မြိုင်၊ ဇွန် ၁၆၊ ၂၀၂၅။

မကွေးတိုင်း၊ မြိုင်မြို့နယ်တောင်ပိုင်း ဇီးတောကျေးရွာ ဘုန်းကြီးကျောင်းကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးသေဆုံးပြီး ၇ ဦး ထိခိုက်ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဇွန် ၁၆ ရက် နေ့လယ် ၁ နာရီခွဲမှာဂျက်ဖိုက်တာ ၁ စီးက ပေါင် ၅၀၀ ဗုံး ၁ လုံးကြဲချတာကြောင့် အိမ်ခြေ ၁၅၀ ကျော်ရှိ ဇီးတောကျေးရွာကဘုန်းကြီးကျောင်းပေါ်ကျရောက်ပေါက်ကွဲခဲ့တယ်လို့ ဆိုပါတယ်။

“ဇီးတောကျေးရွာ ဘုန်းကြီးကျောင်းကိုတိုက်ခိုက်တာပါ၊ ဘုန်းကြီးကျောင်းထဲမှာက ကမ္မနဲ့ပေါက်လမ်း အနီးတဝိုက်ကပြည်သူတွေနေတာပါ၊ ပေါင် ၅၀၀လို့ ယူဆရပါတယ်၊ ဘုန်းကြီးကျောင်း နဲ့ စေတီပုထိုးများပျက်စီးသွားခဲ့ရပါတယ်၊” လို့ ဇီးတောရွာခံတဦးကပြောပါတယ်။

ဒီဗုံးကြဲတိုက်ခိုက်မှုကြောင့် အမျိုးသမီး ၁ ဦးသေဆုံးပြီး နောက်ထပ်ဒေသခံ ၇ ဦးဒဏ်ရာရကာ ကလေးငယ်တွေလည်းသတိလစ်မေ့မျောတာတွေဖြစ်ခဲ့တယ်လို့ ဆိုပါတယ်။

ပြီးခဲ့တဲ့ ဇွန် ၁၅ ရက်ကလည်း မြိုင်မြို့နယ်၊ တွင်းမကျေးရွာက စစ်ဘေးရှောင်တောတိုက်တွေကို စစ်ကောင်စီတပ်က ဂျက်ဖိုက်တာ ၁ စီးနဲ့ ဗုံး ၂ လုံးကြဲချသွားပါသေးတယ်။

စာတည်း – လင်း

ဖမ်းခံရသူတွေက Non CDM နဲ့မိသားစုတွေလို့ စစ်ကောင်စီတယ်လီဂရမ်တွေမှာဖော်ပြ

မြေလတ်အသံ၊ မေ ၂၉၊ ၂၀၂၅။

မကွေးတိုင်း၊ စေတုတ္တရာမြို့နယ်၊ ပွင့်တောက်ရွာအနီး မုန်းချောင်းစက်လှေဆိပ်မှာ လူ ၈ ဦးကို လက်နက်ကိုင်ဆောင်ထားသူတွေက ဖမ်းဆီးခေါ်ဆောင်သွားကြောင်း ဒေသခံတွေထံက သိရပါတယ်။

ဖမ်းဆီးခံရသူတွေဟာ ပျူစောထီးအားကောင်းတဲ့လက်ပံကျင်းကျေးရွာမှာနေထိုင်တဲ့ အမျိုးသမီး ၅ ဦး၊ အမျိုးသား ၃ ဦးဖြစ်ပြီး အထက်ပါကျေးရွာစက်လှေဆိပ်ကနေ စေတုတ္တရာမြို့ကို သွားရောက်ဖို့ စက်လှေစောင့်ဆိုင်းနေစဥ် မေ ၂၅ ရက် မနက်ပိုင်းက ဖမ်းဆီးခံခဲ့ရတာလို့ ဆိုပါတယ်။

“ လက်ပံကျင်းကျေးရွာကမို့လို့ကို ဖမ်းထားတဲ့သဘောပါ ” လို့ ဖြစ်စဥ်ကိုသိရှိထားတဲ့ စေတုတ္တရာဒေသခံတဦးက မြေလတ်အသံကို ပြောပါတယ်။

လက်ပံကျင်းရွာဟာ စေတုတ္တရာမြို့နယ်တွင်း ပျူစောထီးအားအကောင်းဆုံးရွာတခုဖြစ်ပြီး ကျေးရွာအတွင်းမှာ စစ်ကောင်စီတပ်အင်အား ၅၀ ခန့်အပါ ပျူစောထီးနဲ့ စစ်ကောင်စီတပ်ဖွဲ့ ၁၀၀ ကျော်ဝန်းကျင် အထိုင်ချတပ်စွဲထားတယ်လို့ သိရပါတယ်။

“ လက်ပံကျင်းဆိုရင် ပျူပေါ့၊ လုံးကြီးရွာကို မီးရှို့တာတွေ၊ တခြားရွာတွေကကျွဲတွေ၊ နွားတွေသတ်တာတွေကစ နာမည်ကြီးပါတယ်” လို့ အထက်ပါဒေသခံက ပြောပါတယ်။

လက်ပံကျင်းရွာဟာ ပျူစောထီးအားကောင်းတဲ့ရွာဖြစ်တဲ့အလျောက် အနီးနားကျေးရွာတွေက ဒေသခံအမျိုးသားတွေကို ပျူစောထီးတပ်ဖွဲ့ဝင်တွေအဖြစ် စစ်သင်တန်းပေးနေပြီး ၎င်းရွာနဲ့အနီးတဝိုက်ရှိ လုံးကြီးရွာ၊ ဘူးရွာတွေကို မကြာခဏမီးရှို့တာ ကျေးရွာတွင်းတိရစ္ဆာန်တွေနဲ့ပစ္စည်းတွေကို ယူဆောင်တာတွေ လုပ်ဆောင်လေ့ရှိတယ်လို့ သိရပါတယ်။

အဆိုပါ ဖြစ်စဥ်နဲ့ပတ်သက်ပြီး စစ်ကောင်စီသတင်းထုတ်ပြန်ရေးတယ်လီဂရမ်ချန်နယ် News Of Myanmar မှာ ဖမ်းဆီးခံရသူတွေဟာ စေတုတ္တရာမြို့နယ်အတွင်းက စစ်ကောင်စီလက်အောက်ပညာရေးဝန်ထမ်းတွေနဲ့မိသားစုဝင်တွေဖြစ်ပြီး PDF တပ်ဖွဲ့က ဖမ်းဆီးသွားတာဖြစ်တယ်လို့ ဖော်ပြပါတယ်။

“ မကွေးတိုင်းဒေသကြီး၊ စေတုတ္တရာမြို့နယ်၊ လက်ပံကျင်းကျေးရွာနေသူများဖြစ်ကြသည့် ရေသောင်ကျေးရွာ၊ အခြေခံပညာအထက်တန်းကျောင်းခွဲမှ အထက်တန်းပြဆရာမဖြစ်သူ ဒေါ်ဖြိုးဝေမြင့် (၃၀) နှစ်နှင့်တောင်ဟန်ဒေါက်ကျေးရွာ၊ အခြေခံပညာမူလတန်းကျောင်းမှ လက်ထောက်မူလတန်းပြဆရာမ ဖြစ်သူ ဒေါ်ချိုသဇင်ဦး (၂၆) နှစ်တို့ ၂ ဦးသည် စေတုတ္တရာမြို့နယ်ပညာရေးမှူးရုံးသို့ လည်းကောင်း၊ မကွေးပညာရေးကောလိပ်မှ ပထမနှစ်ကျောင်းသား ဇော်ဇော်အောင် (၂၀) နှစ်၊ တတိယနှစ်ကျောင်းသူ မနွေးနွေးလှိုင် (၂၁) နှစ်နှင့် မခင်မိုးဝေ (၂၀) နှစ်၊ ပခုက္ကူပညာရေးကောလိပ်မှ ဒုတိယနှစ်ကျောင်းသူ မခင်စုစုလှိုင် (၂၀) နှစ်၊ မခင်မိုးဝေ၏ဖခင် ဦးလှမိုး (၄၈) နှစ်၊ မနွေးနွေးလှိုင်၏ဖခင် ဦးသန်းထွန်း (၅၆) နှစ်တို့ ၆ ဦးသည် ၎င်းတို့သက်ဆိုင်ရာ ပညာရေးကောလိပ်များသို့လည်းကောင်း၊ ဒေါ်ပပဝင်း (၂၉) နှစ်သည် ရန်ကုန်မြို့သို့လည်းကောင်း အသီးသီးသွားရောက်ရန် ပွင့်တောက်ကျေးရွာရှိ စက်လှေဆိပ်ကမ်း၌ စက်လှေအား စောင့်ဆိုင်းနေစဉ် PDF အကြမ်းဖက်သမားများ ရောက်လာပြီး ၎င်းတို့ ၉ ဦးအား ပွင့်တောက်ကျေးရွာ၏မြောက်ဘက် ၃ မိုင်ခန့်အကွာရှိ မကြီးကျေးရွာဘက်သို့ ဖမ်းဆီးခေါ် ဆောင်သွားကြောင်းသိရသည်” လို့ News Of Myanmar က ဖော်ပြပါတယ်။

ဖမ်းဆီးခံရသူတွေနဲ့ ပတ်သက်ပြီး အသေးစိတ်မသိရသေးဘဲ အဆိုပါဖမ်းဆီးမှုနဲ့ပတ်သက်ပြီး သက်ဆိုင်ရာဒေသတွင်းတပ်ဖွဲ့တွေဘက်က သတင်းထုတ်ပြန်တာမတွေ့ရသေးသလို မေးမြန်းနိုင်ဖို့ ဆက်သွယ်ပေးမယ့် အဆက်အသွယ်မရသေးပါဘူး။

စာတည်း – ဟိန်းစံ

မြိုင်၊ မေ ၂၄၊ ၂၀၂၅။

မကွေးတိုင်း၊ မြိုင်မြို့နယ်၊ အိုရင်းရွာကျေးရွာကို စစ်ကောင်စီတပ်က မေ ၂၄ ရက် ဒီမနက် ၇ နာရီကျော်မှာ လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသမီး ၂ ဦး ဒဏ်ရာရရှိခဲ့တယ်လို့ ဒေသခံတွေကပြောပါတယ်။

အိမ်ခြေ ၅၀၀ ကျော်ရှိတဲ့ အိုရင်းရွာရဲ့အရှေ့မြောက်ဘက်ရှိ လူနေအိမ်တွေပေါ် တိုက်ခိုက်ရေး လေယာဥ် ၁ စီးနဲ့ ဗုံးသီး ၂ လုံး ကြဲချခဲ့တာကြောင့် အသက် ၁၉ နှစ်အရွယ် အမျိုးသမီး ၁ ဦးနဲ့ ၇၀ အရွယ်အမျိုးသမီး ၁ ဦးတို့ ဒဏ်ရာရခဲ့ကြတာပါ။

“ဒဏ်ရာရသူတွေက အမျိုးမတော်ဘူး။ မီးလောင်ဗုံး ၂ လုံးကြဲတာ။ အိမ်ကတော့ ၃ လုံးပျက်စီးတယ်။ ဒဏ်ရသူတွေက တယောက်တအိမ်ပေါ့နော်။အစတွေမှန်သွားကြတာ။ စိုးရိမ်စရာတော့မရှိပါ”လို့ မြိုင်ဒေသခံဖြစ်သူ မြိုင်ဒေါင်းမင်းကပြောပါတယ်။

စစ်ကောင်စီတပ်က အိုရင်းကျေးရွာအနီးမှာ တိုက်ပွဲဖြစ်တာမရှိဘဲ ဗုံးကြဲတိုက်ခိုက်လာတာဖြစ်ပြီး ကျေးရွာနေပြည်သူတွေကတော့ ဗုံးကြဲချိန်ထွက်ပြေးခဲ့ကြပေမယ့် ဗုံးကြဲပြီးနောက် ကျေးရွာထဲကို ပြန်ဝင်လာခဲ့ကြပြီလို့ မြိုင်ဒေါင်းမင်းက ဆိုပါတယ်။

ပြီးခဲ့တဲ့မေ ၂၀ ရက်ကလည်း ဗဟင်းကျေးရွာရှိ ထမင်းဆိုင်ကို ပေါင် ၃၀၀ ဗုံး ၁ လုံး ကြဲချတိုက်ခိုက်ခဲ့ရာ ထမင်းဆိုင်တွင်းရှိနေတဲ့ PDF တပ်ဖွဲ့ဝင် ၄ ဦးနဲ့ ထမင်းဆိုင်ရှင် သားအမိ ၂ ဦးတို့ နေရာမှာပဲသေဆုံးခဲ့တယ်လို့ ဒေသခံတွေဆီကသိရပါတယ်။

ဒါ့အပြင် မေ ၁၉ ရက် ည ၈ နာရီခန့်မှာလည်း မြိုင်နယ်အရှေ့မြောက်ဘက်တောတိုက်ထဲ ဂျက်ဖိုက်တာနဲ့ လေကြောင်းတိုက်ခိုက်ခဲ့တာကြောင့် စစ်ဘေးရှောင် အမျိုးသမီး ၁ ဦး ထိခိုက်ဒဏ်ရာရခဲ့ပါသေးတယ်။

၂၀၂၁ စစ်အာဏာသိမ်းချိန်ကနေ ၂၀၂၅၊ မေ ၂၃ ရက်အထိ စစ်ကောင်စီနဲ့ ၎င်းတို့ရဲ့လက်ပါးစေတွေကြောင့် သေဆုံးခဲ့တဲ့အရပ်သားပြည်သူစုစုပေါင်း ၆,၇၂၁ ဦးရှိခဲ့တယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ပါတယ်။

စာတည်း – လင်း

မြင်းခြံ၊ မေ ၂၀၊ ၂၀၂၅။

မန္တလေးတိုင်း၊ မြင်းခြံမြို့နယ်၊ ကန်ဆင့်ကျေးရွာမှာ လေယာဥ်ဗုံးထိမှန်တာကြောင့် ရွာခံအမျိုးသမီး ၂ ဦး သေဆုံးပြီး ၄ ဦးဒဏ်ရာရခဲ့တယ်လို့ ဒေသခံတွေထံက သိရပါတယ်။

မေ ၁၉ ရက် ယမန်နေ့မွန်းတည့် ၁၂ နာရီခန့်မှာ စစ်ကောင်စီတပ် တိုက်လေယာဥ် ၁ စီးက ကန်ဆင့်ရွာအတွင်း ဗုံး ၂ လုံးကြဲချခဲ့ရာ ကျေးရွာအလယ်ဘုန်းကြီးကျောင်းအနီးရှိ ဒေါ်မေရီမြင့်နေအိမ်နဲ့ ဦးမြင့်ခိုင်တို့နေအိမ်တွေပေါ်ကို ကျရောက်ပေါက်ကွဲခဲ့တာလို့ ဆိုပါတယ်။

” ခုထိတဲ့သူတွေကလည်း (လေယာဥ်ကြောက်လို့) ရွာထဲမှာမနေဘူး။ ဒီအချိန်မှာ လုပ်ငန်းချိန်၊ ကြက်သွန်သိမ်းထားတဲ့အချိန်ဆိုတော့ ဂိုဒေါင်တွေထဲမှာ ကြက်သွန်တွေထားတာ။ ကြက်သွန်က ပုပ်တတ်တဲ့သဘောရှိတော့ အဲဒါကိုရှင်းလင်းရေးလာလုပ်တဲ့အချိန် အိမ်မှာရှိနေချိန် ဖြစ်သွားတာ” လို့ ကျေးရွာနဲ့နီးစပ်သူတဦးက မြေလတ်အသံကို ပြောပါတယ်။

စစ်ကောင်စီက ကန်ဆင့်ရွာကို မတ် ၂၀ ရက်မှာ ပထမအကြိမ်လေယာဥ်နဲ့ဗုံးကြဲလို့ အမျိုးသား ၁ ဦးသေဆုံးခဲ့ပြီးနောက် ရွာခံအများစုဟာ ကျေးရွာအနီးတောတောင်တွေနဲ့ ယာခင်းတွေမှာ သွားရောက်နေထိုင်ကြပြီး အလုပ်ကိစ္စတွေရှိမှ ကျေးရွာတွင်းယာယီပြန်လည်နေထိုင်ကြတာပါ။

လေယာဥ်ဗုံးကျရောက်ပေါက်ကွဲတာကြောင့် နေအိမ်တွင်းရှိနေတဲ့ အသက် ၅၅ နှစ်အရွယ် ဒေါ်မေရီမြင့်နဲ့ အမဖြစ်သူ အသက် ၅၆ နှစ်အရွယ် ဒေါ်ခင်ဌေးရီတို့ ၂ ဦးဟာ နေရာမှာ သေဆုံးသွားခဲ့ပြီး အသက် ၃၀ ကနေ ၆၀ ကြား အမျိုးသား ၂ ဦးနဲ့ အမျိုးသမီး ၂ ဦးတို့ ဒဏ်ရာရခဲ့ကာ ဒဏ်ရာရသူတွေအနက် အမျိုးသမီး ၁ ဦးက စိုးရိမ်ရတဲ့အခြေအနေရှိနေတယ်လို့ ၎င်းက ဆိုပါတယ်။

လေယာဥ်ဗုံးကျရောက်ပေါက်ကွဲတဲ့ နေအိမ် ၂ လုံးအပါ နေအိမ် ၄ လုံး ထိခိုက်ပျက်စီးခဲ့ပြီး သေဆုံးအမျိုးသမီး ၂ ဦးကို ယမန့်နေမှာပဲ သင်္ဂြိုဟ်ပေးခဲ့ကာ ဒဏ်ရာရသူ ၄ ဦးကို နီးစပ်တဲ့ ဆေးရုံတခုမှာ ဆေးကုသမှုပေးနေတယ်လို့ သိရပါတယ်။

ကန်ဆင့်ကျေးရွာဟာ အိမ်ခြေ ၂၀၀ ကျော် လူဦးရေ ၁,၀၀၀ ဝန်းကျင်နေထိုင်ပြီး လယ်ယာကိုင်းလုပ်ငန်းကို လုပ်ကိုင်ကြသူတွေအများစုနေထိုင်ကြပြီး အဆိုပါရွာနဲ့အနီးတဝိုက်မှာ တော်လှန်ရေးအင်အားစုတွေ လှုပ်ရှားသွားလာတာရှိပေမယ့် တိုက်ပွဲဖြစ်ပွားတာမရှိဘဲ လေကြောင်းဗုံးကြဲတိုက်ခိုက်မှုပြုလုပ်ခဲ့တာလည်း ဖြစ်ပါတယ်။

ပြီးခဲ့တဲ့ မေလဒုတိယပတ်အတွင်းမှာ မြင်းခြံခရိုင် မြင်းခြံ၊ တောင်သာ၊ နွားထိုးကြီးနဲ့ ငါန်းဇွန်မြို့နယ်တွေအတွင်း နေရာ ၈ ခုထက်မနည်းမှာ တိုက်ပွဲတွေဖြစ်ပွားခဲ့ပြီး အဆိုပါတိုက်ပွဲတွေအတွင်း စစ်ကောင်စီက လေကြောင်းဆက်တိုက်အသုံးပြုဗုံးကြဲခဲ့လို့ တော်လှန်ရေးတပ်ဖွဲ့ဝင်တွေနဲ့ ဒေသခံတွေ ထိခိုက်သေဆုံးခဲ့ပါသေးတယ်။

စာတည်း – ဟိန်းစံ

ကောလင်း၊ မေ ၅၊ ၂၀၂၅။

စစ်ကိုင်းတိုင်း၊ ကောလင်းမြို့နယ်၊ တာကျေးရွာအနီးမှာ မေ ၄ ရက်မနက် ၇ နာရီကျော်မှာ စစ်ကောင်စီတပ်ဖွဲ့ဝင်တွေပစ်ခတ်လိုက်တဲ့ သေနတ်ကျည်ထိမှန်ပြီး အမျိုးသမီး ၁ ဦးသေဆုံးခဲ့တယ်လို့ ဒေသခံတွေဆီကသိရပါတယ်။

သေဆုံးသူမှာ တာကျေးရွာနေအသက် ၅၀ အရွယ်ဒေါ်ဥဖြစ်ပြီး ရွာထဲမှာသွားလာနေချိန် စစ်ကောင်စီတပ်ဖွဲ့ဝင်တွေကပစ်ခတ်လိုက်တာလို့ ဆိုပါတယ်။

“သူမက ရင်ဘတ်ကိုကျည်ဖောက်ထွက်သွားပြီးတော့ ပွဲချင်းပြီးသေသွားတာ”လို့ Kawlininfo မှတာဝန်ရှိသူအမျိုးသားတဦး ကပြောပါတယ်။

တာကျေးရွာမှာ ကောလင်းမြို့ရဲ့ တောင်ဘက်ကပ်ရပ်မှာတည်ရှိပြီး မြို့အတွင်းရှိ စစ်ကောင်စီတပ်က အဲဒီကျေးရွာကိုစစ်ကြောင်းထိုးလာချိန် ကောလင်းခရိုင် တပ်ရင်း (၁)၊ ပကဖပူးပေါင်းအဖွဲ့တွေ ၁ နာရီခန့်ကြာ ထိတွေ့တိုက်ပွဲဖြစ်ပွားခဲ့တယ်လို့ သူကဆက်ပြောပါတယ်။

“တိုက်ပွဲဖြစ်ပြီးတော့ စကစတွေပြန်ဆုတ်တဲ့အခါမှာ အမျိုးသမီးက လမ်းသွားနေတာ။ အဲ့တာကိုမြင်လို့ လှမ်းပစ်လိုက်တာ”လို့ အထက်ပါအမျိုးသားကဆိုပါတယ်။

တိုက်ပွဲဖြစ်ပွားပြီးနောက် စစ်ကောင်စီတပ်သားတွေဟာ ကောလင်းမြို့ပေါ်ကိုပြန်လည် ဆုတ်ခွာသွားခဲ့တယ်လို့ သိရပါတယ်။

ပြီးခဲ့တဲ့ ၂၀၂၂ ဒီဇင်ဘာ ၁၂ ရက်ကလည်း ကောလင်းမြို့နယ်၊ ပေပင်ချောင်ကျေးရွာကို စစ်ကြောင်းထိုးဝင်ရောက်လာတဲ့ စစ်ကောင်စီတပ်သားတွေက ရွာခံအမျိုးသား ၄ ဦးကို ဖမ်းဆီးပြီး သေနတ်နဲ့ ပစ်သတ်ခဲ့တယ်လို့ သိရပါတယ်။

စာတည်း – လင်း