ရွာ ၃ ရွာ

ကန့်ဘလူ၊ မတ် ၆၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ကျေးရွာသုံးရွာက နေအိမ် ၅၅ လုံးကို ၂ ရက်အတွင်း စစ်ကောင်စီ၊ ပျူစောထီးတပ်ဖွဲ့တွေက မီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

မီးရှို့ခံရတဲ့ ကျေးရွာသုံးရွာဟာ ချပ်သင်းရွာ၊ ပင့်သာရွာ နဲ့ အောက်တဲရွာ တို့ဖြစ်ပြီး မတ်လ ၄ ရက်နေ့က ကိုးတောင်ဘို့တိုက်နယ်ထဲမှာရှိတဲ့ အောက်တဲရွာကို မနက် ၆ နာရီလောက်မှာ စစ်ကောင်စီလက်အောက်ခံ ခြေလျင်တပ်ရင်း (၁၃၇)က အင်အား ၅၀ ကျော်နဲ့ ကျေးရွာက နေအိမ် ၂ လုံးကို မီးရှို့ဖျက်ဆီးခဲ့တယ်လို့ ကျွန်းလှတက်ကြွလှုပ်ရှားသူများအဖွဲ့မှ တာဝန်ရှိသူတဦးက ပြောပါတယ်။

“အဲဒီကျေးရွာ သုံးရွာက အကွာအဝေးတွေတော့ ကျနော်တို့ အတိအကျ ပြောမရပါဘူး။ ရွာတွေကို မီးရှို့တဲ့အဖွဲ့တွေကလည်း မတူပါဘူး။ အောက်တဲရွာက အခုအကြိမ်နဲ့ဆို မီးရှို့ခံရတာ တတိယအကြိမ်မြောက်ပါ။ နေအိမ်စုစုပေါင်း ၄၂ လုံး အထိ မီးလောင်သွားပါပြီ” လို့ ဆိုပါတယ်။

အဲဒီနေ့မှာပဲ ချပ်သင်းရွာထဲက အုတ်တိုက် (၇) လုံးကို ပျူစောထီးတပ်ဖွဲ့တွေက မီးရှို့ဖျက်ဆီးသွားခဲ့ပြန်တယ်လို့ သိရပါတယ်။

အလားတူ မတ်လ ၄ ရက်နဲ့ ၅ ရက်နေ့မှာ ပင့်သာ(တည်ပင်)ရွာကို ပျူစောထီးတပ်ဖွဲ့တွေက အင်အား ၂၀၀ ကျော်နဲ့ ၂ ရက်ဆက်တိုက် မီးရှို့ဖျက်ဆီးခဲ့တဲ့အတွက် ပြည်သူပိုင်နေအိမ် ၅၁ လုံးနဲ့ လယ်ယာသုံးပစ္စည်းတချို့ မီးလောင်ပျက်စီးသွားပါတယ်။

“ပင့်သာရွာက ပြီးခဲ့တဲ့ ၂၀၂၂ ခုနှစ် သြဂုတ်လကတည်းက ပထမအကြိမ် မီးရှို့ခံရတာပါ။ အခုအကြိမ်နဲ့ဆို လေးကြိမ်မြောက် ရှိပါပြီ။ နေအိမ် ၁၅၀ လုံးအထိ မီးလောင်ပျက်စီးသွားတယ်” လို့ အဆိုပါတာဝန်ခံက ဆက်ပြောပါတယ်။

အခုလက်ရှိမှာ ပျူစောထီးတပ်ဖွဲ့တွေကို စစ်ကောင်စီတပ်က လက်နက်တပ်ဆင်ပေးလိုက်တဲ့အတွက် ပျူစောထီးတပ်ဖွဲ့ဟာ ကန့်ဘလူခရိုင်ထဲက ကျေးရွာ‌တွေဖြစ်တဲ့ ကိုးတောင်ဘို့၊ ချပ်သင်း နဲ့ ပင့်သာတိုက်နယ်အတွင်း စစ်ကြောင်းထိုးမီးရှို့မှုတွေ ဆက်တိုက်ပြုလုပ်လာတဲ့အတွက် ဒေသခံပြည်သူ သုံးသောင်းကျော်ဟာ ထွက်ပြေးတိမ်းရှောင်နေရတယ်လို့လည်း ကျွန်းလှတက်ကြွလှုပ်ရှားသူများအဖွဲ့က ထုတ်ပြန်ထားပါတယ်

စာတည်း – 007

ရွှေဘို၊ ဖေဖော်ဝါရီ ၂၃၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်က ကျေးရွာ ၃ ရွာကို စစ်ကောင်စီတပ်သားတွေက ဖေဖော်ဝါရီလ ၂၀ ရက်နေ့လည်ပိုင်းမှာ မီးရှို့သွားခဲ့တာကြောင့် လူနေအိမ်၂၄၀ ကျော် ပြာကျပျက်စီးသွားခဲ့တယ်လို့ ဒေသခံတွေက ပြောပါတယ်။

မီးရှို့ခံရွာတွေကတော့ ထူးကြီးတောင်ရွာက နေအိမ် ၁၀၀ ကျော်၊ ထူးကြီးမြောက်ရွာက ၄၀ ကျော်နဲ့ တည်ပင်ကျေးရွာက ၁၀၀ ကျော်တို့ ဖြစ်တယ်လို့ တည်ပင်ရွာခံသားတဦးက မြေလတ်အသံကို ပြောပါတယ်။

“စကစတွေက အရင်ဆုံးထူးကြီးရွာ၂ ရွာကို ရှို့တယ်။ ပြီးမှ တည်ပင်ရွာကိုရှို့တာ။ စကစတွေက နေအိမ်တွေကို မီးရှို့ပြီးတော့ တည်ပင်ရွာထဲမှာ ညအိပ်တယ်။ ၂၁ ရက်နေ့ မနက်ပိုင်းမှ ထွက်သွားကြတာ။ ဒါကပထမဆုံး မီးရှို့ခံရတာပါ” လို့ ဆိုပါတယ်။

မီးရှို့ခဲ့တဲ့ စစ်ကောင်စီတပ်ဟာ ပလိုင်း(ပျူ)ရွာစခန်းမှ အင်အား ၈၀ ကျော်နဲ့ စစ်ကြောင်းထိုးလာတာဖြစ်ပြီး တိုက်ပွဲဖြစ်ပွားတာမရှိဘဲ အကြောင်းမဲ့ မီးရှို့သွားတာလို့ နောက်ထပ် တည်ပင်ရွာခံသားတဦးက ပြောပါတယ်။

“လူတွေကတော့ အထိအခိုက် မရှိခဲ့ဘူး။ ရွာဘက်ကို စစ်ကြောင်းထိုးလာတာကို အချိန်မီသတင်းရခဲ့လို့ ထွက်ပြေးလွတ်မြောက်ခဲ့တယ်။ နေအိမ်တွေပဲ မီးရှို့ခံလိုက်ရတယ်။ အခုတော့ သန့်ရှင်းရေးတွေလုပ်ပြီး တဲလေးတွေ ထိုးပြီးတော့ ဖြစ်သလိုနေနေရတယ်” လို့ ဆိုပါတယ်။

ထူးကြီး(တောင်ရွာ၊မြောက်ရွာ)မှာ စုစုပေါင်း အိမ်ခြေ ၅၀၀ ဝန်းကျင်ရှိသလို တည်ပင်ကျေးရွာမှာလည်း အိမ်ခြေ ၅၀၀ ခန့်ရှိကာ ၃ ရွာလုံးက ရွှေဘို-မုံရွာ ကားလမ်းမဘေးမှာတည်ရှိပြီး ရွှေဘိုမြို့နဲ့ ၁၁ မိုင်ကွာဝေးတယ်လို့ သိရပါတယ်။

လက်ရှိအချိန်မှာ မီးရှို့သွားတဲ့ စစ်ကောင်စီစစ်ကြောင်းဟာ တည်ပင်ကျေးရွာနဲ့ ၃ မိုင်ခန့်ဝေးတဲ့ ဇီးဖြူကုန်း(ပျူ)ရွာထဲကို ရောက်ရှိနေတယ်လို့ ဆိုပါတယ်။

၂၀၂၁ ခုနှစ်၊ မေလ ၁ ရက်ကနေ ၂၀၂၃ ခုနှစ် ဇန်နဝါရီလ ၃၁ ရက်အထိ စစ်ကောင်စီတပ်တွေရဲ့ မီးရှို့ဖျက်ဆီးမှုကြောင့် စစ်ကိုင်းတိုင်းအတွင်း နေအိမ် ၄ သောင်းကျော် (၄၃၂၉၂) လုံး မီးလောင်ပျက်စီးခဲ့တယ်လို့ Data For Myanmar ရဲ့စစ်တမ်းတွေရဲ့အရ သိရပါတယ်။