နတ်တလင်း၊ မေ ၂ ၊ ၂၀၂၅။

ပဲခူးတိုင်းအနောက်ခြမ်း၊ နတ်လင်းမြို့နယ်အရှေ့ဘက်ရှိ စစ်ကောင်စီတပ်ရဲ့ ဒမငယ်ရဲကင်းစခန်းကို မေ ၂ ရက် ဒီမနက် ၄ နာရီလောက်မှာ ပြည်သူ့ကာကွယ်ရေးတပ်မတော် PDF ပူးပေါင်းတပ်တွေက တိုက်ခိုက်ခဲ့တာကြောင့် ၃ ဦးသေကာ လက်နက်ခဲယမ်းအချို့ သိမ်းဆည်းရမိတယ်လို့ တပ်ရင်း ၃၈၀၁၊ တပ်ခွဲ ၂ ဆီက သိရပါတယ်။

စစ်ကောင်စီတပ်သား၊ ရဲနဲ့ ပျူစောထီး အင်အား ၁၅ ဦးခန့်ရှိတဲ့ ဒမငယ်နယ်မြေရဲကင်းကို ဝင်ရောက်တိုက်ခိုက်ခဲ့တာဖြစ်ပြီး နှစ်ဘက်ပြန်လှန်ပစ်ခတ်ချိန် ၁ နာရီလောက် ကြာမြင့်တယ်လို့ ဆိုပါတယ်။

“တိုက်ပွဲတွင်းမှာ သေတာ ၂ ကောင်၊ ကွက်သစ်ဆေးရုံရောက်မှသေတာ ၁ ကောင်၊ စုစုပေါင်း ၃ ကောင်ပါ။ အဲစခန်းမှာ စစ်** ရဲ**နဲ့ ပျူတွေရောနေတာလေ။” လို့ တပ်ရင်း ၃၈၀၁၊ တပ်ခွဲ ၂ က ပြောပါတယ်။

လက်ရှိမှာ အဲဒီစခန်းက စစ်အုပ်စုဝင်တွေဟာ ဒမငယ်စခန်းဝန်းကျင်မှာ ကင်းပတ်နေတယ်လို့ သတင်းရကြောင်း သူက ဆက်ပြောပါတယ်။

တိုက်ပွဲအတွင်း G3 ၁ လက်၊ ကာဘိုင် ၃ လက်၊ MA 3 ၁ လက်၊ ၆၀ မမ စိန်ပြောင်း ၁ လက်၊ ၆၀ သီး ၉ လုံး၊ ပလတ်စတစ်နင်းမိုင်း ၅ လုံး၊ ယာဉ်ဖျက်မိုင်း ၄ လုံး၊ G 3 ကျည် ၁၂၀ တောင့်တို့ကို သိမ်းဆည်းရရှိခဲ့တယ်လို့ ဆိုပါတယ်။

အဲဒီတိုက်ပွဲကို တပ်ရင်း ၃၈၀၁၊ တပ်ခွဲ ၂၊ တပ်ခွဲ ၆ နဲ့ နတ်တလင်း ပကဖ တို့ပူးပေါင်းလုပ်ဆောင်ခဲ့တာလို့ သိရပါတယ်။

ပြီးခဲ့တဲ့ ဧပြီ ၂၇ ရက် မနက်ကလည်း ပဲခူးတိုင်းအနောက်ခြမ်း မင်းလှမြို့နယ် သရောကုန်ရွာထိပ် အနီးမှာ စစ်ကောင်စီတပ်နဲ့ ပြည်သူ့ကာကွယ်ရေးပူးပေါင်း တပ်ဖွဲ့တွေတိုက်ပွဲ ဖြစ်ပြီး စစ်ကောင်စီတပ်သား ၁၀ ဦးသေကာ ၁ ဦးကို အရှင်ဖမ်းမိခဲ့တဲ့အပြင် လက်နက်ခဲယမ်းတွေလည်း သိမ်းဆည်းခဲ့ပါသေးတယ်။

သတင်း – မောင်ဆွေအင်း၊ စာတည်း – လင်း

ညောင်လေးပင်၊ မေ ၂၊ ၂၀၂၅။

ပဲခူးတိုင်း၊ ညောင်လေးပင်မြို့နယ်၊ ပုဇွန်မြောင်းကျေးရွာရှိ စစ်ကောင်စီအဖွဲ့ကိုတိုက်ခိုက်ခဲ့ရာ ၃ ဦး ဒဏ်ရာရတယ်လို့ မေ ၂ ရက်မှာ Fire Dragon PDF အဖွဲ့က သတင်းထုတ်ပြန်ပါတယ်။

မေ ၁ ရက် နေ့လယ် ၁၂ နာရီဝန်းကျင်ခန့်မှာ ပုဇွန်မြောင်းရွာ၊ ဆွဲဒလွဲရပ်ကွက်က နေအိမ်တွေထဲ ပစ္စည်းတွေလိုက်ယူနေတဲ့ အင်အား ၆၀ ပါ စစ်ကောင်စီအဖွဲ့ကိုတိုက်ခိုက်ပြီး နှစ်ဖက်အပြန်အလှန် ပစ်ခတ်မှုလည်းဖြစ်ခဲ့တယ်လို့ ဆိုပါတယ်။

“သူတို့ (စကစ)တွေက ရွာထဲမှာတပ်စွဲထားတာ။ အဲ့ကနေ ပစ္စည်းတွေလိုက်ခိုးကြတာ။ ကျနော်တို့ ကင်းပုန်းနဲ့တိုးပြီး ပစ်ခတ်မှုဖြစ်တာ။ တိုက်ပွဲကတော့ မိနစ်ပိုင်းလောက်ဖြစ်သွားတယ်။ နောက်ကနေ လက်နက်ကြီးနဲ့ ထုနေလို့ပြန်ဆုတ်လာရတယ်။”လို့ Fire Dragon PDF အဖွဲ့တာဝန်ရှိသူတဦးက ပြောပါတယ်။

တိုက်ပွဲအတွင်းမှာ စစ်ကောင်စီတပ်သား ၃ ဦးဒဏ်ရာရပြီး တိုက်ခိုက်ပြီးနောက် အထိုင်ချတပ်စွဲထားတဲ့ ဘုန်းကြီးကျောင်းနဲ့ စာသင်ကျောင်းဘက်ကို ပြန်ဆုတ်သွားတယ်လို့ သိရပါတယ်။

ဧပြီ ၂၀ ရက်ကလည်း ပုဇွန်မြောင်းကျေးရွာအတွင်းမှာ စစ်ကောင်စီတပ်ဖွဲ့ဝင်တွေ တိုက်ခိုက်ခံရပြီး ၃ ဦးသေဆုံးကာ ၅ ဦးဒဏ်ရာရခဲ့သေးတယ်လို့ ဆိုပါတယ်။

ပုဇွန်မြောင်းကျေးရွာဟာအိမ်ခြေ ၁,၆၀၀ ဝန်းကျင်၊ လူဦးရေ ၇,၀၀၀ ဝန်းကျင်နေထိုင်တဲ့ စံပြကျေးရွာတရွာဖြစ်ပြီး ၂၀၂၂ ကတည်းက စစ်ကောင်စီတပ်ရဲ့ စစ်ကြောင်းထိုး မီးရှို့မှုတွေကြောင့်ဒေသခံတွေ ရွာကတိမ်းရှောင်နေကြရတာလို့ အထက်ပါတာဝန်ရှိသူကပြောပါတယ်။

အဲဒီနောက်ပိုင်းမှာ စစ်ကောင်စီဘက်က အင်အား ၆၀ ဝန်းကျင်နဲ့ ကျေးရွာထဲမှာ အထိုင်ချတပ်စွဲထားပြီး ကျေးရွာအရှေ့လမ်းပိုင်းမှာလည်း စစ်ရေးဂိတ်ချထားကာ လမ်းသွားလမ်းလာတွေကို စစ်ဆေး ဖမ်းဆီးတာတွေပြုလုပ်နေတာလို့ သိရပါတယ်

စာတည်း – လင်း

မြင်းခြံ၊ မေ ၁၊ ၂၀၂၅။

မန္တလေးတိုင်း၊ မြင်းခြံခရိုင်၊ ဆီမီးခုံမြို့လယ်ကောင်ကို ဆိုင်ကယ်နဲ့ကင်းပတ်ထွက်လာတဲ့ ဗိုလ် ၁ ဦး နဲ့ ပျူစောထီး ၂ ဦးတို့ကိုပစ်ခတ်ပြီး လက်နက်တွေသိမ်းဆည်းခဲ့တယ်လို့ မြင်းခြံခရိုင်တပ်ရင်း ၉၊ Myingyan Black Tiger – MBT ခေါင်းဆောင် ဗိုလ်မိုက်ခဲက ပြောပါတယ်။

ဧပြီ ၃၀ ရက် ည ၈ နာရီလောက်မှာ ဆီးမီးခုံမြို့ပေါ်က‌နေ ဆိုင်ကယ် ၂ စီး နဲ့ ကင်းပတ်ထွက်လာချိန် ပစ်ခတ်တိုက်ခိုက်ခဲ့တာလို့ သိရပါတယ်။

“ကင်းပတ်ထွက်လာမှာသိလို့ ကျနော်တို့ မြို့ထဲကိုအပျောက်သွားပြီးတော့ ကင်းပုန်းစောင့်ခဲ့တာပါ။ ဆိုင်ကယ် ၂ စီးနဲ့ ဗိုလ် ၁ ဦးအပါအဝင် ပြည်သူ့စစ် ၂ ဦးကို ကျနော်တို့ မြန်မြန်ဆန်ဆန်နဲ့ ပစ်ခတ်တိုက်ခိုက်ခဲ့တာပါ။” လို့ MBT ခေါင်းဆောင်ဗိုလ်မိုက်ခဲက ပြောပါတယ်။

ပစ်ခတ်ပြီးနောက် ပျူစောထီးတွေကိုင်ဆောင်တဲ့ G3 ၂ လက်ကိုကောက်ယူပြီး ပြန်ဆုတ်ခွာခဲ့တယ်လို့ ဆိုပါတယ်။

“ရန်သူ့လက်နက်ကောက်တဲ့အချိန်မှာ ကျနော်တို့ ပျူစောထီးကိုင်တဲ့ G3 ၂ လက်ကိုတော့ ကောက်နိုင်ခဲ့တယ်။ ဗိုလ်ကိုင်တဲ့ MA 3 ကိုတော့ ကောက်ဖို့သွားတဲ့အချိန် မြို့ထဲဖြစ်တာကြောင့် ပြန်လည်ပစ်ခတ်လို့ ကောက်နိုင်ခြင်းမရှိဘူး။”လို့ ဗိုလ်မိုက်ခဲက ဆက်ပြောပါတယ်။

ပစ်ခတ်ခံရတဲ့ ပျူစောထီး ၂ ဦးဟာ ဆုံရွာကဖြစ်ပြီး ဗိုလ်ကတော့ ဆီမီးခုံမြို့ကလို့ သိရကာ ပစ်ခတ်မှုအတွင်း ၃ ဦးစလုံး သေဆုံးခဲ့တယ်လို့လည်း သူကပြောပါတယ်။

ပစ်ခတ်မှုဖြစ်ပြီးနောက်ပိုင်းကစလို့ မေ ၁ ရက်ဒီကနေ့အထိ ပစ်ခတ်တိုက်ခိုက်တဲ့နေရာမှာ စစ်ကောင်စီဘက်က ကင်းပုန်းဝတ်တွေရှိနေသေးတယ်လို့ သိရပါတယ်။

စာတည်း – လင်း

◼ ၂ ဦး အရှင်ဖမ်းမိပြီး လက်နက်ခဲယမ်းတွေ သိမ်းဆည်း

အောင်စိုး ၊ ဟယ်သာ

မြေလတ်အသံ၊ ဧပြီ ၃၀၊ ၂၀၂၅။

မန္တလေးတိုင်း၊ တောင်သာနဲ့ ကျောက်ပန်းတောင်းမြို့နယ်မှာဖြစ်ခဲ့တဲ့ ၂ ရက်တာတိုက်ပွဲအတွင်း စစ်ကောင်စီဘက်က တပ်ဖွဲ့ဝင် ၅ ဦးသေဆုံးပြီး ၂ ဦးအရှင်ဖမ်းမိကာ လက်နက်ခဲယမ်းတွေသိမ်းဆည်းနိုင်ခဲ့တယ်လို့ Popa Production and Guerilla Force (PGF) နဲ့ Bagan Ogre Force တပ်ဖွဲ့ဆီက သိရပါတယ်။

ဧပြီ ၂၇ ရက်မနက် ၆ နာရီကျော်မှာ ငါ့သရောက်မြို့နယ်ခွဲရဲစခန်းကနေ အင်အား ၁၂၀ ဝန်းကျင်နဲ့ ထွက်လာတဲ့စစ်ကောင်စီတပ်သားတွေကို တောင်သာမြို့နယ်၊ တောင်ခမောက်ကျေးရွာအနီးမှာ ၁ ကြိမ်၊ ဧပြီ ၂၈ ရက်မနက် ၉ နာရီကျော်က ကျောက်ပန်းတောင်းမြို့နယ်၊ ထောက်ရှာကျေးရွာအနီးမှာ ၁ ကြိမ် ကြားဖြတ်တိုက်ခိုက်ခဲ့တယ်လို့ ဆိုပါတယ်။

“စကစ ၁ လောင်းကတော့ တောင်ခမောက်တိုက်ပွဲမှာဗျ။ ကျန်တဲ့ ၄ လောင်းက ထောက်ရှာတိုက်ပွဲမှာတွေ့တာ။ သိမ်းဆည်ရမိတဲ့ လက်နက်တွေ၊ သုံ့ပန်းတွေကလည်း ထောက်ရှာတိုက်ပွဲမှာပါပဲဗျ။” လို့ Popa Production and Guerilla Force(PGF)မှ ဒုတာဝန်ခံ ဗျတ္တကပြောပါတယ်။

အရှင်ဖမ်းမိခဲ့တဲ့ ငါ့သရောက်မြို့နယ်၊ နယ်မြေရဲစခန်းမှ ရဲတပ်သား ၁ ဦးနဲ့ ညောင်ဦးမြို့ပေါ်မှ ပြည်သူ့စစ် ၁ ဦးတို့ကို စစ်သုံ့ပန်းဥပဒေနဲ့အညီ စစ်ဆေးနေတယ်လို့ ဆိုပါတယ်။

ဒါ့အပြင် အဲ့ဒီစစ်ကြောင်းကနေ M2 ၂ လက်၊ Equipment ၁ ခု၊ လက်ပစ်ဗုံး ၃ လုံး၊ စကားပြောစက် ၄ လုံး၊ 7.62 ကျည် ၈၀ နဲ့ အခြားဆက်စပ်ပစ္စည်းတွေ သိမ်းဆည်းရရှိခဲ့တယ်လို့ ဒုတာဝန်ခံဗျတ္တက ပြောပါတယ်။

ထောက်ရှာကျေးရွာတိုက်ပွဲအတွင်း ဒဏ်ရာရတဲ့ စစ်ကောင်စီတပ်ဘက်က စစ်ကြောင်းမှူးကို ဝဲလှောင်ရွာရဲစခန်းကိုပို့ဆောင်ခဲ့ပြီးနောက် စစ်ကြောင်းဖရိုဖရဲဖြစ်နေချိန် တိုက်ခိုက်ရေးလေယာဉ် ၁ စီးနဲ့ ၁၀ မိနစ်ကြာပစ်ကူပေးလာခဲ့တဲ့အတွက် တော်လှန်းရေးပူးပေါင်းအဖွဲ့တွေ ပြန်လည်ဆုတ်ခွာလာခဲ့ရတယ်လို့ ဆိုပါတယ်။

“ကျနော်တို့အနေနဲ့ မျက်မြင်အလောင်းကတော့ ၅ လောင်းဗျ။ ဒါပေမဲ့ ကျနော်တို့တပ်တွင်းဖရဲသီး သတင်းပေးချက်အရတော့ ၄၃ ဦးခန့် ထိခိုက်သေဆုံးရှိနိုင်တယ်လို့ သိရတယ်ဗျ။ အတိအကျတော့ ကျနော်တို့လည်း မသိရဗျ။ လောလောဆယ် ကျနော်တို့အနေနဲ့ မျက်မြင်တွေ့ရတာတော့ အလောင်း ၅ လောင်းရယ်။ တိုက်ပွဲဖြစ်တဲ့နေရာမှာ စကစတွေမီးရှို့သွားတဲ့ အလောင်းနေရာတွေလည်း တွေ့ရှိရတယ်။”လို့ Bagan Ogre Force တာဝန်ခံ ကိုဇီးကွက်က ပြောပါတယ်။

ဒါ့အပြင် ခုတွေ့ရှိထားတဲ့ စစ်ကောင်စီတပ်ဖွဲ့ဝင်အလောင်း ၅ လောင်းထဲမှာ တပ်ကြပ် ၁ ဦး ပါဝင်တယ်လို့ 21 Baganမှ သတင်းနဲ့ ပြန်ကြားရေး တာဝန်ခံယက္ခက ပြောပါတယ်။

အဲ့ဒီစစ်ကောင်စီစစ်ကြောင်းဟာ ဧပြီ ၂၇ ရက်မှာတိုက်ခိုက်ခံရပြီးနောက် တောင်ခမောက်ရွာကို မီးရှို့ခဲ့သေးကာ ဒေသခံ ၂ ဦးကိုဖမ်းဆီးခဲ့ပေမယ့် ညနေဘက်မှာပြန်လွှတ်ခဲ့တယ်လို့ 21 Baganမှ သတင်းနဲ့ ပြန်ကြားရေး တာဝန်ခံယက္ခက ပြောပါတယ်။

တိုက်ပွဲအတွင်း တော်လှန်ရေးပူးပေါင်းအဖွဲ့ ၁၂ ဖွဲ့ထဲက Popa Production and Guerilla Force(PGF)မှ တပ်ဖွဲ့ဝင် ၁ ဦးထိခိုက်ဒဏ်ရာရရှိခဲ့ပေမယ့် စိုးရိမ်စရာမရှိဘူးလို့သိရပါတယ်။

ဒီတိုက်ခိုက်မှုကို ပုဂံပြည်ဘီလူးတပ်၊ Popa Production and Guerilla Force(PGF)၊ ညောင်ဦးခရိုင် တပ်ရင်း ၅၊ မြင်းခြံခရိုင်တပ်ရင်း ၃၊ ရန်ကြီးအောင် PDF (ညောင်ဦးမြို့နယ်ပကဖ)၊ 21 Bagan PDF၊ မိုးမခပြောက်ကျားတပ်၊ ဒေါင်းရင်သွေးတပ်ဖွဲ့၊ ဂဠုန်ပြောက်ကျားတပ်၊ မန်းဘခိုင်ပြည်သူ့ ကာကွယ်ရေးတပ်ဖွဲ့ ၊ Scorpions People Defend Force၊ ညောင်ဦးခရိုင် ပကဖတို့က ပူးပေါင်း လုပ်ဆောင်ခဲ့တာဖြစ်ပါတယ်။

စာတည်း – လင်း

ညောင်ဦးမှာလည်း စစ်ကောင်စီစစ်ကြောင်းတိုက်ခိုက်ခံရပြီး ၄ ဦးသေဆုံး

ဒိန်းဂျား ၊ အောင်စိုး

ရေစကြို ၊ ဧပြီ ၂၉ ၊ ၂၀၂၅။

မကွေးတိုင်း၊ ရေစကြိုမြို့နယ်၊ ဗလဘကျေးရွာကို စီးနင်းဝင်ရောက်လာတဲ့ စစ်ကောင်စီစစ်ကြောင်းကို ပိတ်ဆို့ပစ်ခတ်ခံရလို့ သေဆုံးမှုများပြားတယ်လို့ PDF တပ်ဖွဲ့ဝင်တွေက ပြောပါတယ်။

ဗလဘကျေးရွာကို ထိုးဖောက်စီးနင်းလာတဲ့ စစ်အင်အား ၂၅၀ ကျော်ပါ စစ်ကြောင်းကို နယ်မြေခံတပ်ဖွဲ့တွေက အဆိုပါကျေးရွာအနီး စောင့်ကြိုပစ်ခတ်ခဲ့ပြီးနောက် ဧပြီ ၂၀ နဲ့ ၂၁ ရက် ၂ ရက်ကြာတိုက်ပွဲဖြစ်ပွားခဲ့တာလို့ ဆိုပါတယ်။

“ အလောင်းတွေကို ပခုက္ကူကိုသုံးဘီးနဲ့ခိုးသယ်တယ်လို့ သိရတယ်။ သူတို့အထိနာတဲ့အတွက် ဗလဘကျေးရွာကို ရွာလုံးကျွတ်နီးပါးမီးရှို့သွားတယ်။ ဧပြီ ၂၂ ရက်မှာ ပခုက္ကူမြို့ကို ပြန်ထွက်သွားတယ်” လို့ ရေစကြိုတပ်ပေါင်းစုသတင်းနဲ့ ပြန်ကြားရေးတာဝန်ခံက ပြောပါတယ်။

အဆိုပါ ၂ ရက်ကြာတိုက်ပွဲအတွင်း စစ်ကောင်စီတပ်ဖွဲ့ဝင် ၂၀ ဦးထက်မနည်းသေဆုံး ၃၀ ကျော်ဒဏ်ရာရရှိခဲ့ပြီး ရေစကြိုတပ်ပေါင်းစုတပ်ဖွဲ့ဘက်ကလည်း PDF တပ်ဖွဲ့ဝင် ၁ ဦး သေဆုံးကာ ၃ ဦးဒဏ်ရာရခဲ့တယ်လို့ ဆိုပါတယ်။

တိုက်ပွဲတွေအတွင်း အထိနာခဲ့တဲ့ စစ်ကောင်စီတပ်က တိုက်ပွဲဖြစ်ပွားစဥ်နဲ့ ဖြစ်ပွားပြီးချိန်တွေမှာလည်း လေကြောင်းပစ်ကူပေးတိုက်ခိုက်ခဲ့ရပြီး တပ်မ ၁၀၁ လက်အောက်ခံပူးပေါင်းတပ်တွေဖြစ်တဲ့အဆိုပါစစ်ကြောင်းဟာ လက်ရှိမှာ ပခုက္ကူတပ်မ ၁၀၁ ကို ပြန်လည်ဝင်ရောက်သွားပြီလို့ သိရပါတယ်။

တိုက်ခိုက်မှုကို ရေစကြိုတပ်ပေါင်းစု၊ ပခုက္ကူခရိုင် တပ်ရင်း ၂၊ ၃၊ ၁၀၊ ရေစကြိုမြို့နယ်ပြည်သူ့လုံခြုံရေးအဖွဲ့ (ပ.လ.ဖ)၊ ပခုက္ကူမြို့နယ်ပြည်သူ့ကာကွယ်ရေးအဖွဲ့ တပ်ရင်း ၁ (ပ.က. ဖ)၊ ရေစကြိုမြို့နယ်ပြည်သူ့ကာကွယ်ရေးအဖွဲ့ (ပ.က.ဖ)၊ ကမ္မတပ်ပေါင်းစု၊ နယ်စည်းမခြား ပြည်သူ့ကာကွယ်ရေးတပ်ဖွဲ့၊ အမေ့လက်ရုံးပျောက်ကျားတပ်၊ ဒေါင်းညီနောင် နဲ့ Wolf Brothers Burma Revolution Ranger တို့က ပူးပေါင်းလုပ်ဆောင်ခဲ့တာဖြစ်ပါတယ်။

အလားတူ မန္တလေးတိုင်း၊ ညောင်ဦးမြို့နယ်အတွင်းမှာ စစ်ကောင်စီစစ်ကြောင်းကို မိုင်းဆွဲ ပစ်ခတ်တိုက်ခိုက်ခဲ့လို့ စစ်သား ၄ ဦး သေဆုံးတယ်လို့ Bagan Bo Cho PDFပြောပါတယ်။

နယ်မြေချင်းထိစပ်နေတဲ့ မကွေးတိုင်း၊ ချောက်မြို့ကနေ အင်အား ၆၀ ခန့်နဲ့ ထွက်ခွာလာတဲ့ ထွက်ခွာလာတဲ့စစ်ကောင်စီစစ်ကြောင်းဟာ ညောင်ဦးမြို့နယ်၊ စဥ့်ကူးရဲစခန်းကတဆင့်တပ်မရေနံမှော်ကို စစ်ကြောင်းထိုးလာစဥ် လမ်းပိုင်းတနေရာအရောက် ဧပြီ ၂၈ ရက် မနက် ၅ နာရီကျော်မှာ တိုက်ခိုက်ခဲ့တာလို့ ဆိုပါတယ်။

“ မိုင်းက ၆ လုံးဆွဲတာ။ ပြီးမှတိုက်ခိုက်တာ။ တိုက်ပွဲကြာချိန်ကတော့ သိပ်မကြာဘူး။ လက်နက်၊ လူအင်အားမမျှလို့ ပြန်ဆုတ်ခဲ့ရတာ။ သေဆုံးတာက ရဲဘော်တွေရဲ့မျက်မြင်ပါ။ သေတဲ့ကောင်တွေကို မီးရှို့ခဲ့တယ်။ ကျနော်တို့ရဲဘော်တွေ မီးရှို့တဲ့နေရာကိုသွားကြည့်တော့ ၄ ယောက်လို့ပြောတယ်” လို့ Bagan Bo Cho PDF သတင်းနဲ့ပြန်ကြားရေးတာဝန်ခံက ပြောပါတယ်။

အထက်ပါစစ်ကောင်စီတပ်သားသေဆုံးမှုတွေနဲ့ပတ်သက်ပြီး မြေလတ်အသံက သီးခြား အတည်မပြုနိုင်သေးပါဘူး။

တိုက်ခိုက်ခံရပြီးနောက် စစ်ကောင်စီစစ်ကြောင်းဟာ တပ်မရေနံမှော်ဘက်ကိုဆက်လက်ထွက်ခွာသွားခဲ့ပြီး ဧပြီ ၂၉ ရက် ဒီကနေ့မနက်ပိုင်းမှာတော့ အဆိုပါစစ်ကြောင်းဟာ တိုက်ပွဲဖြစ်ပွားခဲ့တဲ့နေရာကို တန်ပြန်စစ်ကြောင်းထိုးလာနေတယ်လို့ သူကဆက်ပြောပါတယ်။

အခုတိုက်ခိုက်မှုကိုလည်း Bagan Bo Cho PDFနဲ့ ပူးပေါင်းအဖွဲ့တွေက ပူးပေါင်းလုပ်ဆောင်ခဲ့တာ လို့သိရပါတယ်။

စာတည်း – ဟိန်းစံ