အောင်စိုး 
မြေလတ်အသံ၊ သြဂုတ် ၁၄၊ ၂၀၂၅။
ပဲခူးတိုင်း၊ သဲကုန်းမြို့နယ်ကို စစ်ကြောင်းထိုးဝင်ရောက်နေတဲ့ စစ်ကောင်စီတပ်ဖွဲ့ဝင်တွေက ကျေးရွာ ၃ ရွာကို မီးရှို့ဖျက်ဆီးခဲ့ကာ ဒေသခံတွေလည်းထွက်ပြေးနေကြရတယ်လို့ ပြည်ခရိုင်အမှတ် ၁ တပ်ရင်း ၃၆၀၁ တပ်ခွဲ ၂ Royal Tiger Force မှ တပ်ဖွဲ့ဝင် Ronnie ကပြောပါတယ်။
သြဂုတ် ၁၂ ရက်မှာ ဓားသွေးကျောက်ရွာက နေအိမ် ၁၄ လုံး၊ သြဂုတ် ၁၃ ရက်မှာ သရက်ကိုင်းရွာက နေအိမ် ၃လုံးမီးရှို့ခဲ့ပြီး သြဂုတ် ၁၄ ရက်မနက်ပိုင်းမှာလည်း ရုံးပင်တက်ရွာကို ဝင်ရောက်မီးရှို့နေဆဲ ဖြစ်တယ်လို့ ဆိုပါတယ်။
“ရုံးပင်တက်ရွာကို အခုမနက် ၇ နာရီခန့်လောက်ကမီးစရှို့ခဲ့တာပါ။ အခု အချိန်ထိရှို့နေကြတုန်းပါပဲ။ လက်နက်ကြီးတွေနဲ့လည်း ပတ်ပတ်လည်ပစ်ခတ်နေပါတယ်။”လို့ ပြည်ခရိုင်အမှတ် ၁ တပ်ရင်း ၃၆၀၁ တပ်ခွဲ၂ Royal Tiger Force မှ တပ်ဖွဲ့ဝင် Ronnie ကပြောပါတယ်။
ပြီးခဲ့တဲ့သြဂုတ် ၁၁ ရက်မနက်ပိုင်းမှာ သဲကုန်းမြို့ပေါ်ကနေ သစ်နီတောကျေးရွာကို စစ်ကောင်စီတပ်ဖွဲ့ ဝင် ၁၂၀ ဝန်းကျင်က ဖောကား ၅ စီးနဲ့ ၁ ကြိမ်၊ ဖောကား ၂ စီးနဲ့ ၁ ကြိမ် ရောက်ရှိလာခဲ့ပြီးနောက် ကျေးရွာတွေကိုအခုလို စစ်ကြောင်းထိုးမီးရှို့နေတာလို့ ဆိုပါတယ်။
အဲ့ဒီစစ်ကောင်စီတပ်တွေစတင်စစ်ကြောင်းထိုးလာတဲ့ သြဂုတ် ၁၁ ရက် ညနေ ၆ နာရီမှာ ပြည်ခရိုင် ပကဖ တိုက်ခိုက်ရေးအဖွဲ့၊ သဲကုန်း၊ ပေါင်းတည်ပကဖ အဖွဲ့ ၃ ဖွဲ့တို့က ရုံးပင်တက်ရွာအနောက်ကုန်းမှာ မိုင်းဆွဲတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၁၃ ဦးသေဆုံးခဲ့တယ်လို့ သြဂုတ် ၁၂ ရက်မှာ ပြည်ခရိုင်ပကဖ ကထုတ်ပြန်ထားပါတယ်။
စာတည်း – လင်း