ကောလင်း၊ မေ ၇၊ ၂၀၂၅။

စစ်ကိုင်းတိုင်း၊ ကောလင်းမြို့နယ်၊ ရှောက်ပင်ခြုံကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ထိခိုက်ပျက်စီးမှုတွေရှိခဲ့တယ်လို့ Kawlin People Defence Force – KLPDF ဆီက သိရပါတယ်။

မေ ၇ ရက် ဒီနေ့မနက်အစောပိုင်း ၁ နာရီလောက်မှာ ဂျက်ဖိုက်တာနဲ့ ဗုံး ၂ လုံးချ တိုက်ခိုက်ခဲ့ရာ အရပ်သားနေအိမ် ၁ လုံးပေါ်ကျရောက်ပေါက်ကွဲခဲ့တာလို့ ဆိုပါတယ်။

“အရပ်သားနေအိမ်ပေါ် ကို ကြဲချသွားတာ၊ ပြည်သူအထိအခိုက်အသေအဆုံးကတော့မရှိဘူး၊ ကား၊ ဆိုင်ကယ် ပစ္စည်းတွေနဲ့ နေအိမ်ပဲထိခိုက်ပျက်စီးသွားတာ၊ လေယာဉ်ကြဲတဲ့အချိန်မှာ အဲ့ဒီအိမ်မှာက အမျိုးသား ၁ ဦးပဲရှိတယ်၊ လေယာဉ်သံကြားတော့ အိမ်ပေါ်ကနေခုန်ချတာမှာ သူကတော့ဘေးကင်းသွားတယ်၊” လို့ KLPDF တာဝန်ရှိသူတဦးက ပြောပါတယ်။

ဗုံးကျရောက်ပေါက်ကွဲခဲ့တဲ့အိမ်ဟာ ရွာလယ်ပိုင်းကုန်းမြင့်ပေါ်မှာရှိပြီး ဗုံးစထိမှန်ပြီး နေအိမ် ၁ လုံး၊ ကား၊ ဆိုင်ကယ်၊ ဘက်ဟိုးကားတို့ ပျက်စီးခဲ့တယ်လို့ ဆိုပါတယ်။

“ကြဲခံရတဲ့အိမ်က ရွာလယ်ပိုင်းကပဲ၊ ကုန်းမြင့်ပိုင်းဆိုတော့ အိမ် ၁ လုံးပဲပျက်စီးတယ်၊ တိုက်ပွဲဖြစ်ပွားတာလည်းမရှိဘူး၊ အရပ်သားနေအိမ်တွေကို ပစ်မှတ်ထားပြီးကြဲသွားတာ”လို့ KLPDF တာဝန်ရှိသူ တဦးက ပြောပါတယ်။

ပြီးခဲ့တဲ့ ဧပြီ ၁၁ ရက်လည်း ကောလင်းမြို့နယ်၊ လျှော်ဖြူကုန်းကျေးရွာကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံအမျိုးသမီး ၂ ဦးသေဆုံးခဲ့ပါသေးတယ်။

စာတည်း – လင်း၊ တည်းဖြတ် – HP

စဉ့်ကူး၊ ဧပြီ ၂၈၊ ၂၀၂၅။

မန္တလေးတိုင်း၊ စဉ့်ကူးမြို့ပေါ်က ဘုန်းတော်ကြီးကျောင်းနဲ့ စာသင်ကျောင်းဆောင်တို့ကို စစ်ကောင်စီတပ်က ဧပြီ ၂၇ ရက်မနက် ၁၀ နာရီကျော်မှာ လေကြောင်းက နေဗုံးကြဲတိုက်ခိုက်ခဲ့တယ်လို့ စဉ့်ကူးမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

မြို့ပေါ်ရှိ အထက်တန်းကျောင်းစာသင်ကျောင်းဆောင်နဲ့ မဟာဝေယံဘုံသာဘုန်းတော်ကြီးကျောင်းဆောင်တို့ကို ပေါင် ၂၅၀ ဗုံးသီး ၂ လုံးကြဲချခဲ့တာကြောင့် စာသင်ဆောင် ၁ ခုနဲ့ ဘုန်းကြီးကျောင်းထဲက သိမ်ခန်း ၂ ခု ပျက်စီးခဲ့တယ်လို့ ဆိုပါတယ်။

“သပ်သပ် ဘလိုင်းကြီးလာကြဲတာ။ ရဲဘော်တွေလည်းမရှိဘူး။ ဘာမှမရှိဘူး။ အဓိကဘုန်းကြီးကျောင်းနဲ့ စာသင်ကျောင်းမှာ ဘာဆိုဘာမှမရှိဘူး။ ပြည်သူတွေပဲရှိတာဗျ။ ပြည်သူတွေကို သတ်ချင်တာကြောင့် သပ်သပ်ကိုလာကြဲတာ”လို့ စဉ့်ကူးမြို့နယ်ပြည်သူ့ကာကွယ်ရေးအဖွဲ့မှ တာဝန်ခံက ပြောပါတယ်။

အထက်ပါဘုန်းတော်ကြီးကျောင်းနဲ့ စာသင်ကျောင်းဆောင်တို့မှာ မီတာ ၈၀၀ ခန့်ကွာဝေးပြီး ဗုံးကြဲတိုက်မှုအတွင်း လူအထိအခိုက်မရှိခဲ့ဘူးလို့သိရပါတယ်။

ပြီးခဲ့တဲ့ဧပြီ ၂၁ ရက်ကလည်း စဉ့်ကူးမြို့နယ်၊ အောက်ဇီးကုန်းကျေးရွာကို တိုက်ခိုက်ရေးလေယာဉ် ၁ စီးနဲ့ ဗုံးကြဲတိုက်ခိုက်ခဲ့ရာ ၅ လအရွယ်ကလေးငယ် ၁ ဦးနဲ့ အသက် ၆၀ အရွယ်အမျိုးသမီး ၁ ဦးတို့ အပါအဝင် ၄ ဦးဒဏ်ရာရရှိခဲ့ပြီး နွား ၁ ကောင်၊ ဝက် ၁ ကောင်သေဆုံးကာ လူနေအိမ် ၃လုံး ပျက်စီးခဲ့ပါသေးတယ်။

စာတည်း – လင်း၊ တည်းဖြတ် – M

စေတုတ္တရာ၊ ဧပြီ ၂၆၊ ၂၀၂၅။

မကွေးတိုင်း၊ စေတုတ္တရာမြို့နယ်၊ လုံးစွန်ကျေးရွာကို စစ်ကောင်စီတပ်က ဧပြီ ၂၄ ရက်ည ၇ နာရီကျော်မှာ လေကြောင်းကနေ ဗုံးကြဲတိုက်ခိုက်ခဲ့တာကြောင့် ရွာလုံးကျွတ်နီးပါး မီးလောင်ပြာကျသွားခဲ့တယ်လို့ မင်းဘူးခရိုင်တပ်ရင်း ၃ ဆီကသိရပါတယ်။

အိမ်ခြေ ၆၀ ကျော်ရှိတဲ့ လုံးစွန်ကျေးရွာအတွင်းကို တိုက်ခိုက်ရေးလေယာဥ် ၁ စီးနဲ့ ပေါင် ၅၀၀ ဗုံးသီး ၂ လုံးကြဲချခဲ့တာကြောင့် လူနေအိမ် ၅၂ ဆောင်မီးလောင်ပြာကျခဲ့ရတာလို့ဆိုပါတယ်။

“ရွာရဲ့အလယ်တည့်တည့်ကိုကျတာဗျ။ ဗုံးသီး ၂ လုံးက။ ထိခိုက်သေဆုံးမှုတော့မရှိဘူး။ သတင်းကြိုရထားလို့ ရွာထဲကလူတွေကို ရှောင်ခိုင်းထားတာ။ အိမ်မွေးတိရစ္တာန်တွေ သေဆုံးတာတော့ရှိတယ်”လို့ မင်းဘူးခရိုင် တပ်ရင်း ၃ မှတာဝန်ရှိသူတဦးကပြောပါတယ်။

လက်ရှိမှာ နေအိမ်မီးလောင်ပျက်စီးသွားတဲ့ ရွာခံမိသားစုတွေအနေနဲ့ ယာတဲကလေးတွေမှာ ဖြစ်သလိုခိုလှုံနေကြရတာကြောင့် စားနပ်ရိက္ခာ၊ အဝတ်အထည်တွေအရေးပေါ် လိုအပ်နေတယ်လို့ ဆိုပါတယ်။

“သူတို့(ရွာခံတွေ)ရဲ့ စိတ်ထိခိုက်တာတွေ၊ အကြောက်တရားတွေက သူတို့ကိုလွှမ်းမိုးနေတယ်။ တတ်နိုင်သလောက်တော့ ကျနော်တို့တပ်ရင်း၊ တပ်ဖွဲ့တွေက လုပ်ဆောင်ပေးနေတယ်။ လောလောဆယ်ထိတော့ မလုံလောက်ဘူး”လို့ အထက်ပါတာဝန်ရှိသူက ဆက်ပြောပါတယ်။

လုံးစွန်ကျေးရွာနဲ့ ၁မိုင်ခန့်သာကွာဝေးတဲ့ စစ်ကောင်စီတပ်ရဲ့ ဂါလံငါးသောင်းစခန်းကို ဧပြီ ၂၄ ရက်ည ၆ နာရီကျော်မှာ တော်လှန်ရေးတပ်ဖွဲ့တွေက ထိုးစစ်ဆင်တိုက်ခိုက်ခဲ့ပြီးနောက် အရေးနိမ့်နေတဲ့ စစ်ကောင်စီတပ်က ကျေးရွာကို အခုလိုဗုံးလာကြဲတာလို့ မင်းဘူးခရိုင်တပ်ရင်း ၃ တာဝန်ရှိသူက ပြောပါတယ်။

ပြီးခဲ့တဲ့ ဖေဖော်ဝါရီ ၂၃ ရက်မှာလည်း စေတုတ္တရာမြို့နယ်၊ မုံညှင်းကျေးရွာအုပ်စု၊ မုံညှင်းကျေးရွာ အနီးကို စက်တပ်လေထီး (Paramotar) နဲ့ဗုံးကြဲတိုက်ခိုက်ခဲ့တာကြောင့် ကလေး ၂ ဦးအပါအဝင် ၇ ဦးသေဆုံးခဲ့တယ်လို့ သိရပါတယ်။

သတင်း – အောင်စိုး၊စာတည်း – လင်း၊တည်းဖြတ် – HP

တောင်သာ၊ ဧပြီ ၂၆၊ ၂၀၂၅။

မန္တလေးတိုင်း၊ တောင်သာမြို့နယ်၊ မကျီးပင်တဲကျေးရွာမှာ စစ်ကောင်စီက လေကြောင်းကနေဗုံးကြဲတိုက်ခိုက်တဲ့အတွက် ဒေသခံအမျိုးသမီး ၁ ဦးဒဏ်ရာရပြီး နေအိမ် ၇ လုံးပျက်စီးသွားတယ်လို့ တောင်သာမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ဧပြီ ၂၅ ရက်ညနေ ၃ နာရီကျော်မှာ စစ်ကောင်စီတပ်ရဲ့ ဂျက်ဖိုက်တာ ၁ စီးက မကျီးပင်တဲကျေးရွာထဲကို ဗုံး ၃ လုံးကြဲချခဲ့တယ်လို့ ဆိုပါတယ်။

“ဘာတိုက်ပွဲမှာမရှိဘဲနဲ့ ချသွားတာပဲ။ ရွာထဲကျတာပဲ။ အိမ်တွေပါသွားတယ်။ လူကတော့ ထိခိုက်နည်းတယ်။ အဖွားကြီး ၁ ယောက်တော့ ထိခိုက်များတယ်။ သူက အိမ်ထဲရှိနေချိန်ထိတာ အိမ်တွေထိတော့ သူပါထိတာ။”လို့ တောင်သာမြို့နယ်ပကဖ ပြန်ကြားရေးတာဝန်ခံကပြောပါတယ်။

ဗုံးစထိမှန်လို့ အသက် ၅၀ ကျော်အရွယ် ဒေါ်နုနု ထိခိုက်ဒဏ်ရာရပြီး နေအိမ် ၇ လုံး ပျက်စီးသွားခဲ့တယ်လို့ဆိုပါတယ်။

မကျီးပင်တဲကျေးရွာဟာ လေကြောင်းအန္တရာယ်ကြိုတင်ကာကွယ်ပြီး ဗုံးခိုကျင်းတွေလုပ်ထားတဲ့အတွက် လူထိခိုက်နည်းတာဖြစ်နိုင်တယ်လို့ တောင်သာမြို့နယ်ပကဖ ပြန်ကြားရေးတာဝန်ခံက ပြောပါတယ်။

မကျီပင်တဲကျေးရွာမှာ အိမ်ခြေ ၁၀၀ ကျော် လူဦးရေ ၆၀၀ ဝန်းကျင်နေထိုင်တဲ့ကျေးရွာဖြစ်ကာ အခုတိုက်ခိုက်ခံရတာက ဒုတိယအကြိမ်ဖြစ်တယ်လို့ ဆိုပါတယ်။

ပြီးခဲ့တဲ့ မတ် ၂၈ ရက်ကလည်း မကျီးပင်တဲကျေးရွာကို စစ်ကောင်စီဘက်က စက်တပ်လေထီးအသုံးပြုကာ ကျေးရွာထဲဗုံးကြဲချခဲ့တာကြောင့် ကျေးရွာဘုန်းကြီးကျောင်းနဲ့နေအိမ်အချို့ ပျက်စီးခဲ့တယ်လို့ သိရပါတယ်။

စာတည်း – လင်း၊ တည်းဖြတ် – M