တောင်တွင်းကြီး၊ ဇူလှိုင် ၂၂၊ ၂၀၂၅။

မကွေးတိုင်း၊ တောင်တွင်းကြီးမြို့အထွက် တောင်တွင်း-မြို့သစ်လမ်းပိုင်းမှာ စစ်ဆေးရေးဝင်လုပ်ချိန် ဖမ်းမိတဲ့ စစ်ကောင်စီဗိုလ်ကြီး ၁ ဦးကို ပစ်ခတ်ရာသေဆုံးခဲ့တယ်လို့ ဗိဿနိုးပြည်သူ့ကာကွယ်ရေး တပ်မတော် ဆီကသိရပါတယ်။

ဇူလိုင် ၂၂ ရက်ဒီမနက်ပိုင်းမှာ ဒေသခံတော်လှန်ရေးတပ်တွေက လမ်းပိုင်းစစ်ဆေးရေးလုပ်နေချိန် မြဝတီ ၁၀၁၈ နယ်ခြားစောင့်တပ်မှ မြစ်ကြီးနားအခြေစိုက် ခလရ ၂၉ ကိုပြောင်းရွေ့ဖို့ မန္တလေးကို ထွက်ခွာလာတဲ့ ဗိုလ်ကြီးနိုင်သူရကို ဖမ်းမိခဲ့တာလို့ ဆိုပါတယ်။

“တောင်တွင်း-မြို့သစ်လမ်းပိုင်းတနေရာပေါ့။ အဓိကကတော့ ကျနော်တို့ သူ့ကားကိုပဲမဟုတ်ဘူး၊ ကျန်တဲ့ကားတွေကိုရော ရှောင်တခင်ဝင်ပြီး စစ်တဲ့အချိန်မှာ ကံဆိုးစွာနဲ့ သူနဲ့တွေ့လိုက်ရတယ်။ သူ့ကိုစစ်မိတော့ မသင်္ကာတော့ ဖုန်းစစ်တယ်။ စာရွက်စာတန်းတွေစစ်တော့ တပ်အပြောင်းအရွေ့ စာရွက်စာတန်းတွေ တွေ့တယ်။ ဖုန်းထဲမှာလည်း တချို့အချက်အလက်တွေ တွေ့တယ်”လို့ ကိုတက်တူးကပြောပါတယ်။

ဗိုလ်ကြီးနိုင်သူရကိုဖမ်းမိချိန်မှာ အရပ်ဝတ်အထုပ်အပိုးတွေနဲ့ ၁ ဦးတည်းဖမ်းမိခဲ့တာဖြစ်ပြီး စခန်းကို ဖမ်းဆီးသွားချိန်မှာ တော်လှန်ရေးတပ်ဖွဲ့ဝင်တွေကို ပြန်လည်ခုခံတိုက်ခိုက်တဲ့အပြင် စခန်းကိုပါ အန္တရာယ်ပေးမှာစိုးရိမ်တဲ့အတွက် စခန်းမှာပစ်သတ်ခဲ့တယ်လို့ ဆိုပါတယ်။

“သူတို့အမြန်လမ်းကို အသုံးပြုဖို့ အရမ်းကြောက်နေကြတာ၊ လမ်းဟောင်းကိုပဲ အရပ်ဝတ်နဲ့ သာမန်ပြည်သူလိုပဲသွားလာကြတာ။ ကျနော်တို့ စစ်လို့ဆေးလို့သာ ပေါ်လာတာပေါ့။ မြစ်ကြီးနားကိုသွားမှာဆိုတော့ မန္တလေးမှာလေယာဉ်စီးရမှာ တကယ်တော့ ဗိုလ်တယောက်အကူလည်း ပါရမှာ သို့ပေမယ့် အကူပါမလာဘူး။ သူတို့ရဲ့ သက်စောင့်သေနတ်တောင်ပါမလာဘူးဆိုတော့ သူတို့ ဘယ်လိုစီစဉ်လဲတော့မသိဘူး” လို့ ကိုတက်တူးက ပြောပါတယ်။

စစ်ကောင်စီတပ်ဖွဲ့ဝင်တွေအနေနဲ့ လမ်းဟောင်းတွေကိုသာအသုံးပြုနေကြပြီး တောင်တွင်းကြီးမြို့နား တဝိုက်မှာလည်း စစ်ကြောင်းထိုးတာတွေရှိနေတယ်လို့ ကိုတက်တူးက ပြောပါတယ်။

စာတည်း – လင်း

ပစ်ခတ်ဖို့သွားတဲ့ တော်လှန်ရေးတပ်ဖွဲ့ဝင် ၁ ဦးလည်းဓါးထိုးခံရပြီးသေဆုံး

တောင်တွင်းကြီး၊ ဇူလိုင် ၂၊ ၂၀၂၅။

မကွေးတိုင်း၊ တောင်တွင်းကြီးမြို့နယ်၊ အိုးပေါက်အုပ်စု၊ အိုးပေါက်ကျေးရွာက ပျူစောထီးခေါင်းဆောင် အုပ်ချုပ်ရေးမှူး ပစ်ခတ်ခံရပြီးသေဆုံးခဲ့တယ်လို့ ပုဏ္ဏဝတီ ပြည်သူ့ကာကွယ်ရေးတပ် (တောင်တွင်းကြီး) တိုက်ခိုက်ရေးခေါင်းဆောင်ဆီက သိရပါတယ်။

ပစ်ခတ်ခံရသူဟာ အသက် ၆၀ နှစ်အရွယ် ဘိုကွီး(ခ)ခင်မောင်လတ်ဆိုသူဖြစ်ပြီး ဇွန် ၂၉ ရက် ည ၁၀ နာရီခွဲဝန်းကျင်က သူ့နေအိမ်မှာပစ်ခတ်ခဲ့တာလို့ ဆိုပါတယ်။

“သူ့ရဲ့ ဦးခေါင်းကို ၂ ချက်ပစ်ခဲ့တယ်၊ ဝမ်းဗိုက်ကို ၃ ချက်ပစ်ခဲ့တယ်၊ သူကထွက်ပြေးမယ်လုပ်တဲ့အချိန် ကျနော်တို့ ပစ်ခတ်ရှင်းလင်းတာ၊” လို့ ပုဏ္ဏဝတီပြည်သူ့ကာကွယ်ရေးတပ် တိုက်ခိုက်ရေး ခေါင်းဆောင်က ပြောပါတယ်။

ဦးခင်မောင်လတ်ဟာ စစ်မှုထမ်းကြေးကောက်တာ၊ ပဲခူးရိုးမက ဆင်းလာတဲ့သစ်လှည်း၊ ဝါးလှည်းတွေကို ဆက်ကြေးကောက်တာ၊ ဖမ်းဆီးရိုက်နှက်တာတွေလုပ်နေသူဖြစ်တယ်လို့ သူကဆက်ပြောပါတယ်။

“တောင်တွင်းကြီး-ဆတ်သွား နေပြည်တော်လမ်းဘေး အိုးပေါက်ကျေးရွာမှာနေပြီးတော့ ပဲခူးရိုးမက ဆင်းလာတဲ့ သစ်လှည်း၊ ဝါးလှည်းတွေကို သူက ဂိတ်ဖွင့်ဖမ်းဆီးပြီး ဆက်ကြေးကောက်တယ်၊ ဖမ်းဆီး ရိုက်နှက်တယ်၊ နှိပ်စက်တယ်၊ သူ့ကျေးရွာမှာလည်း ပျူစောထီးဖွဲ့နိုင်ဖို့ ပျူစောထီးသင်တန်းတွေပေးဖို့ ဖိအားပေးတာတွေလုပ်တယ်”လို့ အထက်ပါတိုက်ခိုက်ရေးခေါင်းဆောင်က ဆက်ပြောပါတယ်။

ဘိုကွီး(ခ)ခင်မောင်လတ်ရဲ့အလောင်းကို နေအိမ်ရှေ့မှာထားခဲ့တာကြောင့် ဇွန် ၃၀ ရက်မှာ ဆိုင်ကယ် ၈ စီးနဲ့ စစ်ကောင်စီတပ်ဖွဲ့ဝင်တွေလာကြည့်ပြီး ဇူလိုင် ၂ ရက်ဒီကနေ့မှာတော့ အလောင်းကို အိုးပေါက်ရွာမှာ သင်္ဂြိုဟ်တယ်လို့သိရကြောင်း တိုက်ခိုက်ရေးခေါင်းဆောင်ကပြောပါတယ်။

ဇွန် ၂၉ ရက်မှာပဲ ဦးခင်မောင်လတ်ကို ပစ်ခတ်ဖို့ဝင်သွားတဲ့ အသက် ၂၆ နှစ်အရွယ် တော်လှန်ရေးတပ်ဖွဲ့ဝင် ၁ ဦးလည်း နေအိမ်ထဲကိုဝင်ချိန်နော က်ထပ် ပျူစောထီးဝပ်ဖွဲ့ဝင် ၁ ဦးက ဓါးနဲ့ထိုးခဲ့တာကြောင့် သေဆုံးခဲ့တယ်လို့ ဆိုပါတယ်။

“သူ့နေအိမ်ထဲကို ကျနော့်ရဲဘော်တဦးကဝင်သွားတဲ့အချိန်မှာ ပျူစောထီးအဖွဲ့ဝင်တဦးက အိမ်ထဲမှာ ပုန်းပြီးအလစ်အငိုက် ဓါးနဲ့ထိုးပြီးထွက်ပြေးသွားတယ်၊ ကျနော်တို့ ရဲဘော်တဦးတော့ ကျဆုံးသွားတယ်”လို့ သူက ဆက်ပြောပါတယ်။

သေဆုံးသွားတဲ့တပ်ဖွဲ့ဝင်ရဲ့အလောင်းကိုပြန်သယ်ပြီး ဇွန် ၃၀ ရက် ညနေ ၃ နာရီလောက်မှာ သင်္ဂြိုဟ်ခဲ့တယ်လို့ ပုဏ္ဏဝတီပြည်သူ့ကာကွယ်ရေးတပ် တိုက်ခိုက်ရေး ခေါင်းဆောင်က ပြောပါတယ်။

ဒီပစ်ခတ်မှုကို ပြည်သူ့ကာကွယ်ရေးတပ် ပုဏ္ဏဝတီ (တောင်တွင်းကြီး)၊ သရက်ခရိုင် အမှတ် ၅ တပ်ရင်း (ဆင်ပေါင်ဝဲမြို့နယ်)နဲ့ မကွေးတောင်ပိုင်းပြည်သူ့ကာကွယ်ရေးအဖွဲ့ တို့က ပူးပေါင်းလုပ်ဆောင်ခဲ့တာ လို့ သိရပါတယ်။

ပြီးခဲ့တဲ့ ဧပြီ ၂၃ ရက်ကလည်း မကွေးတိုင်း၊ ဆင်ပေါင်ဝဲမြို့နယ်၊ ဓနုံးမြှောင်ဂိတ်မှ ဗိုလ်ကြီးဖြိုးမောင် ဦးဆောင်ပြီး ဝါးစေ့မြှောင်ဂိတ်က ကားနဲ့တက်လာတဲ့ စစ်ကြောင်းကို ပြည်သူ့ကာကွယ်ရေးတပ် ပုဏ္ဏဝတီ (တောင်တွင်းကြီး) အဖွဲ့က ဝါးစေ့မြှောင်ဂိတ်အနီးမှာ ပစ်ခတ်တိုက်ခိုက်ခဲ့ရာ စစ်ကောင်စီဘက်က ၈ ဦးသေဆုံးခဲ့ပါ‌သေးတယ်။

စာတည်း – လင်း

တောင်တွင်းကြီး၊ ဇွန် ၁၈၊ ၂၀၂၅။

မကွေးတိုင်း၊ တောင်တွင်းကြီးမြို့မှာ လိုင်စင်မဲ့ယာဥ်စီးနင်းမှုနဲ့ထောင်ကျနေသူ အမျိုးသား ကိုဗစ်ကြောင့်သေဆုံးသွားတယ်လို့ ဒေသခံတွေထံက သိရပါတယ်။

သေဆုံးသူဟာ တောင်တွင်းကြီးမြို့၊ ရွှေအိုး ၁ ရပ်ကွက်၊ အပိုင်း ၃ နေသူ အသက် ၃၁ နှစ်အရွယ် ကိုဘိုဘို၀င်းဆိုသူဖြစ်ပြီး ဇွန်လ ၁၇ ရက်ညမှာ မကွေးပြည်သူ့ဆေးရုံမှာ သေဆုံးသွားတာလို့ဆိုပါတယ်။

“ဆေးရုံတက်က လွန်ခဲ့တဲ့ ၃ ရက်လောက်ကတည်းက တက်နေရတာ။ ပုံမှန်ဖျားနာပုံစံနဲ့တက်တာ။ မနေ့ညက ၁၀ နာရီလောက်မှာ ဆုံးသွားတာ။ မကွေးထောင်ကနေ ဆေးရုံလာတက်ရတာ။ ကိုဗစ်လူနာဖြစ်ကြောင်းဆေးရုံက အတည်ပြုချက်ရတယ်”လို့ ဒေသခံတဦးကပြောပါတယ်။

သေဆုံးသွားတဲ့ ကိုဘိုဘိုဝင်းရဲ့အလောင်းကိုတော့ နေအိမ်ပြန်မသယ်တော့ဘဲ ယနေ့မနက်ပိုင်းမှာ မကွေးမြို့၊ ချမ်းမြေသာယာသုသာန်မှာ သဂြိုဟ်လိုက်တယ်လို့ သိရပါတယ်။

ကိုဘိုဘိုဝင်းဟာ ဇွန် ပထမအပတ်အတွင်းမှာ တောင်တွင်းကြီးမြို့မှာ ပလုံကောက်ဖို့ဆိုင်ကယ်နဲ့သွားစဥ် လိုင်စင်မဲ့ယာဥ် စစ်ဆေးနေတဲ့ စစ်ကောင်စီအဖွဲ့တွေနဲ့တွေ့ပြီး ဖမ်းဆီးခံလိုက်ရတာပါ။

အဲဒီနောက် ပို့ကုန်သွင်းကုန်ပုဒ်မ ၈ နဲ့တရားစွဲဆိုခဲ့ရပြီး တောင်တွင်းကြီးတရားရုံးကနေ နေ့ချင်း ထောင်တလကျခံဖို့ အမိန်ချခံရပြီးနောက် မကွေးထောင်ကို ပို့ဆောင်ခံလိုက်ရတာလို့ သိရပါတယ်။

ကိုဗစ်ရောဂါနဲ့သေဆုံးသူက မကွေးအကျဥ်းထောင်ကနေဆေးရုံတက်လာရသူဖြစ်တာကြောင့် ထောင်အတွင်းမှာ ရောဂါကူးစက်နိုင်သူတွေရှိနေနိုင်ပြီး အရေအတွက် ဘယ်လောက်ထိရှိနေတယ်ဆိုတာကိုတော့မသိရသေးဘူးလို့ ဆိုပါတယ်။

မကွေးမြို့မှာ ယခုလို ကိုဗစ်လူနာပြန်တွေ့ရတာ ပထမဆုံးအကြိမ်ဖြစ်ပြီး သေဆုံးတာကလည်း ပထမဆုံးဖြစ်ပါတယ်။

ပြီးခဲ့တဲ့ ၂၀၂၂ ခုနှစ် ကိုဗစ်တတိယလှိုင်းကာလက မကွေးမြို့နယ်အတွင်းမှာ ကိုဗစ်ကြောင့် သေဆုံးသူ ၃၀၀ ကျော်ရှိခဲ့တယ်လို့ ဒေသလူမှုကူညီရေးအသင်းတွေထံက သိရပြီး မြေပြင်မှာ ပိုများနိုင်တယ်လို့ သိရပါတယ်။

စာတည်း – လင်း

တောင်တွင်းကြီး၊ မတ် ၁၃၊ ၂၀၂၅။

မကွေးတိုင်း၊ တောင်တွင်းကြီးမြို့နယ်၊ ပရပ်ကြယ်တိုက်နယ်၊ ညာတောအုပ်စု၊ ညာတောရွာ အုပ်ချုပ်ရေးမှူးဟောင်း ပစ်ခတ်ခံရပြီးသေဆုံးခဲ့တယ်လို့ Magway Guerrilla Warfare – မကွေးပြောက်ကျားတပ်ဖွဲ့ဆီက သိရပါတယ်။

အုပ်ချုပ်ရေးမှူးဟောင်း အသက် ၅၀ အရွယ် အောင်လွင် ကို မတ် ၁၁ ရက်မနက် ၈ နာရီခန့်က ညာတောရွာအထွက်မှာ ဒေသခံကာကွယ်ရေးတပ်ဖွဲ့ဝင်တွေကပစ်ခတ်ခဲ့တာလို့ ဆိုပါတယ်။

“ညာတောကျေးရွာကနေ ဆပ်သွားရွာကိုအသွား ရွာအထွက်မြေနီလမ်းဖွင့်ဖြိုးရေးလမ်းပေါ်မှာ ရှင်းလင်းခဲ့တာ၊ ဦးခေါင်းကိုပဲ ၂ ချက်ပစ်ခတ်ခဲ့တာ။”လို့ မကွေးပြောက်ကျားတပ်တာဝန်ခံ ကံကြီးမောင်က ပြောပါတယ်။

ဦးအောင်လွင်ဟာ စစ်အာဏာမသိမ်းခင်က အုပ်ချုပ်ရေးမှူးလုပ်ခဲ့သူဖြစ်ပြီး အာဏာသိမ်းပြီးနောက် သူ့နေရာမှာတခြားတဦးအစားထိုးဝင်ရောက်လာပေမယ့် လက်ရှိမှာစစ်ကောင်စီနဲ့ပေါင်းပြီး စစ်မှုထမ်းကြေးကောက်တာတွေ လုပ်ပေးနေသူဖြစ်တယ်လို့ ဆိုပါတယ်။

“လက်ရှိမြို့နယ်ရဲ့ အထွေထွေအုပ်ချုပ်ရေးအောက်မှာ တာဝန်ထမ်းဆောင်နေတဲ့ ကျော်သူက သူ့ (ဦးအောင်လွင်)ရဲ့တူတော်စပ်တာ၊ မိန်းမနဲ့ပတ်သက်ပြီး တော်တာ။ ရှင်းတုန်းကတော့ ၂ ဦးစလုံးကိုရှင်းတာ၊ ထွေအုပ်စာရေးကျော်သူနောက်ကို ကျနော်တို့ ရွာထဲလိုက်တဲ့အလိုက်မှာ အကြောင်းတခုခုကြောင့် လွတ်မြောက်သွားခဲ့တာ။” လို့ မကွေးပြောက်ကျားတပ်တာဝန်ခံ ကံကြီးမောင်က ပြောပါတယ်။

ဒီပစ်ခတ်မှုကို Magway Guerrilla Warfare မကွေးပြောက်ကျားတပ်၊ Dragon King People’s Defence Force၊ နဂါးမင်းပြည်သူ့ကာကွယ်ရေးအဖွဲ့တောင်တွင်းကြီးနဲ့ Taungdwingyi Fighter Force တို့က ပူးပေါင်းလုပ်‌ဆောင်ခဲ့တာဖြစ်ပြီး ပစ်ခတ်ပြီးနောက် ဦးအောင်လွင်ဆီကနေ ဖုန်း ၁ လုံး သိမ်းဆည်းခဲ့တယ်လို့ ဆိုပါတယ်။

ပစ်ခတ်မှုဖြစ်ပြီးနောက် ပရပ်ကြယ်ရဲစခန်းနဲ့ ဆပ်သွားရဲစခန်းက ရဲ ၁၂ ဦးလောက်က အလောင်းစစ်ဆေးပြီးတော့ ပြန်သွားကြတယ်လို့ သိရပါတယ်။

ပြီးခဲ့တဲ့ မတ် ၆ ရက်ကလည်း တောင်တွင်းကြီးမြို့နယ်၊ ပရပ်ကြယ်အုပ်စု၊ ကန်ကြီးကုန်းကျေးရွာက ပြည်သူတွေဆီက စစ်မှုထမ်းကြေးကောက်နေတဲ့ အုပ်ချုပ်ရေးမှူးကိုလည်း Magway Guerrilla Warfare မကွေးပြောက်ကျားတပ်က ပစ်ခတ်ရှင်းလင်းခဲ့ပါသေးတယ်။

စာတည်း – လင်း

တောင်တွင်းကြီး၊ မေ ၂၂၊ ၂၀၂၅။

မကွေးတိုင်း၊ တောင်တွင်းကြီးမြို့နယ်၊ ပရပ်ကြယ်တိုက်နယ်၊ ဂွေးတောက်ခုန်ကျေးရွာက အမှုပွဲစား ဆိုသူ အမျိုးသား ၁ ဦးကို ပစ်ခတ်ခံရပြီးသေဆုံးခဲ့တယ်လို့ Magway Guerrilla Warfare မကွေးပြောက်ကျားတပ်ဆီက သိရပါတယ်။

ပစ်ခတ်ခံရသူဟာ အသက် ၅၀ နှစ်အရွယ် ရဲခိုင် ဆိုသူဖြစ်ပြီး မေ ၂၀ ရက် နေ့လယ် ၁၂ နာရီခွဲခန့်မှာ ကာကွယ်ရေးတပ်ဖွဲ့တွေက ပစ်ခတ်ခဲ့တယ်လို့ ဆိုပါတယ်။

“ရဲခိုင်က ရပ်ရွာတွေမှာအမှုတွေရှိခဲ့ရင် ရဲစခန်းနဲ့ပေါင်းပြီး ရတဲ့အကျိုးအမြတ်ကို ရဲစခန်းနဲ့‌ ပေါင်းစားတဲ့အပြင် အုပ်ချုပ်ရေးမှူးပျံလွှားနဲ့ပေါင်းပြီး စစ်မှုထမ်းကြေးတွေကောက်တဲ့အတွက် ခုလိုပစ်ခတ်ခဲ့တာ” လို့ Magway Guerrilla Warfare မကွေးပြောက်ကျားတပ်တာဝန်ခံ ကိုကံကြီးမောင်က ပြောပါတယ်။

ကိုရဲခိုင်ရဲ့ လက်မောင်း၊ ပေါင်နဲ့ ဦးခေါင်းတို့ကို ၄ ချက်ပစ်ခတ်ခဲ့ပြီးနောက် ဖုန်း ၂ လုံးကို သိမ်းဆည်းခဲ့တယ်လို့ သူကဆက်ပြောပါတယ်။

“ပရပ်ကြယ်ရဲစခန်းကရဲတွေက ဂွေးတောက်ခုန်ကျေးရွာက သေဆုံးသူနေအိမ်ကိုလာပြီး အလောင်းကို ပရပ်ကြယ်တိုက်နယ်ဆေးရုံကိုသယ် စစ်ဆေးချက်တွေယူပြီး ပြန်သွားကြတယ်”လို့ ကိုကံကြီးမောင်က ပြောပါတယ်။

ဒီပစ်ခတ်မှုကို Magway Guerrilla Warfare မကွေးပြောက်ကျားတပ်၊ Taungdwingyi Fighter Force (LPDF) တို့က ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ မတ် ၁၁ ရက်ကလည်း မကွေးတိုင်း၊ တောင်တွင်းကြီးမြို့နယ်၊ ပရပ်ကြယ်တိုက်နယ်၊ ညာတောအုပ်စု ညာတောကျေးရွာ အုပ်ချုပ်ရေးမှူးဟောင်းကို Magway Guerrilla Warfare မကွေးပြောက်ကျားတပ်က ပစ်ခတ်ရှင်းလင်းခဲ့ပါသေးတယ်။

စာတည်း – လင်း

တောင်တွင်းကြီး၊ မတ် ၇၊ ၂၀၂၅။

မကွေးတိုင်း၊ တောင်တွင်းကြီးမြို့နယ်၊ ပရပ်ကြယ်အုပ်စု၊ ကန်ကြီးကုန်းကျေးရွာအုပ်ချုပ်ရေးမှူး သေနတ်ပစ်ခတ်ခံခဲ့ရပြီး သေဆုံးခဲ့တယ်လို့ Magway Guerrilla Warfare မကွေးပြောက်ကျားတပ်ဆီက သိရပါတယ်။

သေဆုံးသူမှာ ကန်ကြီးကုန်းကျေးရွာအုပ်ချုပ်ရေးမှူး အသက် ၅၅ ဝန်းကျင်အရွယ် ဝင်းသန်း ဖြစ်ပြီး မတ် ၆ ရက် နေ့လယ် ၁ နာရီခွဲဝန်းကျင်မှာ ၎င်းရဲ့နေအိမ်အတွင်းဝင်ရောက် ပစ်ခတ်ခဲ့တာလို့ ဆိုပါတယ်။

“ သူ့နယ်အတွင်း နေအိမ်မှာပင်ရှင်းလင်းခဲ့တာ။ ၄ ချက်ပစ်ခတ်ရှင်းလင်းခဲ့တာ၊ ပေါင် ၂ ချက်၊ ဦးခေါင်း ၂ ချက်ပစ်ခတ်ပြီး ရှင်းလင်းခဲ့တာ။” လို့ Magway Guerrilla Warfare မကွေးပြောက်ကျားတပ်တာဝန်ခံ ကံကြီးမောင်က ပြောပါတယ်။

အုပ်ချုပ်ရေးမှူး ဝင်းသန်းဟာ စစ်ကောင်စီတပ်ဖွဲ့ဝင်တွေနဲ့ပေါင်းပြီး ပြည်သူတွေဆီက လစဉ်စစ်မှုထမ်းကြေးကောက်ခံတာတွေ လုပ်ဆောင်နေတဲ့သူဖြစ်တယ်လို့ ဆိုပါတယ်။

ပစ်ခတ်မှုဖြစ်ပြီးတဲ့နောက် ပရပ်ကြယ်ရွာရဲစခန်းက စစ်ကောင်စီတပ်ဖွဲ့ဝင်တွေဟာ အခင်းဖြစ်ပွားတဲ့ကံကြီးကုန်းရွာကိုထွက်လာခဲ့ပေမယ့် ရွာအထိရောက်မလာဘဲ လမ်းကနေ ပရပ်ကြယ်ရဲစခန်းကို ပြန်လှည့်သွားတယ်လို့ သိရပါတယ်။

ပစ်ခတ်မှုကို Magway Guerrilla Warfare မကွေးပြောက်ကျားတပ်၊ Dragon King People’s Defence Forceနဲ့ နဂါးမင်းပြည်သူ့ကာကွယ်ရေးအဖွဲ့တောင်တွင်းကြီးတို့က ပူးပေါင်းလုပ်‌ဆောင်ခဲ့တာဖြစ်ပါတယ်။

ဖေဖော်ဝါရီ ၁၇ ရက်ကလည်း တောင်တွင်းကြီးမြို့နယ်၊ ထောက်ကြံ့ကွင်း‌ကျေးရွာ စစ်တပ်ဂိတ်အနီးအရက်ဆိုင်ဖွင့်ကာ စစ်ကောင်စီတပ်ဖွဲ့နဲ့ပူးပေါင်းပြီး လမ်းသွားလမ်းလာတွေကို ဆက်ကြေးကောက်တယ်လို့ နာမည်ကြီးတဲ့ လင်မယားသေနတ်ပစ်ခတ်ခံရပြီး သေဆုံးခဲ့ပါသေးတယ်။

စာတည်း – ဟိန်းစံ

တောင်တွင်းကြီး၊ ဖေဖော်ဝါရီ ၂၈၊ ၂၀၂၅။

မကွေးတိုင်း၊ တောင်တွင်းကြီးမြို့နယ်၊ ထောက်ကြံ့ကွင်းကျေးရွာ စစ်တပ်ဂိတ်အနီးအရက်ဆိုင်ဖွင့်ကာ စစ်ကောင်စီတပ်ဖွဲ့နဲ့ပူးပေါင်းပြီး လမ်းသွားလမ်းလာတွေကို ဆက်ကြေးကောက်နေတဲ့လင်မယားကို သေနတ်နဲ့ပစ်ခတ်ခဲ့တယ်လို့ Magway Guerrilla Warfare မကွေးပြောက်ကျားတပ်က ပြောပါတယ်။

သေဆုံးသူတွေဟာ အသက် ၅၀ နှစ်ဝန်းကျင်ရှိကြတဲ့ ဦးမြင့်သန်းနဲ့ ၎င်းရဲ့ဇနီးဖြစ်သူ မြစန်းရီတို့ဖြစ်ပြီး ဖေဖော်ဝါရီ ၂၇ ရက်မနက် ၆ နာရီခွဲလောက်မှာ ၎င်းတို့အရက်ဆိုင်အတွင်း ဝင်ရောက်ပစ်ခတ်ခဲ့တာလို့ ဆိုပါတယ်။

“သူတို့ဆိုင်ရှေ့မှာ စစ်တပ်က ဂိတ်ထိုင်ထားတယ်။ ပြီးတော့ သစ်ကားဝါးကားတွေကို ပိုက်ဆံတောင်းတယ်။ အချိန်မတော်သွားလာတဲ့သူတွေကိုလည်း အမြင်မကြည်ရင်မကြည်သလို စစ်တပ်ကို ဖမ်းဆီးခိုင်းတယ်။ သူတို့ပြီးမှပြီးတာ။ ဆက်သွားတိုက်နယ်တကြောမှာတော့ နာမည်အကြီးဆုံးလင်မယားလို့ ပြောလို့ရတယ်။” Magway Guerrilla Warfare မကွေးပြောက်ကျားတပ်တာဝန်ခံ ကံကြီးမောင်က ပြောပါတယ်။

တောင်တွင်းကြီးအခြေစိုက် ကပစ ၁၈ နဲ့ စခတ ၇ တပ်တွေက စစ်ကောင်စီတပ်ပူးပေါင်းအင်အား ၁၀ ဦးခန့်ဟာ ၎င်းတို့လင်မယားအရက်ဆိုင်အရှေ့မှာ ဂိတ်ချတပ်စွဲကာ အတူချက်ပြုတ်စားသောက် အနီးကပ်နေထိုင်ကြသူတွေဖြစ်တယ်လို့ ဆိုပါတယ်။

ဖေဖော်ဝါရီလနောက်ဆုံးပတ်အတွင်းမှာ အဆိုပါစစ်ကောင်စီတပ်ဖွဲ့ဝင်တွေဟာ ပျဉ်းချောင်းရွာဘက်ကို အပြီးရွှေ့ပြောင်းသွားခဲ့လို့ ဝင်ရောက်ပစ်ခတ်ရှင်းလင်းနိုင်ခဲ့တာဖြစ်ပြီး ပစ်ခတ်ခံရပြီးနောက် ဦးသန်းမြင့်လင်မယားရဲ့ ရုပ်အလောင်းတွေကို စစ်ကောင်စီတပ်ဖွဲ့ဝင်တွေက လာရောက်ကောက်ယူသွားတယ်လို့ အထက်ပါတာဝန်ခံက ပြောပါတယ်။

ပစ်ခတ်မှုကို Magway Guerrilla Warfare မကွေးပြောက်ကျားတပ်နဲ့ Taungdwingyi Fighter Force (LPDF) တို့က ပူးပေါင်းလုပ်ဆောင်ခဲ့တာဖြစ်ပြီး ဖေဖော်ဝါရီ ၂၄ ရက်ကလည်း စစ်ကောင်စီလက်အောက် မကွေးမြို့နယ်၊ သက်ရင်းတောအုပ်စုအုပ်ချုပ်ရေးမှူးကို Magway Guerrilla Warfare မကွေးပြောက်ကျားတပ်က ပစ်ခတ်ရှင်းလင်းခဲ့ပါသေးတယ်။

စာတည်း – ဟိန်းစံ