိလိုင်းကြေးကောက်နေတဲ့ သတင်းပေး အစစ်ပါ” လို့ နွေဦးတပ်ဖွဲ့ဝင် တဦးက ပြောပါတယ်။

သေဆုံးသူဟာ ပေါင်းတည်က စစ်တပ်နဲ့ရဲကို ဆက်ကြေးပေးပြီး လောင်းကစားဝိုင်းတွေ အပတ်စဥ်လုပ်နေတာလို့လည်း ဒေသခံတဦးက ပြောပါတယ်။

“ကိုမောင်ဝင်းက အခုနှစ်ဆန်း စပါးပေါ်ချိန်ကစပြီး အင်္ဂါနဲ့ ဗုဒ္ဓဟူးရက်မှာ ကြို့ပင်သာအုပ်စု၊ ကျွဲတဲရွာမှာ လောင်းကစားဝိုင်း လုပ်တယ်။ ကြာသာပတေးနေ့နဲ့ သောကြာမှာက လက်ပံပါးပျဥ်းရွာမှာ လောင်းကစား လုပ်တယ်။ အဓိကက မှတ်တိုင်ရဲစခန်းကို အပတ်စဥ်သိန်းချီပြီး ဆက်ကြေးပေးနေသူ ဖြစ်တယ်” လို့ ပြောပါတယ်။

ဒ့ါအပြင် ကိုမောင်ဝင်းမှာ စစ်ကောင်စီအလိုကျ ချဲ၊ နှစ်လုံး၊ သစ်လိုင်းကြေး ကောက်ခံပေးတာ၊ ကိုယ်တိုင်ကြက်ဝိုင်း၊ ဂျင်ဝိုင်းထောင်ပြီး စစ်တပ်ကို ထောက်ပံ့နေသူလည်း ဖြစ်ပြီး ကျေးရွာအုပ်စုအတွင်းက တော်လှန်ရေးအင်အားစု သတင်းတွေကို စစ်တပ်ကိုပေးပို့တာ၊ CDM ဝန်ထမ်းတွေကိုလည်း စိတ်ဒုက္ခအမျိုးမျိုး ပေးနေသူဖြစ်တယ်လို့ နွေဦးအဖွဲ့ရဲ့ထုတ်ပြန်ချက်မှာ ဖော်ပြထားပါတယ်။

ပြီးခဲ့တဲ့နှစ် နိုဝင်ဘာ ၅ ရက်မနက်ကလည်း အဲဒီကျေးရွာအုပ်ချုပ်ရေးမှူး အသက် ၇၀ နှစ်အရွယ် ဦးဆောင်းတင်ဆိုသူကို ပေါင်းတည်မြို့နယ် ပြည်သူ့ကာကွယ်ရေးတပ်ဖွဲ့ (PPDF) ၃၆၀၁ တပ်ရင်း – တပ်ခွဲ ၅ နွေဦးအဖွဲ့က နန်းထိုက်အောင်စစ်ဆင်ရေးအဖြစ် ရှင်းလင်းခဲ့လို့ ဒီနေ့တိုင် အဲဒီအုပ်စုမှာ အုပ်ချုပ်ရေးမှူးလုပ်မယ့်သူ မရှိသေးဘူးလို့လည်း သိရပါတယ်။

စာတည်း – လင်း

ကြို့ပင်ကောက်၊ မတ် ၁၄၊ ၂၀၂၃။

ပဲခူတိုင်း(အနောက်ခြမ်း)၊ ကြို့ပင်ကောက်မြို့၊ အရှေ့တောင်ဘက် ကျေးရွာတရွာက အုပ်ချုပ်ရေးမှူးနဲ့အဖွဲ့ဟာ မတ်လ ၁၃ ရက်မနေ့ည ၁၀ နာရီခွဲလောက်က တိုက်ခိုက်ခံရလို့ သေဆုံးမှုတွေရှိတယ်လို့ သိရပါတယ်။

ကြို့ပင်ကောက်မြို့နယ်၊ ရုံးချောင်းအုပ်စု၊ ရုံးချောင်းရွာမှာ ဖြစ်ပွားခဲ့တာဖြစ်ပြီး အုပ်ချုပ်ရေးမှူးအပါ ၈ ဦးလောက် စကားပြောနေချိန်မှာ တိုက်ခိုက်ခဲ့တာလို့ ဆိုပါတယ်။

“ကိုအေးထွန်းက အုပ်ကြီးလည်းဖြစ်သလို ပျူစောထီးခေါင်းဆောင်လည်း ဖြစ်တယ်။ သူတို့အင်အား ၈ ဦးလောက်နဲ့ ရှိနေတာကို ပစ်ခတ်ခဲ့တာပါ။ သူတို့ဘက်ကလည်း တထောင့်ထိုးတူမီးတွေ လက်ပစ်ဗုံးတွေနဲ့ ပြန်ပစ်သေးတယ်ဗျ” လို့ တိုက်ခိုက်ရာမှာ ပါဝင်တဲ့ Black Dragon အဖွဲ့ဝင်တဦးက ပြောပါတယ်။

Black Dragon(GBK PDF)ရဲ့ သတင်းထုတ်ပြန်ချက်မှာတော့ အုပ်ချုပ်ရေးမှူးပျူစောထီးခေါင်းဆောင် ကိုအေးထွန်းနဲ့ ပျူခေါင်းဆောင် ပါ ၃ ဦး သေဆုံးပြီး ဒဏ်ရာရသူ ၅ ဦး ရှိတယ်လို့ ဖော်ပြထားပါတယ်။

ဒေသခံတဦးပြောတာကတော့ ကိုအေးထွန်းရဲ့အလောင်းနဲ့ ဒဏ်ရာရသူ ၂ ဦးကို အဲဒီညကပဲ ကြို့ပင်ကောက်မြို့နယ်၊ အလယ်ကုန်းတိုက်နယ်ဆေးရုံကို ပို့ဆောင်ထားတယ်လို့ ဆိုပါတယ်။

အဲဒီတိုက်ခိုက်မှုမှာ သာယာဝတီခရိုင်၊ ကြို့ပင်ကောက်မြို့နယ် နတ်စစ်သည်တပ်ရင်းအမှတ် ၃၈၀၁ တပ်ခွဲ ၂ – Black Dragon(GBK PDF)၊ တပ်ရင်းအမှတ် ၃၈၀၁ တပ်ခွဲ ၅ ဟီးရိုးပြောက်ကျား၊ Yoma – GBK PDF တပ်ပေါင်းစုတို့ ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ မတ်လ ၇ ရက်က Black Dragon (GBK PDF)က စစ်တပ်သတင်းပေးနဲ့ ပျူစောထီးခေါင်းဆောင်တွေ အုပ်ချုပ်ရေးမှူးတွေ နုတ်ထွက်ကြဖို့ သတိပေးထားခဲ့ပါသေးတယ်။

စာတည်း – 007

ကန့်ဘလူ၊ မတ် ၁၂၊ ၂၀၂၃။

စစ်ကိုင်းတိုင်းဒေသကြီး၊ ကန့်ဘလူမြို့နယ်၊ နဂါးပေါ်ကျေးရွာက အုပ်ချုပ်ရေးမှူးအပါအဝင် ပျူစောထီး ၂ ဦး စုစုပေါင်း ၃ ဦး ပစ်ခတ်ရှင်းလင်းခံရတယ်လို့ သိရပါတယ်။

မတ်လ ၁၀ ရက်နေ့ည ၉ နာရီကျော်ခန့်မှာ နဂါးပေါ်ရွာနေ ပျူစောထီး ထွန်းညွှန့် (၃၂ နှစ်) နဲ့အတူ နေအိမ်မှာရှိနေတဲ့ ပျူစောထီး ဦးအုန်းကြိုင် (၅၂ နှစ်) နဲ့ အုပ်ကြီး ဇော်အောင် (၅၀ နှစ်) ကို ဝင်ရောက်ပစ်ခတ်ရှင်းလင်းခဲ့တာ ဖြစ်တယ်လို့ ကန့်ဘလူ ပကဖ အဖွဲ့ဝင်တဦးက ပြောပါတယ်။

“သွားရှင်းတုန်းကတော့ ထွန်းညွန့်နဲ့ အုန်းကြိုင်ကို ဝင်ရှင်းတာ။ ဖြစ်ချင်တော့ အုပ်ကြီးကလည်း ရှိနေတာ။ အုပ်ကြီးက ရွာကိုတော့ နည်းနည်းငဲ့တယ်။ ပျူရွာဖွဲ့ခိုင်းတာကို သူက မလုပ်တာ။ ၃ ယောက်စလုံးက သေနတ်ကိုင်တာ။ သူက စကစခန့်အုပ်ကြီးဆိုတော့ ပါသွားတာပေါ့” လို့ ပြောပါတယ်။

ပစ်ခတ်ရှင်းလင်းချိန်မှာ အုန်းကြိုင် ဆိုသူဟာ ထွက်ပြေးတာကြောင့် ကျေးရွာသုသာန်အနီးမှာ ထပ်မံပစ်ခတ်ရှင်းလင်းလိုက်ရတယ်လို့ ဆိုပါတယ်။

သေနတ်နဲ့ ပစ်ခတ်ရှင်းလင်းခံရလို့ ထွန်းညွန့်နဲ့ အုပ်ကြီးဇော်အောင်ဟာ ထွန်းညွန့်နေအိမ်မှာ သေဆုံးသွားပြီး အုန်းကြိုင်ဆိုသူကတော့ ရွာသုသာန်နားမှာ သေဆုံးသွားတယ်လို့ သိရပါတယ်။

အုပ်ချုပ်ရေးနဲ့အဖွဲ့ ရှင်းခံရပြီးနောက် မတ်လ ၁၁ ရက်နေ့မနက်မှာ စစ်ကောင်စီတပ်ဖွဲ့ဟာ ကျေးရွာထဲကို ရောက်လာပြီး ဒေသခံတွေကို စစ်ဆေးမေးမြန်းတာ PDF မိသားစုဝင်တွေလို့ ထင်တဲ့ ပြည်သူတွေကို စာရင်းမှတ်သွားတယ်လို့ သိရပါတယ်။

၂၀၂၂ ခုနှစ် စက်တင်ဘာလ ၅ ရက်နေ့ကလည်း ကန့်ဘလူမြို့နယ်၊ အင်ကြင်းစုကျေးရွာက စစ်ကောင်စီခန့်အုပ်ချုပ်ရေးမှူး ဦးကြည်လွင်နဲ့ သတင်းပေး ခင်မောင်သိန်းဆိုသူဟာလည်း ရှင်းလင်းခံရလို့ သေဆုံးခဲ့သေးတယ်လို့ သိရပါတယ်။

ပေါင်းတည်၊ မတ် ၁၀၊ ၂၀၂၃။

ပဲခူးတိုင်းအနောက်ခြမ်း၊ ပေါင်းတည်မြို့နယ်က စစ်တပ်သတင်းပေး ပျူစောထီးခေါင်းဆောင်လို့ လူသိများသူတဦးကို မတ်လ ၁၀ ရက်ဒီနေ့လယ် ၁၂ နာရီလောက်မှာသေနတ်နဲ့ပစ်သတ်ခဲ့တယ်လို့ Thegon PDF က သတင်းထုတ်ပြန်ထားပါတယ်။

ပေါင်းတည်မြို့နယ်၊ သစ်ပုတ်ကျေးရွာမှာနေထိုင်တဲ့ အသက် ၅၀ နှစ်အရွယ် ကိုအောင်ဝင်းဌေးဆိုသူဖြစ်ပြီး သူ့ကို နန်းထိုက်အောင် စစ်ဆင်ရေးအဖြစ် ရှင်းလင်းခဲ့တာလို့ တပ်ခွဲ ၄ – TPDF ရဲ့ သတင်းတာဝန်ခံက ပြောပါတယ်။

“သူက ရွာကိုဆိုင်ကယ်နဲ့တဦးတည်း ပြန်လာတာကို လက်ပံခုံရွာအနီး မြေနီလမ်းပေါ်မှာ ရှင်းလိုက်တာ၊ ပွဲချင်းပြီး သေတယ်။ နားထင်၊ ရင်ဘတ်နဲ့ နံညွန့်တွေကို တချက်စီနဲ့ ၃ ချက်ပစ်ခတ်ခဲ့တာဖြစ်တယ်” လို့ ပြောပါတယ်။

ကိုအောင်ဝင်းဌေးဟာ သစ်ပုတ်တာဝါတိုင်က စစ်သားတွေနဲ့ပေါင်းပြီး ကျွန်းသစ်ခိုးတာ၊လမ်းပြတာ၊ အိမ်ထောင်စုစာရင်းကောက်ယူတာ၊ စစ်တပ်ကို မမှန်သတင်းပေးတာ၊ လောင်းကစားဝိုင်းပြုလုပ်တာနဲ့ ဆက်ကြေးကောက်တာတွေ ပြုလုပ်နေတာဖြစ်သလို သူနဲ့ပတ်သက်ပြီး သတင်းပေးပို့ချက်တွေလည်း ရှိတာကြောင့် စိစစ်ပြီးမှ ခုလိုလုပ်ဆောင်ခဲ့တာလို့ ထုတ်ပြန်ချက်မှာ ဖော်ပြထားပါတယ်။

ပစ်ခတ်ပြီးချိန်ကစလို့ လက်ရှိအချိန်ထိ ကိုအောင်ဝင်းဌေးနဲ့ပူးပေါင်းနေတဲ့ စစ်သားတွေလည်း သူ့အိမ်ကို ရောက်ရှိလာခြင်းမရှိဘူးလို့ ဆိုပါတယ်။

ဒီရှင်းလင်းမှုကို တပ်ရင်း ၃၆၀၁၊ တပ်ခွဲ ၃ နဲ့ တပ်ရင်း ၃၆၀၂၊ တပ်ခွဲ ၄ – TPDF၊ တပ်စု ၆၊ တပ်စိတ် ၁၆ တို့က ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ မတ်လ ၇ ရက်ကလည်း ပေါင်းတည်မြို့နယ်၊ ကျောက်တံခါးအုပ်စု၊ အောင်သပြေရွာကို ကျွန်းသစ်ခိုးယူဖို့လာတဲ့ ဖောကားတစီးကို ပေါင်းတည်မြို့နယ်တပ်ရင်း ၃၆၀၁ တပ်ခွဲ ၃ က မီးရှို့ဖျက်ဆီးခဲ့ပါသေးတယ်။

စာတည်း – လင်း

ကလေး၊ မတ် ၆၊ ၂၀၂၃။

စစ်ကိုင်းတိုင်း၊ ကလေးမြို့ပေါ်က ပျူစောထီးအဖွဲ့ရဲ့ ခေါင်းဆောင်ဆိုသူကို မတ်လ ၅ ရက်မနက် ၁၂ နာရီကျော်မှာ ပစ်ခတ်ရှင်းလင်းခဲ့တယ်လို့ မြို့ပြ UG အဖွဲ့တာဝန်ရှိသူက ပြောပါတယ်။

သေဆုံးသူမှာ အောင်မေတ္တာရပ်ကွက်နေ ချမ်းမြေ့အောင်(ခ)ဖိုးချမ်းဖြစ်ပြီး၊ သူ့ကို စမ်းမြို့ရပ်ကွက်၊ ဗိုလ်ချုပ်လမ်းမကြီးပေါ်မှာ ပစ်ခတ်ခဲ့တာ ဖြစ်တယ်လို့ ကလေးမြို့ မြို့ပြစီမံချက် UG အဖွဲ့မှ ဦးဆောင်သူ ကိုရန်မင်းနိုင်က ပြောပါတယ်။

“ခေါင်းကို သုံးချက် ပစ်ခဲ့တာပါ။ နေရာမှာတင် ပွဲချင်းပြီးတယ်။ သူက အဲဒီရပ်ကွက်ကို ဘာသွားလုပ်တာလဲတော့ မသိဘူး။ သူက တယောက်တည်းသွားနေတာ” လို့ ဆိုပါတယ်။

ဖိုးချမ်းမှာ က‌လေးမြို့ပေါ်နဲ့ ကျေးရွာတွေက ဆိုင်ကယ် အစီးပေါင်း ၁၀၀ ကျော် ခိုးယူရာမှာ ဂိုဏ်းခေါင်းဆောင် ပြုလုပ်သူ၊ အိတ်စွပ်ရွာက ၁၅ နှစ်အရွယ် မိန်းကလေးတစ်ဦးအား အဓမ္မပြုကျင့် သတ်ထားခဲ့သူ၊ ရွှေဘုံသာဘုရားကြီးလမ်းက လူမိုက်ကျော်ကြီးတို့အဖွဲ့အား ဦးဆောင်ကာ ခိုးဆိုးလုနှိုက် အနုကြမ်းစီးရန် စေခိုင်းခဲ့သူ ဖြစ်တယ်လို့ ဆိုပါတယ်။

ဒါ့အပြင် ကလေးမြို့ရွှေဆိုင်တဆိုင်ကို သေနတ်အတိုတလက်နဲ့ အနုကြမ်းစီးခဲ့ဖူးသူ၊ တော်လှန်ရေးသမားတွေကို ဖမ်းဆီးရာမှာ ​ရှေ့က ဦးဆောင်ပြီး ပါဝင်သူ ဖြစ်သလို PDF တွေရဲ့ လည်းချောင်းသွေးဖောက်သောက်မည်ဟု ကြိမ်းဝါးထားသူ ဖြစ်တယ်လို့ ကိုရန်မင်းနိုင်က ပြောပါတယ်။

ဒါ့အပြင် ကလေးမြို့ မြို့ပြစီမံချက် UG အဖွဲ့အနေနဲ့ မြို့ပေါ်မှာ ကျန်ရှိနေသေးတဲ့ စစ်ကောင်စီ လက်ပါးစေသူတွေကို သတိပေးထားတယ်လို့ ဆိုပါတယ်။

စာတည်း – 007

မုံရွာ၊ ဖေဖော်ဝါရီ ၂‌၈၊ ၂၀၂၃။

စစ်ကိုင်းတိုင်း၊ မုံရွာမြို့နယ်က စစ်မှုထမ်းဟောင်းတဦး ဖေဖေါ်ဝါရီလ ၂၇ ရက် မနေ့ကနေ့လယ်ပိုင်းမှာ သေနတ်နဲ့ပစ်သတ်ခံခဲ့ရပါတယ်။

မုံရွာမြို့နယ်၊ မြို့သစ်ရပ်ကွက်က အသက် ၅၀ နှစ်အရွယ် စစ်မှုထမ်းဟောင်း ဒုတပ်ကြပ်သန်းနိုင်ဆိုသူဖြစ်ပြီး၊ ဆိုင်ကယ်နဲ့တဦးတည်းလာချိန် နေ့လယ် ၁၂ နာရီလောက်မှာ မုံရွာလွှတ်တော်နဲ့ အနောက်မြောက်တိုင်းစစ်ဌာနချုပ် – နမခ ကြားအရောက် ၉ မမနဲ့ ၂ ချက်ပစ်ခတ်ရှင်းလင်းခဲ့တာလို့ BHA အဖွဲ့ရဲ့ သတင်းပြန်ကြားရေးတာဝန်ခံ မပိုးပိုးကပြောပါတယ်။

“ပစ်ခတ်လိုက်တဲ့နေရာမှာပဲ အဲဒီလူတခါတည်းရှောသွားတယ်။ သူ့ဆီက သူ့ရဲ့စစ်မှုထမ်းဟောင်းကဒ်၊ သံပုရာသီး(ဗုံး)တလုံးနဲ့ ဖုန်းတလုံးသိမ်းဆည်းရမိခဲ့ပါတယ်။ ပြီးတော့သူက နခမရဲ့ လူယုံတယောက်လည်းဖြစ်တယ်။ နမခကို စားနပ်ရိက္ခာထောက်ပံ့သူလည်းဖြစ်တယ် ” လို့ ပြောပါတယ်။

ဒီတိုက်ခိုက်မှုကို Brave Heart Army – BHA၊မုံရွာ_ဗန္ဓုလနဲ့အဖွဲ့သားများ အဖွဲ့(၁)၊ Black Falcon ‌မြို့တွင်းပျောက်ကျားတပ်ဖွဲ့နဲ့ SpecialForces-11PDF၊ တို့ ပူးပေါင်းလုပ်ဆောင်ခဲ့တာလည်း ဖြစ်ပါတယ်။

ကိုသန်းနိုင်ဟာ PDF တွေရဲ့လူပ်ရှားမူသတင်းကို ပေးနေသူဖြစ်တာကြောင့် စောင့်ကြည့်သုတ်သင်ခဲ့တာဖြစ်ပြီး၊ ဦးခေါင်းနဲ့ရင်ဘတ်ကို တချက်စီကျည်ထိမှန်ခဲ့ကာ နေရာတင်ပွဲချင်းပြီးသေဆုံးခဲ့တာလို့လည်း မပိုးပိုးက ဆက်ပြောပါတယ်။

BHA အဖွဲ့ဟာ ဒေသတွင်းမဟာမိတ်တွေနဲ့ပေါင်းပြီး ပြီးခဲ့တဲ့ဖေဖေါ်ဝါရီလ ၂၆ ရက်မနက်ကလည်း မုံရွာမြို့နယ်၊ တောပုရွာအနီးက လယ်ကွင်းထဲမှာ ပဲနဲ့ဂျုံတွေရိတ်နေတဲ့ ပျူစောထီးတွေကို တိုက်ခိုက်ခဲ့လို့သေဆုံးမှုတွေ ရှိခဲ့ပါသေးတယ်။

မန္တလေး၊ ဖေဖော်ဝါရီ ၁၊ ၂၀၂၃။

မန္တလေးတိုင်း၊ ပုသိမ်ကြီးမြို့နယ်၊ ကျွဲရေကုန်းကျေးရွာက စစ်ကောင်စီသတင်းပေး အမျိုးသမီးတဦး ဇန်နဝါရီ ၃၁ ရက်မနေ့ကမနက် ၁၁ နာရီလောက်မှာ သေနတ်နဲ့ပစ်ခံရပြီးသေဆုံးခဲ့ပါတယ်။

အဆိုပါအမျိုးသမီးမှာ အသက် ၂၀ နှစ်အရွယ် မဖြူစင်သန့်ဖြစ်ပြီး၊ သူ့ကို မန္တလေး -မတ္တရာကားလမ်းဘေး နန္ဒာတောင်ရွာအနီးမှာ ပစ်ခတ်ရှင်းလင်းခဲ့တာလို့ နဂါးနီပြောက်ကျား-မတ္တရာတပ်ဖွဲ့မှ တာဝန်ခံကိုသားငယ်က ပြောပါတယ်။

“ဖြူစင်သန့်က ရွေးကောက်ပွဲအတွက် မဲစာရင်း၊ သန်းခေါင်းစာရင်းတွေ လိုက်လံကောက်ပေးနေသူ တယောက်ပါ။ ပြီးတော့ ရဲဘော်တွေကိုလည်း ချိန်းဆိုပြီး သူနဲ့သွားတွေ့တဲ့ ရဲဘော်တွေဖမ်းဆီးခံရတာတွေ ရှိပါတယ်။ သူရဲ့ မိသားစုနဲ့ သူက စကစ ဒေါက်တိုင်ဖြစ်တယ်”လို့ဆိုပါတယ်။

မဖြူဇင်သန့်မှာ မနေ့မနက်ပိုင်းက အခြားအမျိုးသမီးအဖော်တဦးနဲ့ မင်္ဂလာဆောင်တခုကပြန်လာချိန် ပစ်ခတ်ခံရတာဖြစ်ပြီး၊ ဝဲနားထင်ကျည်ဖောက်ဝင်ဒဏ်ရာနဲ့ နေရာတင်ပွဲချင်းပြီးသေဆုံးခဲ့တာဖြစ်သလို သူ့ရဲ့အလောင်းကိုတော့ ဒေသလူမှုကူညီရေးအသင်းတွေက လာရောက်သယ်ဆောင်သွားခဲ့တယ်လို့လည်း သိရပါတယ်။

ခုလိုမရှင်းလင်းခင်ကလည်း သူ့ဆီကိုစာပို့ပြီး သတိပေးခဲ့ပေမယ့် မလိုက်နာခဲ့တာကြောင့် အခုလိုရှင်းလင်းခဲ့ရတာဖြစ်ပြီး ရှင်းလင်းချိန်မှာလည်း သူ့ဆီက ဘာပစ္စည်းတခုကိုမှ မယူခဲ့ကြဘူးလို့ ကိုသားငယ်က ဆက်ပြောပါတယ်။

ဒါ့အပြင် မဖြူသန့်စင်ရှင်းလင်းခံရပြီးနောက်မှာ သူ့ရဲ့မိသားစုဝင်တွေက အခြားသူတွေကိုပါ စစ်တပ်ကိုအကြောင်းကြားပြီး ဖမ်းဆီးခိုင်းတာတွေ ရှိခဲ့တယ်လို့ ဆိုပါတယ်။

“သူပစ်ခတ်ခံရပြီးတာနဲ့ သူ့မိသားစုက တခြားမဆိုင်တဲ့မိသားစု၀င်တွေကို လိုက်လံဖမ်းဆီးခိုင်းပါတယ်။ အခုဆိုရင်အဖမ်းခံထားရတာ ၅ ယောက်ရှိနေပြီ။ အခုအဖမ်းခံရတဲ့သူတွေက အရပ်သားပြည်သူတွေပါ”လို့ တာဝန်ခံကိုသားငယ်က ပြောပါတယ်။

လက်ရှိမှာ မဖြူစင်သန့်ရဲ့မိသားစုရဲ့ဖမ်းဆီးခိုင်းမှုကြောင့် ပုသိမ်ကြီးမြို့ပေါ်က အမျိုးသမီး ၃ ဦးနဲ့ အမျိုးသား၂ ဦးတို့ကို စစ်ကောင်စီတပ်သားတွေက ဖမ်းဆီးခံထားရပြီး သူနဲ့ပက်သက်တဲ့အချက်အလက်တွေကိုတော့ မြေလတ်အသံက ဆက်လက်စုံစမ်းနေဆဲပါ။