ချောက်၊ စက်တင်ဘာ ၅၊ ၂၀၂၅။

မကွေးတိုင်း၊ ချောက်မြို့ပေါ်ရှိ ဘာသာစကားသင်တန်းကျောင်းက ကျောင်းသား ၁၃ ဦးအပါအဝင် စုစုပေါင်း လူငယ် ၁၆ ဦးကို စက်တင်ဘာ ၄ ရက်နေ့လယ် ၃ နာရီဝန်းကျင်မှာ စစ်ကော်မရှင်တပ်ကဖမ်းဆီးသွားခဲ့တယ်လို့ ချောက်မြို့ခံတွေဆီက သိရပါတယ်။

ချောက်မြို့၊ အမှတ် ၁၅၊ တိုးချဲ့ရပ်ကွက်ရှိ ကိုရီးယားဘာသာစကားသင်တန်းကျောင်းက အသက် ၂၀ အရွယ် သင်တန်းသား ၁၃ ဦးနဲ့ တရပ်ကွက်တည်းရှိ ‘ကော်နာ’ စားသောက်ဆိုင်မှာအလုပ်လုပ်နေတဲ့ လူငယ်အမျိုးသား ၃ ဦးတို့ကို တချိန်တည်း ဖမ်းဆီးသွားတာလို့ ဆိုပါတယ်။

“မနေ့က တိုးချဲ့ရပ်ကွက် GTI ကျောင်းနားလေးက ကိုရီးယားဘာသာသင်တန်းကျောင်း ဖွင့်ထားတာ၊ ဘော်ဒါပုံစံမျိုး ဖွင့်ထားတာရှိတယ်၊ နယ်ကလူတွေ ရွာကလူတွေ တက်နေတဲ့ကလေးတွေရှိတယ်၊ အဲ့ဒီက ကလေး ၁၃ ဦး ပါသွားတယ်၊ ကလေးတွေလို့ပဲ သိရတယ်၊ အသက်တော့မသိရဘူး၊ သင်တန်းတက်နေတဲ့ ကလေးတွေဆိုတော့ ငယ်ဦးမှာပါ၊” လို့ ချောက်မြို့ခံတဦးက ပြောပါတယ်။

ခုလိုဝင်ရောက်ဖမ်းဆီးသူတွေဟာ ပျူစောထီးတွေနဲ့ လုံခြုံရေးနှင့်သက်ဆိုင်သော ပုံနှိပ်လုပ်ငန်းများစက်ရုံ (လနစ) ကတပ်ဖွဲ့ဝင်တွေဖြစ်နိုင်တယ်လို့ ဒေသခံတွေကခန့်မှန်းပါတယ်။

“ဝါဇီတပ်က စစ်ကော်မရှင်တပ်ဖွဲ့ဝင်တွေဖြစ်မယ်၊ မနေ့က GTI တက်နေတဲ့ ကျောင်းသားတွေကိုလည်း ဆိုင်ကယ်တူးဘောက်တွေလှန်ကြည့်ပြီး ကျောင်းတက်တာ ဘယ်နှစ်နှစ်ရှိပြီတုန်းဆိုပြီး စစ်ဆေးတာတွေလည်းရှိတယ်” လို့ ချောက်မြို့ခံတဦးက ပြောပါတယ်။

သင်တန်းကျောင်းက လူငယ် ၁၃ ဦးဟာ စလင်းမြို့နယ်၊ ရေပေါ်ကျွန်းရွာနဲ့ လက်ပံကျွန်းကျေးရွာကဖြစ်ပြီး ကော်နာစားသောက်ဆိုင်က အလုပ်သမားလူငယ် ၃ ဦးတော့ ချောက်မြို့ခံတွေဖြစ်တယ်လို့ ဆိုပါတယ်။

လက်ရှိမှာဖမ်းဆီးခံရသူအားလုံးကို ချောက်မြို့မရဲစခန်းမှာချုပ်နှောင်ထားပြီး ဖမ်းခံရသူတွေနဲ့ပတ်သက်တဲ့ အသေးစိတ်အချက်အလက်တွေကိုတော့ မသိရှိရသေးပါဘူး။

ခုလိုစစ်ကော်မရှင်တပ်တွေရဲ့ စီးနင်းဖမ်းဆီးမှုတွေရှိနေတာကြောင့် ဒေသခံတွေအနေနဲ့လည်း ည ၈ နာရီထိုးတာ နေအိမ်ပြင်မထွက်ရဲဘဲ အသွားအလာနည်းသွားကြတယ်လို့ သိရပါတယ်။

ချောက်မြို့ပေါ်မှာ စစ်ကော်မရှင်တပ်နဲ့ ပျူစောထီးတွေက မကြာခဏပေါ်တာဆွဲဖမ်းဆီးတာတွေလုပ်နေပြီး ဩဂုတ် ၂၇ ရက်ကလည်း ချောက်မြို့ပေါ်ရှိ ဖုန်းဆိုင်တွေက ဝန်ထမ်းလူငယ်တွေကို စစ်ကော်မရှင်အဖွဲ့တွေက ပေါ်တာဆွဲဖမ်းဆီးမှုတွေပြုလုပ်ခဲ့သေးတယ်လို့ သိရပါတယ်။

စာတည်း – လင်း

ယင်းမာပင်၊ စက်တင်ဘာ ၃၊ ၂၀၂၅။

စစ်ကိုင်းတိုင်း၊ ယင်းမာပင်မြို့နယ်၊ တရော်ကျင်းရွာကို စစ်ကော်မရှင်တပ်က စက်တင်ဘာ ၃ ရက် ဒီနေ့လယ် ၁၂ နာရီခန့်မှာ စတင်မီးရှို့နေတယ်လို့ ဒေသခံတွေဆီက သိရပါတယ်။

ဒီကနေ့မနက် ၆ နာရီခန့်ကနေ ထွက်လာတဲ့ စစ်ကြောင်းက လက်ရှိ တရော်ကျင်းရွာထဲမှာရှိနေပြီး ကျေးရွာအရှေ့ဘက်ခြမ်းက နေအိမ်ကို စတင် မီးရှို့နေတာလို့ သိရပါတယ်။

“အခုလတ်တလော သိရတာက တရော်ကျင်းရွာရဲ့ အရှေ့ဘက်က နေအိမ်တွေကို မီးရှို့နေတယ်လို့ပဲ သိရသေးတယ်၊ စစ်ကြောင်းထိုးနေဆဲဆိုတော့ တိတိကျကျတော့ သတင်းမရသေးဘူး။”လို့ ဒေသတွင်း သတင်းရင်းမြစ်က မြေလတ်အသံကို ပြောပါတယ်။

တရော်ကျင်းရွာဟာ စစ်ကော်မရှင်လက်အောက်ခံ ပျူစောထီးတပ်ဖွဲ့ အထိုင်ချထားတဲ့ ဘန့်ဘွေးရွာရဲ့ အနောက်ဘက် ကပ်လျက်ရွာဖြစ်ပြီး အိမ်ခြေ ၂၀၀ ကျော် ရှိတယ်လို့ သိရပါတယ်။

မုံရွာမြို့အခြေစိုက် အနောက်မြောက်တိုင်း စစ်ဌာနချုပ် – နမခ ကနေ ဒီကနေ့မနက်ပိုင်းမှာထပ်မံအင်အားဖြည့်တင်းထားပြီး ဘန့်ဘွေးရွာက ပြည်သူ့စစ်တွေနဲ့ ပူးပေါင်းကာ အင်အား ၅၀၀ ဝန်းကျင်အထိ ရှိနိုင်တယ်လို့ ဒေသခံတွေက ခန့်မှန်းပြောဆိုပါတယ်။

အဆိုပါ စစ်ကြောင်းကြောင့် တရော်ကျင်းရွာ၊ ကံစုရွာ၊ ချင်းတောင်ရွာ၊ ညောင်ငုတ်တိုရွာ၊ သကြားစက်ရွာ စတဲ့ကျေးရွာတွေက ဒေသခံပြည်သူ ၃,၀၀၀ ထက်မနည်း စစ်ဘေးတိမ်းရှောင်နေရပါတယ်။

ဩဂုတ် ၁၅ ရက်ကလည်း တရော်ကျင်းရွာကို စစ်ကြောင်းထိုးလာတဲ့ စစ်ကော်မရှင်နဲ့ ပျူစောထီး ပူးပေါင်းတပ်တွေက ကားသမားတွေကို ဖမ်းပြီး ငွေတောင်းတာ၊ တရော်ကျင်းရွာရှိ ပြည်သူပိုင်နေအိမ်တွေက ပစ္စည်းတွေကို ထော်လာဂျီနဲ့ သယ်ဆောင်သွားတာတွေရှိခဲ့တယ်လို့ သိရပါတယ်။

စာတည်း – လင်း

ပေါက်၊ စက်တင်ဘာ ၁၊ ၂၀၂၅။

မကွေးတိုင်း၊ ပေါက်မြို့နယ်အနောက်မြောက်ပိုင်း၊ မကျီးကုန်းရွာက ဒေသခံအမျိုးသား ၁ ဦးကို စစ်ကော်မရှင်တပ်ကဖမ်းဆီးပြီး နေအိမ်တွေကိုလည်းမီးရှို့ဖျက်ဆီးခဲ့တယ်လို့ ပေါက်မြို့ခံတွေဆီက သိရပါတယ်။

သြဂုတ် ၃၁ ရက်မနေ့ကမနက် ၁၀ နာရီဝန်းကျင်မှာ ကပစ ၂၄ ကထွက်လာတဲ့ စစ်ကော်မရှင်တပ်ဖွဲ့ဝင် အင်အား ၂၀၀ ကျော်က မကျီးကုန်းရွာကနေအိမ် ၃ လုံးကိုမီးရှို့ပြီး အသက် ၆၀ အရွယ် ဦးဇော်ဌေးကို ဖမ်းဆီးသွားတာလို့ ဆိုပါတယ်။

“မကျီးကုန်းရွာက ဦးဇော်ဌေးကိုလည်း စစ်ကော်မရှင်စစ်ကြောင်းက ဖမ်းဆီးခေါ်ဆောင်သွားတယ်၊ သူ့ရဲ့ အိမ်စီးကားနဲ့ ကားဂိုထောင်ကိုလည်း မီးရှို့သွားတယ်၊ ဖောကားအသစ် ၁ စီးနဲ့ ရွှေငွေတွေကိုလည်း စစ်ကော်မရှင်စစ်ကြောင်းကယူသွားတယ်၊” လို့ ပေါက်မြို့ခံ ကိုလရောင်ကပြောပါတယ်။

ဖမ်းဆီးပြီးနောက် အဲ့ဒီစစ်ကြောင်းဟာ ထန်းပင်ချောင်းရေနံမှော်ကိုလည်းဝင်ရောက်မီးရှို့ခဲ့ပြီး လက်ရှိမှာ ရေနံမြေတကျောမှာတပ်ဖြန့်ပြီး ပေါက်မြို့နယ်၊ ဇီးပြာရွာဘက်ကိုသွားမယ်လို့လည်း သိရပါတယ်။

ပြီးခဲ့တဲ့ ဩဂုတ် ၂၅ ရက်ကလည်း စစ်ကော်မရှင်စစ်ကြောင်းက ပေါက်မြို့နယ်အရှေ့ပိုင်း ပေခုနှစ်ပင်ရွာကို မီးရှို့ပြီး တည်ပင်ကန်ရွာက အမျိုးသား ၁ ဦးကိုလည်း ဖမ်းဆီးသွားခဲ့ပါသေးတယ်။

စာတည်း – လင်း

ဘုတလင်၊ ဩဂုတ် ၂၇၊ ၂၀၂၅။

စစ်ကိုင်းတိုင်း၊ ဘုတလင်မြို့နယ်၊ လွှဲတဲရွာမှာ စစ်ကော်မရှင်တပ်ကဒေသခံတွေကို ဖမ်းဆီးပြီးနောက် ရွေးကောက်ပွဲမဲထည့်ဖို့ ပြောဆိုတာ၊ မဲထည့်နည်းသင်ပေးပြီး မှတ်တမ်းဓာတ်ပုံရိုက်ကူးတာတွေ လုပ်ဆောင်ခဲ့တယ်လို့ ဒေသခံတွေထံက သိရပါတယ်။

ဘုတလင်မြို့ပေါ် အထိုင်စခန်းကထွက်လာတဲ့ စစ်ကော်မရှင်စစ်ကြောင်းဟာ ဩဂုတ် ၂၂ရက် မနက်ပိုင်းက လွှဲတဲကျေးရွာကို ဝင်ရောက်လာချိန်မပြေးနိုင်တာကြောင့် ကျေးရွာအတွင်းကျန်ခဲ့သူတွေနဲ့ စစ်ကြောင်းလာရာလမ်းတလျှောက်ဖမ်းဆီးလာတဲ့ဒေသခံတွေကို ခြိမ်းခြောက်ဖိအားပေးပြီး မဲထည့်ဖို့ပြောဆိုသွားတာလို့ ဆိုပါတယ်။

” အရပ်ဝတ်တွေရော၊ စစ်သားတွေရော အများကြီးလာပြီး အဲ့ဒါတွေကို လက်နက်ပြခြိမ်းခြောက်ပြီး လုပ်နေကြတာ။ စစ်ကြောင်းထိုးပြီး မပြေးနိုင်တဲ့ လူတွေနဲ့ အသင့်ခေါ်လာတဲ့ ဓားစာခံတွေကိုစုပြီး ဓာတ်ပုံရိုက်ကြ၊ ဆယ်ဖီဆွဲကြပေါ့ဗျာ၊ တကယ့်အတုတွေ လုပ်နေကြတာ၊ မဲထည့်ဖို့ပြောတယ်လို့ ဖမ်းခံရတဲ့ပြည်သူတချို့ကတော့ ပြောတယ်” ဘုတလင်စစ်ဘေးရှောင်တဦးက မြေလတ်အသံကို ပြောပါတယ်။

စစ်ကော်မရှင်တပ်ဖွဲ့ဝင်တွေက လွှဲတဲရွာမှာကျန်ခဲ့တဲ့ ရွာသားတွေကို မဲထည့်နည်းသင်ပေးကာ ဓာတ်ပုံရိုက်သွားတာတွေဟာ ၎င်းဒေသတွေမှာ ရွေးကောက်ပွဲလုပ်ပြီးကြောင်း လိမ်လည်ဖော်ပြဖို့ဖြစ်နိုင်တယ်လို့ ဘုတလင်မြို့နယ်ပအဖနာယက ဒေါက်တာ ဇေလင်းမောင်က သုံးသပ်ပြောဆိုပါတယ်။

“ ကြောက်လန့်နေကြရတာဆိုတော့ သိပ်တော့မှတ်မိကြဟန်မတူဘူး၊ မဲပေးခိုင်းတယ်လို့ပဲ သိရတယ်။ မဲထည့်နည်းသင်ပေးတယ်၊ ဓာတ်ပုံတွေ ရိုက်တယ်။ အဲ့ဒါကို သူတို့က ရွေးကောက်ပွဲလုပ်ပြီးပြီလို့ အချိန်တခုရောက်ရင် ဓာတ်ပုံတွေထုတ်ပြမယ့် သဘောရှိတယ်။ သူတို့က အဲ့ဒီလို လိမ်လေ့ရှိတယ်လေ” လို့ သူက ဆိုပါတယ်။

ထပ်မံပြီး အဲ့ဒီစစ်ကြောင်းဟာ ဩဂုတ် ၂၆ ရက် မနက်ပိုင်းမှာ ဘုတလင်မြို့အဝင် ဗန္ဓုလရုပ်ထုရှေ့ရှိ လမ်းသွားလမ်းလာတွေကိုဖမ်းဆီးပြီး အထက်ပါအတိုင်း မှတ်တမ်းဓာတ်ပုံရိုက်ယူခဲ့သေးတယ်လို့ နောက်ထပ် ဘုတလင်မြို့ခံတဦးက ပြောပါတယ်။

“မြို့အဝင် ဗန္ဓုလကြေးရုပ်ရှေ့မှာလည်း အရပ်ဝတ်တွေနဲ့ စုပြီးဓာတ်ပုံရိုက်ကြတယ်၊ ရွေးကောက်ပွဲအတုလုပ် မဲဆွယ်ပွဲအတုတွေလုပ်နေကြတာလို့ ယူဆရတယ်” လို့ ဘုတလင်ဒေသခံတဦးက ပြောပါတယ်။

ဓာတ်ပုံရိုက်ပြီးနောက် ပဲပြစ်တောရွာကို ဆက်လက်စစ်ကြောင်းထိုးလာခဲ့တာကြောင့် ရွာခံအားလုံးနီးပါး ထွက်ပြေးခဲ့ရပြီး စစ်ကြောင်းဟာ ပဲပြစ်တောရွာအတွင်းယာယီတပ်စွဲခဲ့ကာ ဒီကနေ့ ဩဂုတ် ၂၇ ရက် မနက် ၁၀ နာရီခန့်မှာ ဘုတလင်မြို့၊ အထကကျောင်းအတွင်း ပြန်လည်ဝင်ရောက်သွားခဲ့တယ်လို့ ဆိုပါတယ်။

စစ်ကြောင်းကြောင့် မြောက်ကျီကျေးရွာ၊ ထတန်း၊​ မြောက်တော၊ ရှမ်းတဲ၊ တလှိုင်း၊ ပဲပြစ်တောအနောက်၊ ပဲပြစ်တောအရှေ့၊ ဆိတ်သာကန်၊ ကြို့ကုန်း၊ နတ်ရွာ၊ မြင်သာ၊ ရွာသာလေး၊ အုတ်ဖို စတဲ့ရွာတွေက ဒေသခံ ၃,၀၀၀ ထက်မနည်း ရှောင်တိမ်းနေကြရတယ်လို့ သိရပါတယ်။

စာတည်း – ဟိန်းစံ

ရေစကြို၊ ဩဂုတ် ၂၇၊ ၂၀၂၅။

မကွေးတိုင်း၊ ရေစကြိုမြို့၊ အမှတ် (၇)၊ နှစ်ထောင်ပြည့်ရပ်ကွက်က အမျိုးသား ၁ ဦး စစ်ကော်မရှင်တပ်တွေရဲ့ ပစ်ခတ်တာကိုခံရပြီး သေဆုံးခဲ့တယ်လို့ ရေစကြိုမြို့ခံတွေဆီက သိရပါတယ်။

ဩဂုတ် ၂၆ ရက် ညနေ ၂ နာရီခွဲမှာ အဲ့ဒီရပ်ကွက်ရှိ ပန်းခြံထဲမှာတပ်စွဲနေတဲ့စစ်ကော်မရှင်တပ်တွေက ဆိုင်ကယ်စီးအမျိုးသား ၂ ဦးကို လိုက်လံပစ်ခတ်ချိန် ရပ်ကွက်တွင်းရှိ နေအိမ် ၁ အိမ်မှာ အဝတ်လှမ်းနေတဲ့ အသက် ၃၉ နှစ် အရွယ် ကိုဇော်ဇော်ဝင်းကို ထိမှန်ပြီးသေဆုံးခဲ့တာလို့ ဆိုပါတယ်။

“လူ ၂ ဦးက အရက်ဆိုင်ကပြန်လာတာ၊ ဦးထုပ်မဆောင်းဘူး၊ အရက်ကလည်း မူးနေတော့ မေ့မေ့ရော့ရော့နဲ့ သူတို့ရှေ့မှာ ဦးထုပ်မဆောင်းပဲနဲ့ ဆိုင်ကယ်စီးပြေးလို့ဆိုပြီး ဆိုင်ကယ်နဲ့ ၅ ဦးလောက်ကလိုက်ပစ်တာ၊ လိုက်ပစ်ရင်းနဲ့ အမှတ် (၇)၊ နှစ်ထောင်ပြည့်ရပ်၊ တိလောကဘကကျောင်းနဲ့ မျက်နှာချင်းဆိုင် အနောက်ဘက်အိမ်မှာရှိတဲ့ ရေချိုးပြီး အဝတ်လျှော်ပြီး၊ အဝတ်လှန်းနေတဲ့ အမျိုးသား ၁ ဦး (ကျည်ထိ) သေသွားတာ”လို့ ရေစကြိုမြို့ခံတဦးက ပြောပါတယ်။

ကိုဇော်ဇော်ဝင်းဟာ မြိုင်မြို့နယ်က ရေနံမှော်တခုမှာ အလုပ်လုပ်ကိုင်နေသူဖြစ်ပြီး နေအိမ်ကိုပြန်ရောက်ချိန် နာရီပိုင်းအတွင်းမှာတင် ခုလိုပစ်ခတ်ခံခဲ့ရတာဖြစ်သလို ပစ်ခတ်ခံရချင်းဆေးရုံကိုသွားပေမယ့် ဦးခေါင်းနဲ့ ခန္ဓာကိုယ် ကျည်ထိမှန် ဒဏ်ရာတွေနဲ့ ဆေးရုံမှာတင်သေသွားတာလို့ သိရပါတယ်။

“တကယ်တော့ သူက လူပျိုကြီးပါ၊ မိအိုဖအို လုပ်ကိုင်ကျွေးနေတာ၊ ရေနံမှော်ထဲက ပြန်ရောက်တာ ၁ နာရီကျော်ကျော်ပဲရှိသေးတယ်၊ ခဏနားပြီး အဝတ်လျှော် အဝတ်လှန်းနေတုန်းမှာ ဖြစ်သွားတာ၊ ရေစကြိုဆေးရုံပေါ်ရောက်သေးတယ်၊ အသက်ကယ်ဆေး ၂ လုံးထိုးတာကို မမှီလိုက်ဖူး၊ သေသွားတာ၊” လို့ ရေစကြိုမြို့ခံတဦးကပြောပါတယ်။

ကိုဇော်ဇော်ဝင်ရဲ့အလောင်းကိုတော့ သြဂုတ် ၂၇ ရက်ဒီညနေ ၃ နာရီဝန်းကျင်မှာ သင်္ဂြိုဟ်သွားမယ်လို့လည်း သိရပါတယ်။

ရေစကြိုမှာ ဆိုင်ကယ်စီးဦးထုပ် မဆောင်းတာ၊ ဆိုင်ကယ် ၂ ဦးစီးလာရင် ရပ်ခိုင်းပြီး မရပ်ပါက နောက်ကနေ လိုက်လံပစ်ခတ်လေ့ရှိတယ်လို့ သိရပါတယ်။

ပြီးခဲ့တဲ့ ၂၀၂၄၊ စက်တင်ဘာ ၁၅ ရက်ကလည်း ရေစကြို အမှတ် ၁ ထင်းတန်းရပ်ကွက်မှာ ဆိုင်ကယ်စီးလာတဲ့ လူငယ် ၂ ဦးကို စစ်ကော်မရှင်က ပစ်ခတ်လို့ သေဆုံးခဲ့ပါသေးတယ်။

စာတည်း – လင်း