မြေလတ်အသံ၊ ဇန်နဝါရီ ၂၄၊၂၀၂၅။

ဇန်နဝါရီ ၂၄ ရက် ဒီနေ့ည ဘန်ကောက်မြို့၊ Impact Arena မှာ ကျင်းပသွားမယ့် ONE 170 ပြိုင်ပွဲမှာ သန့်ဇင်ကတော့ ထိုင်းဖိုက်တာ စူရီယန်လက်ခ်နဲ့ ထိုးသတ်သွားရမှာ ဖြစ်ပါတယ်။ 

စူရီယန်လက်ခ်ဟာ အသက် ၂၈ အရွယ်ကစားသမား ၁ ဦးဖြစ်ပြီး ONE ရဲ့မှတ်တမ်းတွေအရ ၉ ပွဲထိုးထားကာ ၆ ပွဲအနိုင်ရပြီး ဘောနပ်စ်ဆုတွေလည်း အကြိမ်ကြိမ်ရရှိထားဖူးသူဖြစ်ပါတယ်။ 

သူကတော့ ပွဲမစခင်ကတည်းက ဒီပွဲကို ဒိုင်အဆုံးအဖြတ်ထိမရောက်ချင်ဘူးလို့ပြောထားသလို သန့်ဇင်ကို အပြိုင်အဆိုင်ထိုးသတ် အနိုင်ယူပြီး ဘောနပ်စ်ဆုနဲ့အတူ ONE ရဲ့ဒေါ်လာ ၁ သိန်းတန်စာချုပ်ကို ရချင်တယ်လို့ ပြောခဲ့ပေမယ့် ဆေးစစ်ဝိတ်ချိန်တဲ့အချိန်မှာ Hydration Test ဝင်အောင်မလုပ်နိုင်တာကြောင့် ဘောနပ်စ်နဲ့တော့ လွဲသွားပါပြီ။ 

စူရီယန်လက်ခ်ဟာ ပြိုင်ဘက်ကိုဖိအားပေးထိုးသတ်သူဖြစ်ကာ အနီးကပ်လက်သီးချက်တွေက သတိထားစရာကောင်းပြီး ပြိုင်ဘက်အတော်များများဟာ အဲ့ဒီလက်သီးချက်တွေကြောင့် အမှတ်စဉ်ရေတွက်ခံရတာတွေ ရှိပါတယ်။ 

သန့်ဇင်ကိုအပြိုင်အဆိုင်ထိုးချင်တယ်လို့ပြောထားသလိုပဲ သူ့ရဲ့အရပ်အမောင်းအရ အနီးကပ်ဆိုင်ထိုးပြိုင်ထိုးမှ အားသာချက်ရယူနိုင်တာမျိုးဖြစ်ပြီး ဘယ်ညာတွဲလုံးတွေက သတိတချက်လွတ်တာနဲ့ အနိုင်အရှုံး ဆုံးဖြတ် ပေးသွားနိုင်ပါတယ်။ အများစုသောထိုင်းဖိုက်တာတွေလို ထိတာများလာရင်နောက်တွန့်သွားတတ်တဲ့ ဖိုက်တာမျိုးမဟုတ်ဘဲ သူကျကိုယ်ကျ ထိုးသတ်တာကြောင့် ONE ကအကြိုက်တွေ့တဲ့ကစားသမားလည်း ဖြစ်ပါတယ်။ 

သူ့ရဲ့အားနည်းချက်တော့ ခြေကန်ချက်သိပ်မထွက်တာနဲ့ အကွာအဝေးချိန်ပြီးထိုးသတ်တဲ့ဖိုက်တာတွေနဲ့ တွေ့ရင် အခက်တွေ့တတ်တာပဲ ဖြစ်ပါတယ်။ 

သန့်ဇင်ကတော့ ပေါက်ကွဲအားအပြည့်နဲ့ကစားတတ်တာကြောင့် ပွဲကောင်းတွေထိုးသတ်ခွင့်ရနေပါတယ်။ သူဟာ ONE ရဲ့ ဒေါ်လာ ၁ သိန်းတန်စာချုပ်ကိုမရသေးပေမယ့် အခုပွဲအပါအဝင် ထိုးသတ်ရတဲ့ ၄ ပွဲမှာ ၂ ပွဲက ပြိုင်ပွဲကြီးတွေမှာယှဉ်ပြိုင်ခွင့်ရနေတာပါ။ 

သန့်ဇင်ဟာ ဒီပြိုင်ပွဲမှာတော့ မီဒီယာတွေနဲ့ဝေးဝေးနေထားပြီး လေ့ကျင့်နေတဲ့ပုံရိပ်တွေကိုပါ ဖော်ပြတာမျိုး မလုပ်တော့တာကိုတွေ့ရပါတယ်။ ဒါဟာ သူ့အတွက်တကယ်ကောင်းမွန်တဲ့ ဆုံးဖြတ်ချက်ဖြစ်ပြီး ခန္ဓာကိုယ် တည်ဆောက်ပုံလည်း ပိုမိုကောင်းမွန်လာတာတွေ့ရပါတယ်။ ဆေးစစ်ဝိတ်ချိန် လွတ်လွတ်ကျွတ်ကျွတ် အောင်ထားတာကြောင့် အနိုင်ရရင် ဘောနပ်စ်လည်း မျှော်လင့်နိုင်မှာ ဖြစ်ပါတယ်။ 

သန့်ဇင်အနေနဲ့ ပြိုင်ဘက်ကို အကွာအဝေးချိန်ဆပြီးထိုးတတ်တာကြောင့် ဒီပွဲမှာအသာရနိုင်ပြီး သူ့ရဲ့မူပိုင် ကန်ချက်ပြင်းပြင်းတွေနဲ့ ဘယ်ထောက် ညာဝိုက်လက်သီးချက်တွေဟာ ပြိုင်ဘက်ကစားသမားတွေကို အခက်တွေ့စေပါတယ်။  

သန့်ဇင်မှာ လက်သီးတွဲလုံးဆက်တိုက်မထွက်တဲ့ အားနည်းချက်ရှိနေပြီး ဒီနေ့ပြိုင်ဘက်ဟာ အရင်ပြိုင်ဘက်တွေလို လွယ်လွယ်နဲ့ စင်ပေါ်ကဆင်းသွားမှာမဟုတ်ဘဲ ကိုယ့်ကိုဖိအားဆက်တိုက်ပေးနိုင်တာကို သတိပြုဖို့လိုပါလိမ့်မယ်။ 

ပွဲကောင်းတွေထိုးသတ်ခွင့်ရနေတာကြောင့် ONE ရဲ့စာချုပ်ကို သန့်ဇင်ကိုယ်တိုင်လည်း မျှော်လင့်နေမှာသေချာသလို ဆေးစစ်ဝိတ်ချိန်နဲ့ ကစားသမားမိတ်ဆက်အချိန်တွေမှာ ကိုယ့်ကိုယ်ကို ယုံကြည်မှုရှိနေတာလည်းတွေ့ရပါတယ်။ 

ဒီလိုယုံကြည်ချက်တွေရှိနေတဲ့သန့်ဇင်တယောက် ပြိုင်ပွဲမှာ အစွမ်းပြအနိုင်ရသွားပြီး သူမျှော်လင့်ထားတာတွေ ရနိုင်မလား၊ စူရီယန်လက်ခ်ကပဲ အနိုင်ယူသွားမလားဆိုတဲ့အဖြေကို ဒီကနေ့ ညနေမှာ သိရတော့မှာဖြစ်ပါတယ်။ 

Photo – One Lumpinee FC

မြေလတ်အသံ၊ ဇန်နဝါရီ ၂၄၊၂၀၂၅၊

ဇန်နဝါရီ ၂၄ ရက်၊ ယခုလက်ရှိကျင်းပနေတဲ့ ONE 170 ပြိုင်ပွဲမှာ သန့်ဇင်ကတော့ ထိုင်းဖိုက်တာ စူရီယန်လက်ခ်ကို ဒုတိယအချီမှာ အလဲထိုးနဲ့ ရှုံးနိမ့်သွားခဲ့ပါတယ်။ 

ပွဲရဲ့ ပထမအချီအစမှာ သန့်ဇင်ဟာ သူအားသာတဲ့ အောက်ခြေသိမ်းကန်ချက်နဲ့ စခဲ့ပါတယ်။ စူရီယန်လက်ခ်ကလည်း အောက်ခြေကန်ချက်နဲ့တုံ့ပြန်ခဲ့ပါတယ်။ သန့်ဇင်ဟာ လူချင်းအကပ်သိပ်မခံဘဲ ထိုးသတ်ခဲ့တာ အလုပ်ဖြစ်ခဲ့ပြီး ဘယ်ဝိုက် ညာဖြောင့်လက်သီး စူရီယန်လက် လဲကျသွားတဲ့အထိကောင်းခဲ့ပါတယ်။ 

သန့်ဇင်ရဲ့အောက်ခြေကန်ချက်ကြောင့် စူရီယန်လက်ခ်နာသွားပုံရပြီး သိပ်မတိုးတော့တာကြောင့် ပထမချီဟာ သန့်ဇင်လုပ်တိုင်းဖြစ်နေခဲ့တာပါ။ သန့်ဇင်ခြေကန်ချက်ကောင်းမွန်တာကို သိသွားတဲ့ စူရီယန်လက်ခ်ကတော့ ကန်ရင်ရှောင်ပြီး သူအားသာတဲ့လက်သီးကို တိတိကျကျထိအောင်ပဲ ကြိုးစားနေရပါတယ်။ 

ဒုတိယအချီမှာတော့ အသာရနေတဲ့သန့်ဇင်ဟာ အောက်ခြေကန်ချက်နဲ့စပြီး စူရီယန်လက်ခ်နောက်ဆုတ်သွားချိန် ဒူးပျံခုန်ကျွေးခဲ့တဲ့အထိ အလုပ်ဖြစ်နေပါသေးတယ်။ စူရီယန်လက်ခ်တယောက် ရှောင်တိမ်းရင်း သူအားသာတဲ့လက်သီးချက်ကို သေချာအသုံးချနေပါတယ်။ 

အဲ့ဒီကပဲ လက်သီးနှစ်ချက်ဆက်တိုက်ထိခဲ့ပြီး သန့်ဇင်တယောက် အမှတ်စဉ်ရေတွက်ခံလိုက်ရပါတယ်။ သန့်ဇင်ဟာ ပြိုင်ဘက်အားသာတဲ့လက်သီးချက်ကို သတိမမူဘဲ အောက်ခြေကန်ဖို့သာအားထုတ်နေတာကြောင့် အငိုက်မိသွားပြီး သုံးကြိမ်တိတိလဲကျကာ အလဲထိုးနဲ့ အရှုံးပေးခဲ့ရပါတယ်။ 

မြေလတ်အသံ၊ ဇန်နဝါရီ ၂၃၊ ၂၀၂၅။

ဇန်နဝါရီ ၂၄ ရက်ညမှာကျင်းပသွားမယ့် ONE 170 ပြိုင်ပွဲမှာ မြန်မာဖိုက်တာတွေဖြစ်တဲ့ စိုးလင်းဦးနဲ့ သန့်ဇင်တို့ရဲ့ပွဲတွေပါဝင်ပြီး ထိုင်းဖိုက်တာတွေနဲ့ ယှဉ်ပြိုင်ထိုးသတ်သွားကြမှာ ဖြစ်ပါတယ်။ ဒီပွဲကို ဘန်ကောက်မြို့က ပရိသတ်သောင်းချီကြည့်ရှုနိုင်တဲ့ Impact Arena မှာကျင်းပသွားမှာဖြစ်ပြီး ONE Championship ရဲ့နာမည်ကျော်ဖိုက်တာတွေဖြစ်တဲ့ စူပါဘွန်းနဲ့ တာဝမ်ချိုင်းရဲ့ပွဲစဉ်အပါ ချန်ပီယံခါးပတ်လုပွဲ ၃ ပွဲအထိထည့်သွင်းကျင်းပသွားမှာဖြစ်ပါတယ်။ 

ပြိုင်ပွဲကျင်းပနေစဉ်မှာလည်း ဟောလိဝုဒ်နာမည်ကျော်တွေနဲ့ MMA လောကကိုကျောရိုးပြုထားတဲ့ Beast In Me ရုပ်ရှင်ကားလည်းရိုက်ကူးသွားမယ်လို့ သိရပါတယ်။ 

ဒီပြိုင်ပွဲမှာ စိုးလင်းဦးဟာ ထိုင်းနိုင်ငံရဲ့ဝါရင့်ဖိုက်တာတဦးဖြစ်တဲ့ ဆက်ဆန်နဲ့ထိုးသတ်ရမှာဖြစ်ပြီး  ဆက်ဆန်ဟာ မွေထိုင်းပွဲစဉ်ပေါင်း ၂၀၀ ကျော်ထိုးသတ်ထားကာ ONE ကကျင်းပတဲ့ပြိုင်ပွဲတွေမှာ ၁၀ ပွဲထိုး ၉ ပွဲနိုင် မှတ်တမ်းကောင်း ပိုင်ဆိုင်ထားသူတယောက်ဖြစ်ပါတယ်။ 

ဆက်ဆန်ဟာ မာဂုဏ်မြင့်တဲ့ကစားသမားတဦးဖြစ်ပြီး သူ့ရဲ့ညာလက်သီးကို ယုံယုံကြည်ကြည်နဲ့အသုံးချ တတ်ပါတယ်။ အားပါတဲ့ညာဖြောင့်လက်သီး၊ ညာတံတောင်တို့ကို လိုသလိုအသုံးပြုတတ်ပြီး အနာခံထိုးသတ်တတ်သူဖြစ်ကာ ပြိုင်ဘက်ကိုဆက်တိုက်ဖိအားပေးကစားတတ်သူလည်း ဖြစ်ပါတယ်။ အနီးကပ်တံတောင်ရိုက်ချက်အပြင် မထင်မှတ်တဲ့အချိန်မှာ အသုံးပြုတတ်တဲ့ ပတ်တံတောင်၊ လက်ပြန်ရိုက်ချက်တွေကလည်း ပြိုင်ဘက်ကစားသမားကိုအခက်တွေ့စေပါတယ်။ 

ခြေကန်ချက်အားနည်းပေမယ့် သူ့ရဲ့ခြေကန်ချက်ကိုလက်နဲ့ဖမ်းတားပြီး ထိုးဖို့ကြိုးစားရင်တော့ အကာအကွယ်မဲ့သွားတဲ့ မေးရိုးတွေဆီ လက်သီးချက်တွေဆက်တိုက်ဝင်တာ ခံရနိုင်ပါတယ်။ 

အားနည်းချက်အနေနဲ့ကတော့ အနိမ့်ကန်ချက်တွေခံရရင် တုံ့ပြန်ပုံအားနည်းကာ ဖိအားပေးကစားတတ်တဲ့ကစားသမားတွေရဲ့ ပုံစံအတိုင်း သူ့ရဲ့မေးရိုးတွေဟာ အကာအကွယ်မဲ့နေတတ်ပြီး ပြိုင်ဘက်ရဲ့ပင့်လက်သီးဒဏ်ကို ပွဲတိုင်းနီးပါး ခံရတာတွေ့ရပါတယ်။ 

စိုးလင်းဦးကတော့ ဒီဇင်ဘာလထဲမှာ ကားမတော်တဆမှုကြောင့် အစောပိုင်းမှာ ပြိုင်ပွဲက နုတ်ထွက်ခဲ့ပေမယ့် နောက်ပိုင်းမှာတော့ ပြန်လည်ထိုးသတ်ဖို့အတွက် ဆုံးဖြတ်ခဲ့တာဖြစ်ပြီး ဒီပွဲအတွက်အားခဲထားကာ ယုံကြည်ချက်မြင့်မားနေတဲ့ပုံစံကိုလည်း တွေ့ရပါတယ်။  

စိုးလင်းဦးကလည်း နောက်မဆုတ်တမ်းဖိအားပေးထိုးသတ်တဲ့ကစားသမားဖြစ်ပြီး ထောက်လက်သီးနဲ့ အနီးကပ်ပင့်လက်သီးအားသာချက်ရှိပါတယ်။ 

ခြေကန်ချက်ပိုင်းအားနည်းပြီး တချက်နှစ်ချက်ထိမှ ပိုကောင်းလေ့ရှိတဲ့စိုးလင်းဦးအတွက် ကားမတော်တဆမှုကရထားတဲ့ သူ့ရဲ့ဒဏ်ရာတွေက ဒီပွဲမှာ အဆင်ပြေပါ့မလား စိုးရိမ်စရာပါ။ 

ONE မှာ ၃ ပွဲဆက်အနိုင်ရပြီး နောက်ဆုံးထိုးသတ်ရတဲ့ပွဲစဉ်မှာ နာဘီလ်ကိုရှုံးနိမ့်ထားတဲ့ စိုးလင်းဦးတယောက် ဒီပွဲကိုအနိုင်ကစားဖို့အတွက် ပြင်ဆင်မှုတွေပြုလုပ်လာမှာသေချာပါတယ်။ 

အကွက်ဆန်းတွေပြင်ဆင်ထားတယ်ဆိုတဲ့ ဆက်ဆန်ရဲ့အားနည်းချက်တွေကို လေ့လာထားပြီးပါပြီဆိုတဲ့ စိုးလင်းဦးအနေနဲ့ ဒီပွဲမှာ ဘယ်လောက်အထိအောင်စွမ်းဆောင်ပြမလဲဆိုတာ တွေ့ရပါတော့မယ်။ 

ဒီပွဲဟာ စိုးလင်းဦး ONE ကိုရောက်ကတည်းက ထိုင်းပရိသတ်တွေကြည့်ချင်နေတဲ့ပွဲ ဖြစ်တာကြောင့် ကစားသမားတွေရဲ့အားပြိုင်မှုအပြင် ပရိသတ်တွေရဲ့အပြိုင်အဆိုင်အားပေးမှုကိုပါ မြင်တွေ့ရမှာဖြစ်ပြီး ခန္ဓာကိုယ်တည်ဆောက်ပုံချင်းရော၊ မာဂုဏ်မြင့်မားပုံချင်းပါတူတဲ့ ကစားသမားနှစ်ယောက် ဘယ်သူအသာရသွားမလဲဆိုတာ စောင့်ကြည့်ရအောင်ပါ။ 

Photo – One Championship