ဒရုန်း

ရွှေဘို၊ ဖေဖော်ဝါရီ ၂၅၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်က ပျူစောထီးကင်းစခန်း ၃ ခု ဒရုန်းဗုံးချတိုက်ခိုက်ခံရပြီး ၁ ဦး သေဆုံးကာ ၈ ဦး ဒဏ်ရာရတယ်လို့ တိုက်ခိုက်မှုမှာပါဝင်တဲ့ PDF အဖွဲ့ဝင်တဦးထံက သိရပါ တယ်။

ဖေဖော်ဝါရီ ၂၄ ရက် မနေ့ နေ့လယ် ၁ နာရီခန့်မှာ ခွန်တောင်ကြီးရွာနဲ့ ခွန်တောင်ကြီး-ညောင်ကန်ရွာလမ်းပေါ်ရှိ ပျူစောထီးအဖွဲ့တွေရဲ့ ကင်းစခန်းနေရာနေရာ ၃ ခုကို ဒရုန်းနဲ့ဗုံးသီး ၁၈ လုံးချ တိုက်ခိုက်ခဲ့တာလို့ ဆိုပါတယ်။

” ညောင်ကန်ဘက်ကို ဝင်လာတာမို့လို့ ဒီဘက်နေပြီးတော့ သူတို့ရွာကင်းတွေပြန်ဆုတ်သွားတဲ့အချိန်မှာ ဒရုန်းတွေနဲ့ဗုံးချတာ”လို့ တိုက်ခိုက်မှုအတွင်းပါဝင်တဲ့ ဒရုန်းတပ်ဖွဲ့ဝင်တဦးက ပြောပါတယ်။

ဒရုန်းဗုံးချတိုက်ခိုက်မှုမှာ ခွန်တောင်ကြီးရွာပျူစောထီးစခန်းက ပျူစောထီး ၁ ဦးသေဆုံးပြီး တိုက်ခိုက်ခံရတဲ့ ပျူစောထီးစခန်း ၃ ခုက ဒဏ်ရာရရှိသူ ပျူစောထီး ၈ ဦးရှိတယ်လို့ ၎င်းက ဆိုပါတယ်။

ခွန်တောင်ကြီးကျေးရွာက ပျူစောထီးအားကောင်းတဲ့ကျေးရွာဖြစ်ပြီး လက်နက်ကိုင် ပျူစောထီးအဖွဲ့ဝင် ၅၀ ခန့်ရှိသလို စစ်ကောင်စီအင်အားလည်း ၂၀ ခန့်ရှိတယ်လို့ သိရပါတယ်။

ဖေဖော်ဝါရီ ၁၉ ရက်က ရွှေဘိုမြို့နယ်၊ ပန်းရံကျေးရွာက ပျူစောထီးခေါင်းဆောင် အောင်ကျော်ရဲ့ညီမဖြစ်သူ ဦးဆောင်ပြုလုပ်နေတဲ့ ရှင်ပြုအလှူ ဒရုန်းဗုံးချခံရလို့ ကလေး ၁ ဦးသေ ဆုံးပြီး အများအပြားဒဏ်ရာရခဲ့သေးတယ်လို့ သိရပါတယ်။

စာတည်း – ဟိန်းစံ

ရွှေဘို၊ ဖေဖော်ဝါရီ ၂၁၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ပန်းရံကျေးရွာမှာပြုလုပ်တဲ့ ရှင်ပြုအလှူပွဲ ဒရုန်းနဲ့ဗုံးချခံရလို့ ကလေး ၁ ဦးသေဆုံးပြီး အများအပြားဒဏ်ရာရတယ်လို့ ဒေသကာကွယ်ရေးအဖွဲ့ဝင်တွေထံက သိရပါတယ်။

ဖေဖော်ဝါရီ ၁၉ ရက်က ပန်းရံကျေးရွာဘုန်းကြီးကျောင်းမှာ ကျေးရွာပျူစောထီးခေါင်းဆောင် အောင်ကျော်ရဲ့ ညီမဖြစ်သူပြုလုပ်တဲ့ ရှင်ပြုအလှူပွဲ မနက် ၁၀ နာရီခန့်မှာ ဒရုန်းနဲ့ ဗုံးချခံခဲ့ရတာလို့ဆိုပါတယ်။

” ပန်းရံက ပျူအားကောင်းတဲ့ရွာ။ ချတာကတော့ တခါတည်းချတာ။ ၂ လုံးလား ၃ လုံးလားတော့မသိဘူး။ ဖြစ်စဥ်ကမှန်တယ်။ အလှူကလည်း ပျူအလှူပါ။ ရှင်ပြုအလှူပါ “လို့ ရွှေဘိုခရိုင်ဒေသကာကွယ်ရေးအဖွဲ့ဝင်တဦးက ပြောပါတယ်။

ဒရုန်းဗုံးကျလို့ အလှူပွဲမှာရှိနေတဲ့ ကလေး ၁ ဦးသေဆုံး၊ အများအပြားဒဏ်ရာရခဲ့ပြီး သေဆုံးထိခိုက်သူတွေရဲ့အသေးစိတ်အချက်အလက်ကိုတော့ မသိရသေးဘူးလို့ ဆိုပါတယ်။

ပန်းရံကျေးရွာဟာ ပျူစောထီးခေါင်းဆောင် အောင်ကျော် ဦးစီးတဲ့ လက်နက်ကိုင်ပျူစောထီးအဖွဲ့ဝင် ၃၀ ကျော်နဲ့ ထိန်းချုပ်ထားတဲ့ကျေးရွာဖြစ်ပြီး ဒေသတွင်း ပျူစောထီးအားကောင်းတဲ့ကျေးရွာဖြစ်တယ်လို့ သိရပါတယ်။

ဒရုန်းဗုံးနဲ့တိုက်ခိုက်မှုကို ရွှေဘိုခရိုင်PDFတပ်ရင်းတခုက လုပ်ဆောင်ခဲ့ကြောင်းသိရပြီး တိုက်ခိုက်ခဲ့မှုနဲ့ပတ်သက်လို့ အသေးစိတ်အခြေအနေသိရှိနိုင်ရေး အဆိုပါရွှေဘိုခရိုင်တပ်ရင်းကို ဆက်သွယ်မေးမြန်ခဲ့ပေမယ့် ပြန်လည်ဖြေကြားတာမရှိသေးပါဘူး။

စစ်ကောင်စီထောက်ခံတယ်လီဂရမ်တွေမှာတော့ ကျေးရွာဘုန်းကြီးကျောင်းမှာပြုလုပ်နေတဲ့ ရှင်ပြုအလှူကို PDF တွေဘက်က ဒရုန်းနဲ့ဗုံးလာချလို့ မောင်ရှင်လောင်း အသက် ၉ နှစ်အရွယ် ကလေးငယ် ၁ ဦးသေဆုံးကာ ၁၄ ဦးဒဏ်ရာရတယ်လို့ ဖော်ပြကြပါတယ်။

ဒရုန်းဗုံးကျလို့ ထိခိုက်ဒဏ်ရာရသူတွေကိုတော့ ရွှေဘိုပြည်သူ့ဆေးရုံကို ပို့ဆောင်ထားပြီး ဆေးကုသနေရတယ်လို့ ဆိုပါတယ်။

ပြီးခဲ့တဲ့ ၂၀၂၃ ဒီဇင်ဘာ ၄ ရက်နေ့ကလည်း ပန်းရံကျေးရွာ ပျူစောထီးအဖွဲ့ဝင် ၁ ဦးရဲ့ မင်္ဂလာဆောင်ဒရုန်းဗုံးချခံရပြီး ၂ ဦးသေဆုံးကာ ၁၃ ဦးဒဏ်ရာရခဲ့သေးတယ်လို့ သိရပါတယ်။

စာတည်း – ဟိန်းစံ

စစ်ကိုင်း၊ မတ် ၃၀၊ ၂၀၂၃။

စစ်ကိုင်းတိုင်း၊ ယင်းမာပင်မြို့လယ် ဝါတိုင်အဆောက်အဦး၊ လရိပ်သာတည်းခိုဆောင်အနီးမှာ ယာယီတပ်စွဲထားတဲ့ စစ်ကောင်စီနေရာ ဒရုန်းနဲ့ဗုံးချတိုက်ခိုက်ခံရလို့ ၄ ဦး သေဆုံးတယ်လို့ သိရပါတယ်။

မတ်လ ၂၈ ရက် ညနေ ၃ နာရီခန့်မှာ အင်အား ၁၀၀ ခန့်နဲ့ ယာယီတပ်စွဲထားတဲ့နေရာကို ဒရုန်းနဲ့ M 9 ဗုံးသီး ၆ လုံးချ တိုက်ခိုက်ခဲ့တယ်လို့ Myingyan District Drone Strike အဖွဲ့တာဝန်ရှိသူက ပြောပါတယ်။

“ကျနော်တို့အဖွဲ့က နယ်မြေခံမဟုတ်တော့ မဟာမိတ်အဖွဲ့တွေရဲ့ ဖိတ်ခေါ်တဲ့အတွက် သူတို့နဲ့အတူ ပူးပေါင်းပြီး မစ်ရှင်ဖော်ဆောင်ခဲ့တာပါ။ ဒီမစ်ရှင်ကိုတော့ ခက်ခက်ခဲခဲ လုပ်ဆောင်ခဲ့ရတယ်။ ဒရုန်းတွေ သယ်ယူဖို့ ခက်ခဲတာပေါ့။ ဒရုန်းဗုံးကတော့ ၆ လုံး ချခဲ့တယ်။ ထိခိုက်သေဆုံးကတော့ မျက်မြင်အခြေနေကြည့်ပေးတဲ့သူတွေက သတင်းပြန်ပေးလို့ သိရတာပါ။ သူတို့တပ်က စစ်ကြောင်းထိုးပြီး ယာယီဝင်နားတဲ့အဖွဲ့လို့တော့ သိရတယ်” လို့ ပြောပါတယ်။

စစ်ကောင်စီတပ်စွဲထားတဲ့နေရာ ဒရုန်းနဲ့တိုက်ခိုက်ခံရလို့ စစ်ကောင်စီတပ်သား ၄ ဦး သေဆုံးခဲ့တာကြောင့် ထိခိုက်သေဆုံးသွားတဲ့ စစ်ကောင်စီတပ်ဖွဲ့ဝင်တွေကို လူနာတင်ယာဥ်တွေနဲ့ဆေးရုံဘက်ကို သယ်သွားကြတယ်လို့ သိရပါတယ်။

ဒရုန်းနဲ့တိုက်ခိုက်ခံရပြီးနောက်မှာတော့ စစ်ကောင်စီအဖွဲ့ဟာ လမ်းပိတ်ဆို့ စစ်ဆေးတာ၊ ကင်းပုန်းချတာတွေ ဆက်တိုက်လုပ်ဆောင်ခဲ့ပြီး မတ်လ ၃၀ ရက်ဒီကနေ့အထိ စစ်ကြောင်းပြန်မထွက်နိုင်သေးဘူးလို့ သိရပါတယ်။

အဲ့ဒီတိုက်ခိုက်မှုကို Myingyan District Drone strike MDDS အဖွဲ့၊ 27 revolution forces၊ မြင်းခြံခရိုင် အမှတ်(၃)တပ်ရင်း၊ အမှတ်(၄)တပ်ရင်း၊ MRDA၊ Urban Underground revolution force YSO အဖွဲ့တို့က ပူးပေါင်းတိုက်ခိုက်ခဲ့တာ ဖြစ်ပါတယ်။

စာတည်း – ရင်ငြိမ်း

ပခုက္ကူ၊ မတ် ၂၂၊ ၂၀၂၃။

မကွေးတိုင်း၊ ပခုက္ကူမြို့နယ်၊ ပခုက္ကူ-မြိုင်သွားလမ်းမပေါ် အင်ပင်ကျေးရွာ ဘုန်းကြီးကျောင်းအနီးမှာ အင်အား ၂၀ ခန့်နဲ့ တပ်စွဲထားတဲ့ စစ်ကောင်စီတပ်သားတွေကို မတ်လ ၂၁ ရက် မနေ့နေ့လည် ၁၂ နာရီလောက်မှာ ဒရုန်းဗုံး ၃ လုံး ပစ်ချတိုက်ခိုက်ခဲ့တယ်လို့ သိရပါတယ်။

အဲ့ဒီစစ်ကောင်စီတပ်ဟာ ရေဒီယိုလှိုင်းဖြတ်တဲ့ ဂျန်မာစက်တွေ အသုံးပြုထားပေမယ့် မီးပျက်နေချိန် တိုက်ခိုက်ခဲ့တာကြောင့် အဆောက်အဦးအတွင်း ကျရောက်ပေါက်ကွဲခဲ့လို့ စစ်ကောင်စီတပ်ဖွဲ့ဝင် ၂ ဦး ထိခိုက်ဒဏ်ရာ ရရှိခဲ့တယ်လို့ Royal Defence Force MYG တာဝန်ရှိသူက မြေလတ်အသံကို ပြောပါတယ်။

“ပုံမှန်ဆို ဒီကောင်တွေဆီမှာ ဂျန်မာ(ရေဒီယိုလှိုင်းဖြတ်စက်) ရှိတယ်။ အဲ့တာတွေဖွင့်ထားရင် သူတို့နေရာတွေကို ဒရုန်းပျံလို့ မရဘူး။ မနေ့က ပခုက္ကူဘက်မှာ မီးလိုင်းပျက်နေတုန်းရှိတဲ့ ဂျန်ပါတွေ အလုပ်မလုပ်ချိန်မှာ ဒရုန်းတွေနဲ့ ဗုံးချတိုက်ခိုက်ခဲ့တာ။ တပ်စွဲနေတဲ့အဆောက်အဦးထဲကွဲလို့ ၂ ယောက် ဒဏ်ရာရတယ်” လို့ ပြောပါတယ်။

အဲ့ဒီစစ်ကောင်စီတပ်သားတွေဟာ ပခုက္ကူ-မြိုင်လမ်းပိုင်းမှာ တပ်စွဲထားတာ ၅ လကျော်ရှိပြီဖြစ်ပြီး လမ်းအသုံးပြုတဲ့ကားတွေနဲ့ လမ်းသွားလမ်းလာ ဒေသခံတွေဆီကနေ စစ်ဆေးရေးအကြောင်းပြ ငွေတောင်းခံတာတွေ လုပ်ဆောင်နေတာလို့ ဆိုပါတယ်။

ဒရုန်းနဲ့ဗုံးချတိုက်ခိုက်ခံရပြီးနောက်မှာ စစ်ကောင်စီတပ်ဘက်က လက်နက်ငယ်တွေနဲ့ ပြန်လည်ပစ်ခတ်တာတွေရှိပေမယ့် တော်လှန်ရေးရဲဘော်တွေ အထိအခိုက်မရှိ ပြန်လည်ဆုတ်ခွာလာနိုင်ခဲ့တယ်လို့ သိရပါတယ်။

ဖေဖော်ဝါရီလ ၁၄ ရက်နေ့ကလည်း အင်ပင်ကျေးရွာက စစ်ကောင်စီတပ်စွဲထားတဲ့နေရာ ဒရုန်းနဲ့တိုက်ခိုက်ခံရပြီး စစ်ကောင်စီတပ်သား ၃ ဦး ထိခိုက်ဒဏ်ရာရခဲ့သေးတယ်လို့ သိရပါတယ်။

စာတည်း – ရင်ငြိမ်း

စစ်ကိုင်း၊ မတ် ၄၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်ထဲမှာ မတ်လ ၃ ရက် မနေ့ နေ့လယ်ပိုင်းက စစ်ကောင်စီ ယာဥ်တန်းနှစ်ခုဆုံချိန် ဒေသခံကာကွယ်ရေးတပ်တွေက ဒရုန်းနဲ့ ဗုံးကြဲတိုက်ခိုက်ခဲ့တယ်လို့ သိရပါတယ်။

စစ်ကိုင်းအခြေစိုက် တမခ ၃၃ က ထွက်လာတဲ့ ယာဥ်တန်းနဲ့ မုံရွာမြို့ဘက်က ထွက်လာတဲ့ယာဥ်တန်း စုစုပေါင်း ၂၀ စီးလောက် ဆုံရာ စစ်ကိုင်းမြို့နယ်ထဲက မုံရွာ-မန္တလေး အဝေးပြေးလမ်းမ တနေရာမှာ ဗုံးသီး ၄ လုံး ကြဲချတိုက်ခိုက်ခဲ့တာလို့ T. G.R Women Drone Force ခေါင်းဆောင် ကျားခင်စိန်က အခုလို ပြောပါတယ်။

“မနေ့က စကစ ကားတန်းတွေက ရှုပ်နေတာပဲ။ မုံရွာကနေရော၊ စစ်ကိုင်းကနေရော သူတို့တွေ ကားနဲ့ ပစ္စည်းတခုခုကို သယ်ဆောင်နေကြတာ။ သူတို့ကားတန်းတွေ အဝေးပြေးလမ်းမပေါ် ရောက်လာတဲ့အချိန်မှာ ဒရုန်းနဲ့ကြဲချလိုက်တယ်။ ထိခိုက်မှုတွေတော့ ရှိပါတယ်။ အတိအကျတော့ မသိသေးပါဘူး” လို့ ဆိုပါတယ်။

ဒီပစ်ခတ်မှုကို T. G. R Women Drone Force၊ မြောင်မြို့နယ် T.G.R ပြည်သူ့ကာကွယ်ရေးတပ်ဖွဲ့နဲ့ Black Eagle People Defense Force တပ်ဖွဲ့တို့က ပူးပေါင်းဆောင်ရွက်ခဲ့ကြတာ ဖြစ်ပြီး အဲ့ဒီယာဥ်တန်းတွေပေါ်ကလည်း ပြန်လည်ပစ်ခတ်မှုတွေ ရှိခဲ့တယ်လို့ ဆိုပါတယ်။

T. G. R Women Drone Force တပ်ဖွဲ့ဟာ ပြီးခဲ့တဲ့ ဖေဖော်ဝါရီလထဲမှာလည်း စစ်ကောင်စီတပ်ဖွဲ့တွေကို ဒရုန်းနဲ့ ၆ ကြိမ်ထက်မနည်း တိုက်ခိုက်ခဲ့သေးတယ်လို့ သိရပါတယ်။

ဒါ့အပြင် ဇန်နဝါရီလ ၇ ရက် မနက် ၆ နာရီဝန်းကျင်မှာလည်း စစ်ကိုင်းမြို့ဘက်က ထွက်လာတဲ့ စစ်ကောင်စီကား ၃ စီးကို မြင်းမူမြို့နယ်၊ ဂွေးပင်တောရွာနဲ့ နတ်ရေကန်ရွာကြားမှာ တိုက်ခိုက်ခဲ့ရာ စစ်ကောင်စီဘက်က ထိခိုက်သေဆုံးမှုတွေ ရှိခဲ့ပါသေးတယ်။