မြေလတ်အသံ၊ မေ ၁၀၊ ၂၀၂၅။
စစ်ကိုင်းတိုင်း၊ ကလေး၊ ခမ်းပါတ်နဲ့ ကနီမြို့နယ်တွေမှာ လေယာဥ်ဗုံးကြဲတိုက်ခိုက်ခံရပြီး နေအိမ်အဆောက်အဦအများအပြားပျက်စီးခဲ့တယ်လို့ ဒေသခံတွေနဲ့ တော်လှန်ရေးတပ်ဖွဲ့တွေထံက သိရပါတယ်။
ကနီမြို့နယ်၊ အရှေ့မြောက်ခြမ်း ဆူးလေကုန်းကျေးရွာကို မေ ၉ ရက် ယမန့်နေ ညနေ ၄ နာရီခန့်မှာ စစ်ကောင်စီတပ်က ပေါင် ၅၀၀ ဗုံးအပါအဝင် ဗုံး ၃ လုံးကြဲချတိုက်ခိုက်ခဲ့ရာ နေအိမ်တွေပေါ်ကျရောက်ပေါက်ကွဲခဲ့တယ်လို့ ဆိုပါတယ်။
” ၃ ကြိမ် လေကြောင်းတိုက်ခိုက်မှု ပြုလုပ်သွားတယ်။ ရွာထဲကိုပဲကျတာ။ ရွာထဲကိုမှ လူခြေစိပ်တဲ့နေရာကိုကျတာ။ ရွာပြင်ကို ၁ လုံးမှ မပါဘူး။ လူကတော့ ထိခိုက်မှုမရှိလိုက်ဘူး။ နေအိမ်တွေတော့ ပျက်စီးဆုံးရှုံးမှုရှိတယ်။” လို့ ကနီမြို့နယ်ပကဖပြန်ကြားရေးတာဝန်ခံက ပြောပါတယ်။
လေယာဥ်ဗုံးကြဲချချိန် ရွာခံအများစုက ကျေးရွာအနီးယာခင်းတွေမှာ အလုပ်လုပ်နေကြချိန်ဖြစ်ပြီး ကျေးရွာအတွင်းရှိသူတွေက ဗုံးခိုကျင်းတွေထဲ အချိန်မီဝင်ပုန်းခိုနိုင်တာတွေကြောင့် လူထိခိုက်မရှိတာလို့ ၎င်းက ဆက်ပြောပါတယ်။
လေယာဥ်ဗုံးကြဲခံရလို့ ဆူးလေကုန်းရွာက ဓမ္မာရုံ ၁ လုံးအပါ နေအိမ်အဆောက်အဦ ၁၄ လုံး ထိခိုက်ပျက်စီးခဲ့ပြီး အဆိုပါနေအိမ်တွေအနက် တိုက်ခံအိမ် ၅ လုံးမှာ လုံးဝပြိုကျပျက်စီးသွားခဲ့ကာ ကား၊ ဆိုင်ကယ်နဲ့ နွားတွေလည်း သေဆုံးပျက်စီးခဲ့တယ်လို့ သိရပါတယ်။
ဗုံးကြဲခံရတဲ့ဆူးလေကုန်းရွာအနီးမှာ တိုက်ပွဲဖြစ်ပွားတာမရှိသလို ကျေးရွာအတွင်း ဒေသကာကွယ်ရေးတပ်ဖွဲ့တွေတပ်စွဲနေထိုင်တာမရှိဘဲ ၎င်းရွာမှာ အိမ်ခြေ ၁,၀၀၀ ဝန်းကျင်၊ လူဦးရေ ၄,၀၀၀ ကျော်ရှိကာ မကြာခဏဗုံးကြဲခံနေရတာကြောင့် ရွာခံ ၂,၀၀၀ ကျော်လောက်က ကျေးရွာကနေ စွန့်ခွာပြီး စစ်ဘေးရှောင်နေကြရတယ်လို့ သိရပါတယ်။
အလားတူ မေ ၈ ရက် နေ့လယ် ၃ နာရီကျော်မှာ ကလေးမြို့နယ်မြောက်ပိုင်းရှိ လက်ပံချောင်းကျေးရွာကို တိုက်ခိုက်ရေးလေယာဥ် ၁ စီးနဲ့ လေကြောင်းကနေ ဗုံးသီး ၅ လုံးကြဲချတိုက်ခိုက်ခဲ့တယ်လို့ ကလေးဒေသခံအမျိုးသမီးတဦးက ပြောပါတယ်။
ကျေးရွာအတွင်း လူမနေကြဘဲ စစ်ရှောင်နေကြလို့ လူအထိအခိုက် မရှိခဲ့ပေမယ့် နေအိမ် ၅ လုံးပျက်စီးခဲ့တယ်လို့ ၎င်းက ပြောပါတယ်။
ဒါ့အပြင် မေ ၉ ရက် ညနေ ၆ နာရီခန့်မှာ တမူးခရိုင်၊ ခမ်းပါတ်မြို့အနီးပတ်ဝန်းကျင်ကို တိုက်ခိုက်ရေးလေယာဥ် ၁ စီးနဲ့ ဗုံး ၂ လုံးကြဲချခဲ့ရာ လူအထိအခိုက်မရှိခဲ့ဘူးလို့ တမူးဒေသခံတော်လှန်ရေးရဲဘော်တဦးက ပြောပါတယ်။
တော်လှန်ရေးအဖွဲ့တွေနေတဲ့နေရာတွေလို့ ယူဆပြီး ဗုံးကြဲတာဖြစ်နိုင်ကာ တောထဲတွေကိုပဲဗုံးကျခဲ့လို့ ထိခိုက်၊ ပျက်စီးတာမရှိဘူးလို့သိရကြောင်း သူကဆက်ပြောပါတယ်။
အထက်ပါ ကလေးနဲ့ ခမ်းပါတ်ဒေသတွေမှာလည်း တိုက်ပွဲဖြစ်ပွားတာမရှိဘဲ လေကြောင်းကနေ ဗုံးကြဲတိုက်ခိုက်သွားတာဖြစ်ကြောင်း ဒေသခံတွေက ပြောပါတယ်။
စာတည်း – ဟိန်းစံ၊ တည်းဖြတ် – M