ပေါင်းတည်၊ စက်တင်ဘာ ၁၃၊ ၂၀၂၅။

ပဲခူးတိုင်း၊ ပေါင်းတည်မြို့နယ်၊ ပန်းသင်းပင်ကျေးရွာမှာ ပျူစောထီး ၁ ဦး လယ်ခင်းထဲအသွားပစ်သတ်ခံရပြီး သေဆုံးသွားတယ်လို့ ၃၆၀၁ တပ်ရင်း စစ်ထောက်လှမ်းရေးနဲ့ သတင်းပြန်ကြားတာဝန်ခံ Shadow ဆီက သိရပါတယ်။

ပစ်သတ်ခံရသူက ပျူစောထီးအဖွဲ့ဝင်ဖြစ်သူ ပန်းသင်ပင်ကျေးရွာက အသက် ၃၄ အရွယ်အေးမင်းထွန်းဖြစ်ပြီး စက်တင်ဘာ ၁၁ ရက်မနက် ၇ နာရီခန့်မှာ သူနေအိမ်ကနေ ကျေးရွာအနီးရှိ လယ်ခင်းထဲကိုအလာ ရွာအပြင်နားလောက်မှာ ပစ်ခတ်ခဲ့တာလို့ဆိုပါတယ်။

“သူကခေါင်းဆောင်တော့မဟုတ်ဘူး အဖွဲ့ဝင်။ ရွာကနေ သူခြေကျင်ဘဲထွက်လာတာ သူယာထဲကို။ ၃ ချက်ပစ်ခတ်ခဲ့တာ။ ဝမ်းဗိုက်ရယ်၊ ဆီးခုံရယ်၊ ပေါင်ရယ်ထိပြီးသေတာ”လို့ ၃၆၀၁ တပ်ရင်း စစ်ထောက်လှမ်းရေးနှင့်သတင်းပြန်ကြားတာဝန်ခံ Shadow ကပြောပါတယ်။

ပစ်ခတ်ခံရပြီးသေဆုံးသွားတဲ့ အေးမင်းထွန်းရဲ့အလောင်းကိုတော့ ကျေးရွာထဲတပ်စွဲထားတဲ့ စစ်ကော်မရှင်အဖွဲ့က လာကောက်သွားကာ အလောင်းကောက်ချိန် ဘေးပတ်ဝန်းကျင်ကို လက်နက်ငယ်တွေနဲ့ ရမ်းသမ်းပစ်ခတ်တာမျိုးတွေရှိတယ်လို့ ဆိုပါတယ်။

အေးမင်းထွန်းဟာ ကျေးရွာအတွင်းက စစ်ကော်မရှင်တပ်သား၊ ပျူစောထီးအဖွဲ့တွေနဲ့ပေါင်းပြီး အနားနီးပါးရွာတွေက ပြည်သူတွေထံကနေ စားသောက်ကုန်၊ လုပ်ငန်းသုံးပစ္စည်းတွေနဲ့ တန်ဖိုးရှိပစ္စည်းတွေ လုယူရာမှာပါဝင်သူဖြစ်သလို စစ်ကော်မရှင်တပ်သားတွေအလိုကျ လုပ်ကိုင်ပေးနေသူတဦးဖြစ်တာကြောင့်ပစ်ခတ်ခဲ့တာလို့ ဆိုပါတယ်။

အဆိုပါပစ်ခတ်မှုကိုတော့ ပြည်သူ့ကာကွယ်ရေးတပ်မတော် ဗျူဟာ(၂၁)ကွပ်ကဲမှုအောက်ရှိ ၃၆၀၁ တပ်ရင်း တပ်ခွဲ(၂)မှ အဖွဲ့ဝင်တွေက ပစ်ခတ်ခဲ့တာလို့ သိရပါတယ်။

ပြီးခဲ့တဲ့ စက်တင်ဘာ ၇ ရက်ကလည်း အုတ်ဖိုမြို့နယ်၊ စစ်တောကျေးရွာမှာ ဘေးတွဲဆိုင်ကယ်နဲ့လာတဲ့ ရာအိမ်မှူး ဦးသန်းစိုးဆိုသူ ပစ်သတ်ခံရလို့ သေဆုံးသွားတယ်လို့ သိရပါတယ်။

စာတည်း – လင်း

လက်ပံတန်း၊ စက်တင်ဘာ ၁၀၊ ၂၀၂၅။

ပဲခူးတိုင်း၊ လက်ပံတန်းမြို့နယ်၊ သစ်ဟောင်းပြင်ကျေးရွာမှာ ဒရုန်းနဲ့ဗုံးချတိုက်ခိုက်ခံရပြီး အမျိုးသမီး ၂ ဦးသေဆုံးကာ ၂ ဦးဒဏ်ရာရခဲ့တယ်လို့ ရွှေတန်းမြေပြည်သူ့ကာကွယ်ရေးအဖွဲ့ တာဝန်ရှိသူတွေဆီက သိရပါတယ်။

စက်တင်ဘာ ၉ ရက်နေ့လယ် ၁၂ နာရီခန့်မှာ လက်ပံတန်းမြို့ပျူစောထီးအဖွဲ့တွေက သစ်ဟောင်းပြင်ကျေးရွာအနီး တမိုင်ကျော်လောက်ကနေကျေးရွာထဲကို ဒရုန်းနဲ့ဗုံးသီး ၂ လုံးလာကြဲချသွားတယ်လို့ ဆိုပါတယ်။

“အိမ်မှာနေရင်းနဲ့ကိုထိတာ။ ရွာထဲအိမ်တွေမှာရှိနေတာ။ ဗုံးတွေကပြင်းတယ်။ အိမ်တွေပေါ်ကျတာနဲ့ ပွင့်ကျလန်ထွက်ကုန်တာ။ အိမ် ၂ အိမ်ပျက်ပြီး အမျိုးသမီး ၂ ဦးသေပြီး ၂ ဦးဒဏ်ရာရသွားတာ။ မိသားစုဝင်တွေပဲ”လို့ ရွှေတန်းမြေပြည်သူ့ကာကွယ်ရေးအဖွဲ့တာဝန်ခံက ပြောပါတယ်။

စစ်ကော်မရှင်တပ်က မြို့နယ်အလိုက် ပျူစောထီးအဖွဲ့တွေဆီ ဒရုန်းတွေပေးထားတာရှိနေပြီး ပျူစောထီးအဖွဲ့တွေက ရရှိထားတဲ့ ဒရုန်းတွေကို စမ်းသပ်မောင်းနှင်ပြီး ကြုံတဲ့နေရာကို ဗုံးလိုက်ကြဲနေတာလို့ အထက်ပါတာဝန်ရှိသူက ပြောပါတယ်။

ဗုံးကျပေါက်ကွဲလို့ အသက် ၆၀ ဝန်းကျင်အရွယ်ရှိ ဒေါ်ခင်လှိုင်၊ အသက် ၅၀ ဝန်းကျင်ရှိ ဒေါ်စန်းဌေးတို့ နေရာတင်သေဆုံးပြီး အသက် ၉ နှစ်အရွယ် မယွန်းဝတီနဲ့ အသက် ၄၅ နှစ်အရွယ် မညိုမီလှိုင်တို့ ပြင်းထန်ဒဏ်ရာရခဲ့တယ်လို့ ဆိုပါတယ်။

ဒါအပြင်နေအိမ် ၂ လုံးမီးလောင်ပျက်စီးသွားပြီး ဒဏ်ရာရသူ ၂ ဦးကိုတော့ နီးစပ်ရာဆေးရုံပို့ထားရကာ သေဆုံးသွားသူတွေကိုတော့ နေ့ချင်းသင်္ဂြိုဟ်လိုက်ပြီလို့ သိရပါတယ်။

ဒရုန်းဗုံးချခံရတာကြောင့် အိမ်ခြေ ၂၀၀ ခန့်ရှိတဲ့ သစ်ဟောင်းပြင်ကျေးရွာက ဒေသခံအများစုဟာ ဘေးလွတ်ရာကိုတိမ်းရှောင်သွားကြရပြီး လူနည်းစုလောက်က ရွာမှာဆက်ရှိနေပါတယ်။

စက်တင်ဘာ ၄ ရက်ကလည်း လက်ပံတန်းမြို့နယ်၊ သရက်ချောင်းရွာမှာ စစ်ရှောင်ရာကနေ နေအိမ်ခေတ္တပြန်နေနေတဲ့အမျိုးသား ဒရုန်းဗုံးထိမှန်လို့ သေဆုံးသွားတယ်လို့ သိရပါတယ်။

စာတည်း – လင်း

ရွှေတောင်၊ စက်တင်ဘာ ၉၊ ၂၀၂၅။

ပဲခူးတိုင်းအနောက်ခြမ်း၊ ပြည်မြို့မှာ အဝေးသင်တက္ကသိုလ်မှာတက်ရောက်နေတဲ့ ကျောင်းသားတဦး စစ်ကော်မရှင်တပ်ရဲ့ ပေါ်တာဆွဲဖမ်းဆီးမှုခံရပြီးနောက် ထွက်ပြေးလွတ်မြောက်လာတယ်လို့ ရွှေတောင်ပကဖတာဝန်ခံထံက သိရပါတယ်။

ဖမ်းဆီးခံရသူဟာ ရွှေတောင်မြို့ဇာတိ ပြည်အဝေးသင်တက္ကသိုလ်မှာ ရူပဗေဒဘာသာရပ်နဲ့ ပထမနှစ်တက်ရောက်နေသူ အသက် ၂၁ နှစ်အရွယ် မောင်မျိုးမင်းဟိန်းဖြစ်ပြီး ဩဂုတ်လဒုတိယပတ်အတွင်းက ၎င်းရဲ့သူငယ်ချင်းအမျိုးသား ၂ ဦးနဲ့အတူ ဆိုင်ကယ်စီးနင်းနေစဥ် ပြည်၊ မြို့သစ် ၁၇ လမ်းအရောက်မှာ စစ်ကော်မရှင်တပ်သားတွေရဲ့ ဖမ်းဆီးတာကိုခံလိုက်ရတာလို့ ဆိုပါတယ်။

” သူငယ်ချင်း ၃ ယောက်ဆိုင်ကယ် ၁ စီးနဲ့သွားနေတဲ့အချိန်မှာ **က နောက်ကနေ စုဆောင်းရေးကားက ကပ်ပါလာတာကို ဘုန်းကြီးကားထင်ပြီး လမ်းဘေးချရပ်ပေးလိုက်တာကို ရှေ့ကနေပိတ်ပြီး ၃ ယောက်စလုံးကို ဖမ်းတာ။ ကျန်တဲ့ ၂ ယောက်ကလည်း ခုခံလို့ဆိုပြီး ရိုက်နှက်ဖမ်းသွားတာ” လို့ ထွက်ပြေးလွတ်မြောက်လာသူရဲ့ပြောဆိုချက်ကို ရွှေတောင်မြို့နယ်ပကဖတာဝန်ခံက ပြောပါတယ်။

အဲ့ဒီနောက် မျိုးမင်းဟိန်းအပါ ၃ ဦးကို ပြည်မြို့အခြေစိုက် အမှတ် ၉၅၉ လျှပ်စစ်နှင့်စက်မှုအင်ဂျင်နီယာတပ်ခွဲ အတွင်း ၃ ရက်ကြာ ထိပ်တုံးခတ်ဖမ်းဆီးထားပြီးနောက် စစ်ကော်မရှင်လက်အောက်လျှပ်စစ်ဝန်ထမ်းတွေဖြစ်တဲ့ သူငယ်ချင်းအမျိုးသား ၂ ဦးကို ပြန်လွှတ်ပေးလိုက်ပြီး ၎င်းကို ရွှေတောင်မြို့အခြေစိုက် ခလရ ၁၄ ကို ပြောင်းရွှေ့ကာ ဆက်လက်ဖမ်းဆီးထားခဲ့တယ်လို့ သိရပါတယ်။

ခလရ ၁၄ ကိုရောက်ရှိချိန် အခြားဖမ်းဆီးခံထားရသူ အမျိုးသား ၃၀ ဦးကျော်နဲ့အတူနေထိုင်ခဲ့ရပြီး ဩဂုတ်လနောက်ဆုံးပတ်ထဲမှာ စစ်ကော်မရှင်တပ်သားတွေ ညပိုင်းကင်းအိပ်နေကြချိန် အပေါ့သွားမယ်ဆိုကာ ထွက်ပြေးခဲ့ရာ စက်တင်ဘာ ၅ ရက်မှာ ရွှေတောင်မြို့နယ်ပကဖထံရောက်ရှိခဲ့တာလို့ ဆိုပါတယ်။

“သူထွက်ပြေးလာပြီးတော့ လမ်းမှာအဆင့်ဆင့်ဆက်သွယ်လာပြီး ကျနော်တို့နဲ့ချိတ်ဆက်ပြီး ကျနော်တို့က ဒီဘက်ကိုကယ်တင်ပြီး ခေါ်လာတာ။ သူက ပကဖထဲဝင်သွားမယ်လို့တော့ အဆိုပြုထားတာရှိတယ်”လို့ပကဖ တာဝန်ခံကဆက်ပြောပါတယ်။

လက်ရှိမှာ အဝေးသင်တက္ကသိုလ်သိပ္ပံဘာသာတွဲအထူးပြုဘာသာရပ်တွေအနေနဲ့ တက္ကသိုလ်တက်ရောက်နေရပြီဖြစ်ပြီး စက်တင်ဘာလကုန်မှာ စာမေးပွဲဖြေဆိုရမှာဖြစ်ကာ ဝိဇ္ဇာတွဲအထူးပြုဘာသာရပ်တွေအနေနဲ့ အောက်တိုဘာနဲ့ နိုဝင်ဘာလတွေမှာ ဆက်လက်တက်ရောက်ရမှာ ဖြစ်ပါတယ်။

စစ်ကော်မရှင်ပြည်သူစစ်မှုထမ်းဆင့်ခေါ်ရေး နည်းဥပဒေမှာ စစ်ကော်မရှင်ကဖွင့်လှစ်တဲ့ တက္ကသိုလ်တွေမှာတက်ရောက်နေသူ ကျောင်းသားတွေကို စစ်မှုထမ်းဆောင်ခြင်းကနေ ယာယီကင်းလွတ်ခွင့်ပြုကြောင်း ပြဌာန်းထားပေမယ့် စစ်ကော်မရှင်တပ်က တက္ကသိုလ်ကျောင်းသားတွေကိုပါ ဖမ်းဆီးနေတဲ့အပေါ် ပြည်နည်းပညာတက္ကသိုလ်ကျောင်းသားများသမဂ္ဂအတွင်းရေးမှူးဟောင်းတဦးက အခုလို မှတ်ချက်ပြုပါတယ်။

” စစ်ကော်မရှင်က ပြည်သူ့စစ်မှုထမ်းဥပဒေ စပြဌာန်းကတည်းက ပေါ်တာတွေဆွဲနေတာပေါ့နော်။ ဒီဥပဒေကလည်း ပေါ်တာဆွဲဖို့အတွက်ပဲ ထုတ်ထားတဲ့ပုံစံမျိုးပဲ ဖြစ်တယ်ပေါ့။ လောလောဆယ်မှာ လူဦးရေမလောက်တော့တဲ့အတွက်ကြောင့်မလို့ ဒီကျောင်းတက်နေတဲ့ တက္ကသိုလ်ကျောင်းသားတွေဘက်ကိုလည်း ဦးတည်လာတယ်လို့ ထင်ရတယ်။ ခုကတော့ အဝေးသင်တက္ကသိုလ်ကျောင်းသားတွေ များသောအားဖြင့်ပါတယ်။ သူတို့က ဘာလို့လည်းဆိုတော့ တက္ကသိုလ်မှာအမြဲနေရတာမဟုတ်ဘူး။ အပြင်မှာ အလုပ်လုပ်ရင်းနဲ့ကျောင်းတက်နေရတာဖြစ်တာကြောင့်မလို့ အလုပ်လုပ်ရင်းနဲ့ ပေါ်တာဆွဲခံရတာမျိုးတွေလည်းရှိနိုင်တယ်။ နောက်ပြီး နောက်တဆင့်ကျရင်တော့ Day တက်နေတဲ့ ကျောင်းသားတွေဘက်ကိုလည်း လှည့်ကောင်းလှည့်လာနိုင်တယ်ပေါ့။ သူတို့အနေနဲ့ ဂရုတစိုက်နေဖို့ကို ပြောချင်ပါတယ် “ လို့ သူကပြောပါတယ်။

စစ်ကော်မရှင်တပ်ဟာ ၎င်းတို့လစဥ်ဖွင့်လှစ်နေတဲ့ ပြည်သူ့စစ်မှုထမ်းသင်တန်းတွေမှာ စစ်သင်တန်းသားတွေပြည့်မီစေရေး နေ့ရောညပါ လူငယ်တွေကို ဖမ်းဆီးမှုတွေပြုလုပ်နေပြီး ပဲခူး၊ မကွေး၊ စစ်ကိုင်းနဲ့ ဧရာဝတီတိုင်းဒေသကြီးတွေက လူငယ်တွေကို အဓိကပစ်မှတ်ထားဖမ်းဆီးနေတာလည်းဖြစ်ပါတယ်။

ပြီးခဲ့တဲ့ဩဂုတ်လအတွင်းမှာလည်း စစ်ကိုင်းတံတားပေါ်က ခရီးသွားကားတွေကို တားဆီးကာ လူငယ် ၃၀ ကျော်ကို ဖမ်းဆီးခဲ့သလို မကွေးတိုင်း၊ အောင်လံမြို့ နယ်က ကျေးရွာတွေမှာလည်း လူငယ်တွေကို နေအိမ်တွေထဲအထိ ဝင်ရောက်ဖမ်းဆီးမှုတွေလုပ်ဆောင်နေတယ်လို့ မြို့ခံတွေထံက သိရပါတယ်။

စာတည်း – ဟိန်းစံ

ဖြူး၊ စက်တင်ဘာ ၉၊ ၂၀၂၅။

ပဲခူးတိုင်း၊ ကညွတ်ကွင်းမြို့မှာ ကားနဲ့ကင်းလှည့်ကာ ပေါ်တာဆွဲဖမ်းဆီးမှုတွေလုပ်နေတဲ့ စစ်ကော်မရှင်တပ်က ဆိုင်ကယ်စီးလာတဲ့ ညီအကို ၂ ဦးကို သေနတ်နဲ့ ပစ်သတ်ခဲ့တယ်လို့ မြို့ခံတွေထံက သိရပါတယ်။

သေဆုံးသူတွေဟာ ကညွတ်ကွင်းမြို့၊ စက်တောင်ရပ်ကွက်နေ အသက် ၂၈ နှစ် စည်လင်းထက်နဲ့ ညီဖြစ်သူ အသက် ၂၄ နှစ် ညီလင်းထက်တို့ ဖြစ်ပြီး စက်တင်ဘာ ၆ ရက် ည ၉ နာရီခန့်မှာ နေအိမ်ကနေ မြို့တွင်းကိုသွားရောက်စဥ် လျှပ်စစ်ရုံးအနီးအရောက်မှာ စစ်ကော်မရှင်တပ်ဖွဲ့နဲ့တိုးပြီး ပစ်ခတ်ခံခဲ့ရတာလို့ ဆိုပါတယ်။

” ညီအကိုနှစ်ယောက် ထမင်းကြော်သွားဝယ်စားတာကို ပေါ်တာဆွဲတဲ့ကားနဲ့တိုးပြီး “ဟေ့ကောင်တွေမင်းတို့လာအုန်း” ဆိုတော့ သူတို့က ကြောက်ပြီး အရှေ့ကိုမောင်းပြေးတာမှာ ကားက သူတို့ကိုကျော်ရပ်ပြီး ပစ်လိုက်တာ”လို့ ဖြစ်စဥ်ကိုသိထားတဲ့ ဖြူးမြို့ခံတဦးက မြေလတ်အသံကို ပြောပါတယ်။

ကညွတ်ကွင်းမြို့စစ်ကော်မရှင်တပ်က ညဘက်ကင်းလှည့်ချိန်တွေမှာ လမ်းပေါ်တွေ့ရှိတဲ့ လူငယ်တွေကို ပေါ်တာဆွဲဖမ်းဆီးပြီး စစ်မှုထမ်းဖို့ ပို့ဆောင်လေ့ရှိတယ်လို့ မြို့ခံတွေထံက သိရပါတယ်။

ကနဦးပစ်ခတ်ခံရအချိန်မှာ ဆိုင်ကယ်မောင်းသူ စည်လင်းထက် ကျည်ထိမှန်သွားတာကြောင့် ဆိုင်ကယ်မှောက်သွားချိန် ညီဖြစ်သူကိုပါ စစ်ကော်မရှင်တပ်က ထပ်မံပစ်ခတ်ခဲ့တာလို့ဆိုပါတယ်။

“အကြီးကောင်ကို ၃ ချက်ပစ်ခံရလို့ ဆိုင်ကယ်မှောက်ပြီးလဲချိန် ညီဖြစ်သူက သွားထူတဲ့အချိန် ညီဖြစ်သူကိုပါ ၇ ချက်လောက်ပစ်သွားတာ”လို့ သူက ​ပြောပါတယ်။

ပစ်ခတ်ခံရလို့ စည်လင်းထက်နဲ့ ညီလင်းထက်မှာ ရင်ဘတ်၊ ဦးခေါင်းနဲ့ လက်တွေမှာ ကျည်ထိဒဏ်ရာတွေနဲ့နေရာမှာ သေဆုံးသွားခဲ့ပြီး ၎င်းတို့ရုပ်အလောင်းတွေကို စစ်ကော်မရှင်တပ်ဖွဲ့တွေက ဖြူးမြို့ဆေးရုံကိုပို့ဆောင်ခဲ့တာပါ။

အဲ့ဒီနောက် ရုပ်အလောင်းတွေကိုနေအိမ်ဆီသယ်ဆောင်ခွင့်မပေးဘဲ စက်တင်ဘာ ၇ ရက်မှာ မိသားစုအနည်းငယ်နဲ့ ဖြူးမြို့မှာပဲ သင်္ဂြိုဟ်ခွင့်ပြုခဲ့ကာ သေဆုံးသူ ညီအကို ဟာ PDF တပ်ဖွဲ့ဝင်ဆိုပြီး စစ်ကော်မရှင်ဘက်က သတင်းလွှင့်ထားတယ်လို့ အထက်ပါမြို့ခံက ပြောပါတယ်။

စက်တင်ဘာ ၁ ရက်မှာလည်း ဖြူးမြို့နယ်၊ မြို့ချောင်းရွာတံတားအပေါ်မှာ အောင်စည်ယွန်းကျေးရွာက ဒေသခံလူငယ် ၂ ဦးကို စစ်တပ်က သေနတ်နဲ့ ပစ်သတ်ခဲ့လို့သေဆုံးခဲ့ပါသေးတယ်။

စာတည်း – မြတ်

အုတ်ဖို၊ စက်တင်ဘာ ၈၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ ကန်သာယာကျေးရွာမှာ အုပ်ချုပ်ရေမှူး ၁ ဦး ပစ်ခတ်ခံရပြီး သေဆုံးခဲ့တယ်လို့ သာယာဝတီခရိုင် တပ်ရင်း (၃၈၀၂)၊ တပ်ခွဲ ၅၊ပြန်ကြားရေးတာဝန်ခံ ရိုးမမြေဆီက သိရပါတယ်။

ပစ်သတ်ခံရသူက ကန်သာယာအုပ်စု အုပ်ချုပ်ရေးမှူး အသက် ၆၀ ကျော်အရွယ် ဦးထွန်းသိန်း ဖြစ်ပြီး စက်တင်ဘာ ၆ ရက် ည ၇ နာရီခွဲမှာ ပျူစောထီး ခေါင်းဆောင် ကိုလှရွှေရဲ့နေအိမ်ရှေ့မှာ စကားပြောနေကြစဉ် သာယာဝတီခရိုင် တပ်ရင်း ၃၈၀၂ တပ်ခွဲ ၅ Black Tiger ပျောက်ကြားအဖွဲ့က ပစ်ခတ်ခဲ့တာလို့ဆိုပါတယ်။

“အုပ်ကြီးက ပျူခေါင်းဆောင်လှရွှေအိမ်ရှေ့မှာ နှစ်ယောက် စကားပြောနေတာကို ဝင်ပစ်တာ၊ အုပ်ကြီးထွန်းသိန်းခေါင်းကို ကျည် ၃ ချက်မှန်ပြီးသေတယ်။ အုပ်ကြီးက ခေတ်အဆက်ဆက် စစ်တပ်ထောက်တိုင်လုပ်လာတာ”လို့ တာဝန်ခံရိုးမမြေက ပြောပါတယ်။

ပစ်ခတ်ချိန်အတွင်း ပျူစောထီးခေါင်းဆောင် ကိုလှရွှေကတော့ ထွက်ပြေးလွတ်မြောက်သွားပြီး အုပ်ချုပ်ရေးမှူး ဦးထွန်းသိန်းနေအိမ်ကနေ စစ်မှုထမ်းစာရွက်တွေနဲ့ အခြားစာရွက်စာတမ်းတွေကို ယူဆောင်ကာ ကာကွယ်ရေးအဖွဲ့ဝင်တွေက မီးရှို့ခဲ့တယ်လို့လဲ ဆိုပါတယ်။

“ပျူခေါင်းဆောင်လှရွှေက ထွက်ပြေးသွားပြီး စတွေဆီ ဖုန်းဆက်အကြောင်းကြားလို့ လက်နက်ကြီး ၂ လုံးနဲ့ စတွေရွာထဲကို ပစ်တယ်။ အုပ်ကြီးအိမ်ထဲဝင်ရှာတော့ စစ်မှုထမ်းရမယ့် လူငယ်တွေနာမည်စာရင်းပါတဲ့ စာရွက်နဲ့ တခြားစာရွက်စာတမ်းတွေသိမ်းရတာ တခါထဲမီးရှို့ပစ်တယ်” လို့ တာဝန်ခံရိုးမမြေက ပြောပါတယ်။

အုတ်ဖိုမြို့နယ်၊ စစ်တောကျေးရွာရာအိမ်မှူး အသက် ၅၀ ကျော်အရွယ် ဦးသန်းစိုးကိုလည်း စက်တင်ဘာ ၇ ရက် မနက် ၁၁ နာရီခွဲမှာ သူ့နေအိမ်ကနေ လယ်တဲကိုဘေးတွဲဆိုင်ကယ်နဲ့အလာမှာ တော်လှန်ရေးတပ်ဖွဲ့ဝင်တွေက လမ်းမှာစောင့်ပြီး ပစ်ခတ်ရာသေဆုံးခဲ့ပါသေးတယ်။

စာတည်း – လင်း

အုတ်ဖို၊ စက်တင်ဘာ ၈၊ ၂၀၂၅။

ပဲခူးတိုင်း၊ အုတ်ဖိုမြို့နယ်၊ ချင်းစု၊ ကိုင်းကြီး၊ ဒေါင်းကြီး၊ ကြို့ကိုးပင်ကျေးရွာတွေကို စစ်ကော်မရှင်တပ်က စက်တပ်လေထီးနဲ့ဗုံးကြဲတိုက်ခိုက်ခဲ့တာကြောင့် ပြည်သူ ၃ ဦးသေဆုံးကာ ၂ ဦးဒဏ်ရာရတယ်လို့ သာယာဝတီခရိုင်စစ်ဆင်ရေးတာဝန်ခံဆီက သိရပါတယ်။

စက်တင်ဘာ ၇ ရက် ညနေ ၅ နာရီကျော်မှာ ကြို့ပင်ကောက်မြို့ဘောလုံးကွင်းကနေတက်လာတဲ့ စက်တပ်လေထီး ၅ စီးက အထက်ပါကျေးရွာတွေကို တိုက်ပွဲဖြစ်တာမရှိဘဲ မိနစ်ပိုင်းလောက်သာခြားပြီး ဗုံးသီးတွေကြဲချခဲ့တာလို့ဆိုပါတယ်။

“ကိုင်းကြီးမြောက်ကျောင်း ဘုန်းကြီးကျောင်းပေါ်ကျတယ်။ ဘုန်းကြီးကျောင်းပျက်စီးတယ်။ ချင်းစုရွာမှာက ဆေးဆိုင်တည့်တည့်ကိုကျတာ။ ပြည်သူတွေကတော့လက်လုပ်လက်စားတွေဘဲ။ လေထီးကိုမမြင်ဘူးတော့ ခြံထဲကနေ ဓာတ်ပုံရိုက်တာ။ အဲ့မှာတည့်တည့်လည်းကျကော မရှောင်သာမတိမ်းသာဘဲထိတာ”လို့ သာယာဝတီခရိုင် စစ်ဆင်ရေးတာဝန်ခံ ကိုသစ္စာကပြောပါတယ်။

ဗုံးသီးကျရောက်ပေါက်ကွဲတာကြောင့် ချင်းစုကျေးရွာနေ အသက် ၃၆ နှစ်အရွယ် ကိုချစ်ကောင်း၊ အသက် ၁၅ နှစ်အရွယ် G7 ကျောင်းသား ခန့်ကျော်သူ၊ ကိုင်းကြီးကျေးရွာဘုန်းကြီးကျောင်းနံဘေးရှိနေတဲ့ အသက် ၃၅ နှစ်အရွယ် ကိုတင်မျိုးမင်းတို့ ၃ ဦးနေရာမှာတင်သေဆုံးခဲ့ကြပါတယ်။

ဒါ့အပြင် ဒေါင်းကြီးကျေးရွာနေအိမ်ထဲရှိနေတဲ့ အသက် ၃၇ နှစ်အရွယ် ဦးအယ်စေးမှာ ပေါင်နဲ့လက် ပြင်းထန်ဒဏ်ရာရသလို သမီးဖြစ်သူ အသက် ၁၄ နှစ်အရွယ် မြမြသင်းဆိုသူမှာလည်း နဖူးထိခိုက်ဒဏ်ရာရခဲ့ကာ ကြို့ကိုးပင်ကျေးရွာမှာတော့ လူထိခိုက်တာမရှိဘူးလို့ သိရပါတယ်။

ဗုံးထိမှန်မိပြီး ချင်းစုရွာက နေအိမ် ၂ လုံး၊ ကိုင်းကြီးကျေးရွာက ဘုန်းကြီးကျောင်း ၁ ကျောင်း၊ ဒေါင်းကြီးရွာက နေအိမ် ၁ လုံးတို့ပျက်စီးပြီး နွား ၁ ကောင်သေဆုံးခဲ့ပါတယ်။

စစ်ကော်မရှင်ဘက်က စက်တပ်လေထီးနဲ့ဗုံးကြဲတာကြောင့် ဒေသခံတွေမှာ ထိတ်လန့်ကြောက်ရွံနေကြပေမယ့် ကျေးရွာကနေ ထွက်ပြေးတိမ်းရှောင်တာမျိုးတော့မရှိဘူးလို့ သိရပါတယ်။

ဩဂုတ် ၂၈ ရက်ကလည်း အုတ်ဖိုမြို့နယ်၊ ဒေါင်းကြီးကျေးရွာကို စစ်ကော်မရှင်တပ်ဘက်က ဒရုန်းနဲ့ဗုံးချတိုက်ခိုက်လို့ သားအမိ ၂ ဦးသေဆုံးသွားသေးတယ်လို့သိရပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ စက်တင်ဘာ ၄ ရက်ထိ စစ်ကော်မရှင်တပ်နဲ့လက်အောက်ခံတွေကြောင့် သေဆုံးခဲ့တဲ့ပြည်သူစုစုပေါင်း ၇,၁၈၂ ဦးရှိပြီလို့ နိုင်ငံရေးအကျဥ်းသားများကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – လင်း