စစ်ကော်မရှင်စစ်ကြောင်း

မြေလတ်အသံ၊ စက်တင်ဘာ ၁၇၊ ၂၀၂၅။

မကွေးတိုင်း၊ အထက်မင်းလှမြို့နယ်၊ ပုသိမ်-မုံရွာကားလမ်းမအနီးကဒေသခံတွေကို စစ်ကြောင်းထိုးဖမ်းဆီးခဲ့တဲ့ စစ်ကော်မရှင်စစ်ကြောင်းကို ကြားဖြတ်တိုက်ခိုက်ခဲ့တာကြောင့် ထိခိုက်မှုရှိခဲ့တယ်လို့ ဒေသခံတွေဆီကသိရပါတယ်။

စက်တင်ဘာ ၁၆ ရက်မနက် ၁၀ နာရီကျော်မှာ အင်အား ၁၀၀ ကျော်ပါ စစ်ကော်မရှင်တပ်ဖွဲ့ဝင်တွေက စစ်ကြောင်းထိုးဝင်ရောက်လာချိန် အထက်မင်းလှမြို့နယ်၊ ပုသိမ်-မုံရွာကားလမ်းမနံဘေးရှိ ရေနံနဲ့ ကျောက်မီးသွေးလုပ်ကွက်တွေက အသက် ၂၀ နဲ့ ၃၀ အရွယ် လုပ်သား ၅ ဦးကို ဖမ်းဆီးခဲ့တယ်လို့ ဆိုပါတယ်။

“အဲ့မှာ(ကျောက်မီးသွေးလုပ်ကွက်) အမ်းမြို့နယ်ကနေ စစ်ရှောင်တဲ့ရခိုင်လူငယ်တွေရှိတယ်။ ပေါ်တာဆွဲခံရတာက ဒေသခံလား၊ ရခိုင်ဘက်က စစ်ဘေးရှောင်တွေလားဆိုတာကို ခွဲခြားမသိရဘူး။ ယောကျာ်း ၅ ဦးပါသွားတယ်။ ဖြစ်နိုင်ခြေက အဲ့ကျောက်မီးသွေးလုပ်ကွက်တွေမှာ အများဆုံးအလုပ်လုပ်နေတာက ရခိုင်လူငယ်တွေများတယ်” လို့ ဖြစ်စဥ်ကိုသိရှိထားတဲ့ ဒေသခံတဦးက ပြောပါတယ်။

ဒေသခံတွေကိုဖမ်းဆီးပြီး ကန်တုတ်ကျေးရွာရှိတပ်စခန်းကိုဆက်သွားတဲ့စစ်ကြောင်းကို အဲ့ဒီနေ့ နေ့လယ် ၁ နာရီကျော်မှာ မုံရွာ-ပုသိမ်ကားလမ်းမဘေးတနေရာမှာ ဒေသခံတော်လှန်ရေးတပ်ဖွဲ့တွေက ဖြတ်တောက်တိုက်ခိုက်ခဲ့ရာ ထိတွေ့တိုက်ခိုက်မှု ညနေ ၅ နာရီအထိ ဖြစ်ပွားခဲ့တယ်လို့ ဆိုပါတယ်။

“ကန်တုတ်ဘက်ကနေ ဖြန့်တက်လာတဲ့စစ်ကြောင်းကို ဖြတ်တောက်ပိတ်ဆို့တာမျိုးပါ။ နေ့လယ် ၁ နာရီလောက်ကနေ ဖြစ်တာ။ ညနေ ၅ နာရီလောက်အထိ အပြန်အလှန်ဖြစ်ခဲ့တယ်။ ၇ ယောက်ထိတယ်။ မျက်မြင် ကားပေါ်တင်တာလို့ လမ်းဘေးမြင်တဲ့သူကပြောတာ”လို့ အထက်ပါဒေသခံက ပြောပါတယ်။

တိုက်ပွဲအတွင်း စစ်ကော်မရှင်ဘက်က ထိခိုက်မှုတွေရှိတယ်လို့ပြောပေမယ့် ဒီအခြေအနေတွေနဲ့ ပတ်သက်ပြီး မြေလတ်အသံကသီးခြားအတည်မပြုနိုင်သေးပါဘူး။

ဖမ်းဆီးခံ အမျိုးသား ၅ ဦးအလုပ်လုပ်ကိုင်တဲ့ ရေနံနဲ့ကျောက်မီးသွေးလုပ်ကွက်ဟာ ရေနံမ၊ ဓာတ်ကုန်း၊ ဆပ်ပြာ၊ ဆင်မကျ၊ ရွာပုလဲစတဲ့ကျေးရွာတွေ အနီးမှာတည်ရှိပြီး ၅ ဦးစလုံးကိုတော့ စက်တင်ဘာ ၁၇ ရက်ဒီမနက်ပိုင်းမှာ ကပစ ၂ (မလွန်) ဘက်ကိုပို့လိုက်တယ်လို့သိရကြောင်း သူကဆက်ပြောပါတယ်။

စစ်ကြောင်းကတော့ စက်တင်ဘာ ၁၇ ရက်ဒီကနေ့အထိ စစ်အင်အား ၅၀ ကျော်နဲ့တပ်စွဲထားတဲ့ ပုသိမ်-မုံရွာကားလမ်းမပေါ်က ကန်တုတ်ရွာတပ်စခန်းနဲ့ ၁ ဖာလုံခန့်သာကွာဝေးတဲ့ မြောက်မျှားကျေးရွာ အတွင်းမှာ ဝင်ရောက်တပ်စွဲထားတယ်လို့ ဒေသခံတွေဆီကသိရပါတယ်။

ပြီးခဲ့တဲ့သြဂုတ် ၂ ရက်ကလည်း စစ်ကော်မရှင်တပ်သားတွေက အထက်မင်းလှမြို့နယ်၊ ပုသိမ်-မုံရွာလမ်းနံဘေးရှိ စက်စက်ယိုကျေးရွာအနီးက ကျောက်မီးသွေးတွင်းလုပ်ကွက်မှာ အလုပ်လုပ်ကိုင်နေတဲ့ စစ်ရှောင် ရခိုင်အမျိုးသား ၇ ဦးကို ဖမ်းဆီးခဲ့ပြီးနောက် ကပစ ၂ ဘက်ကို ခေါ်ဆောင်သွားခဲ့တယ်လို့ သိရပါတယ်။

စာတည်း – လင်း

တိုက်ပွဲအတွင်း လက်နက်ခဲယမ်းတွေနဲ့ သုံ့ပန်း ၇ ဦးဖမ်းမိ

ကလေး၊ စက်တင်ဘာ ၁၁၊ ၂၀၂၅။

စစ်ကိုင်းတိုင်း၊ ကလေးခရိုင်၊ ကလေးမြို့နယ်၊ နန်းစောင်းပုရွာသစ်ကို ထိုးစစ်ဆင်လာတဲ့ စစ်ကော်မရှင်အဖွဲ့ကို တော်လှန်ရေးတပ်တွေက စက်တင်ဘာ ၂ ရက်မှာ တိုက်ခိုက်ခဲ့တာကြောင့် ထိခိုက်သေဆုံးမှုတွေရှိပြီး လက်နက်ခဲယမ်းနဲ့သုံ့ပန်းတွေလည်း ဖမ်းဆီးသိမ်းမိခဲ့တယ်လို့ အမှတ် ၁ စစ်ဒေသက စက်တင်ဘာ ၁၁ ရက် ဒီကနေ့မှာထုတ်ပြန်လာပါတယ်။

စက်တင်ဘာ ၂ ရက်မှာ ကလေးခရိုင်ကွပ်ကဲရေးမှူးဦးစီးတဲ့ ကလေးခရိုင် အမှတ် (၁၊ ၃၊ ၄) တပ်ရင်း၊ အထူးလှုပ်ရှား (၅၊ ၆) တပ်ရင်း၊ ကလေးမြို့နယ် ပကဖ၊ ကလေးဝမြို့နယ် ပကဖ၊ မင်းကင်းမြို့နယ် ပကဖ၊ ကလေးခရိုင် အထူးစစ်ကြောင်း၊ ကလေးမြို့နယ် ပြည်သူ့လုံခြုံရေးတပ်ဖွဲ့ (ပလဖ) နဲ့ Zoland PDF ပူးပေါင်းအဖွဲ့တို့က တိုက်ခိုက်ခဲ့တာဖြစ်ပြီး တိုက်ပွဲတွေအတွင်း စစ်ကော်မရှင်တပ်ဖွဲ့ဝင် သုံ့ပန်း ၇ ဦး ဖမ်းဆီးရမိပြီး အလောင်း ၄ လောင်းနဲ့ လက်နက် ၅ လက် သိမ်းဆည်းရမိခဲ့တယ်လို့ ဆိုပါတယ်။

စစ်ကော်မရှင်စစ်ကြောင်းဆီက MA1 ၃ လက်၊ MA3 ၁ လက်၊ MA11 ၁ လက်၊ 7.62 ကျည် ၂၇၇ တောင့်၊ 5.56 ကျည် ၈၉ တောင့်၊ RPG ဗုံးသီး ၁ လုံး၊ RPG ပို့ယမ်း ၃ ခု၊ နင်းမိုင်း ၁၂ ခလုံး၊ မိုင်းရှင်းစက် ၁ ခု၊ ကျည်အိမ်မျိုးစုံ ၁၉ ခုနဲ့ မူးယစ်ဆေး အမျိုးအစား ၃ မျိုး သိမ်းဆည်းရမိတယ်လို့ ထုတ်ပြန်ချက်မှာ ဖော်ပြပါတယ်။

စစ်ကော်မရှင်ဘက်က ဒကစ (ကလေး) လက်အောက်ခံ တတက-၁၀ မှ ဗိုလ်မှူး ရဲမျိုးမင်း၊ ဗိုလ်ကြီး ပြည့်ဖြိုးအောင်၊ ဗိုလ်ကြီး နိုင်းဝင်းစိုးတို့ ဦးစီးတဲ့ ခမရ ၃၆၁၊ ၃၆၂၊ ၃၆၃၊ ဆသရ-၆၊ ခလရ ၈၇၊ ၂၂၉၊ SNA၊ အိန္ဒိယနိုင်ငံသားတွေဖြစ်တဲ့ ကသည်း (ULFA)နဲ့ နာဂ (NSAC) သူပုန်တပ်ဖွဲ့ အင်အား ၁၃၀ ခန့် ထိုးစစ်ဆင်လာခဲ့တယ်လို့ ထုတ်ပြန်ချက်မှာ ဖော်ပြပါတယ်။

တိုက်ပွဲအတွင်း စစ်ကော်မရှင်ဘက်က လက်နက်ကြီးတွေနဲ့ ပစ်ခတ်တာ၊ ဒရုန်းတွေနဲ့ ဗုံးချတိုက်ခိုက်မှုတွေပြုလုပ်ခဲ့ကာ စစ်ကော်မရှင်တပ်ဟာ ကလေးခရိုင်အတွင်းကသည်း – ULFA နဲ့ နာဂ – NSAC သူပုန်တပ်ဖွဲ့တို့ကို ယခုနှစ် ဩဂုတ်လကစတင်အသုံးပြုခဲ့ပြီး ၎င်းအဖွဲ့တွေဟာ ဩဂုတ်လအတွင်း ချင်းတွင်းမြစ်ကြောင်းအတိုင်း ခန္တီးခရိုင်အတွင်းမှ စုန်ဆင်းလာသော သင်္ဘောတွေနဲ့ လိုက်ပါခဲ့တယ်လို့ လည်း ဆိုပါတယ်။

စစ်ကော်မရှင်စစ်ကြောင်းဟာ ဩဂုတ် ၆ ရက်က စတင်ထိုးစစ်ဆင်တိုက်ခိုက်လာတာဖြစ်ပြီး ဩဂုတ် ၁၅ ရက်မှာလည်း စစ်ကော်မရှင်ဘက်က သုံ့ပန်း ၁ ဦး၊ အလောင်း ၃ လောင်းနဲ့ လက်နက်မျိုးစုံ ၁၀ လက် တို့ကို တော်လှန်ရေးတပ်တွေဘက်က သိမ်းဆည်းရမိခဲ့တယ်လို့ သိရပါတယ်။

စာတည်း – လင်း