ပဲခူး၊ မေ ၂၄၊ ၂၀၂၅။

ပဲခူးတိုင်း၊ ပဲခူးမြို့၊ မဇင်းဆည်နားမှာ အသက် ၁၃ နှစ်အရွယ်ကျောင်းသားကို ဖမ်းဆီးသတ်ဖြတ်ခဲ့သူ ၂ ဦးကိုဖမ်းမိခဲ့တယ်လို့ ပဲခူး အမှတ် ၂ ရဲစခန်းနဲ့နီးစပ်သူတွေဆီက သိရပါတယ်။

မေ ၂၃ ရက် နေ့လယ်ပိုင်းမှာ လူသတ်မှုကျူးလွန်ထားသူ မဇင်း ၂ လမ်းနေ အသက် ၃၂ အရွယ် ကျော်ကြီးနဲ့ မဇင်း ၃ လမ်းနေ အသက် ၃၁ အရွယ် အောင်နိုင်ဖြိုးတို့ကို သူတို့ရဲ့နေအိမ်တွေမှာ ဖမ်းမိခဲ့တယ်လို့ဆိုပါတယ်။

“တရားခံတွေကိုကတော့ သူတို့အိမ်မှာပဲဖမ်းတာ။ CCTV မှတ်တမ်းနဲ့ လိုက်ပြီးဖမ်းတာ။ သူတို့က အေးဆေးမသိအောင် သူတို့နဲ့မဆိုင်တဲ့သဘောနဲ့ အိမ်မှာပြန်နေနေတာ။ သူတို့သတ်တယ်ဆိုတာလည်း ဝန်ခံတယ်။”လို့ အမှတ် ၂ ရဲစခန်းနဲ့နီးစပ်သူတဦးက ပြောပါတယ်။

ကျော်ကြီးနဲ့ အောင်နိုင်ဖြိုးတို့မှာ အကြွေးတွေရှိနေပြီး ငွေလိုတာကြောင့် သေဆုံးသူကလေးရဲ့မိဘဆီမှာ ငွေညှစ်ဖို့ဖမ်းဆီးထားချိန် လူငယ်ကအော်ဟစ်နေတဲ့အတွက် ခြေလက်ကြိုးတုပ်ပြီး မြွေရေခွံအိတ်နဲ့ခေါင်းကိုစွပ်ထားရာက သေဆုံးသွားတာလို့ ၎င်းတို့ရဲ့ထွက်ဆိုချက်အရ သိရပါတယ်။

ကလေးငယ်ကို စတင်ဖမ်းဆီးသွားကတည်းက မဇင်းဆည်နားကို ဖမ်းဆီးသွားပြီး ချုပ်နှောင်ထားခဲ့တာလို့ ဆိုပါတယ်။

လက်ရှိမှာ ကျူးလွန်သူ ၂ ဦးကို ပဲခူး အမှတ် ၂ ရဲစခန်းမှာ ထိန်းသိမ်းထားပြီး ရာဇသတ်ကြီးပုဒ်မ ၃၀၂ လူသတ်မှုနဲ့ အမှုဖွင့်ထားတယ်လို့ သိရပါတယ်။

မေ ၂၀ ရက်ညနေ ၅ နာရီခန့်မှာ ပဲခူးမြို့၊ မဇင်းရပ်ကွက်၊ မဟာစေတီ ၃ လမ်းနေ အသက် ၁၃ နှစ်အရွယ် မောင်သက်မင်းနိုင်ဟာ နေအိမ်ကထွက်သွားရာကပျောက်ဆုံးခဲ့ပြီး မေ ၂၃ ရက်မနက် ၈ နာရီခန့်မှာမှ မဇင်ဆည်အနီးလျှိုထဲမှာ အလောင်းကိုပြန်တွေ့ခဲ့တာ ဖြစ်ပါတယ်။

စာတည်း – လင်း

မန္တလေး၊ မေ ၂၊ ၂၀၂၅။

မန္တလေးတိုင်း၊ မဟာအောင်မြေမြို့နယ်၊ စိန်ပန်းရပ်ကွက်၊ ၃၇ လမ်းနဲ့ ၃၈ လမ်းကြား၊ သင်္ဂဇာပတ်လမ်း (အနောက်) ရှိ Happy Like လက်ဖက်ရည်ဆိုင်ပိုင်ရှင်အမျိုးသားကိုသတ်ခဲ့တဲ့ ဇနီးဖြစ်သူနဲ့ အမျိုးသား ၁ ဦးကိုဖမ်းဆီးထားတယ်လို့ မေ ၂ ရက်မှာ စစ်ကောင်စီက ထုတ်ပြန်ထားပါတယ်။

Happy Like လက်ဖက်ရည်ဆိုင်ပိုင်ရှင် အသက် ၅၀ နှစ်အရွယ် ဦးအောင်နေမျိုး ကို သူ့ရဲ့ဇနီးဖြစ်သူ ဒေါ်ရွှေစင်ဝင်းနဲ့ အသက် ၃၃ နှစ်အရွယ် ကိုဇော်ဖြိုးအောင် တို့က သတ်ဖြတ်ခဲ့တာဖြစ်ပြီး ကိုဇော်ဖြိုးအောင် ကို မေ ၁ ရက်က ဧရာဝတီတိုင်း၊ မော်ကျွန်းမြို့နယ်၊ တံခွန်တိုင်ကျုံဝရွာမှာ ဖမ်းမိခဲ့တာလို့ ဆိုပါတယ်။

ဧပြီ ၂၇ ရက်က ဦးအောင်နေမျိုးဟာ လက်ဖက်ရည်ဆိုင်အိပ်ခန်းအတွင်း ကျည်ထိမှန်ဒဏ်ရာတွေနဲ့ အသတ်ခံထားရတယ်ဆိုပြီး ဇနီးဖြစ်သူဒေါ်ရွှေစင်ဝင်းက ရဲထံကိုအကြောင်းကြားခဲ့တယ်လို့ သိရပါတယ်။

အခင်းဖြစ်နေရာကို သွားရောက်စစ်ဆေးချိန်မှာ ဦးအောင်နေမျိုးကို လက်ဖက်ရည်ဆိုင်အိပ်ခန်း အတွင်း ကုတင်ပေါ်မှာ ညာဘက်နားထင်ကနေ ဘယ်ဘက်နားထင်ထိကျည်ဖောက်ထွက် ဒဏ်ရာ ၁ ချက်၊ ဝမ်းဗိုက်မှာထိုးသွင်းဒဏ်ရာ ၂ ချက်တို့နဲ့ သေဆုံးနေတာကိုတွေ့ရတယ်လို့ ထုတ်ပြန်ချက်မှာ ဖော်ပြထားပါတယ်။

စစ်ဆေးမေးချိန်မှာ ဒေါ်ရွှေစင်ဝင်းရဲ့ အမူအယာပျက်နေတာကြောင့်ထပ်မံစစ်ဆေးခဲ့ရာမှာ ၎င်းရဲ့ ထွက်ဆိုချက်အရ ခင်ပွန်းဖြစ်သူမှာ ၎င်းအားအမျိုးမျိုးညှင်းပန်းနှိပ်စက်တဲ့အပြင် အတူနေညီအစ်ကိုမောင်နှမတွေကိုလည်း နေအိမ်မှအကြိမ်ကြိမ်မောင်းချတဲ့အတွက် နာကျည်းစိတ်ရှိတာကြောင့် သတ်ဖြတ်ပေးဖို့ ဒေါ်ရွှေစင်ဝင်းဟာ သူနဲ့ချစ်ကြိုက်နေတဲ့ ကိုဇော်ဖြိုးအောင်ကို နေအိမ်အခြေအနေ အသေးစိတ်ပြောဆိုအသိပေးပြီး ဧပြီ ၂၇ မှာလုပ်ကြံခဲ့ကြတာလို့ ဆိုထားပါတယ်။

ထွက်ဆိုချက်ရပြီးနောက် မေ ၁ ရက်မှာ ကိုဇော်ဖြိုးအောင်နေထိုင်တဲ့ အောင်မြေသာစံမြို့နယ်၊ ဒေါနဘွားရပ်ကွက်၊ အုတ်စက်ရပ်၊ အကွက် ၁၃ ရှိ အခန်းကိုဝင်ရှာချိန် SIGSAUER အမျိုးအစား 9mm ပစ္စတိုသေနတ် ၁ လက်၊ ကျည်အိမ် ၂ ခု၊ ၎င်းကျည် ၂၈ တောင့်နဲ့ Scoopy ဆိုင်ကယ် ၁ စီးတို့ကို သိမ်းဆည်းရမိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

အဲ့ဒီနောက် ကိုအောင်ဖြိုးအောင်ဟာ ၎င်းရဲ့ဇာတိဖြစ်တဲ့ တံခွန်တိုင်ကျုံဝါးကျေးရွာကို ပြန်သွားကြောင်းသိရတဲ့အတွက် သက်ဆိုင်ရာနယ်မြေရဲနဲ့ချိတ်ဆက်ပြီး ဖမ်းဆီးခဲ့တာလို့ သိရပါတယ်။

အမှုနဲ့ပတ်သက်ပြီး ပြစ်မှုကျူးလွန်သူ ၂ ဦးကို မဟာအောင်မြေမြို့နယ် အမှတ် ၇ နယ်မြေရဲစခန်းကနေ ပ ၅၀/ ၂၀၂၅၊ ရာဇသတ်ကြီးပုဒ်မ ၃၀၂ လူသတ်မှုနဲ့အမှုဖွင့်ဖမ်းဆီးထားတယ်လို့ သိရပါတယ်။

စာတည်း – လင်း

ပဲခူး၊ မတ် ၁၆၊ ၂၀၂၅။

ပဲခူးတိုင်း၊ ပဲခူးမြို့၊ စိန်ထွန်းရပ်ကွက်၊ လက်ဝဲသုန္ဒရလမ်းမှာ ဇနီးဟောင်းဖြစ်သူကို ဓားနဲ့ထိုးခဲ့ပြီး သေဆုံးသွားတာကြောင့် ထွက်ပြေးတိမ်းရှောင်နေတဲ့ အမျိုးသား လာရောက်အဖမ်းခံခဲ့တယ်လို့ ဒေသခံတွေဆီကသိရပါတယ်။

မတ် ၁၆ ရက်နေ့မနက် ၁၀ နာရီခန့်မှာ ထွက်ပြေးနေတဲ့ အမျိုးသားဖြစ်သူ ကိုအောင်မြင့်မြတ်ဟာ ပဲခူးမြို့မရဲစခန်းမှာ သူကိုယ်တိုင်လာအဖမ်းခံခဲ့တယ်လို့ ဆိုပါတယ်။

“သူကိုယ်တိုင်လာအဖမ်းခံတာလို့တော့ သိထားရတယ်။ သူတို့ရပ်ကွက်က အမှတ် ၁ စခန်းအပိုင်ဆိုတော့ အဲမှာဘဲလာအဖမ်းခံတာ။ ရဲစခန်းမှာချုပ်ထားတယ်လို့တော့ သိရတယ်”လို့ ဒေသခံတဦးကပြောပါတယ်။

လာရောက်အဖမ်းခံခဲ့တဲ့ ကိုအောင်မြင့်မြတ်ကို ဖြစ်စဉ်စဖြစ်တဲ့ရက်ကတည်းက ပဲခူးမြို့မရဲစခန်းမှာ ရာဇသတ်ကြီးပုဒ်မ ၃၀၂ နဲ့ အမှုဖွင့်ထားတာကြောင့် အဆိုပါပုဒ်မနဲ့ တရားရုံးတင်သွားဖွယ်ရှိတယ်လို့ ဆိုပါတယ်။

မတ် ၁၂ ရက်၊ မနက် ၁ နာရီကျော်ခန့်မှာ အသက် ၃၀ ဝန်းကျင်အရွယ် မလင်းလင်းကျော်ဟာ နေအိမ်မှာရှိနေချိန် ခင်ပွန်းဟောင်းဖြစ်သူ ကိုအောင်မြင့်မြတ်က နေအိမ်ကိုရောက်လာပြီး စကားများကြရာမှ ကိုအောင်မြင့်မြတ်က မလင်းလင်းကျော်ကို ဓားနဲ့ထိုးပြီး ထွက်ပြေးသွားခဲ့ပါတယ်။

ဓားနဲ့ထိုးခံရလို့ မလင်းလင်းကျော်မှာ ဝမ်းဗိုက်ထိုးသွင်းဒဏ်ရာရပြီး ပဲခူးဆေးရုံမှာ ဆေးကုသမှုခံယူနေစဥ် မနက် ၅ နာရီခန့်မှာ သေဆုံးသွားပြီး သူ့ရဲ့ရုပ်အလောင်းကိုတော့ မတ် ၁၂ ရက် နေ့လယ် ၁ နာရီကျော် စင်ဖြူကွင်းသုဿာန်မှာ နေ့ချင်းသင်္ဂြိုဟ်ခဲ့တယ်လို့ သိရပါတယ်။

ကိုအောင်မြင့်မြတ်နဲ့မလင်းလင်းကျော်တို့က လွန်ခဲ့တဲ့ နှစ်နှစ်ခန့်ကတည်းက တရားဝင်ကွာရှင်းထားသူတွေဖြစ်ပြီး မလင်းလင်းကျော်မှာ သားနှစ်ဦးကျန်ခဲ့တယ်လို့ သိရပါတယ်။

စာတည်း – ကိုချမ်း

မန္တလေး၊ မတ် ၁၄၊ ၂၀၂၅။

မန္တလေးတိုင်း၊ ပြည်ကြီးတံခွန်မြို့နယ်၊ ညောင်ပင်သာရွာကနေ ပျောက်ဆုံးနေတဲ့ ညီအကို ၂ ဦးကို ၈ ရက်အကြာမှာ သေဆုံးလျက်ပြန်တွေ့ခဲ့တယ်လို့ မိသားစုနဲ့နီးစပ်သူတွေထံက သိရပါတယ်။

ပျောက်ဆုံးနေသူတွေဟာ အသက် ၁၃ နှစ် မောင်အောင်ခန့်ဦးနဲ့ ညီဝမ်းကွဲတော်စပ်သူ အသက် ၁၀ နှစ် မောင်ပြည့်စုံကျော်တို့ဖြစ်ပြီး ၎င်းတို့ ၂ ဦးဟာ မတ် ၂ ရက်ကစတင်ကာ နေအိမ်တွေကနေပျောက်ဆုံးနေရာက စဉ့်ကိုင်မြို့နယ်၊ ရဲရွာသစ်ကျေးရွာရဲ့အနောက်ဘက်လျှိုမြောင်အတွင်းမှာ မတ် ၁၀ ရက်က သေဆုံးလျက်ပြန်တွေ့ခဲ့ရတာလို့ ဆိုပါတယ်။

” စခန်းကတွေ့တယ်ဆိုလို့ အကြောင်းကြားလို့ သိရတာ။ အလောင်းမြင်ရချိန်မှာတော့ ခြေထောက်တွေ၊ခေါင်းတွေ အကုန်ကြေနေတာကိုတော့ မြင်ရတယ်။ နှစ်ယောက်စလုံးက အဲလိုတွေ့ရတာ။ ကျောက်ခဲနဲ့ထုသတ်ထားတယ်လို့တော့ သိထားရတယ်။”လို့ မိသားစုနဲ့နီးစပ်သူတဦး မြေလတ်အသံကို ပြောပါတယ်။

ပျောက်ဆုံးကလေး၂ ဦးအသတ်ခံရတာနဲ့ပတ်သက်ပြီး ကျူးလွန်သူတွေလို့ယူဆထားတဲ့ ပြည်ကြီးတံခွန်မြို့နယ်၊ ညောင်ဝန်းကျေးရွာနေ လူငယ် ၄ ဦးကို နယ်မြေခံရဲစခန်းက ဖမ်းဆီးစစ်ဆေးနေကာ ဖမ်းဆီးခံရသူတွေက ဘယ်သူတွေဆိုတာနဲ့ ဘာကြောင့်သတ်ဖြတ်ခဲ့တယ်ဆိုတာကို မသိရသေးဘူးလို့ဆိုပါတယ်။

ဆယ်ကျော်သက်ညီအကို ၂ ဦးရုပ်အလောင်းပြန်တွေ့ခဲ့တဲ့နေရာဟာ မြစ်ငယ်မြစ်ရဲ့တဖက်ကမ်းဖြစ်လို့ နေထိုင်ရာကျေးရွာနဲ့ ၁၀ မိုင်ကျော်ကွာဝေးပြီး ရုပ်အလောင်းတွေကို မတ် ၁၁ ရက်မှာ ပြန်သယ်ဆောင်သင်္ဂြိုဟ်ပေးခဲ့ကာ မတ် ၁၃ ရက်မှာ အလောင်းတွေ့ရှိတဲ့နေရာမှာ သပိတ်ဆွမ်းသွပ်အလှူပြုလုပ်ပေးခဲ့တယ်လို့ သိရပါတယ်။

အမှုနဲ့ပတ်သက်ပြီး ဖမ်းဆီးခံထားရတဲ့ လူငယ် ၄ ဦးနဲ့ပတ်သက်တဲ့ အချက်အလက်တွေနဲ့ ဘာကြောင့်သတ်ခဲ့တယ်ဆိုတာကို တရားရုံးတင်မှသိရမှာဖြစ်ကြောင်း ရဲဘက်ကအကြောင်းကြားထားလို့ တရားရုံးတင်မယ့်ရက်ကို နစ်နာသူမိသားစုဝင်တွေဘက်က စောင့်ဆိုင်းနေတယ်လို့ သိရပါတယ်။

စာတည်း – ဟိန်းစံ

ပဲခူး၊ မတ် ၁၂၊ ၂၀၂၅။

ပဲခူးတိုင်း၊ ပဲခူးမြို့၊ စိန်ထွန်းရပ်ကွက်၊ လက်ဝဲသုန္ဒရလမ်းမှာ ခင်ပွန်းဟောင်းက သူ့ရဲ့ဇနီးဟောင်းကို ဓားနဲ့ထိုးလို့ သေဆုံးသွားတယ်လို့ ဖြစ်စဥ်ကိုသိရှိထားတဲ့ ဒေသခံတွေထံက သိရပါတယ်။

ဓားနဲ့ထိုးခံရသူဟာ အသက် ၃၀ ဝန်းကျင်အရွယ် မလင်းလင်းကျော်ဆိုသူဖြစ်ပြီး မတ် ၁၂ ရက် မနက် ၁ နာရီကျော်ခန့်က နေအိမ်မှာရှိနေချိန် ခင်ပွန်းဟောင်းဖြစ်သူ ကိုအောင်မြင့်မြတ်က ဓားနဲ့ထိုးခဲ့တာလို့ ဆိုပါတယ်။

“ယောကျာ်းဖြစ်သူက နေအိမ်ထဲဝင်လာပြီး ဓားနဲ့ထိုးသွားတာလို့တော့ သိထားရတယ်။ ဓားထိုးခံရလို့ ဒဏ်ရာတွေရနေလို့ဆေးရုံကိုပို့ပြီး ဆေးကုမှုလုပ်နေချိန်မှာ ဒီမနက်မှာဘဲဆုံးသွားတာ”လို့ ဖြစ်စဥ်ကိုသိရှိထားတဲ့ ဒေသခံတဦးက ပြောပါတယ်။

ဓားနဲ့ထိုးခံရလို့ မလင်းလင်းကျော်မှာ ဝမ်းဗိုက်မှာ ထိုးသွင်းဒဏ်ရာရပြီး ပဲခူးဆေးရုံမှာ ဆေးကုသမှုခံယူနေစဥ် မနက် ၅ နာရီခန့်မှာ သေဆုံးသွားတယ်လို့ ဆိုပါတယ်။

သေဆုံးသူ မလင်းလင်းကျော်ရဲ့အလောင်းကို ဒီနေ့လယ် ၁ နာရီကျော်မှာ စင်ဖြူကွင်းသုဿာန်မှာ သင်္ဂြိုဟ်လိုက်တယ်လို့သိရပြီး ဓားနဲ့ထိုးသွားတဲ့ ကိုအောင်မြင့်မြတ်ကတော့ မတ် ၁၂ ရက် ညနေပိုင်းထိ ဖမ်းဆီးနိုင်ခြင်းမရှိသေးဘဲ ထွက်ပြေးလွတ်မြောက်နေဆဲလို့ ဒေသခံတွေက ပြောပါတယ်။

ကိုအောင်မြင့်မြတ်နဲ့မလင်းလင်းကျော်တို့ဟာ လွန်ခဲ့တဲ့ နှစ်နှစ်ခန့်ကတည်းက တရားဝင်ကွာရှင်းထားတာဖြစ်ပြီး မလင်းလင်းကျော်မှာ သားနှစ်ဦးကျန်ရစ်ခဲ့တယ်လို့ သိရပါတယ်။

ပြီးခဲ့တဲ့ ဇန်နဝါရီ ၈ ရက်နေ့ကလည်း ပဲခူးမြို့နယ်၊ ဇောင်းတူကျေးရွာမှာ လင်မယားနှစ်ယောက် စကားများရန်ဖြစ်ရာမှ လင်ဖြစ်သူက မယားဖြစ်သူကို ဓားနဲ့ခုတ်လို့ သေဆုံးသွားတယ်လို့ သိရပါတယ်။

စာတည်း – ကိုချမ်း