ပြုလုပ်

မြေလတ်အသံ၊ စက်တင်ဘာ ၁၅၊ ၂၀၂၅။

စစ်ကော်မရှင်ပြုလုပ်မယ့် အတုအယောင်ရွေးကောက်ပွဲကို ဆန့်ကျင်တဲ့ ဆန္ဒပြလူထုလှုပ်ရှားမှုသပိတ် စစ်ကိုင်းတိုင်း၊ ဆားလင်းကြီးမြို့နယ်တနေရာမှာ ပြုလုပ်ခဲ့ကြတယ်လို့ ဒေသတွင်းသပိတ်အင်အားစုတွေထံက သိရပါတယ်။

အဲ့ဒီလူထုလှုပ်ရှားမှုကို စက်တင်ဘာ ၁၄ ရက် မနေ့ မနက်ပိုင်းမှာ ဆားလင်းကြီးမြို့နယ် သပိတ်အင်အားစုတွေနဲ့ ဒေသခံပြည်သူတွေပူးပေါင်း အင်အား ၂၀၀ ခန့်က ပြုလုပ်ခဲ့တာဖြစ်ပြီး အတုယောင်ရွေးကောက်ပွဲမှာ ပြည်သူတွေမပါဝင်ဖို့ ဟောပြောလှုံ့ဆော်ခဲ့ကြတယ်လို့ ဆိုပါတယ်။

” စကမ ပြုလုပ်တဲ့အတုယောင်ရွေးကောက်ပွဲဟာ ပြည်သူတွေအတွက် ထွက်ပေါက်မဟုတ်ပဲ ထောင်ချောက်သာဖြစ်ကြောင်း လူထုကို လှုပ်နှိုးဖို့ ပြုလုပ်ခဲ့တာဖြစ်တယ်”လို့ ဆားလင်းကြီးမြို့နယ် သပိတ်အင်အားစုအဖွဲ့ဝင်တဦးက မြေလတ်အသံကို ပြောပါတယ်။

လာမယ့် ဒီဇင်ဘာလမှာ ရွေးကောက်ပွဲလုပ်ဖို့ ပြင်ဆင်နေပြီး အပိုင်း ၃ ပိုင်းခွဲ ပြုလုပ်သွားမှာဖြစ်ကာ အပိုင်း ၁ ကို မြို့နယ် ၁၀၂ ခုမှာ စတင်ကျင်းပမယ်လို့ စစ်ကော်မရှင်လက်အောက် ရွေးကောက်ပွဲ ကော်မရှင်က ထုတ်ပြန်ထားပါတယ်။

စလင်း၊ သြဂုတ် ၁၈၊ ၂၀၂၅။

မကွေးတိုင်း၊ စလင်းမြို့နယ်ရှိ ကျေးရွာတရွာမှာ မိုးခေါ်လွန်ဆွဲပွဲကို သြဂုတ် ၁၆ ရက်နဲ့ ၁၇ ရက်မှာ ပြုလုပ်ကျင်းပခဲ့တယ်လို့ စလင်းမြို့နယ်ပြည်သူ့ကာကွယ်ရေးအဖွဲ့ ဒုတာဝန်ခံဆီက သိရပါတယ်။

စလင်းမြို့နယ်အတွင်းက ကျေးရွာတွေမှာမိုးခေါင်တဲ့အတွက် မြန်မာ့ရိုးရာဓလေ့တခုဖြစ်တဲ့ မိုးခေါ် လွန်ဆွဲပွဲကို ဒေသခံတွေကပြုလုပ်ခဲ့ကြတာဖြစ်ပြီး ပိုက်ဆံကြဲတာ၊ အအေးနဲ့မုန့်တွေလည်း ကျွေးမွေးခဲ့ကြတယ်လို့ ဆိုပါတယ်။

“ပကဖနဲ့ ပကဖဆေးဘက်ဆိုင်ရာ ရဲဘော်လေးတွေရှိမယ်၊ ရုံးပိုင်းဆိုင်ရာကလေးတွေ၊ ရပ်ကျေး ပကဖတွေပါမယ်။ နောက်ဆုံးနေ့မှာ ရွှေမိုးငွေမိုး ရွာတယ်ပြောရမှာပေါ့၊ ပိုက်ဆံကြဲတာတွေ လုပ်ခဲ့တယ်။ လာအားပေးကြတဲ့ပြည်သူတွေကိုရော အအေးတိုက်တာမျိုးတွေ မုန့်တွေလုပ်ပြီး ဧည့်ခံတာတွေရှိတယ်” လို့ စလင်းမြို့နယ်ပြည်သူ့ကာကွယ်ရေးအဖွဲ့ ဒုတာဝန်ခံက ပြောပါတယ်။

စလင်းမြို့နယ်အတွင်းရှိ ကျေးရွာ ၁၀ ရွာခန့်က ပြည်သူတွေနဲ့ပြုလုပ်ကျင်းပခဲ့တာဖြစ်ပြီး ဒီနှစ်ဟာ မိုးခေါင်လွန်းတဲ့အခြေအနေဖြစ်တာကြောင့် စလင်းပကဖ ကဦးဆောင်ကာ ဒေသခံပြည်သူတွေလည်း စိတ်ပင်ပန်းမှု ခဏတာပြေပျောက်အောင် ဒီပွဲကိုပြုလုပ်ခဲ့တာလို့ ဆိုပါတယ်။

လွန်ဆွဲပွဲစခဲ့တဲ့ သြဂုတ် ၁၆ ရက်စပြီးမိုးရွာခဲ့တယ်လို့သိရပြီး ၄ လနီးပါးကြာမှ ရွာတဲ့ မိုးဖြစ်တဲ့အတွက် ဒေသခံတွေလည်း ဝမ်းသာနေကြတယ်လို့ သူကဆက်ပြောပါတယ်။

“(မိုးရွာတော့) သူတို့ကတော့ဝမ်းသာတာပေါ့၊ သူတို့ဝမ်းသာတာမြင်တော့ ကျနော်တို့ ပိုဝမ်းသာတာပေါ့၊ ပွဲနေ့က ဒီလိုပွဲလေးလုပ်ပေးတဲ့အတွက် သူတို့အနေနဲ့ ခဏတာ ပျော်ကြရွှင်ကြတယ်။ စိတ်ထွက်ပေါက်လေးတခု ရသွားတဲ့အတွက် သူတို့ပျော်တာမြင်ရတော့ ကျနော်တို့ ပိုပြီးပျော်ရပါတယ်၊” လို့ ဆိုပါတယ်။

ဒေသခံတွေအနေနဲ့ တော်လှန်ရေးကာလအတွင်း စိတ်ပင်ပန်းမှုတွေရှိနေကြတဲ့အပြင် စစ်ကောင်စီတပ်တွေရဲ့ စစ်ကြောင်းထိုးတာတွေကိုလည်း ရင်ဆိုင်နေကြရတာကြောင့် နောက်ပိုင်းတွေမှာလည်း ပျော်ပွဲရွှင်ပွဲလေးတွေ ပြုလုပ်ပေးဖို့ရှိတယ်လို့ သူကဆက်ပြောပါတယ်။

စလင်းမြို့နယ်ထဲက ကျေးရွာတွေမှာ စိုက်ပျိုးရေးအဓိကလုပ်ဆောင်ကြတာဖြစ်ပြီး မိုးမရွာရင် အဝီစီတွင်းတွေက ရေတင်စိုက်ပျိုးကြရတာဖြစ်လို့ မိုးရွာရင်တော့ ရေတင်ရတဲ့စရိတ် သက်သာကြတယ်လို့ သိရပါတယ်။

စာတည်း – လင်း

ဝက်လက်၊ ဩဂုတ် ၉၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်မှာ ဝက်လက်မြို့နယ်ကျောင်းသားများသမဂ္ဂက ဦးဆောင်ပြီး ၃၇ နှစ်မြောက် ၈၈၈၈ လူထုအရေးတော်ပုံအထိမ်းအမှတ် အခမ်းအနားပြုလုပ်ခဲ့တယ်လို့ ဝက်လက်မြို့နယ်ကျောင်းသားသမဂ္ဂဥက္ကဌ ကိုဟန်မင်းစိုးက မြေလတ်အသံကို ပြောပါတယ်။

အခမ်းအနားကို ဝက်လက်မြို့နယ်ကျောင်းသားမျာရသမဂ္ဂ (ဗကသများအဖွဲ့အချုပ်)၊ ဝက်လက်မြို့နယ် အမျိုးသားဒီမိုကရေစီအဖွဲ့ချုပ်၊ ဝက်လက်မြို့နယ် ပကဖ၊ ဝက်လက်မြို့နယ် ပအဖ၊ ကျန်းမာရေးဌာန၊ CDM အစုအဖွဲ့တွေ၊ လူငယ်လွတ်မြောက်ရေးတပ်ဖွဲ့ – YLA နဲ့ ဝက်လက်မြို့နယ် သပိတ်ဦးဆောင်ကော်မတီတို့က ပူးပေါင်းလုပ်ဆောင်ခဲ့တာလို့ သိရပါတယ်။

“ပူးပေါင်းလုပ်ဆောင်ခဲ့တာက ဝက်လက်မြို့နယ် အမျိုးသားဒီမိုကရေစီအဖွဲ့ချုပ်ကရယ်၊ ကျနော်တို့ မြို့နယ်ပကဖ၊ မြို့နယ် ပအဖ၊ ကျနော်တို့ ကျန်းမာရေးဌာနရယ်၊ CDM အစုအဖွဲ့တွေရယ်၊ နောက်ပြီးတော့ လူငယ်လွတ်မြောက်ရေးတပ်ဖွဲ့ – YLA ရယ်၊ သပိတ်ဦးဆောင်ကော်မတီရယ် ဒါတွေနဲ့ ကျနော်တို့ ပူးပေါင်းလုပ်ဆောင်ခဲ့တာပါ။”လို့ ဝက်လက်မြို့နယ်ကျောင်းသားသမဂ္ဂဥက္ကဌ ကိုဟန်မင်းစိုးက မြေလတ်အသံကို ပြောပါတယ်။

လူထုအင်အား ၁၀၀ နီးပါးတက်ရောက်ခဲ့ပြီး အခမ်းအနားကို အစီအစဉ် ၇ ခုနဲ့ ပြုလုပ်ခဲ့ပြီး မြို့နယ်သမဂ္ဂကလည်း မိန့်ခွန်းပြောခဲ့တယ်လို့ ဆိုပါတယ်။

“ကျနော်တို့ အခမ်းအနားအစီအစဉ် ၇ ရပ်နဲ့ လုပ်ခဲ့တာပါ၊ ကျနော်တို့ ဗကသများအဖွဲ့ချုပ်က ပေးပို့တဲ့ သဝဏ်လွှာ ဖတ်ကြားခြင်းအစီအစဉ်ပါတယ်၊ ကျနော်တို့ မြို့နယ်သမဂ္ဂက ရဲဘော်တွေ မိန့်ခွန်းပြောတဲ့ အစီအစဉ််ပါတယ်၊ ပြီးတော့ ကျနော်တို့ မဟာမိတ်အဖွဲ့အစည်းတွေကနေ အမှတ်တရစကား ပြောကြားတဲ့ အစီအစဉ်တွေပါတယ်၊ ပြီးတော့ ကျနော်တို့ ကမ္ဘာမကြေဘူးသီချင်းနဲ့ အခမ်းအနားကို ပိတ်သိမ်းခဲ့တာပါ။”လို့ ကိုဟန်မင်းစိုးက ပြောပါတယ်။

ဒီအခမ်းအနားမှာပဲ ဝက်လက်မြို့နယ်ကျောင်းသားများသမဂ္ဂအနေနဲ့ ပြည်သူလူထုရဲ့တင်ပြချက်တွေကို ချက်ချင်းတုံ့ပြန် ဆောင်ရွက်ပေးဖို့၊ ချက်ချင်းတုံ့ပြန်ဆောင်ရွက်ဖို့ ပျက်ကွက်ခဲ့ရင်လည်း ပျက်ကွက်သူတွေကို ပထမအဆင့်သတိပေးရေး၊ ဒုတိယအဆင့် စစ်ဆေးအပြစ်ပေးရေး၊ ကျောင်းသားသမဂ္ဂ လွတ်လပ်စွာဖွဲ့စည်းတည်ရှိခွင့်ကို အာမခံပေးရေး၊ တော်လှန်ရေးကာလ ပညာရေးစနစ်သစ် တည်ဆောက်တဲ့နေရာမှာ အားတက်သရောပါ၀င်နေတဲ့ သမဂ္ဂကျောင်းသားတိုင်းကို အကာအကွယ်ပေးရေး တို့ကိုပါ NUG အပါအဝင် အာဏာလက်ကိုင်တော်လှန်ရေးအဖွဲ့အစည်းတွေကို တောင်းဆိုခဲ့တယ်လို့ သိရပါတယ်။

စာတည်း – လင်း

မုံရွာ၊ ဩဂုတ် ၈၊ ၂၀၂၅။

စစ်ကိုင်းတိုင်း၊ မုံရွာမြို့နယ်မှာ ၃၇ နှစ်ပြည့် ၈၈၈၈ လူထုအရေးတော်ပုံ အထိမ်းအမှတ်အဖြစ် ထီးသပိတ်လှုပ်ရှားမှုပြုလုပ်ခဲ့တယ်လို့ မုံရွာ-အမြင့်လမ်းသပိတ်ဦးဆောင်ကော်မတီရဲ့ ထုတ်ပြန်ချက် အရသိရပါတယ်။

ဩဂုတ် ၈ ရက်ဒီမနက်ပိုင်းမှာ မုံရွာမြို့နယ်တနေရာမှာ မုံရွာ-အမြင့်လမ်း သပိတ်ဦးဆောင်ကော်မတီ ဦးဆောင်မှုနဲ့ တက်ကြွလှုပ်ရှားတဲ့လူငယ်တွေစုပေါင်းကာ ထီးသပိတ်ကိုပြုလုပ်ခဲ့တာလို့ သိရပါတယ်။

အလားတူ မုံရွာမြို့နယ်အတွင်းမှာ မုံရွာလူထုသပိတ်တိုက်ပွဲဦးဆောင်ကော်မတီနဲ့ တက်ကြွ လူငယ်များပူးပေါင်းပြီးတော့လည်း ၈၈၈၈ အရေးတော်ပုံလှုပ်ရှားမှုပြုလုပ်ခဲ့ပါတယ်။

ယနေ့မနက်ပိုင်းကစတင်ကာ စစ်ကောင်စီတပ်စွဲထားတဲ့ ဗောဓိတစ်ထောင်အပါအဝင် မုံရွာ – မန္တလေး လမ်းမကြီးပေါ်နဲ့ မုံရွာ မုဒ်ဦးရှေ့စတဲ့နေရာတွေမှာ ထီးသပိတ်အပါအဝင် ၈ အက္ခရာပါတဲ့ ဘောလုံး အင်္ကျီများဝတ်ဆင်ပြီး ၈၈၈၈ (Global Movement) ထီးသပိတ် လှုပ်ရှားမှုကို ပြုလုပ်ခဲ့တယ်လို့ သိရပါတယ်။

မြေလတ်အသံ၊ ဇူလိုင် ၂၆၊ ၂၀၂၅။

စစ်ကိုင်းတိုင်း(အထက်ပိုင်း)၊ ပင်လည်ဘူး မြို့သိမ်းတိုက်ပွဲနဲ့ အခြားစစ်ဆင်ရေးတွေမှာ တိုက်ပွဲဝင်ပြီး ပြန်လည်ရောက်ရှိလာတဲ့ ယင်းမာပင်ခရိုင် အမှတ် ၂၉ ပြည်သူ့ကာကွယ်ရေးတပ်ရင်း တပ်ဖွဲ့ ဝင်တွေကို ကြိုဆိုပွဲပြုလုပ်ပေးခဲ့တယ်လို့ ယင်းမာပင်မြို့နယ်ပြည်သူ့အုပ်ချုပ်ရေးအဖွဲ့(ပအဖ) ဆီက သိရပါတယ်။

ပင်လည်ဘူးမြို့တိုက်ပွဲတွေကနေ ဇွန်လအတွင်းမှာ ပြန်လည်ရောက်ရှိလာတဲ့ ယင်းမာပင်ခရိုင်တပ်ရင်း ၂၉ ဒေါင်းမင်းတပ်ခွဲက တပ်ဖွဲ့ဝင် ၃၀ ဦးကို ငွေကျပ် ၁ သိန်းစီထောက်ပံ့ပေးခဲ့ကာ ကြိုဆိုပွဲမှာ နေ့လယ်စာကျွေးမွေးခဲ့တယ်လို့ ဆိုပါတယ်။

” ဂုဏ်ပြုပွဲလုပ်ပေးတာနှစ်ကြိမ်ရှိပြီ။ ရဲဘော်တွေကို အားဖြစ်စေချင်လို့ လုပ်ပေးခဲ့တာဖြစ်တယ်။ ခုပြုလုပ်ပေးတာရောဆို နှစ်ကြိမ်ရှိပြီ” လို့ ယင်းမာပင်မြို့နယ်ပြည်သူ့အုပ်ချုပ်ရေးအဖွဲ့ဝင်တဦးက မြေလတ်အသံကို ပြောပါတယ်။

ကြိုဆိုပွဲကို ဇူလိုင် ၂၄ ရက်က ယင်းမာပင်မြို့နယ်တနေရာမှာပြုလုပ်ခဲ့တာဖြစ်ပြီး ယင်းမာပင်ခရိုင်ကွပ်ကဲရေးမှူး ဗိုလ်သံမဏိ၊ ကနီမြို့နယ်ပြည်သူ့အုပ်ချုပ်ရေးအဖွဲ့ဝင်များ၊ ယင်းမာ​ပင်မြို့နယ်သပိတ်အင်အားစုတွေနဲ့ အခြားသောတော်လှန်ရေးအင်အားစုတွေကတက်ရောက်ခဲ့ကြပြီး စစ်ကောင်စီရဲ့လေကြောင်းအန္တရာယ်ကြောင့် အကျဥ်းချုံးကျင်းပခဲ့တယ်လို့သိရပါတယ်။

ပင်လည်ဘူးမြို့ကို KIA၊ PDF ပူးပေါင်းတပ်ဖွဲ့တွေက ၂ လနီးပါးကြာတိုက်ခိုက်ခဲ့ပြီးနောက် ၂၀၂၄ ၊ အောက်တိုဘာ ၈ ရက်မှာ မြို့ကို အလုံးစုံသိမ်းပိုက်နိုင်ခဲ့တာဖြစ်ပြီး လက်ရှိအထိ ၁ နှစ်နီးပါးအကြာ တော်လှန်ရေးအင်အားစုတွေက ထိန်းချုပ်ထားတာလည်း ဖြစ်ပါတယ်။

စာတည်း – ဟိန်းစံ

မြိုင်၊ ဇူလိုင် ၂၄၊ ၂၀၂၅။

မကွေးတိုင်း၊ ဆိပ်ဖြူမြို့နယ်၊ လက်ဆည်ရဲစခန်းသိမ်းတိုက်ပွဲမှာ ကျဆုံးခဲ့တဲ့ People’s Democratic Army – PDA မှ တော်လှန်ရေးတပ်ဖွဲ့ဝင် ၁ ဦးအတွက် ကျဆုံးခြင်းရက်လည်ကို ဇူလိုင် ၂၃ ရက်မနေ့က ပြုလုပ်ခဲ့တယ်လို့ အဲ့ဒီအဖွဲ့ဆီက သိရပါတယ်။

မြိုင်မြို့နယ်အတွင်းမှာ ရက်လည်ပြုလုပ်ခဲ့တာဖြစ်ပြီး ဘုန်းကြီး‌ကျောင်းတွေမှာ ဆွမ်းကပ်၊ တရားနာတာတွေ ပြုလုပ်ခဲ့ကြတယ်လို့ People’s Democratic Army – PDA တပ်ဖွဲ့ဝင်အုပ်စိုးက ပြောပါတယ်။

“စစ်ဒေသအသီးသီးမှာ လုပ်ခဲ့တာပါ၊ နေရာတိုင်းမှာပဲ ဘုန်းကြီးဆွမ်းကပ်ခဲ့တာပါ၊ ဘုန်းကြီးတွေ ပင့်ခေါ်တာတော့ မဟုတ်ဘူး၊ ဘုန်းကြီးကျောင်းတွေမှာပဲ ဘုန်းကြီးဆွမ်းကပ်တာပြုလုပ်ခဲ့တာ၊” လို့ ဆိုပါတယ်။

အသက် ၃၆ နှစ်အရွယ် တော်လှန်ရေးတပ်ဖွဲ့ နဂါးဟာ ဇူလိုင် ၁၇ ရက်က လက်ဆည်ရဲစခန်း သိမ်းတိုက်ပွဲမှာကျဆုံးခဲ့တာဖြစ်ပြီး တော်လှန်ရေးကာလအတွင်းမှာ People’s Democratic Army – PDA က တပ်ဖွဲ့ဝင် ၃ ဦး ကျဆုံးခဲ့တယ်လို့ သိရပါတယ်။

စာတည်း – လင်း

မင်းဘူး၊ ဇူလိုင် ၁၅၊ ၂၀၂၅။

မကွေးတိုင်း၊ မင်းဘူးမြို့နယ်က ကျေးရွာပေါင်း ၂၀မှာ စစ်ကောင်စီတပ်ရဲ့လေကြောင်းအန္တရာယ်ကာကွယ်ရေး၊ မြေမြှုပ်မိုင်းနဲ့ထပ်ဆင့်ပေါက်ကွဲစေတတ်တဲ့ စစ်လက်ကျန်ပစ္စည်းအန္တရာယ်တွေနဲ့ပတ်သက်ပြီး အသိပညာပေးဟောပြောတာနဲ့ တော်လှန်ရေးရုပ်ရှင်ပြသတာတွေပြုလုပ်ခဲ့တယ်လို့ မင်းဘူးခရိုင် အမှတ် ၅ တပ် ရင်းဆီက သိရပါတယ်။

အမျိုးသားညီညွတ်ရေးအစိုးရ-NUG ကာကွယ်ရေးဝန်ကြီးဌာန၊ စစ်ရုံးချုပ်ကပေးပို့တဲ့ ပြည်သူလူထုလေကြောင်းအန္တရာယ်၊ မိုင်းအန္တရာယ်အသိပညာပေး ရုပ်သံမှတ်တမ်းတွေနဲ့တကွ ဧပြီကနေ ဇူလိုင်လအထိ ကျေးရွာတွေမှာ ၁ ရွာကို ၁ ရက်ကြာ ရှင်းလင်းအသိပညာပေးဟောပြောတာတွေ လုပ်ဆောင်ခဲ့တာလို့ ဆိုပါတယ်။

” လေကြောင်းလာလို့ရှိရင် ကြိုတင်ကာကွယ်ပြုလုပ်နိုင်တဲ့အရာတွေ ကြိုတင်ပြင်ဆင်ရမဲ့အရာတွေ ပြီးရင်ဗုံးခိုကျင်းနဲ့ပတ်သက်တာတွေ အဓိကထားပြီး ရုပ်သံမှတ်တမ်းပြသတာမျိုးတွေ ကျနော်တို့ဘက်က ဟောပြောဆောင်ရွက်တာမျိုးတွေပြုလုပ်ခဲ့ပါတယ်။ မိုင်းနဲ့ပတ်သက်လို့ကတော့ စစ်ကျန်လက်နက်ပစ္စည်းတွေ ပြီးလို့ရှိရင် တိုက်ပွဲဖြစ်ပြီးသားနေရာတွေ အသွားအလာမပြုလုပ်ဖို့နဲ့ စစ်လက်နက်လက်ကျန်ပစ္စည်းတွေ တွေ့ရှိရင်လည်း သက်ဆိုင်ရာအဖွဲ့အစည်းတွေ အကြောင်းကြားဖို့ မိုင်းနဲ့ပတ်သက်ရင်လည်း ဒေသအတွင်း မိုင်းထောင်ထားတဲ့နေရာတွေ၊ သတ်မှတ်ထားတဲ့နေရာတွေကို မသွားလာဖို့ပါ၊ ကျနော်တို့ဘက်ကို မချိတ်ဆက်ပဲ တောင်ယာစိုက်ပျိုးတာမျိုး လမ်းဟောင်းတွေ အသုံးပြုသွားလာတာမျိုး မလုပ်အောင် အဓိကထားဟောပြောခဲ့တာ” လို့ မင်းဘူးခရိုင် အမှတ် ၅ တပ်ရင်းမှူး ဗိုလ်မိုးကြိုးက ပြောပါတယ်။

အသိပညာပေးဟောပြောမှုတွေအပြင် ကျေးရွာပြည်သူတွေကို နိုင်ငံတကာမှာပြသနေတဲ့ တော်လှန်ရေးရုပ်ရှင်ဇာတ်လမ်းတိုတွေကိုလည်း ပြသခဲ့တယ်လို့ ဆိုပါတယ်။

” တော်လှန်ရေးမှတ်တမ်းရုပ်ရှင်ဆိုတာ ကျနော်တို့အခုလက်ရှိ အမျိုးသားညီညွတ်ရေးအစိုးရ NUGဘက်ကနေပြီးတော့ ကိုပေါက်(ဒါရိုက်တာ)တို့ရိုက်ထားတဲ့ ဇာတ်လမ်းအတိုလေးတွေ အများအပြားပါတယ်၊ “သစ္စာ”၊ “မသောက်မိသောမိုးခါးရေ” စတဲ့ နိုင်ငံတကာမှာပြသနေတဲ့ ဇာတ်လမ်းတိုလေးတွေကို ပြသခဲ့တာပါ” လို့ ၎င်းက ဆက်ပြောပါတယ်။

စစ်ကောင်စီတပ်ဟာ ပြည်သူလူထုကိုအဓိကပစ်မှတ်ထားပြီး ဘုန်းကြီးကျောင်း၊ စာသင်ကျောင်းတွေကို လေကြောင်းကနေပစ်ခတ်တိုက်ခိုက်နေတာကြောင့် ပြည်သူတွေ ကြိုတင်ရှောင်ရှားနိုင်ရန် အခုလို ဟောပြောအသိပညာပေးတာတွေပြုလုပ်ရတာဖြစ်တယ်လို့ ၎င်းက ဆိုပါတယ်။

စာတည်း – ဟိန်းစံ