ဒေသခံကာကွယ်ရေးတပ်

ကနီ၊ ဧပြီ ၆၊ ၂၀၂၃။

စစ်ကိုင်းတိုင်း၊ ကနီမြို့နယ်မှာ မိုင်းကွင်းလာဖျက်တဲ့ စစ်အုပ်စုကို ဧပြီလ ၄ ရက်မှာ ဒေသခံကာကွယ်ရေးတပ်တွေက တိုက်ခိုက်လို့စစ်သား ၃ ဦး သေဆုံးကာ၊ စစ်အုပ်စုနဲ့အတူပါလာတဲ့ နွား ၇ ကောင်ကိုလည်း သိမ်းယူနိုင်ခဲ့တယ်လို့ အာဏာရှင်တော်လှန်ရေးပြည်သူ့တပ်မတော် – DRPA က သတင်းထုတ်ပြန်ထားပါတယ်။

ကနီမြို့နယ်၊ အလယ်ကျွန်းရွာကနေ နေ့လယ် ၁၂ နာရီလောက်မှာ စစ်အုပ်စုက အင်အား ၅၀ ကျော်နဲ့ထွက်လာချိန် သရက်တောရွာအနောက်မြောက်ဘက်မှာ တိုက်ခိုက်ခဲ့ကြတာလို့ ဆိုပါတယ်။

“သူတို့က မိုင်းကွင်းထဲမှာ နွားတွေကို အရင်ဖြတ်ခိုင်းတာ၊ အဲဒီမှာ တိုက်ခိုက်ရင်း ကျနော်တို့က နွား ၇ ကောင်ကို သိမ်းနိုင်ခဲ့တာ။ အပြန်အလှန်ပစ်ခတ်ရင်းနဲ့ နွား ၃ ကောင်သေပြီး၊ စစ်သား ၃ ဦးလည်း သေတယ်။ နွား ၄ ကောင်ကိုတော့ အရှင်ရလိုက်တယ်” လို့ DRPA သတင်းပြန်ကြားရေးတာဝန်ခံက ပြောပါတယ်။

စစ်ကောင်စီတပ်တွေဟာ တိုက်ခိုက်ခံရပြီးနောက်မှာတော့ သေဆုံးအလောင်းတွေကိုကောက်ကာ အလယ်ကျွန်းရွာထဲကို ပြန်ဝင်သွားတယ်လို့လည်း သူကဆက်ပြောပါတယ်။

DRPA ခရိုင်တပ်ရင်း ၂ အမေ့သားကျားသုံးဖော်နဲ့ KPDF1က KGF တပ်ခွဲတို့ ပူးပေါင်းတိုက်ခိုက်ခဲ့တာဖြစ်ပြီး၊ ၁ နာရီခွဲဝန်းကျင်ကြာ အနီးကပ်တိုက်ခိုက်ခဲ့ကြတာဖြစ်သလို ဒေသခံကာကွယ်ရေးတပ်တွေဘက်က ၁ ဦးဒဏ်ရာရခဲ့တယ်လို့ ဆိုပါတယ်။

ပြီးခဲ့တဲ့မတ်လ ၃၀ ရက်နေ့လယ်ကလည်း ကနီမြို့အနောက်ဘက်ခြမ်းမှာ ကင်းပုန်းဝတ်နေတဲ့အင်အား ၃၀ လောက်ရှိ စစ်တပ်နဲ့ DRPA ပူးပေါင်းအဖွဲ့တို့ ထိတွေမှုဖြစ်ပြီး စစ်သား ၂ ဦး သေဆုံးခဲ့ပါသေးတယ်။

မကွေး၊ ဖေဖော်ဝါရီ ၈၊ ၂၀၂၃။

မကွေးတိုင်း၊ ကျောက်ထုမြို့နယ်၊ သရက်ချည်ကျေးရွာကနေ ကျောက်ထုမြို့ဘက်ကို ပြန်လာတဲ့ စစ်ကောင်စီတပ်သားတွေကို ဒေသခံကာကွယ်ရေးတပ်တွေက ဖေဖော်ဝါရီလ ၇ ရက် မနေ့ကမနက်ပိုင်းမှာ မိုင်းဆွဲတိုက်ခိုက်ခဲ့ပါတယ်။

တမခ ၅၅၊ တမခ ၁၁ နဲ့ တမခ ၁၀၁ တပ်ရင်းက စစ်သားတွေဟာ ဖေဖော်ဝါရီလ ၆ ရက်ညက သရက်ချည်ကျေးရွာမှာ ညအိပ်တပ်စွဲပြီး မနက်ပိုင်းမှ အင်အား ၈၀ ဝန်းကျင်နဲ့ စစ်ကြောင်းထွက်လာချိန် ငလွန်းကျေးရွာနဲ့ ကျောက်ထုမြို့အကြားမှာတိုက်ခိုက်ခံခဲ့ရတာကြောင့် စစ်သား ၃ ဦး သေဆုံးခဲ့တယ်လို့ Kyaukhtu Regional People Defense Force တာဝန်ခံက ပြောပါတယ်။

“အဲဒီစစ်ကြောင်းက နေတိုင်းလိုလို ကျောက်ထုမြို့နဲ့ ထီးချိုင့်နယ်ထဲကို ပတ်နေတာ၊ သရက်ချည်ကျေးရွာမှာ ညအိပ်တယ်။ မိုင်း ၁၀ လုံးခွဲတာမှာ ၇ လုံး ခွဲနိုင်ခဲ့တယ်။ ၃ ကောင် သေပြီး ထမ်းစဉ်နဲ့ ၈ ကောင် သယ်သွားတာ တွေ့ရတယ်။ ကားနဲ့လာပြီးတော့ အလောင်းတွေ လာကောက်တာလည်း ရှိတယ်။ အလောင်းတွေကို ကားနဲ့ကျောက်ထုတပ်ထဲကို သယ်ပြီး ဒဏ်ရာရသူတွေကိုတော့ ကျောက်ထုရဲစန်းထဲ သယ်တယ်” လို့ ပြောပါတယ်။

ဒီသေဆုံးမှုတွေကို မြေပြင်တိုက်ခိုက်ရေး ရဲဘော်တွေရဲ့ မျက်မြင်အရ အတည်ပြုနိုင်ခဲ့တယ်လို့ဆိုပေမယ့် မြေလတ်အသံက သီးခြားအတည်မပြုနိုင်သေးပါဘူး။

ပြီးခဲ့တဲ့ နိုဝင်ဘာလ ၂၅ ရက်ကလည်း အဆိုပါစစ်ကြောင်းကို ကျောက်ထုမြို့အဝင် ယောချောင်းတံတားထိပ်အရောက်မှာ Kyaukhtu Regional People Defense Force အဖွဲ့က မိုင်းဆွဲတိုက်ခိုက်ခဲ့ရာ စစ်ကောင်စီဘက်က ထိခိုက်သေဆုံးသူတွေ ရှိခဲ့ပါသေးတယ်။

မန္တလေး၊ ဇန်နဝါရီ ၂၇၊ ၂၀၂၃။

မကွေးတိုင်း၊ ပေါက်မြို့နယ်အတွင်းမှာ ဇန်နဝါရီလ ၂၇ ရက်ဒီနေ့လယ်ပိုင်းက စစ်ကောင်စီတပ်သားတွေနဲ့ ဒေသခံကာကွယ်ရေးတပ်တို့ ထိတွေ့တိုက်ပွဲဖြစ်ခဲ့ပါတယ်။

ယာကြီးပြင်ကျေးရွာကနေ ပေါက်မြို့ဘက်ကိုလာတဲ့ ကပစ ၂၄ ကစစ်သားတွေနဲ့ အုန်းတောရွာအနီး စစ်ဆေးရေးလုပ်နေတဲ့ PDF တို့ ဒီနေ့လယ် ၂ နာရီ ၄၅ မိနစ်လောက်မှာတိုက်ခိုက်ခဲ့တာလို့ ပြည်သူ့ကာကွယ်ရေးတပ်ဖွဲ့ – မြိုင်မြို့နယ်မှ ဗိုလ်လက်ယာက ပြောပါတယ်။

“အုန်းတောရွာအနီးမှာ စစ်ဆေးရေးလုပ်နေတဲ့အချိန် စစ်သားတွေက Mark-2 ကားနဲ့လာပြီး ကျနော်တို့ စစ်ဆေးနေတာမြင်တော့ သူတို့ဘက်ကအရင်ဆုံးပစ်တယ်၊ ကျနော်တို့အဖွဲ့တွေကလည်း အကုန်ဝိုင်းပြီး ပြန်ပစ်တယ်” လို့ ပြောပါတယ်။

တိုက်ခိုက်မှုအတွင်း စစ်ကောင်စီဘက်က ဗိုလ်ကြီး ၁ ဦးနဲ့ တပ်ကြပ် ၁ ဦးသေဆုံးကာ ဗိုလ် ၁ ဦးကတော့ လက်ရှိမှာဆေးရုံတက် ကုသနေရတဲ့အပြင် Ma-3 ၁ လက်၊ ကျည်ဘောက် ၁ ခု၊ ကျည် ၆၈ ထောင့်၊ စကားပြောစက် ၁ လုံး နဲ့ အင်္ကျီ ၁ ထည် တို့ကိုလည်းသိမ်းဆည်းနိုင်ခဲ့တယ်လို့ ဗိုလ်လက်ယာက ဆက်ပြောပါတယ်။

သေဆုံးသူနဲ့ ဒဏ်ရာရသူတွေကိုတော့ တပ်တွင်းသတင်းပေး (ဖရဲသီး)တွေရဲ့ သတင်းပေးချက်အရ အတည်ပြုနိုင်ခဲ့တာလို့ ဆိုပါတယ်။

ဒီတိုက်ခိုက်မှုကို ပြည်သူ့ကာကွယ်ရေးတပ်ဖွဲ့ – မြိုင်မြို့နယ်၊ မြိုင် ပကဖ ရင်း ( ၁ )၊ ပေါက် ဗိုလ်တစ္ဆေအဖွဲ့၊ ပေါက်ကျေးရွာ ကာကွယ်ရေးအဖွဲ့တွေနဲ့ YDF တပ်ရင်းတို့က ပူးပေါင်းလုပ်ဆောင်ခဲ့တာဖြစ်ပြီး တိုက်ခိုက် ခံရပြီးနောက် PDF ရဲဘော် ၁ ဦး ပေါင် နဲ့ ခြေဖ‌နောင့်ကို ထိမှန်ခဲ့ပေမယ့် စိုးရိမ်ရတဲ့အခြေအနေမဟုတ်ဘူးလို့လည်း သိရပါတယ်။

ပြီးခဲ့တဲ့ဒီဇင်ဘာလ ၂၆ ရက်ကလည်း မြိုင်မြို့နယ် Well-2 ရေနံမြေစခန်းက မိုင်းရှင်းဖို့ထွက်လာတဲ့ စစ်သားနဲ့ပျူတွေကို တဲကြီးရွာအနီးမှာ ပြည်သူ့ကာကွယ်ရေးတပ်ဖွဲ့ – မြိုင်မြို့နယ်အဖွဲ့က မိုင်းဆွဲတိုက်ခိုက်ခဲ့ရာ စစ်သား ၂ ဦး ပျူ ၁ ဦး သေဆုံးခဲ့ပါသေးတယ်။