ပဲခူး၊ ဖေဖော်ဝါရီ ၁၃၊ ၂၀၂၅။

ပဲခူးတိုင်း၊ သာယာဝတီခရိုင်၊ လက်ပံတန်းမြို့နယ်၊ မကျီးကွင်းအုပ်စု၊ ရွှေဘိုစုကျေးရွာအုပ်ချုပ်ရေးမှူးနဲ့ ဇနီးဖြစ်သူတို့ ဖေဖော်ဝါရီ ၁၂ ရက်မှာပစ်ခတ်ခံရပြီးသေဆုံးခဲ့တယ်လို့ ရွှေတန်းမြေ ပြည်သူ့ကာကွယ်ရေးတပ်ဖွဲ့ဆီက သိရပါတယ်။

သေဆုံးသူတွေဟာ ရွှေဘိုစုကျေးရွာအုပ်ချုပ်ရေးမှူး အသက် ၆၅ နှစ်အရွယ် ဦးသိန်းဝင်းနဲ့ ဇနီးဖြစ်သူ အသက် ၆၁ နှစ်အရွယ်ဒေါ်စန်းစန်းတို့ဖြစ်ပါတယ်။

ညနေ ၄ နာရီ ၄၅ မိနစ်ခန့်မှာ တော်လှန်ရေးတပ်ဖွဲ့ဝင်တွေက အုပ်ချုပ်ရေးမှူးဦးသိန်းဝင်းကို ဖမ်းဆီးဖို့သွားချိန်မှာ လက်ပစ်ဗုံးနဲ့ပြန်ပစ်ဖို့လုပ်တာကြောင့် ခုလိုပစ်ခတ်ခဲ့တာလို့ ဆိုပါတယ်။

“လက်ပစ်ဗုံးက စနက်တံမပြုတ်သေးတာပါ။ ခုခံဖို့လုပ်တော့ သူနဲ့အတူရှိတဲ့ အမျိုးသမီးပါ ရှင်းခဲ့ရတယ်” လို့ ရွှေတန်းမြေကာကွယ်ရေးတပ်ဖွဲ့ တာဝန်ခံ ကိုကိုအောင်က ပြောပါတယ်။

အလောင်းတွေကိုတော့ ဖေဖော်ဝါရီ ၁၂ ရက်နေ့လယ်ပိုင်းမှာ သင်္ဂြိုဟ်လိုက်ပြီလို့ သိရပါတယ်။

အဲ့ဒီအုပ်ချုပ်ရေးမှူးဟာ ပြည်သူတွေဆီကို စစ်မှုထမ်းကြေးအဓမ္မတောင်းခံကာ မပေးနိုင်သူတွေကိုလည်း ဖမ်းဆီးဖို့လုပ်နေပြီး ဒေသခံပြည်သူတွေကသတင်းပေးတိုင်ကြားထားတာတွေရှိတယ်လို့ ရွှေတန်းမြေကာကွယ်ရေးတပ်ဖွဲ့ တာဝန်ခံကိုကိုအောင်က ပြောပါတယ်။

ရွှေဘိုစုရွာ အုပ်ချုပ်ရေးမှူးဟာ ၂၀၂၄ ခုနှစ်ကစပြီး လစဉ်အိမ်ထောင်စုအလိုက် ၃၀,၀၀၀ ကျပ်မှ ၁၀၀,၀၀၀ ကျပ်အထိ လစဥ်တောင်းနေတာကို အခုနှစ် ဇန်နဝါရီလအစောပိုင်းမှာ ဒေသခံတွေကတိုင်ကြားခဲ့တာလို့ ဆိုပါတယ်။

ဒီပစ်ခတ်မှုကို သာယာဝတီခရိုင်ပြည်သူ့ကာကွယ်ရေးတပ်ဖွဲ့၊ တိုက်ခိုက်ရေးတပ်ခွဲ -ရွှေတန်းမြေ ပြည်သူ့ကာကွယ်ရေးတပ်ဖွဲ့နဲ့အတူ တပ်ရင်း ၃၈၀၂၊ တပ်ခွဲ ၂ တပ်ဖွဲ့ဝင်တွေ ပူပေါင်းလုပ်ဆောင်ခဲ့တာ လို့ သိရပါတယ်။

စာတည်း – လင်း

ပဲခူး၊ ဇွန် ၈၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ လက်ပံတန်းမြို့က စတိုးဆိုင်တခု ဇွန်လ ၆ ရက် မနက် အစော ၁ နာရီခန့်မှာ ဖောက်ထွင်းခံရလို့ ငွေသားနဲ့ ရွှေထည်တွေအများအပြား ဆုံးရှုံးသွားတယ်လို့ သိရပါတယ်။

လက်ပံတန်းမြို့၊ မင်းရပ် ရပ်ကွက်၊ ကုလားကုန်းရပ်၊ လမ်းမတော်လမ်းမှာရှိတဲ့ သိန်းသိန်းစတိုး ဖောက်ထွင်းခံခဲ့ရတာဖြစ်ပြီး အပေါင်ဆိုင်နဲ့ပါ တွဲဖက်ဖွင့်ထားတာကြောင့် ရွှေထည်အများအပြားပါ ဖောက်ထွင်းခံခဲ့ရတာလို့ မြို့ခံတဦးက မြေလတ်အသံကိုပြောပါတယ်။

“ဆိုင်ရှင်တွေက လက်ပံတန်းမှာ အရမ်းချမ်းသာကြတဲ့သူတွေ။ တခြားဟိုတယ်တွေလည်းပိုင်တာရှိတယ် ။ စတိုးဆိုင်က အပေါင်ဆိုင်နဲ့တွဲဖွင့်ထားတာ။ ဆိုင်ရော၊ အိမ်ရောတွဲထားတာပေါ့။ ညသန်းခေါင်ကျော် ဝင်ပြီး ဖောက်ထွင်းသွားတာ ဆိုင်ကလူတွေလည်း တယောက်မှမနိုးဘူး” လို့ ပြောပါတယ်။

စတိုးဆိုင်အတွင်းရှိ မီးခံသေတ္တာဖောက်ထွင်းခံခဲ့ရတာဖြစ်ပြီး ဖောက်ထွင်းခံရမှုကြောင့် ငွေကျပ် သိန်း ၂၀၀၀ ခန့်နဲ့ ရွှေထည်ပစ္စည်းမျိုးစုံ ၇၀၀ ကျော် ရွှေချိန် ၃ ပိဿာနီးပါး ဆုံးရှုံးသွားတယ်လို့ ဆိုပါတယ်။

ဆိုင်တွင်း CCTV တွေကို ပြန်လည်စစ်ဆေးရာမှာ ဝင်ရောက်ဖောက်ထွင်းနေတဲ့ အမျိုးသားတဦးကို တွေ့ ရှိခဲ့ပြီး ဆိုင်ပြင်က CCTV ကင်မရာတွေကိုတော့ ဖောက်ထွင်းသူတွေက ရွှံ့နဲ့ပိတ်ကာ အိမ်အနောက်ဘက်ကနေ ဝင်ရောက်ဖောက်ထွင်းသွားလို့ သိရပါတယ်။

ဖောက်ထွင်းခံရတဲ့ စတိုးဆိုင်ဟာလည်း လက်ပံတန်းမြို့မရဲစခန်းနဲ့ ၁ မိုင်ခန့်အကွာမှာသာ တည်ရှိတယ်လို့ မြို့ခံတွေဆီကသိရပါတယ်။

ပြီးခဲ့တဲ့ ၂၀၂၂ ခုနှစ် ဩဂုတ်လအတွင်းကလည်း လက်ပံတန်းမြို့၊ ဗိုလ်အောင်ကျော်လမ်းက နေအိမ်တခုမှာ နေ့ခင်းဘက်ကြီး အိမ်ရှင်ကိုကြိုးတုပ် ဓားပြတိုက်မှုဖြစ်ပွားခဲ့ပါသေးတယ်။

စာတည်း – ရင်ငြိမ်း

လက်ပံတန်း၊ ဧပြီ ၁၃၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ လက်ပံတန်းမြို့၊ မြို့မဈေးအနီးက စစ်ကောင်စီသင်္ကြန်မဏ္ဍပ်နဲ့ ဘီးလင်းတန်းလမ်းမှာရှိတဲ့ ရဲစခန်းဂိတ်တွေကို ဗုံးခွဲတိုက်ခိုက်ခဲ့တယ်လို့ သာယာဝတီခရိုင် PDFတပ်ရင်းတွေဆီက သိရပါတယ်။

ဧပြီလ ၁၃ ရက် သကြန်အကြို ဒီကနေ့မနက်ပိုင်းအစော ၅ နာရီခွဲဝန်းကျင်မှာ တည်ဆောက်နေတဲ့ စစ်ကောင်စီသကြန်မဏ္ဍပ်ကို ဖောက်ခွဲတိုက်ခိုက်ခဲ့တာဖြစ်ပြီး ၆ နာရီခွဲဝန်းကျင်မှာ မြို့မရဲစခန်းအနောက်ဘက်ဂိတ်နေရာကို ဖောက်ခွဲတိုက်ခိုက်ခဲ့တာလို့ သာယာဝတီခရိုင်တပ်ရင်း ၃၈၀၂၊ တပ်ခွဲ ၄ ရွှေတန်းမြေပြည်သူ့ကာကွယ်ရေးတပ်ဖွဲ့တာဝန်ခံက ပြောပါတယ်။

“ဒီနေ့ညနေဖွင့်ပွဲလုပ်မယ့် မဏ္ဍပ်နဲ့ ရဲစခန်းဂိတ်ကို ဗုံးခွဲခဲ့တာပါ။ ရဲနဲ့စစ်သားတွေ လုံခြုံရေးချထားတဲ့ အနီးဆုံးမှာ ဖောက်ခွဲဖို့ပါ။ မနက်အစော ရှာဖွေရေးတွေ လုပ်နေလို့ ချိန်ကိုက်ဗုံးကြိုတင်ခွဲလိုက်ရတာ၊ ထိခိုက်သေဆုံးတာတော့ မသိရသေးပါဘူး” လို့ ပြောပါတယ်။

စစ်ကောင်စီတပ်ဖွဲ့နဲ့ ရဲတပ်ဖွဲ့တွေက ဧပြီလ ၁၂ ရက် ယမန်နေ့ကတည်းက မဏ္ဍပ်အနီးတဝိုက် လမ်းနှစ်ဘက်ကို ပိတ်ထားသလို သဲအိတ်ဘန်ကာတွေနဲ့ အကာအကွယ်လုပ်ထားပြီး၊ဗုံးဖောက်မှုခွဲအပြီးမှာ လုံခြုံရေးတင်းကြပ်ကာ မြို့တွင်းစစ်ဆေးတာတွေ လုပ်နေတယ်လို့ သိရပါတယ်။

စစ်အာဏာရှင်ကို တိုက်ထုတ်နေချိန်မှာ သင်္ကြန်ကာလအပါအဝင် အချိန်အခါမရွေး စစ်ကောင်စီထောက်တိုင်တွေကို တိုက်ခိုက်မှာဖြစ်လို့ ပြည်သူများအနေနဲ့ စစ်ကောင်စီထောက်တိုင်နေရာတွေအနီး မနေကြဖို့ ထပ်မံသတိပေးတယ်လို့ သာယာဝတီခရိုင် PDF တာဝန်ရှိသူတဦးက မြေလတ်အသံကို ပြောပါတယ်။

စာတည်း – ရင်ငြိမ်း

လက်ပံတန်း၊ ဧပြီ ၄၊ ၂၀၂၃။

ပဲခူးတိုင်းအနောက်ခြမ်း၊ သာယာဝတီခရိုင်၊ လက်ပံတန်းမြို့နယ် အထွေထွေအုပ်ချုပ်ရေးဦးစီးဌာနက ရပ်ကျေးစာရေး ဦးဆောင်တဲ့ လောင်းကစားဝိုင်းကို ဧပြီလ ၃ ရက်မနေ့က ဗုံးခွဲတိုက်ခိုက်ခဲ့တာကြောင့် ရပ်ကျေးစာရေးအပါအဝင် ၅ ဦး ဒဏ်ရာရသွားတယ်လို့ တပ်ရင်း ၃၈၀၂ တပ်ခွဲ ၄ ရွှေတန်းမြေ ပြည်သူ့ကာကွယ်ရေးတပ်ဖွဲ့က သတင်းထုတ်ပြန်ပါတယ်။

ဦးဆောင်သူဟာ ပေါက်တောစုကျေးရွာက ရပ်ကျေးစားရေး ကိုမျိုးကြီးလို့ သိရပြီး၊ လက်ပံတန်းမြို့နယ်အနောက်ဘက်၊ ဇီးဖြူကုန်းရွာမှာ လောင်းကစားဝိုင်းလုပ်နေချိန် မနေ့ကနေ့လယ် ၁ နာရီလောက်မှာ ဖောက်ခွဲခဲ့တာလို့ ဆိုပါတယ်။

“ဦးဆောင်သူက လက်ပံတန်းထွေအုပ်က ပေါက်တောစုရွာ ရပ်ကျေးစာရေး ကိုမျိုးကြီးပါ။ စစ်တပ်က အာဏာသိမ်းပြီးကတည်းက လုပ်နေတဲ့ဝိုင်းပါ။ ပြည်သူတွေ စားဝတ်နေရေးကြပ်တည်းချိန် သမကြွေး၊ စိုက်ပျိုးစရိတ်ချေးငွေတွေ ဒီလောက်တောင်းနေချိန်မှာကို လုပ်နေတာ။ စစ်အုပ်စုက ပြည်သူကို မျက်ဖြူစိုက်ချင်နေတာ” လို့ ရွှေတန်းမြေပြည်သူ့ကာကွယ်ရေးတပ်ဖွဲ့ဝင် တဦးက ပြောပါတယ်။

ဗုံးပေါက်ကွဲမှုကြောင့် ကိုမျိုးကြီးနဲ့ ပျူစောထီးဆိုသူ ၅ ဦး ဒဏ်ရာရရှိသွားတယ်လို့သိရပေမယ့် မြေလတ်အသံက သီးခြားအတည်ပြုချက်မရရှိသေးပါဘူး။

ဧပြီလ ၂ ရက်ကလည်း လက်ပံတန်းမြို့နယ်၊ တော်ကလပ်ကျေးရွာလောင်းကစားဝိုင်းကို ဖောက်ခွဲဖို့ သွားချိန်မှာ ပြည်သူတွေရှိနေတဲ့အတွက် အဝေးကသာဖောက်ခွဲခဲ့ရတယ်လို့ အဲ့ဒီအဖွဲ့ရဲ့ထုတ်ပြန်ချက်က ဆိုပါတယ်။

ပြီးခဲ့တဲ့ ဖေဖေါ်ဝါလ ၁၄ ရက်ကတော့ လက်ပံတန်းမြို့နယ်၊ နတ်ဖန်ကွင်းကျေးရွာအုပ်စု ရွှေကြို့ပင်ရွာလောင်းကစားဝိုင်းကို ဦးဆောင်ပြုလုပ်နေတဲ့ ကိုကြီးမြင့် (ခ) ကတုံးကိုလည်း နန်းထိုက်အောင်စစ်ဆင်ရေးအဖြစ် ရွှေတန်းမြေအဖွဲ့က သေနတ်နဲ့ ၃ ချက် ပစ်ခတ်ခဲ့ပါသေးတယ်။

စာတည်း – လင်း

ပဲခူး၊ ဇွန် ၂၉၊ ၂၀၂၂။

ပဲခူးတိုင်း(အနောက်ခြမ်း)၊ သာယာဝတီခရိုင်၊ လက်ပံတန်းမြို့၊ ဖြူစင်လူငယ်ပရဟိတအသင်းဥက္ကဌ ကိုဝင်းမင်းစိုး ဇွန်လ ၂၈ ရက်မနေ့က ထောင်ဒဏ် ၁၀ နှစ်ချမှတ်ခံခဲ့ရတယ်လို့ သူနဲ့နီးစပ်တဲ့သူတွေဆီက သိရပါတယ်။

ပြီးခဲ့တဲ့နှစ် အောက်တိုဘာလ ၃၁ ရက်နေ့က လက်ပံတန်းမြို့ပေါ်ကြံ့ခိုင်ရေးရုံးအပါအဝင် နေရာအများအပြားမှာ ဗုံးပေါက်ကွဲတာနဲ့ပတ်သက်ပြီး သူအပါ အဝင် ၂ ဦးကို PDF နဲ့ ပတ်သတ်တယ်ဆိုပြီး စွပ်စွဲဖမ်းဆီးခဲ့ရာကနေ သူ့ကိုသာယာဝတီထောင်တွင်းတရားရုံးက အခုလို ထောင် ၁၀ နှစ်ချမှတ်ခဲ့တာပါ။

“လက်ပံတန်းမှာဗုံးကွဲတာတွေနဲ့ပတ်သက်ပြီး PDF နဲ့ပတ်သက်တယ်ဆိုပြီး စွပ်စွဲပြီး ဖမ်းသွားတာ။ ကျနော်တို့သိသလောက်ကတော့ ဒီဗုံးကွဲတာတွေနဲ့ သူနဲ့ဘာမှမပတ်သက်ဘူး။ ဒလန်က ဖမ်းခိုင်းတာနဲ့ဖမ်းသွားတာ။ မနေ့ကထောင်တရာရုံးမှာဘဲ အကြမ်းဖက်ပုဒ်မနဲ့ ဆယ်နှစ်ချလိုက်တယ်ဆိုတာသိရတယ်” လို့ သူနဲ့နီးစပ်သူဒေသ ခံတဦးကမြေလတ်အသံကို ပြောပါတယ်။

ကိုဝင်းမင်းစိုးဟာ လက်ပံတန်းမြို့ပေါ် ပရဟိတလုပ်ငန်းတွေမှာ တက်ကြွစွာဆောင်ရွက်တဲ့သူဖြစ်ပြီးတော့ ပြီးခဲ့တဲ့နှစ် ဇွန်လ အခုလိုအချိန် လက်ပံတန်းမြို့မှာ ကိုဗစ်တတိယလှိုင်းပြင်းထန်ခဲ့စဥ်ကလည်း စစ်ကောင်စီက ဘာမှထောက်ပံ့ပေးမှုမရှိတာတောင် ဗော်လန်တီယာလုပ်ပြီး ပရဟိတအလုပ်တွေကို အားထည့်လုပ်ဆောင်သူဖြစ်တယ်လို့ ဒေသခံတွေက ပြောပါတယ်။

စစ်အာဏာသိမ်းပြီးတဲ့နောက်မှာ စစ်ကောင်စီတပ်က သူတို့ကိုဆန့်ကျင်တယ်လို့ ယူဆသူတွေကို PDF နဲ့ ပတ်သက်တယ်လို့စွပ်စွဲဖမ်းဆီးကာ အမြင့်ဆုံးပြစ် ဒဏ်တွေချမှတ်နေပြီး နိုင်ငံရေးအကျဥ်းသားများကူညီစောင့်ရှောက်ရေးအသင်း- AAPPရဲ့ စာရင်းတွေအရ မနေ့ကအထိ ဖမ်းဆီးခံထားရသူ ၁ သောင်း ၁ ထောင်ကျော်ရှိပြီး ၁၂၀၀ ကျော်ထောင်ဒဏ်ချမှတ်ခံထားရတယ်လို့ သိရပါတယ်။