မြေလတ်အသံ၊ ဇွန် ၂၉၊ ၂၀၂၅ ။

စစ်ကိုင်းတိုင်း၊ ဆားလင်းကြီးမြို့နယ်အတွင်း ချင်းတွင်းမြစ်ကမ်းဘေးကျေးရွာတွေကို စစ်ကောင်စီတပ်က လေကြောင်းကနေဗုံးကြဲတိုက်ခိုက်တာကြောင့် ဒေသခံအရပ်သား ၄ ဦးသေဆုံးခဲ့တယ်လို့ ဆားလင်းကြီးမြို့နယ် ပြည်သူ့အုပ်ချုပ်ရေးအဖွဲ့ (ပကဖ) ထံက သိရပါတယ်။

ဇွန် ၂၈ ရက် ယမန်နေ့မနက် ၉ နာရီဝန်းကျင်မှာ ချင်းတွင်းမြစ်နံဘေးက သရက်ကိုင်း၊ အောင်ချမ်းသာ၊ နှောကူးကျေးရွာတွေကို စက်တပ်လေထီး(ပါရာမိုတာ)၂ စီးနဲ့ ဗုံး ၅ လုံးထက်မနည်း ကြဲချခဲ့တာဖြစ်ပြီး ကျေးရွာနေအိမ်တွေပေါ် ကျရောက်ပေါက်ကွဲခဲ့တယ်လို့ ဆိုပါတယ်။

“ သိလို့ဆိုပြီး မြစ်ကမ်းနားကရွာတွေကို လူသားစာနာတာဝန်ခံက သက်ကြီးရွယ်အိုတွေနဲ့ကလေးတွေ ရှောင်ကြဖို့ ရမ်းသမ်းပစ်ခတ်ရင်ထိခိုက်မှာစိုးလို့ လုံလုံခြုံခြုံနေကြဖို့ လိုက်လံအော်ပြီးတော့ ကားနဲ့ကယ်ထုတ်တာ တချို့က လိုက်မလာကြတာပေါ့။” လို့ ဆားလင်းကြီးမြို့နယ် ပြည်သူ့အုပ်ချုပ်ရေးအဖွဲ့ဝင်တဦးက မြေလတ်အသံကို ပြောပါတယ်။

ဗုံးကျရောက်ပေါက်ကွဲတာကြောင့် သရက်ကိုင်းကျေးရွာနေ အသက် ၆၀ နှစ်ခန့်အမျိုးသား ၂ ဦးနဲ့ အသက် ၂၀ နှစ်ခန့်အမျိုးသား ၁ ဦး နေအိမ်မှာ သေဆုံးခဲ့ပြီး နောက်ထပ် အသက် ၆၀ ဝန်းကျင်ရှိအမျိုးသား ၁ ဦးမှာ ဒဏ်ရာပြင်းထန်လို့ ဆေးရုံပို့ဆောင်ကုသစဉ် ထပ်မံသေဆုံးခဲ့တာကြောင့် သေဆုံးသူ ၄ ဦးရှိခဲ့တယ်လို့ သိရပါတယ်။

စစ်ကောင်စီစက်တပ်လေထီးတွေ တိုက်ခိုက်ချိန်ဟာ ဆားလင်းကြီးမြို့နယ် ချင်းတွင်းမြစ်အတွင်း စစ်ကောင်စီသင်္ဘော ၁၄ စီး ဖြတ်သန်းမောင်းနှင်နေချိန်ဖြစ်ပြီး ၎င်းသင်္ဘောတွေတိုက်ခိုက်ခံရမှာကြောင့် မြစ်နံဘေးကျေးရွာတွေကို လေကြောင်းကနေဗုံးကြဲတိုက်ခိုက်ခဲ့တာလို့ အထက်ပါပအဖအဖွဲ့ဝင်က သုံးသပ်ပြောပါတယ်။

“ဧရာဝတီကနေဆန်လာတဲ့ စစ်သင်္ဘောတွေက မနေ့(ဇွန် ၂၇)ညတုန်းက ဆင်ဖြူရှင်တံတားနားလေးမှာ အိပ်တာ။ မနက်ကျ ချင်းတွင်းမြစ်တိုင်း အထက်ကိုဆန်လာတာပေါ့၊ ဆန်လာတဲ့အချိန်ကို စစ်သင်္ဘော ၃ စီးနဲ့ ဖလပ် ၁၁ စီး အားလုံးပေါင်း ၁၄ စီး ဆန်လာတာ။ မုံရွာကနေ ၄ စီးနဲ့လည်း လာကြိုတယ်။ အဲ့အချိန်ကို ပါရာမော်တာ ၂ စီးကနေပြီးတော့ ရွာ ၃ ရွာပေါ်မှာ လေကြောင်းတိုက်ခိုက်မှုလုပ်သွားတာ” လို့ ၎င်းက ဆက်ပြောပါတယ်။

စစ်ကောင်စီသင်္ဘောတွေ ဆန်တက်လာတာကြောင့် မြို့နယ်အုပ်ချုပ်ရေးနဲ့လူသားစာနာအဖွဲ့မှ မြစ်ကမ်းတလျောက်ကျေးရွာတွေကို ယမန်နေ့မနက်အစောပိုင်းမှာ သတိပေးခေါ်ဆောင်တာမျိုးတွေလုပ်ဆောင်ခဲ့ပေမယ့် ကျေးရွာတွေအတွင်းကျန်နေသူတွေ သေဆုံးမှုရှိခဲ့တာဖြစ်ကာ သေဆုံးသူတွေရဲ့နာရေးကိစ္စအတွက် ၅ သိန်းကျပ် ထောက်ပံ့ပေးအပ်ခဲ့တယ်လို့လည်း သိရပါတယ်။

စာတည်း – ဟိန်းစံ

မင်းကင်း၊ ဧပြီ ၂၆၊ ၂၀၂၅။

စစ်ကိုင်းတိုင်း၊ မင်းကင်းမြို့နယ်၊ ကဗျစ်ရွာအနီး ချင်းတွင်းမြစ်ကမ်းနံဘေးရှိ ရွှေမှော်ကို စစ်ကောင်စီတပ်က လေကြောင်းကနေ ဗုံးကြဲချသွားလို့ ရွှေမှော်မှာအလုပ်လုပ်နေတဲ့ အမျိုးသား ၂ ဦး ဒဏ်ရာရခဲ့တယ်လို့ သိရပါတယ်။

ဧပြီ ၂၄ ရက် မွန်းလွဲ ၃ နာရီခွဲခန့်မှာ Y-12 လေယာဉ်ပေါ်ကနေ ဗုံး ၁၀ လုံးခန့်ကြဲချခဲ့တာဖြစ်ပြီး သောင်ပြင်ပေါ်က မျောစင်တွေအနီး ကျရောက်ပေါက်ကွဲတာလို့ ဆိုပါတယ်။

” ကြဲသွားတာကတော့ မျောထဲကိုကြဲသွားတာ မဟုတ်ဘူး၊ မျောလုပ်သားတွေ အလုပ်လုပ်နေတဲ့ မျောစင်တွေဘက်ကို ကြဲသွားတယ်၊ ၁၀လုံးကြဲသွားတာ” လို့ ကဗျစ်ရွှေမှော်နဲ့ နီးစပ်တဲ့ဒေသခံတဦးက မြေလတ်အသံကို ပြောပါတယ်။

ဗုံးကျရောက်ပေါက်ကွဲမှုကြောင့် မျောစင်ပေါ်မှာ အလုပ်လုပ်နေတဲ့ အသက် ၁၅ နှစ်နဲ့ ၂၀ ကြားရှိ အမျိုးသား ၂ ဦး ဒဏ်ရာရရှိခဲ့ပြီး ၁ ဦးမှာ စိုးရိမ်ရတဲ့အခြေ အနေရှိတယ်လို့ သိရပါတယ်။

ချင်းတွင်းမြစ်ကမ်းနံဘေးရွှေမျောတွေကို တိုက်ပွဲမရှိဘဲ လေယာဉ်နဲ့ဗုံးကြဲသွားတာနဲ့ပတ်သက်လို့ အထက်ပါဒေသခံက အခုလိုပြောပါတယ်။

“ တော်လှန်ရေးအင်အားစုတွေဘက်က ဒီမှော်တွေအပေါ်ကနေ အခွန်အခတွေရတာဆိုတော့ ဒီအပေါ်ကို စစ်ကောင်စီအနေနဲ့ ပစ်မှတ်ထားတယ်လို့ မြင်တယ်” လို့ ၎င်းက ဆိုပါတယ်။

လက်ရှိမှာ အဆိုပါဗုံးကြဲခံရတဲ့ ရွှေမှော်လုပ်ငန်းတွေကို ဧပြီ ၂၄ ရက်ကစတင်ကာ ရပ်နားထားပြီး ဒေသခံတွေအနေနဲ့လည်း ကျေးရွာမှာမနေရဲတော့ဘဲ ဘေးလွတ်ရာကို ထွက်ပြေးတိမ်းရှောင်နေကြရတယ်လို့ သိရပါတယ်။

ဧပြီ ၂၅ ရက်မှာလည်း စစ်ကောင်စီတပ်က မုံရွာ၊ ဘုတလင်၊ ကလေးဝ ဒေသတွေကို လေကြောင်း၊ လက်နက်ကြီးတွေနဲ့ပစ်ခတ်တိုက်ခိုက်ခဲ့တာကြောင့် အရပ်သား ၄ ဦး ထက် မနည်းသေဆုံးခဲ့ပါတယ်။

သတင်း – ကျော်စွာ၊ စာတည်း – ဟိန်းစံ

မြေလတ်အသံ၊ မတ် ၂၃၊ ၂၀၂၅ ။

စစ်ကောင်စီတပ် စစ်ကူပို့ရာမှာ အားထားနေရတဲ့ ဧရာဝတီမြစ်နဲ့ ချင်းတွင်းမြစ်တွေကို ထိန်းသိမ်းမယ်လို့ စစ်ကောင်စီက မတ် ၂၂ ရက် ယမန်နေ့ နေပြည်တော်မှာပြုလုပ်တဲ့ “ကမ္ဘာ့ရေနေ့” အခမ်းအနားမှာ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် က ပြောဆိုလိုက်ပါတယ်။

အဆိုပါမြစ်တွေဟာ လူတွေရဲ့လုပ်ဆောင်ချက်ကြောင့် သောင်ပို့မှုများပြားလာပြီး ရေကြောင်းသွားလာရေးမှာ ကန့်သတ်ချက်များလာတာကြောင့် အရေးကြီးတဲ့အခြေအနေမှာဖြစ်နေလို့ ၎င်းရဲ့ လက်အောက်ဒေသဆိုင်ရာ အုပ်ချုပ်ရေးအဖွဲ့တွေ့က ကြပ်မတ်ဖို့လိုတယ်လို့ ဆိုပါတယ်။

“ လက်ရှိအနေအထားမှာ ဧရာဝတီမြစ်၊ ချင်းတွင်းမြစ်တို့ဟာ လူတို့ရဲ့လုပ်ဆောင်ချက်ကြောင့် သောင်ပို့မှုများ များပြားလာပြီး ရေကြောင်းသွားလာရေးမှာ ကန့်သတ်ချက်များ များလာကြောင်း၊ ဒါကြောင့်မြစ်ကြောင်းများထိန်းသိမ်းရေးဟာ အရေးကြီးတဲ့အခြေအနေမှာရှိနေပြီး စောလျင်စွာဖြေရှင်းရန်လိုကြောင်း၊ အဓိကမြစ်များနဲ့ အဆိုပါမြစ်များအတွင်း စီးဝင်တဲ့ မြစ်များ ၊ ချောင်းများဘေး ဝဲယာမှာ သဘာဝပတ်ဝန်းကျင်ထိခိုက်စေတဲ့လုပ်ငန်းများကို ဒေသဆိုင်ရာ အစိုးရ၊ အုပ်ချုပ်ရေးအဖွဲ့များက ကြပ်မတ်ရန်လိုကြောင်း “ ဆိုကာ ပြောပါတယ်။

ဒါ့အပြင် ဧရာဝတီ၊ သံလွင်၊ ချင်းတွင်းနဲ့စစ်တောင်းမြစ်တွေရဲ့ မြစ်ဖျားကစတင်ပြီး ပင်လယ်ထဲရောက်တဲ့အထိ ရေစီးနှုန်းတိုင်းတာရန်နဲ့ ရေလမ်းကြောင်းအခြေအနေအပါအဝင် ရေအရင်းအမြစ်ပမာဏကို စူးစမ်းလေ့လာဆောင်ရွက်နိုင်ရေးအတွက် ရေအားအရင်းအမြစ်စူး စမ်းလေ့လာရေးအဖွဲ့တွေနဲ့ စူးစမ်းလေ့လာရေးလုပ်ငန်းတွေ လုပ်ဆောင်နေတယ်လို့လည်း ဆိုပါတယ်။

ချင်းတွင်းနဲ့ဧရာဝတီမြစ်တွေဟာ ကချင်၊ စစ်ကိုင်း၊ မန္တလေး၊ မကွေး၊ ပဲခူးနဲ့ ဧရာဝတီစတဲ့ ပြည်နယ်၊တိုင်းတွေအတွင်း ဖြတ်သန်းစီးဆင်းတဲ့မြစ်တွေဖြစ်ပြီး အဆိုပါပြည်နယ်နဲ့ တိုင်းတွေရဲ့ နယ်မြေအများစုကို တော်လှန်ရေးပူးပေါင်းတပ်တွေက ထိန်းချုပ်ထားကာ နေ့စဉ်တိုက်ပွဲတွေဖြစ်ပွားနေတာလည်း ဖြစ်ပါတယ်။

အမျိုးသားညီညွတ်ရေးအစိုးရ – NUG ရဲ့ ဇန်နဝါရီလအတွင်းထုတ်ပြန်ခဲ့တဲ့ ၂၀၂၄ ခုနှစ်အတွင်း စစ်ရေးဖြစ်ပေါ်တိုးတက်မှု အစီရင်ခံစာအရ တနိုင်ငံလုံးမြို့နယ်စုစုပေါင်းရဲ့ ၄၄ ရာခိုင်နှုန်းကို တော်လှန်ရေးပူးပေါင်းတပ်တွေက စိုးမိုးထိန်းချုပ်ထားပြီး ၂၄ ရာခိုင်နှုန်းမှာ တိုက်ပွဲတွေဖြစ်ပွားနေကာ စစ်ကောင်စီက ၃၂ ရာခိုင်နှုန်းပဲ ထိန်းချုပ်ထားနိုင်လို့ နိုင်ငံရဲ့ သုံးပုံတပုံခန့်သာ အုပ်ချုပ်နိုင်တယ်လို့ ဖော်ပြပါတယ်။

ဒါ့အပြင် အထက်ပါဒေသတွေကို စစ်ကောင်စီက လူ၊လက်နက်၊ခဲယမ်းပို့ဆောင်ရာမှာ ချင်းတွင်းနဲ့ဧရာဝတီမြစ်တွေကိုအသုံးပြုပြီး ရေလမ်းကြောင်းကနေ အဓိထားပို့ဆောင်နေတာလည်း ဖြစ်ပါတယ်။

ပုံစာ – နေပြည်တော်မှာပြုလုပ်တဲ့ ကမ္ဘာ့ရေနေ့ ၂၀၂၅ အခမ်းအနားတွင် မိန့်ခွန်းပြောနေသည့် စစ်ခေါင်းဆောင်အား တွေ့ရစဉ်။ (ဓါတ်ပုံ – စစ်ကောင်စီ)