တံတားဦး၊ ဖေဖော်ဝါရီ ၂၀၊ ၂၀၂၃။
မန္တလေးတိုင်း၊ တံတားဦးမြို့နယ်၊ မြေငူကျေးရွာက စစ်ကောင်စီခန့်အုပ်ချုပ်ရေးမှူး ညီအကို ၂ ဦး ဖေဖော်ဝါရီလ ၁၉ ရက် ည ၈ နာရီကျော်လောက်မှာ ပစ်သတ်ခံခဲ့ရတယ်လို့ သိရပါတယ်။
ပစ်သတ်ခံရသူတွေဟာ မြေငူကျေးရွာအုပ်ချုပ်ရေးမှူး ဦးအောင်ဆန်းဝင်း ၅၀ နှစ်နဲ့အကိုဖြစ်သူ ဦးဘပြုံး ၅၄ နှစ်တို့ဖြစ်ပြီး သူတို့နေအိမ်မှာရှိနေချိန် အမည်မသိလူ ၂ ဦး ရောက်လာပြီး လမ်းပြပေးဖို့ ခေါ်တာကြောင့် လိုက်သွားရာက ပစ်သတ်ခံလိုက်ရတာလို့ ဒေသခံတဦးက မြေလတ်အသံကို ပြောပါတယ်။
“သူတို့အိမ်ကို လူ ၂ ယောက်ရောက်လာပြီး အဘလွှတ်လိုက်တာ၊ လမ်းပြပေးဖို့ လိုက်ပို့ဆိုလို့ သူတို့ ညီအကို ၂ ဦးလိုက်သွားတာ။ အချိန်အတော်ကြာ ပြန်ရောက်မလာမှလိုက်ရှာကြတာ။ ည အတော်နက်မှ ပစ်သတ်ခံထားရတဲ့ သူတို့အလောင်းကိုတွေ့ရတာ”လို့ ပြောပါတယ်။
အုပ်ချုပ်ရေးမှူးနဲ့အကိုဖြစ်သူတို့ဟာ မြေငူကျေးရွာအထွက်လမ်းပေါ်မှာ ဦးခေါင်းကျည်ထိမှန်ဒဏ်ရာတွေနဲ့ သေဆုံးခဲ့တာဖြစ်ပြီး၊ ပစ်ခတ်မှုဖြစ်ပွားပြီးတဲ့နောက် စစ်ကောင်စီတပ်ဖွဲ့၀င်တွေရောက်ရှိလာပြီး လိုက်လံရှာဖွေတာတွေလုပ်ခဲ့တယ်လို့လည်း ဆိုပါတယ်။
ဒီပစ်ခတ်မှုနဲ့ပတ်သက်လို့ ဒေသတွင်းတော်လှန်ရေးအင်အားစုတွေဘက်က ထုတ်ပြန်ထားတာမျိုး မရှိသေးသလို ဘာကြောင့်ပစ်ခတ်ခံရတယ်ဆိုတာကိုလည်း သီးခြားအတည်မပြုနိုင်သေးပါဘူး။
ဖေဖော်ဝါရီလ ၁၇ ရက်မနက်ပိုင်းကလည်း မန္တလေးမြို့၊ ချမ်းမြသာစည်မြို့နယ်၊ ရွှေဘုန်းရှိန်ရပ်ကွက်က စစ်ကောင်စီခန့်အုပ်ချုပ်ရေးမှူး သေနတ်နဲ့ အနီးကပ်ပစ်ခတ်ခံခဲ့ရပြီး သေဆုံးသွားတယ်လို့ ဒေသခံတွေဆီက သိရပါတယ်။