ဆိပ်ဖြူ

ဆိပ်ဖြူ၊ ဖေဖော်ဝါရီ ၂၁၊ ၂၀၂၃။

မကွေးတိုင်း၊ ဆိပ်ဖြူမြို့နယ်က ရွာသာကုန်းရွာမှာ ဒေသခံသားအဖ ၂ ဦးကို စစ်ကောင်စီတပ်ဖွဲ့တွေက PDF လို့စွပ်စွဲပြီး ဖမ်းဆီးပြီးတဲ့နောက်မှာ သတ်ခဲ့တယ် ဆိုတဲ့ သတင်းနဲ့ဓါတ်ပုံတွေထွက်ပေါ်လာတယ်လို့ ဒေသခံတွေဆီက သိရပါတယ်။

ပြီးခဲ့တဲ့ ဖေဖော်ဝါရီလ ၁၄ ရက်က အဲ့ဒီသားအဖ ၂ ဦးဟာ ၂ မိုင်လောက်ကွာဝေးတဲ့ ကုန်းရွာမှာ စပါးသွားကြိတ်ပြီး ပြန်လာချိန်မှာ စစ်ကောင်စီစစ်ကြောင်းနဲ့ တိုးပြီး ဖမ်းဆီးခေါ်ဆောင်သွားခြင်း ခံရပြီးတဲ့နောက် သတ်ဖြတ်ခံလိုက်ရတာလို့ ဆိုပါတယ်။

“သူတို့သားအဖက လုံးဝ PDF မဟုတ်ပါဘူး ရွာသားတွေပါပဲ။ အဲ့ဒီနေ့က သူ့အဖေက လှည်းနဲ့ စပါးသွားကြိတ်တယ်။ သူ့သားက ဆိုင်ကယ်နဲ့ သွားပြန်ကြိုပြီး ပြန်လာတဲ့အချိန်မှာ စစ်ကြောင်းနဲ့တိုးပြီး ညောင်နီချောင်းရွာကို ဖမ်းဆီး‌ခေါ်ဆောင်သွားတယ်။ ဖမ်းခံရပြီးတော့ အသတ်ခံလိုက်ရပြီလို့ သိရတယ်” လို့ ဒေသခံတဦးက မြေလတ်အသံကို ပြောပါတယ်။

စစ်တပ်ထောက်ခံတဲ့ တယ်လီဂရမ်ချန်နယ်တွေမှာတော့ စစ်ကောင်စီတပ်က သူတို့ သားအဖ ၂ ဦးကို တွေ့ရှိစဉ် ရပ်တန့် စစ်ဆေးဖို့ ပြောဆိုတာကို ထွက်ပြေးလို့ ပစ်ခတ်ဖမ်းဆီးရာမှာ လက်နက်တွေနဲ့ ဖမ်းဆီးရမိခဲ့တယ်လို့ စွပ်စွဲပြီး သေဆုံးခဲ့ဖွယ်ရှိတဲ့ ဓါတ်ပုံတွေကို ဖော်ပြထားပါတယ်။

“PDF လို့စွပ်စွဲပြီး ဖမ်းဆီးသွားတဲ့ သားအဖကို တကယ်သတ်တာလား၊ သတင်းဖြန့်တာလားဆိုတာတော့ ဘယ်သူမှ အတည်မပြုနိုင်ကြဘူး။ အလောင်းတွေလည်း ပြန်မတွေ့ဘူး။ မိသားစုတွေဆီလည်း ပြန်မရောက်သေးဘူး။ အလောင်းက ပြန်မရသေးတော့ သေလားရှင်လားဆိုတာ သေချာမသိရသေးဘူး” ရွာသာကုန်းဒေသခံ တစ်ဦးက ပြောပါတယ်။

အဲ့ဒီသားအဖ ၂ ဦးဟာ စစ်ကောင်စီတပ်ရဲ့ ဖမ်းဆီးသတ်ဖြတ်တာ ခံလိုက်ရတယ်လို့ ယူဆရပြီး တပတ်ခန့် အကြာ ဒီကနေ့အထိတော့ သူတို့ရဲ့ ရုပ်အလောင်းတွေကို မတွေ့ရှိသေးဘူးလို့ ဆိုပါတယ်။

မကွေး၊ ဖေဖော်ဝါရီ ၁၇၊ ၂၀၂၃။

မကွေးတိုင်းဒေသကြီး ၊ ဆိပ်ဖြူမြို့နယ်၊ တောင်မကျေးရွာက နေအိမ်တွေကို ဝင်ရောက်မွှေနှောက်သွားတဲ့အပြင် အသက်မပြည့်သေးတဲ့ ကလေးမလေးတဦးကိုလည်း ရိုက်နှက်သွားတယ်လို့ ဒေသခံတွေထံမှ သိရပါတယ်။

စစ်ကောင်စီစစ်ကြောင်းဟာ ဖေဖော်ဝါရီ ၁၆ ရက် မနေ့က မနက် ၅ နာရီကျော်လောက်မှာ တောင်မကျေးရွာထဲကနေ မထွက်ခွာခင် ရွာသားတွေကို စစ်ဆေးမေးမြန်းမှုတွေ ပြုလုပ်နေချိန်မှာ အသက်မပြည့်သေးတဲ့ ကလေးတဦးဟာ ကြောက်အားလန့်အားနဲ့ ဖြေကြား‌နေစဉ်မှာပဲ စစ်ကောင်စီတပ်ဖွဲ့က ရိုက်နှက်သွားလို့ ပါးတွေ ယောင်ကိုင်းသွားတယ်လို့ ဆိပ်ဖြူဒေသခံတဦးက မြေလတ်အသံကို ပြောပါတယ်။

“သူတို့က (စစ်ကောင်စီ) ရွာထဲမှာ PDF တွေရှိလား ဆိုပြီးမေးတယ်။ လူကြီးတချို့က ဖြေတယ် မရှိဘူးပေါ့။ အသက် ၁၂ ပဲရှိသေးတဲ့ ကလေးကိုမေးတော့ သူက‌ကြောက်ကြောက်နဲ့ PDF ရှိတယ်။ သူက PDF ပါဆိုပြီး ပြောတော့ ကလေးကို ပါးတွေနားတွေ ရိုက်သွားကြတယ်။ ကလေးကနာလို့ ငိုနေတာ အခုထိ” လို့ ပြောပါတယ်။

ဖေဖော်ဝါရီ ၁၅ ရက် မနက် ၆ နာရီကျော်လောက်မှာ အင်အား ၁၀၀ ကျော်ရှိတဲ့ စစ်ကောင်စီစစ်ကြောင်းဟာ တောင်မကျေးရွာတွေထဲကို လက်နက်ကြီးတွေ ပစ်ခတ်ပြီး ဝင်ရောက်လာခဲ့တာပါ။

လက်နက်ကြီးတွေ ပစ်ခတ်မှုကြောင့် အသက် ၄၀ အရွယ် အမျိုးသားတဦး၊ အမျိုးသမီးတဦး ထိခိုက်ဒဏ်ရာ ရရှိသွားပြီး၊ အသက် (၇၀) ကျော်အရွယ် အဖွားတဦးကတော့ လက်နက်ကြီးသံကြောင့် ကြောက်လန့်ပြီး ဆေးရုံတင်လိုက်ရတယ်လို့ ဒေသခံတဦးက ဆက်ပြောပါတယ်။

“မယဉ်ယဉ်က ဒူးရယ်၊ မျက်စိရယ် ထိသွားတယ်။ အဖွား‌ဒေါ်လှသန်းကတော့ လက်နက်ကြီးသံက တော်တော်ကျယ်တော့ လန့်ပြီး လေဖြန်းသလို ဖြစ်သွားတယ်။ သေတာတော့ မသေပါဘူး။ နောက်ထပ် အစ်ကိုတယောက်လည်း လက်နက်ကြီး အစ ထိမှန်သွားတယ်” လို့ ဆိုပါတယ်။

နေအိမ်ပစ္စည်းတွေ ဖျက်ဆီးတာ၊ လက်နက်ကြီးထိမှန်၊ မီးလောင်မှုတွေကြောင့် အိမ်မွေးတိရိစ္ဆာန်တွေ သေဆုံးတာတွေလည်း ဖြစ်ပွားခဲ့သေးတယ်လို့ ဒေသခံတွေဆီက သိရပါတယ်။

အဲဒီစစ်ကောင်စီစစ်ကြောင်းဟာ ဖေဖော်ဝါရီ ၁၃ ရက်နေ့က ဆိပ်ဖြူမြို့နယ်၊ အင်းကန်ကျေးရွာ ဘုန်ကြီးကျောင်းမှာ တညတာ စခန်းချနေထိုင်ခဲ့တဲ့ တပ်ဖွဲ့ဖြစ်တယ်လို့ ဆိုပါတယ်။