ထွက်ပြေး

မင်းလှ၊ မတ် ၂၃၊ ၂၀၂၃။

ပဲခူးတိုင်း(အနောက်ခြမ်း)၊ သာယာဝတီခရိုင်၊ မင်းလှမြို့နယ်၊ စိန်ကန့်လန့်ရွာအခြေစိုက် ခလရ ၁ တပ်က အချုပ်သား ၁ ဦးနဲ့ စစ်ကောင်စီတပ်သား ၂ ဦး မတ်လ ၂၃ ရက် ဒီနေ့မနက် ၃ နာရီလောက်မှာ လက်နက်တွေယူပြီး ထွက်ပြေးသွားတယ်လို့ သိရပါတယ်။

ထွက်ပြေးသွားသူတွေဟာ ခလရ ၁ ဗဟိုကင်းတပ်တွင်းအချုပ်မှာ ဖမ်းခံထားရတဲ့ စစ်ကောင်စီတပ်ဖွဲ့ဝင်အချုပ်သား ၁ ဦးနဲ့ တပ်ဗဟိုကင်းအချုပ်စောင့် တပ်သား ၂ ဦးဖြစ်ပြီး သေနတ် ၃ လက်ယူပြီး ထွက်ပြေးနေတာလို့ တပ်တွင်းသတင်းရင်းမြစ်တဦးက မြေလတ်အသံကို ပြောပါတယ်။

“အချုပ်စောင့်တဲ့ဗဟိုကင်း ကင်းသမား ၂ ယောက်ရယ်၊ အချုပ်သားတယောက်ရယ် မနက် ၃ နာရီလောက်ကြီး ထွက်ပြေးသွားတာ။ ခလရ ၁ က တောအစပ်မှာဆိုတော့ပြေးလို့လွယ်တယ်။ သေနတ်တလက်စီ ပါသွားတယ်” လို့ ပြောပါတယ်။

လက်ရှိမှာ သေနတ်တွေယူဆောင်ထွက်ပြေးသွားတဲ့ စစ်ကောင်စီတပ်သားတွေကို ခလရ ၁ နောက်တန်း စစ်ကောင်စီတပ်ဖွဲ့ဝင်တွေက တောနင်းရှာဖွေနေပြီး တွေ့တဲ့နေရာ ပစ်သတ်ဖို့ ညွှန်ကြားထားတယ်လို့လည်း ဆိုပါတယ်။

“သူတို့သေနတ်တွေကို နိုင်သလောက်သယ်ဖို့လုပ်နေတာလို့ သိရတယ်။ လက်နက်တိုက်ဖောက်နေတာကို ဟိုတလောက မုဒိန်းမှုနဲ့အချုပ်ကျနေတဲ့ ထွန်းနိုင်ကတွေ့လို့ အော်လိုက်လို့တယောက်တလက်စီပဲ ပါသွားတာ။ ခုတပ်ထဲမှာလည်း ဆူညံပွက်လောရိုက်နေတာ။ သူတို့ကို စစ်ကြောင်းထိုး တောနင်းရှာနေတယ်။ ပစ်မိန့်လည်း ပေးထားတယ်။ လူတွေအရှင်မမိရင်နေ သေနတ်တွေပြန်ရအောင် ရှာရမယ်ဆိုပြီး အမိန့်ထုတ်ထားတယ်” လို့ သူကဆက်ပြောပါတယ်။

စစ်ကောင်စီတပ်သားတွေကို ချုပ်နှောင်ထားတဲ့ တပ်တွင်းအချုပ် ဗဟိုကင်းဟာ တပ်ရင်းတခုလုံးရဲ့ လက်နက်၊ ခဲယမ်းတွေကို သိမ်းဆည်းထားရှိတဲ့ လက်နက်တိုက်လည်း ဖြစ်တယ်လို့ သိရပါတယ်။

လက်ရှိအချိန်ထိ ထွက်ပြေးသွားသူတွေကို အောက်ခြေမှာ တောနင်းရှာဖွေနေဆဲဖြစ်ပြီး ဖြစ်စဉ်ဖြစ်ပွားမှုကို ခလရ ၁ နောက်တန်းအရာရှိတွေက တပ်မ ၆၆ နဲ့ ဒကစ(ပြည်)ဌာနချုပ်တွေကို တင်ပြတာမျိုးမရှိသေးဘဲ ကြိတ်ပြီးရှာဖွေနေတယ်လို့ ဆိုပါတယ်။

မင်းလှအခြေစိုက် ခလရ ၁ တပ်ဟာ တပ်မ ၆၆ လက်အောက်ခံ တပ်ရင်းတခုဖြစ်ပြီး ကရင်နီပြည်နယ်အတွင်း စစ်ဆင်ရေးဝင်ရောက်နေတဲ့တပ်ဖြစ်ကာ၊ ရှေ့တန်းစစ်ဆင်ရေးမှာလည်း ထိခိုက်ကျဆုံး များနေသလို နောက်တန်းမှာလည်း အုပ်ချုပ်မှုလျော့နည်းဖြစ်စဉ် အမှုအခင်းတွေ ဆက်တိုက်ဖြစ်ပွားနေကာ အခုမတ်လအတွင်းမှာပဲ ခလရ ၁ က စစ်ကောင်စီတပ်သား ထွန်းနိုင်ဟာ စိန်ကန့်လန့်ရွာနေ အငြိမ်းစားဗိုလ်ကြီး မျိုးမြင့်ရဲ့သမီးဖြစ်သူ စိတ်ဝေဒနာသည်ကို အကြိမ်ကြိမ်အဓ္ဓမပြုကျင့်မှု ဖြစ်ပွားခဲ့သေးတယ်လို့ တပ်တွင်းသတင်းရင်းမြစ်တွေဆီက သိရပါတယ်။

ပခုက္ကူ၊ မတ် ၁၂၊ ၂၀၂၃။

မကွေးတိုင်း၊ ပခုက္ကူမြို့နယ်၊ ကျွန်းချောင်းလျှပ်စစ်ဓာတ်အားထုတ်လုပ်ရေးစက်ရုံအနီးတဝိုက်က ရွာတွေကို စစ်ကောင်စီတပ်က လက်နက်ကြီးနဲ့ပစ်ခတ်နေလို့ ဒေသခံ ၁ သောင်းကျော်ဟာ နေရပ်စွန့်ခွာ ထွက်ပြေးနေရတယ်လို့ သိရပါတယ်။

မတ်လ ၉ ရက်နေ့ညပိုင်းမှာ ကျွန်းချောင်းလျှပ်စစ်ဓာတ်အားပေးစက်ရုံအနီးက စာသင်ကျောင်းမှာ စစ်ကောင်စီတပ်နဲ့ ပျူစောထီးအင်အား ၇၀ကျော် လာရောက်တပ်စွဲပြီး ညအချိန်တွေမှာ ကျေးရွာတွေကို လက်နက်ကြီး၊ လက်နက်ငယ်တွေနဲ့ အချိန်အတော်ကြာ ပစ်ခတ်နေတာကြောင့် အခုလိုထွက်ပြေးနေကြရတာလို့ ဒေသခံတဦးက မြေလတ်အသံကို ပြောပါတယ်။

“ညအချိန်ရောက်ရင် ဒီကောင်တွေက နေ့တိုင်းလိုလို လက်နက်ကြီး၊ လက်နက်ငယ်တွေနဲ့ ပစ်တယ်။ ဘာကြောင့်ပစ်လဲတော့ မသိဘူးပေါ့။ ကျည်တွေက နေအိမ်တွေ၊ဘုန်းကြီးကျောင်းတွေကို လာထိတာတွေရှိတယ်။ အဲဒါကြောင့် ထွက်ပြေးလာခဲ့တာပေါ့။ ဒီကောင်တွေက ယာယီတပ်စွဲတာလား။ အမြဲတမ်း တပ်စွဲ အထိုင်ချမှာလားတော့ မသိရသေးဘူး။ စောင့်ကြည့်ရအုံးမှာ” လို့ ပြောပါတယ်။

ထွက်ပြေးနေရတဲ့သူတွေဟာ ကျွန်းချောင်းလျှပ်စစ်ဓာတ်အားပေးစက်ရုံအနီးက မြို့စိုး၊ ငှက်ပျောတော၊ သီရိလေး၊ ပေါက်တော၊ ကံကြီးစု၊ အိုင်ကြီး၊ ညောင်လှ၊ ညောင်နီပင်၊ သိမ်တော်၊ ဆယ်လံစတဲ့ရွာတွေက ဒေသခံ ၁ သောင်းကျော်အထိ ရှိနေပြီး လက်ရှိမှာ လယ်ကွင်းပြင်တွေထဲ ယာယီတဲထိုး နေထိုင်စစ်ရှောင်နေရတယ်လို့ ဆိုပါတယ်။

“လယ်ကွင်းပြင်တွေထဲမှာ နေကြရတော့ အရမ်းအခက်အခဲ ဖြစ်တာပေါ့။ ဒီနေ့နဲ့ဆို ထွက်ပြေးလာတာ ၄ ရက်ရှိပြီ။ နေ့ဆို အပူဒဏ်ခံရပြီး ညဆိုအအေးဓာတ်ကို အလူးအလိမ့် ခံနေရတယ်။ ရွာကိုလည်း ပြန်မသွားရဲကြသေးဘူး။ စကစတွေက စာသင်ကျောင်းထဲ ရှိနေတုန်းပဲ။ ဒေသခံတွေကတော့ ရွာ ၁၀ ရွာကပါ” လို့ ထွက်ပြေးနေရတဲ့ အမျိုးသားတဦးက ပြောပါတယ်။

အဲ့ဒီစစ်အုပ်စုဟာ မတ်လ ၉ ရက်နေ့က ဆိက္ခဝ ပျူကျေးရွာကနေ တန့်ကြည်တောင်ပေါ်ကို စစ်ကြောင်းထိုးလာခဲ့ပြီး အဲ့ဒီတောင်ပေါ်ကနေတဆင့် ကျွန်းချောင်းလျှပ်စစ်ဓာတ်အားပေးစက်ရုံအနီး အထက စာသင်ကျောင်းကို ရောက်ရှိတပ်စွဲကာ တိုက်ပွဲဖြစ်ပွားတာမရှိဘဲ ကျေးရွာတွေကို လက်နက်ကြီး၊ လက်နက်ငယ်တွေနဲ့ ပစ်ခတ်နေတာလို့ ဒေသခံတွေက ပြောပါတယ်။

ရမည်းသင်း၊ မတ် ၂၊ ၂၀၂၃။

မန္တလေးတိုင်း၊ ရမည်းသင်းမြို့နယ်ရှိ ရမည်းသင်းအကျဉ်းထောင်က အချုပ်သားတွေ မတ်လ ၁ ရက် မနေ့ညနေ ၄နာရီခွဲခန့်က တရားရုံးချိန်းအပြန်မှာ အချုပ်ကားကို စီးနင်းပြီး ထွက်ပြေးလွတ်မြောက်နေတယ်လို့ သိရပါတယ်။

နေပြည်တော်ကောင်စီနယ်မြေ၊ ပျဉ်းမနားခရိုင် တရားရုံးမှာ တရားရုံးထုတ်ပြီး ရမည်းသင်းထောင်ကိုအပြန် ရန်ကုန်-မန္တလေးလမ်းဟောင်းပေါ် တပ်ကုန်းမြို့နယ် သူဌေးကုန်းကျေးရွာအနီးအရောက်မှာ အချုပ်ကားနဲ့ လိုက်ပါလာတဲ့ အချုပ်သားတွေဟာ လုံခြုံရေးအစောင့်ရဲကို သေနတ်လုယူတိုက်ခိုက်ပြီး ထွက်ပြေးလွတ်မြောက်ခဲ့တာလို့ ဒေသခံတဦးက မြေလတ်အသံကို ပြောပါတယ်။

“ပျဉ်းမနားတရားရုံးကနေ ရုံးထုတ်ပြီးအပြန်မှာ ဖြစ်တာလို့ သိရတယ်။ အချုပ်သားတွေက မလုပ်လောက်ဘူးထင်ပြီး လုံခြုံရေးပေါ့တာလည်း ပါမယ်။ ရဲအင်အားအနည်းစုလောက်ပဲ ပါတယ်။ အချုပ်သားတွေက စုပြီး လုံခြုံရေးလိုက်ပါလာတဲ့ ရဲဆီက သေနတ်လုပြီး ပစ်ခတ်တယ်။ ပြီးတော့ ထွက်ပြေးကြတာ သေနတ်ပါ ပါသွားတယ်။ အချုပ်သားတွေက လူညီသွားတော့ ရဲတွေ ခံလိုက်ရတယ်” လို့ ပြောပါတယ်။

အဲ့ဒီအချုပ်ယာဥ်ပေါ်မှာ အချုပ်သားအမျိုးသား ၁၉ ဦးနဲ့ အမျိုးသမီး ၂ ဦးကို ခေါ်ဆောင်လာတာဖြစ်ပြီး အမျိုးသား ၉ ဦးက ထွက်ပြေးခဲ့ရာ မနေ့ညနေပိုင်းမှာပဲ အချုပ်သား ၃ ဦးပြန်လည်ဖမ်းဆီးခံခဲ့ရပြီး ၁ ဦးက သေဆုံးသွားတယ်လို့ သိရပါတယ်။

“ထွက်ပြေးတာက ၉ ယောက် ထွက်ပြေးတာလို့ သိရတယ်။ အကုန်လုံးခြေဦးတည့်ရာ ပြေးကြတာ။ အဲ့ဒီထဲက ၃ ယောက်က တပ်ကုန်းမြို့နယ်ထဲက လမ်းဟောင်းနားမှာပဲ ပြန်အဖမ်းခံရတယ်လို့ သိရတယ်။ သူတို့ကို ပစ်ဖမ်းတာ ၁ ယောက် သေသွားပြီး ၂ ယောက်ကို အရှင်မိတာ။ သေသွားတဲ့အချုပ်သားကို တပ်ကုန်းဆေးရုံကို ပို့ထားတယ်” လို့ သူက ဆက်ပြောပါတယ်။

အခင်းဖြစ်ပွားမှုအတွင်း အချုပ်သားတွေရဲ့တိုက်ခိုက်မှုကြောင့် အစောင့်ရဲတပ်သား ၁ ဦး သေနတ်ကျည် ထိမှန်ခဲ့လို့ တပ်ကုန်းမြို့ ကုတင် – ၁၀၀ ဆေးရုံကို ပို့ဆောင်ကုသနေရတယ်လို့ သိရပါတယ်။

အချုပ်သားတွေ ထွက်ပြေးသွားပြီးတဲ့နောက် စစ်ကောင်စီဘက်က မနေ့ညနေကစလို့ တပ်ကုန်းနယ်မြေ တဝိုက်မှာ အင်အားအများအပြားနဲ့ လိုက်လံရှာဖွေနေပြီး အသာတကြည် အဖမ်းမခံရင် တွေ့တဲ့နေရာ ပစ်သတ်ဖို့ အမိန့်ပေးထားတယ်လို့ ဆိုပါတယ်။

စာတည်း – ရင်ငြိမ်း

မကွေး၊ ဖေဖော်ဝါရီ ၁၅၊ ၂၀၂၃။

မကွေးတိုင်း၊ မြိုင်မြို့နယ်၊ ဝက်ပုတ်ကျေးရွာမှာ အခြေချတပ်စွဲထားတဲ့ စစ်သားနဲ့ပျူတွေက မိုင်ဝက်သာသာဝေးတဲ့ ကျွဲတွင်းကျေးရွာကို တိုက်ပွဲမဖြစ်ပဲ လက်နက်ကြီးနဲ့ပစ်ခတ်လို့ တိရိစ္ဆာန်အချို့ထိမှန် သေဆုံးခဲ့သလို ရွာသားတွေလည်း ထွက်ပြေးတိမ်းရှောင်ခဲ့ရပါတယ်။

ဖေဖော်ဝါရီလ ၁၄ ရက်မနေ့ကညနေ ၅ နာရီကျော်လောက်မှာ လက်နက်ကြီးနဲ့ ၈ ချက်ခန့်ပစ်ခတ်ခဲ့ရာ ဒေသခံတွေကိုတော့ မထိခိုက်ပဲ နွား ၂ ကေင်ကတော့ ကျည်ထိမှန်သေဆုံးခဲ့တယ်လို့ ပြည်သူ့ကာကွယ်ရေးတပ်ဖွဲ့ – မြိုင်မြို့နယ်မှ ဗိုလ်လက်ယာက ပြောပါတယ်။

“ဒေသခံတွေ ထွက်ပြေးတိမ်းရှောင်နေရတယ်လို့ သိရပါတယ်။ စစ်ကောင်စီတပ်သားတွေက တိုက်ပွဲမဖြစ်ပဲ ၆၀ မမ လက်နက်ကြီးနဲ့ ၈ ချက်ပစ်ခတ်တာ၊ အသံကြားလို့ ပြည်သူကတော့ တိမ်းရှောင်နိုင်ပြီး တိရစ္ဆာန်တွေ ထိသွားတယ်။ ပစ်ခတ်ခဲ့တာကြောင့် နွား ၂ ကောင်သေပြီး ၁ ကောင် ဒဏ်ရာရတယ်” လို့ ပြောပါတယ်။

ပခုက္ကူအခြေစိုက် တမခ ၁၀၁၊ ရေစကြိုအခြေစိုက် ခလရ ၂၅၈ က စစ်သားတွေနဲ့ ဝက်ပုတ်ရွာက ပျူစောထီးတွေ ပူးပေါင်းပြီး ခုလိုပစ်ခတ်ခဲ့တာဖြစ်သလို ခုလိုပစ်ခတ်လို့ အိမ်ခြေ ၂၀၀ ဝန်းကျင်ရှိတဲ့ ကျွဲတွင်းရွာက ဒေသခံ ၄၀၀ လောက်က ရွာကနေထွက်ပြေးနေရတယ်လို့ ဆိုပါတယ်။

ခုလက်ရှိမှာလည်း အဆိုပါစစ်အုပ်စုဟာ မြိုင်နယ်အတွင်း စစ်ကြောင်းထိုးဖို့ ပြင်ဆင်နေတယ်လို့ သိရပါတယ်။

မြေလတ်အသံ၊ ဖေဖော်ဝါရီ ၇၊ ၂၀၂၃။

စစ်ကောင်စီရုံးစိုက်ရာ နေပြည်တော်ကောင်စီနယ်မြေ၊ ဇေယျာသီရိမြို့နယ်၊ စစ်ကောင်စီတပ် စစ်ရုံးချုပ်အတွင်းက စစ်ဘက်ရေးရာလုံခြုံရေးတပ်ဖွဲ့အရာရှိချုပ်ရုံး(စရခ)မှာ တာဝန်ထမ်းဆောင်နေတဲ့ အမျိုးသမီးတပ်ကြပ်ကြီး/စာရေး ၂ ဦး အခုလ ဖေဖော်ဝါရီလဆန်းပိုင်းက ထွက်ပြေးသွားတယ်လို့ သိရပါတယ်။

အဲ့ဒီ တပ်ကြပ်ကြီး/ စာရေးအမျိုးသမီး ၂ ဦးဟာ စစ်ကောင်စီတပ် စစ်ဘက်ရေးရာလုံခြုံရေးတပ်ဖွဲ့အရာရှိချုပ်ရုံး(စရခ )ရုံးရဲ့ ထိပ်တန်းလျှို့ဝှက် အချက်အလက်တွေ ထိန်းသိမ်းထားတဲ့ဌာနမှာ တာဝန်ထမ်းဆောင်သူတွေဖြစ်ပြီး သူတို့နောက်ကို စစ်ကောင်စီတပ်ရဲ့ အရေးကြီးအချက်အလက်တွေ ပါသွားတယ်လို့ ယူဆပြီး စစ်ခေါင်းဆောင်တွေက တွေ့တဲ့နေရာမှာ ပစ်သတ်ဖို့ နိုင်ငံအနှံ့ တပ်တွေကို ညွှန်ကြားထားတယ်လို့ ဆိုပါတယ်။

“၁ လပိုင်း လစာထုတ်ပြီး နောက်ရက်မှာ ပြေးသွားတာ၊ အစောပိုင်းမှာ သူတိုကိုလိုက်ပြီး ဆက်သွယ်ပြန်ခေါ်သေးတယ်။ ဘယ်လိုမှ ရှာမရတော့ ခွင့်မဲ့ကြေငြာပြီး တွေ့တဲ့နေရာမှာ ပစ်သတ်ဖို့ထိ ညွှန်ကြားထားတယ်လို့ သိရတယ်။ သူတို့ (တပ်ကြပ်ကြီး/စာရေးမ ၂ ဦး)က စရခရုံး ရဲ့ အရေးကြီးထိပ်တန်းလျှို့ဝှက်တွေ ထိန်းထားတဲ့ဌာနမှာ တာဝန်ထမ်းဆောင်ခဲ့တာဆိုတော့ အရေးကြီး အချက်အလက်တွေ ပါသွားနိုင်တယ်ဆိုပြီး အဲ့ဒီလို အမိန့်ပေးထားတာလို့ သိရတယ်။ သူတို့နောက်ကို အဲ့ဒီဒေတာတွေ ပါ၊မပါဆိုတာ ဘယ်သူမှမသိဘူး။ စစ်ခေါင်းဆောင်တွေက ထင်မြင်ယူဆချက်တွေနဲ့ သတ်ခိုင်းနေတာ” လို့ နေပြည်တော်စစ်ကောင်စီတပ် စစ်ရုံးချုပ်နဲ့ နီးစပ်တဲ့ သတင်းရင်းမြစ်တဦးက မြေလတ်အသံကို ပြောပါတယ်။

ထွက်ပြေးလွတ်မြောက်နေတဲ့ တပ်ကြပ်ကြီး/စာရေးအမျိုးသမီး ၂ ဦးဟာ အမျိုးသမီး ကွန်ပျူတာဒီပလိုမာ တပ်ကြပ်ကြီး/စာရေးသင်တန်း အမှတ်စဉ် ၃ ဆင်း တပ်ကြပ်ကြီးတွေ ဖြစ်ပြီး လက်ရှိအချိန်ထိတော့ ထွက်ပြေးလွတ်မြောက်နေဆဲ ဖြစ်တယ်လို့ သိရပါတယ်။

လက်ရှိမှာ နေပြည်တော်စစ်ရုံးအတွင်း လုံခြုံရေးပိုမိုတင်းကြပ်ထားပြီး စစ်ရုံးအတွင်းမှာရှိနေတဲ့ တပ်ကြပ်ကြီး/စာရေးအမျိုးသမီးတွေထားရှိတဲ့ အပျိုဆောင်ကိုလည်း မကြာခဏ လူစစ်ဆေးမှုတွေ လုပ်ဆောင်နေတယ်လို့ သိရပါတယ်။

စစ်ကောင်စီတပ်ရဲ့ စစ်ဘက်ရေးရာလုံခြုံရေးတပ်ဖွဲ့အရာရှိချုပ်ရုံး (စရခ)ဟာ စစ်ကောင်စီတပ်တခုလုံးရဲ့ နိုင်ငံအနှံ စစ်ဘက်ရေးရာလုံခြုံရေးတပ်ဖွဲ့ (စရဖ) တပ်အားလုံးကို ကွပ်ကဲနေတဲ့ ရုံးဖြစ်ပြီး စရဖတပ်တွေဟာ တော်လှန်ရေးအင်အားစုတွေရဲ့ သတင်းနဲ့ လှုပ်ရှားမှုကို အသွင်အမျိုးမျိုးနဲ့ ဖမ်းဆီးမှုတွေ လုပ်ဆောင်နေတဲ့ တပ်ဖွဲ့ဖြစ်ကာ လက်ရှိစစ်ဘက်ရေးရာ လုံခြုံရေးတပ်ဖွဲ့ အရာရှိချုပ်ဟာ စစ်ကောင်စီတွဲဖက် အတွင်းရေးမှူး ဒု-ဗိုလ်ချုပ်ကြီး ရဲဝင်းဦး ဖြစ်တယ်လို့ စစ်ဘက်သတင်းရင်းမြစ်တွေဆီက သိရပါတယ်။