အားကစား

မြေလတ်အသံ၊ မတ် ၂၁၊ ၂၀၂၅

မတ် ၂၁ ရက် ဒီနေ့ညမှာ ကျင်းပသွားတဲ့ ONE Friday Fights 101 မှာ မြန်မာဖိုက်တာတွေဖြစ်တဲ့ အဲမွီနဲ့ သွေးလင်းထက်တို့ပါဝင်ယှဉ်ပြိုင်ခဲ့ကာ အဲမွီကတော့ ပြိုင်ဘက် အဟာဗက်ဂေါ်ဒွန်ကို ဒိုင်အဆုံးအဖြတ်နဲ့ရှုံးနိမ့်ခဲ့ပြီး သွေးလင်းထက်ကတော့ ပြိုင်ဘက်ဖြစ်သူ ရော့ကီကို ဒိုင်အဆုံးအဖြတ်နဲ့ပဲ အနိုင်ရခဲ့ပါတယ်။ 

အဲမွီနဲ့ဂေါ်ဒွန်တို့ပွဲစဉ် ပထမအချီမှာ အဲမွီက အနိမ့်ကန်ချက်၊ ဘယ်ကန်ချက်တွေ ကောင်းကောင်းအသုံးချခဲ့ပြီး ဂေါ်ဒွန်ကတော့ ကန်ချက်ပိုသုံးကာ နှစ်ယောက်စလုံး ဆိုင်ထိုးခဲ့ကြပါတယ်။ ဂေါ်ဒွန်ကန်ချက်ကို ဆိုင်ပြီး အဲမွီဘယ်ထောက်တာတွေ ကောင်းမွန်တာတွေ့ရပြီး ဂေါ်ဒွန်ကတော့ အသာရတဲ့အချိန်မှာ ကြိုးဝိုင်းထောင့်ကပ်ပြီး စိတ်ကြိုက်ထိုးသွားပါသေးတယ်။ အဲမွီကလည်း အနိမ့်ကန်ချက် ညာဝိုက်တွေနဲ့ တုံ့ပြန်ပါတယ်။ 

ဒုတိယအချီမှာတော့ ဂေါ်ဒွန်ဟာ ပထမအချီလိုမကစားတော့ဘဲ ခြေကန်ချက်နဲ့ တံတောင်ရိုက်ချက်ကို ပိုပြီးအားပြုလာပါတယ်။ အဲမွီတိုးဝင်ထိုးသတ်ချိန် ဂေါ်ဒွန်ရဲ့တံတောင်ရိုက်ချက်ထိပြီး ကွဲသွားပါတယ်။ အဲမွီကပ်ရခက်ခဲ့ပြီး ဘယ်ဝိုက် ညာဖြောင့်တွေနဲ့လိုက်ခဲ့ပါတယ်။ အဲမွီရဲ့ဒဏ်ရာက သွေးကျတာများလာတာကြောင့် ပွဲခဏနားခဲ့ရသေးပြီး ဂေါ်ဒွန်ကတော့ အဲမွီအဝင်ကိုစောင့်ပြီးပဲ ကစားသွားပါတယ်။ 

တတိယအချီမှာတော့ အဲမွီအတင်းထိုးလိုက်လာပြီး ဘယ်ညာတွဲလုံးတွေသုံးခဲ့တာ ထိရောက်ခဲ့ပါတယ်။ ဂေါ်ဒွန်ကတော့ အဲမွီကိုသိပ်အကပ်မခံခဲ့ဘဲ အနားကပ်သွားရင် ဆိုင်ထိုး၊ ဆိုင်ကန် ရင်ဆိုင်ခဲ့ပြီး ပွဲဟာ ကြည့်ကောင်းခဲ့ပါတယ်။ နောက်ပိုင်းမှာ ဂေါ်ဒွန်ခွါကစားသွားပြီး ထောက်လက်သီးနဲ့ အမြင့်ကန်ချက်ကိုသာ သုံးသွားပါတယ်။ အဲမွီရဲ့ထိုးချက်တွေနဲ့ ထိုးလိုက်ခဲ့ပေမယ့် ပွဲအပြီးမှာတော့ ဒိုင် ၃ ဦးစလုံးရဲ့ အမှတ်ပေးဆုံးဖြတ်ချက်နဲ့ ဂေါ်ဒွန် အနိုင်ရသွားပါတယ်။ 

ပွဲစဉ် ၇ မှာ ထိုးသတ်ခဲ့တဲ့ သွေးလင်းထက်နဲ့ ရော့ကီတို့ပွဲမှာတော့ သွေးလင်းထက်ဟာ အသာစီးထိုးသတ်ခဲ့ပြီး အနိုင်ရခဲ့ပါတယ်။ 

ပထမအချီမှာ သွေးလင်းထက်အမြင့်ကန်ချက်နဲ့ စခဲ့ပြီး ရော့ကီကတော့ ဘယ်ညာလက်သီးတွဲလုံးတွေနဲ့ ပြန်ဝင်ခဲ့ပါတယ်။ ရော့ကီဟာ အနိမ့်ကန်ချက်နဲ့ ဘယ်ညာတွဲလုံးသုံးတာ ထိရောက်ခဲ့ပြီး သွေးလင်းထက်ကတော့ နင်းခြေကိုအသုံးပြုတာများခဲ့ပါတယ်။ ရော့ကီဟာ သွေးလင်းထက်ကိုအကပ်မခံဘဲ အနိမ့်ကန်ချက်တွေသုံးတာ ထိရောက်ပါတယ်။ သွေးလင်းထက်ရဲ့ လက်သီးပါဝါကိုသိလို့ ယှဉ်မထိုးခဲ့ပါဘူး။ ဒါကြောင့် သွေးလင်းထက်ရဲ့လက်သီးချက်တချို့ လေပေါ်တင် ဝဲနေပါတယ်။ 

ဒုတိယအချီမှာလည်း ရော့ကီဟ အနိမ့်ကန်ချက်ကိုပဲသေချာသုံးပါတယ်။ သွေးလင်းထက် ပူးကပ်လာရင်လည်း ချုပ်ပစ်လိုက်ပြီး ဒူးတိုက်ဖို့ပဲကြိုးစားပါတယ်။ သွေးလင်းထက်ကတော့ တလုံးကောင်းထိအောင်ထိုးဖို့ ကြိုးစားလာပါတယ်။ ရော့ကီ ပူးချုပ်လိုက် အနိမ့်ကန်လိုက်လုပ်နေချိန်မှာပဲ သွေးလင်းထက်ရဲ့ လက်ပြန်ရိုက်ချက်ထိပြီး အမှတ်စဉ်ရေတွက်ခံလိုက်ရပါတယ်။ သွေးလင်းထက် ပင့်လက်သီးကောင်းခဲ့ပြီး ရော့ကီရဲ့ဘယ်ညာတွဲလုံးတွေနဲ့ ပြန်လိုက်ခဲ့ပါတယ်။ သွေးလင်းထက်ရဲ့ထိုးချက်တွေကို ရော့ကီသတိထားရှောင်သွားပြီး ဒုတိယအချီပြီးခါနီးမှာ ရော့ကီ လက်သီးတွဲလုံးနဲ့ လိုက်လာခဲ့ပါသေးတယ်။ 

တတိယအချီအစမှာတော့ တယောက်နဲ့တယောက် ချိန်ဆနေရင်း သွေးလင်းထက်ဟာ ဘယ်ဝိုက်နဲ့ လက်ပြန်ရိုက်ချက်ဟာ ရော့ကီရဲ့မျက်နှာတည့်တည့်ထိပြီး ဒုတိယအကြိမ် အမှတ်စဉ်ရေခံလိုက်ပြန်ပါတယ်။ ရော့ကီဟာ တတိယအချီရောက်ပြီမို့ ဖွင့်ထိုးလာခဲ့ပြီး သူအားသာတဲ့ ညာဖြောင့်လက်သီးကို ရအောင်ထိုးလာပါတယ်။ သွေးလင်းထက်ရဲ့ ညာဖြောင့်လက်သီးချက် ညာခြေကန်ချက်တွေကောင်းမွန်ခဲ့ပြီး နှစ်ယောက်စလုံး ယှဉ်ထိုးလာတာကြောင့် ပွဲဟာ ကြည့်ကောင်းခဲ့ပါတယ်။ ပွဲပြီးခါနီးမှာ သွေးလင်းထက် သိပ်မလိုက်တော့ဘဲ ရော့ကီဝင်လာချိန်ကိုစောင့်ထိုးခဲ့ကာ လူချင်းပူးကပ်သွားချိန်မှာ အောင်ပွဲခံတဲ့အမူအယာလုပ်ပြခဲ့ပါသေးတယ်။ ရော့ကီလည်း အတင်းလိုက်ဖို့ကြိုးစားပေမယ့် တတိယအချီလည်း ပြီးဆုံးသွားပြီး ပွဲအပြီးမှာ ဒိုင် ၃ ဦးစလုံးရဲ့ဆုံးဖြတ်ချက်နဲ့ သွေးလင်းထက် အနိုင်ရခဲ့ပါတယ်။ 

ONE Friday Fights 101မှာ ယှဉ်ပြိုင်သွားတဲ့ မြန်မာဖိုက်တာ ၂ ယောက်စလုံး အကောင်းဆုံးစွမ်းဆောင်ရည်တွေ ချပြခဲ့ပြီး ပရိသတ်အကြိုက်ဖြစ်ခဲ့ပေမယ့် ဘောနပ်စ်ဆုတွေနဲ့ ဝေးခဲ့ရတာတော့ စိတ်ထဲခုစရာပါ။ ဘာပဲဖြစ်ဖြစ် ဒီနေ့ညပွဲကို မြန်မာပရိသတ်တွေ ကျေနပ်နေကြမယ်လို့ ထင်ပါတယ်။ 

မြေလတ်အသံ၊ မတ် ၂၁၊ ၂၀၂၅။

မတ် ၂၁ ရက် ဒီနေ့ညမှာ ကျင်းပသွားမယ့် ONE Friday Fights 101 မှာ မြန်မာဖိုက်တာတွေဖြစ်တဲ့ အဲမွီနဲ့ သွေးလင်းထက်တို့ပါဝင်မှာဖြစ်ပြီး အဲမွီက အစ္စရေး၊ အမေရိကန်နွယ်ဖွား အဟာဗက်ဂေါ်ဒွန်နဲ့ ထိုးသတ်ရမှာဖြစ်ပြီး သွေးလင်းထက်ကတော့ ထိုင်းဖိုက်တာ ရော့ကီဝေါဝမ်တာဝီနဲ့ ထိုးသတ်သွားမှာဖြစ်ပါတယ်။ 

ဒီနေ့မှာတော့ အဲမွီနဲ့ဂေါ်ဒွန်တို့ဟာ ပွဲစဉ် ၆ မွေထိုင်း ဖလိုင်းဝိတ်တန်းမှာ ယှဉ်ပြိုင်သွားရမှာဖြစ်ပြီး သွေးလင်းထက်နဲ့ ရော့ကီတို့ကတော့ ပွဲစဉ် ၇ မွေထိုင်း စတောဝိတ်တန်းမှာ ယှဉ်ပြိုင်ထိုးသတ်သွားကြမှာဖြစ်ပါတယ်။ 

အဲမွီနဲ့ထိုးသတ်မယ့်ဂေါ်ဒွန်ဟာ အသက် ၁၈ နှစ်သာရှိသေးပြီး ဒီပွဲဟာ သူ့အတွက် ONE မှာပထမဆုံးထိုးသတ်ရမယ့် ပွဲဖြစ်ပါတယ်။ ဂေါ်ဒွန်ဟာ ONE ကိုမရောက်ခင်က ကစ်ဘောက်ဆင်နဲ့ မွေထိုင်းပွဲတွေကို အခြားသောပြိုင်ပွဲတွေမှာထိုးသတ်ခဲ့ပြီး ဆုတံဆိပ်တွေလည်း ရရှိထားသူပါ။ 

ညာဖြောင့်လက်သီးကိုအားကိုးပြီး ဘယ်ဘော်ဒီ ညာဖြောင့်တွဲလုံး၊ ဘယ်ခြေပြ ညာတံတောင်ရိုက်တွဲလုံးတွေကို လျင်လျင်မြန်မြန်သုံးတတ်တာတွေ့ရပါတယ်။ လူချင်းပူးကပ်ချိန် အောက်ခြေကိုဆွဲချိတ်လှဲချတတ်ပြီး လက်သီးပါဝါလည်းအတန်အသင့်ရှိကာ မာဂုဏ်မြင့်တာကိုလည်းတွေ့ရပါတယ်။ 

အားနည်းချက်အနေနဲ့ကတော့ အမြင့်ကန်ချက်အသုံးပြုတာနည်းပြီး လက်ဝှေ့အိတ်အပြောင်းအလဲ အသားမကျဖြစ်နိုင်ကာ ထိုးသတ်ချိန်မှာ ဘော်ဒီကိုကာကွယ်ဖို့တော့ အားနည်းတာတွေ့ရပါတယ်။ 

အဲမွီကတော့ ပြီးခဲ့တဲ့နိုင်ပွဲမှာ အမှတ်စဉ် ၂ ကြိမ်ရေတွက်ခံရပြီးမှ ပြိုင်ဘက်ကို ချက်ကောင်း ထိထိမိမိ ထိုးမိလိုက်တာကြောင့် အနိုင်ရခဲ့ပါတယ်။ အဲမွီဟာ ဒုတိယပွဲမှာ ရှုံးပွဲကြုံပြီးကတည်းက ပြိုင်ဘက်ကစားသမားကို သေချာလေ့လာတာတွေ့ရပြီး ထိုးသတ်ရာမှာလည်း ရဲရဲဖွင့်ထိုးတတ်တဲ့ ဖိုက်တာကောင်းတယောက် ဖြစ်ပါတယ်။ 

လက်သီးတွဲလုံးအားကောင်းပြီး အောက်ခြေကန်ချက်တွေအသုံးပြုတတ်တဲ့အဲမွီတယောက် ဒီပွဲမှာလည်း ပြိုင်ဘက်ကို ဘယ်လိုထိုးသတ်ရမယ်ဆိုတာ လေ့လာပြီးလောက်ပြီထင်ပါတယ်။

ဒီပွဲမှာ ဖိုက်တာနှစ်ယောက်စလုံး သတ်မှတ်ဝိတ်တန်းဝင်ထားပြီး လူကောင်ချင်းသိပ်မကွာဘဲ တိုက်စစ်ဖွင့်ထိုးကြတဲ့ ဖိုက်တာတွေဖြစ်တာကြောင့် ကြည့်ကောင်းမယ့်ပွဲဖြစ်ပြီး ဖျော်ဖြေမှုအပြည့်ပေးနိုင်ကာ ဘောနပ်စ်ဆုတွေကိုလည်း မျှော်မှန်းနိုင်ပါတယ်။ 

ပွဲစဉ် ၇ မှာ သွေးလင်းထက်နဲ့ ယှဉ်ပြိုင်ထိုးသတ်မယ့် ရော့ကီဟာ ONE ရဲ့မှတ်တမ်းမှာ ၁ ပွဲသာထိုးထားပြီး အလဲထိုးနဲ့အနိုင်ရရှိထားပါတယ်။ ညာဖြောင့်လက်သီးကို အားပြုကစားတာတွေ့ရပြီး အားပါပြင်းထန်တာလည်းတွေ့ရကာ သူ့ရဲ့အလဲထိုးနိုင်ပွဲမှာလည်း အဲ့ဒီလက်သီးချက်ကို ဆက်တိုက်ထိုးသတ်ရင်းနဲ့ အနိုင်ယူခဲ့တာဖြစ်ပါတယ်။ 

ဘယ်ဝိုက် ညာဖြောင့်တွဲလုံးကိုအသုံးပြုတာများပြီး ခြေကန်ချက်သိပ်မသုံးဘဲ တိုက်စစ်ဖွင့်ကစားတတ်တဲ့ ဖိုက်တာတဦး ဖြစ်ပါတယ်။ 

အားနည်းချက်ကတော့ ခြေကန်ချက်သိပ်မထွက်တာ၊ ညာတပေါက်ပဲထွက်တာမို့ ထိုးသတ်ပုံကြိုတင်ခန့်မှန်းလို့ရနေတာ၊ သူ့ကိုယ်သူကာကွယ်မှုအားနည်းတာတွေ ရှိပါတယ်။ 

သွေးလင်းထက်ကတော့ ဘယ်ဖိုက်တာလာလာ အကောင်းဆုံးလက်စွမ်းတွေနဲ့ ထိုးသတ်ပြခဲ့ပြီး သူဟာ ONE မှာ အဆင့်တခုရှိတယ်ဆိုတာ ပြသထားတဲ့ကစားသမားတဦးဖြစ်ပါတယ်။ မြန်မာဖိုက်တာတွေထဲမှာ ထိကျပါဝါရှိတဲ့ကစားသမားဖြစ်ပြီး ဘယ်ညာတွဲလုံးတွေကောင်းမွန်တာ၊ အောက်ခြေကန်ချက် အမှတ်မထင်ထုတ်သုံးတတ်တာတွေဟာ သူ့ရဲ့အားသာချက်တွေ ဖြစ်ပါတယ်။ 

ဒီပွဲဟာလည်း  ဖိုက်တာ ၂ ယောက်စလုံးက တိုက်စစ်ဖွင့်ကစားတတ်တာကြောင့် ကြည့်ကောင်းဦးမှာ သေချာပါတယ်။ 

ဒီနေ့ည ONE Friday Fights 101 မှာပါဝင်ယှဉ်ပြိုင်သွားမယ့် မြန်မာဖိုက်တာနှစ်ယောက်မှာ ဘယ်သူနိုင်ပွဲရသွားမလဲဆိုတာ မှတ်ချက်ပေးခဲ့လို့ရပါတယ်။ 

ဓာတ်ပုံ – One Lumpinee FC