ရေစကြို၊ ဧပြီ ၃၀၊ ၂၀၂၅။

မကွေးတိုင်း၊ ရေစကြိုအခြေစိုက် စစ်ကောင်စီတပ်ရင်းတွေက စစ်ကောင်စီတပ်သား ၃ ဦး ဧပြီလ တတိယပတ်အတွင်းမှာ လက်နက်ခဲယမ်းတွေယူပြီး ဘက်ပြောင်းခိုလှုံလာကြတယ်လို့ Southern YSO PDF ဆီက သိရပါတယ်။

ဧပြီ ၂၄ ရက်မှာ ရေစကြိုအခြေစိုက် ခလရ ၂၅၇ တပ်က အသက် ၂၈ နှစ်အရွယ် တပ်သားချစ်စမ်းကို၊ ဧပြီ ၂၅ ရက်မှာ ရေစကြိုမြို့ ခလရ ၂၅၆ တပ်က အသက် ၃၂ နှစ်အရွယ် တပ်သားမြင့်စိန်၊ ဧပြီ ၂၆ ရက်မှာ ခလရ ၂၅၈ က အသက် ၂၄ နှစ်အရွယ် တပ်သားစည်သူကျော်တို့က လက်နက်ခဲယမ်းတွေယူပြီး ဘက်ပြောင်းခိုလှုံခဲ့ကြတာလို့ ဆိုပါတယ်။

တပ်သားချစ်စမ်းကိုဟာ အခုနှစ်ဇန်နဝါရီလပိုင်းက မိတ္တီလာမြို့မှာဖမ်းဆီးခံခဲ့ရပြီးနောက် ဟိုပုံးမှာ စစ်သင်တန်း ၂ လ၊ ပခုက္ကူ တပ်မ ၁၀၁ ထဲမှာ မွမ်းမံသင်တန်း ၁ လတက်ပြီး ခလရ ၂၅၇ ကို ရောက်ရှိလာတာ ရက်ပိုင်းသာရှိသေးပြီး ဘက်ပြောင်းခိုလှုံလာချိန်မှာ MA 1 သေနတ် ၁ လက်၊ ကျည်ဘောက် ၁ ခု ပါလာတယ်လို့ Southern YSO PDF တာဝန်ခံ ဗိုလ်အောင်မောင်းက ပြောပါတယ်။

အလားတူ တပ်သားမြင့်စိန်ဟာလည်း ၂၀၂၄ ဇွန်လပိုင်းက ပြည်ဦးလွင်မှာ ပေါ်တာဆွဲဖမ်းဆီးခံရပြီးနောက် ရှမ်းပြည်နယ်၊ ဗထူးကျောင်းမှာ အပတ်စဥ် ၆ သင်တန်းတက်ခဲ့ရာက စစ်ကောင်စီတပ်သားဖြစ်လာသူဖြစ်ပြီး ခလရ ၂၅၆ တပ်ကို ၂၀၂၄ နို၀င်ဘာလပိုင်းရောက်ရှိလာကာ ဘက်ပြောင်းလာချိန်မှာတော့ ၅.၅၆ ကျည် ၅၀၀ တောင့်ပါလာတယ်လို့ ဆိုပါတယ်။

“ကိုမြင့်စိန်ကတော့ ဇာတိကတခြားကပါ၊ ပြည်ဦးလွင်မှာ အလုပ်လုပ်ရင်းနဲ့ ပေါ်တာဆွဲအဖမ်းခံရတာ၊ အဖမ်းခံရပြီးတော့ သူ့ကိုအတင်းအဓမ္မစစ်မှုထမ်းခိုင်းတဲ့ အခြေအနေကိုရောက်သွားတာ၊ ရှမ်းပြည် ဗထူးကျောင်းမှာ အပတ်စဉ် ၆ သင်တန်းဆင်းခဲ့တာ၊ အဲ့ဒီမှာ သူကတော့ စစ်သင်တန်း ၆ လလောက် တက်ခဲ့ရတယ်၊ ဒီဘက် ရေစကြိုနယ်ကိုရောက်တာ သူက ၅ လလောက်ရှိသွားပြီ” လို့ Southern YSO PDF တာဝန်ခံ ဗိုလ်အောင်မောင်းက ပြောပါတယ်။

ဘက်ပြောင်းလာချိန် လက်ပစ်ဗုံး ၁ လုံး၊ ၅,၅၆ ကျည်တောင့်ပါယူဆောင်လာတဲ့ တပ်သားစည်သူကျော် ကလည်း ၂၀၂၅ ခုနှစ် ဇန်နဝါရီလပိုင်းက တာချီလိတ်မှာအလုပ်သွားလုပ်နေချိန် အဖမ်းခံခဲ့ရပြီးနောက် ဟိုပုံးမှာ အပတ်စဥ် ၈ စစ်သင်တန်းတက်ခဲ့ကာ ဧပြီ ၁၃ ရက်မှာ ခလရ ၂၅၈ ကိုရောက်ရှိလာတာလို့ ဗိုလ်အောင်မောင်းကပြော ပါတယ်။

“သူတို့တတွေက အစကတည်းက စစ်ကောင်စီကို အားပေးတဲ့သူတွေမဟုတ်ပါဘူး၊ မိသားစု စားဝတ်နေရေးကြောင့် ရပ်ဝေးကိုထွက်‌ပြီး အလုပ်လုပ်ရတဲ့အခြေအနေပေါ့၊ စစ်ကောင်စီဘက်ကို ရောက်တော့ အဲ့ဒီမှာမနေချင်ဘူး၊ PDF အဖွဲ့ထဲသွားပြီး သေပဲသေသေဆိုပြီး အလင်းဝင်လာတာ၊ သူတို့ရဲ့ဓါတ်ခံလေးတွေကလည်း စစ်ကောင်စီကို ရွံမုန်းတဲ့ဓါတ်ခံရှိပါတယ်၊” လို့ ဘက်ပြောင်း တပ်သားတွေပြောပြချက်ကို ကိုးကားပြီး ဗိုလ်အောင်မောင်းက ပြန်ပြောပါတယ်။

တပ်သားချစ်စမ်းကို ဆုကြေးငွေ ၃၅ သိန်းကျပ်၊ တပ်သား မြင့်စိန်နဲ့ တပ်သား စည်သူကျော် တို့ကို ၁ ဦးကို ဆုကြေးငွေ ၁၀ သိန်းကျပ်ဆီ ဆုချီးမြှင့်ခဲ့ပြီး ၃ ဦးစလုံးက သူတို့ရဲ့ ဇာတိတွေကိုပြန်ပြီး PDF တွေနဲ့ပူးပေါင်းကာ စစ်ကောင်စီကိုပြန်လည်တိုက်ခိုက်သွားမယ်လို့သိရကြောင်း ဗိုလ်အောင်မောင်းက ပြောပါတယ်။

၂၀၂၁ စစ်အာဏာသိမ်းချိန်ကနေ အခုနှစ် ဧပြီ ၃၀ ရက်အထိ Southern YSO PDF ဆီကို ဘက်ပြောင်း ခိုလှုံလာသူ ရဲတပ်သားနဲ့ စစ်ကောင်စီတပ်သား စုစုပေါင်း ၃၀‌ ကျော်ရှိပြီလို့ အဲ့ဒီအဖွဲ့ဆီကသိရပါတယ်။

စာတည်း – လင်း

ရေစကြို၊ ဧပြီ ၁၈၊ ၂၀၂၅။

မကွေးတိုင်း၊ ရေစကြိုမြို့နယ်မှာ စစ်ကောင်စီတပ်က အကြောင်းမဲ့ လေကြောင်းတိုက်ခိုက်လို့ ခြေပြတ်ခဲ့တဲ့ အသက် ၈၀ နှစ်အရွယ်အဖိုး ၁ ဦး သွေးထွက်လွန်ပြီး သေဆုံးခဲ့တယ်လို့ Yesagyo Township Info Committee က တာဝန်ရှိသူတဦးက ပြောပါတယ်။

ရေစကြိုမြို့နယ်၊ ဗလဘအုပ်စု ဗလဘကျေးရွာကို ဧပြီ ၁၇ ရက် မနေ့ ညနေ ၄ နာရီခွဲလောက်မှာ လေကြောင်းကနေ ၃ ကြိမ် ဗုံးကြဲပစ်ခတ်တိုက်ခိုက်ခဲ့တဲ့အတွက် အဖိုးဦးအောင်သန်းနဲ့ နောက်ထပ် ဒေသခံတချို့ထိခိုက်ခဲ့ပြီး ဦးအောင်သန်းကတော့ ဒီနေ့မနက်ပိုင်းမှာ သေဆုံးခဲ့တာလို့ ဆိုပါတယ်။

“အဘိုးအိုက ခြေတဖက်ပြတ်ဒဏ်ရာနဲ့ သွေးထွက်လွန်ပြီး ဆုံးသွားတာ” လို့ Yesagyo Township Info Committee က တာဝန်ရှိသူတဦးက ပြောပါတယ်။

စစ်ကောင်စီတပ်ဟာ ဂျက်ဖိုက်တာနဲ့ဗုံးကြဲတဲ့အပြင် ရော့ကတ်နဲ့ပါပစ်တဲ့အတွက် ကျေးရွာ ဘုန်းတော်ကြီးကျောင်းနဲ့ ကျောင်းအနီးက အိမ်တွေကိုထိသွားတာလို့ သူကဆက်ပြောပါတယ်။

ဒီတိုက်ခိုက်မှုကို မိတ္ထီလာလေတပ်ဘက်ကလာတဲ့ ဂျက်ဖိုက်တာ ၁ စီးကလုပ်ဆောင်ခဲ့တာဖြစ်ပြီး ပေါင် ၃၀၀ ဗုံးသီး ၃ လုံး ကြဲချခဲ့တာလို့ ရေစကြိုမြို့နယ်ပြည်သူ့ကာကွယ်ရေးအဖွဲ့ ရဲ့ သတင်းနဲ့ ပြန်ကြားရေး တာဝန်ခံကပြောပါတယ်။

ဒါ့အပြင်ကျေးရွာဘုန်းကြီးကျောင်းနဲ့ နေအိမ်အဆောက်အအုံအချို့လည်း ပျက်စီးခဲ့တယ်လို့ ရေစကြိုဒေသခံတဦးက အတည်ပြုပြောပါတယ်။

“ပေါင် ၃၀၀ ဗုံးတွေ ကြဲသွားတာ၊ ဘုန်းကြီးကျောင်းနဲ့ အနီးအနားမှာရှိတဲ့ အိမ်တချို့ပျက်စီးသွားတယ်၊ အသက် ၈၀ အရွယ် လူကြီးပိုင်းတဦးခြေထောက်ပြတ်သွားတယ်၊ဘုန်းကြီးကျောင်းဝိုင်းထဲက အဆောက်အဦတချို့ ပျက်စီးသွားတယ်၊ မီးစက်ထားတဲ့အဆောက်အဦလည်း ပျက်စီးတယ်”လို့ ရေစကြိုမြို့ခံတဦးက ပြောပါတယ်။

မတ် ၂၈ မှာလှုပ်ခတ်ခဲ့တဲ့ အင်အားပြင်းငလျင်ကြီးကြောင့် ပျက်စီးခဲ့တာတွေကို ပြန်လည်ထူထောင်ရေးလုပ်ငန်းတွေ အရှိန်မြှင့်လုပ်ဆောင်ဖို့ဆိုကာ ဧပြီ ၂ ရက်မှ ၂၂ ရက်အထိ ယာယီအပစ်ရပ်ထားကြောင်း ကြေညာခဲ့ပြီးနောက် နေ့စဉ်ဆိုသလို အရပ်သားနေအိမ်တွေကို လေကြောင်းကနေ ဗုံးကြဲတာ၊ လက်နက်ကြီးနဲ့ ပစ်ခတ်တာတွေကို ပြုလုပ်နေတာလည်းဖြစ်ပါတယ်။

ပုံစာ – ဗုံးကြဲတိုက်ခိုက်ခံရသည့် ဗလဘကျေးရွာက နေအိမ်အဆောက်အဦတချို့။

သတင်း – မောင်ဆွေအင်း၊ ဒိန်းဂျား၊ စာတည်း – လင်း

ရေစကြို၊ ဧပြီ ၁၂၊ ၂၀၂၅။

မကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသရှိ သာဂေါင်ကျေးရွာကို စစ်ကောင်စီတပ်က လေကြောင်းကနေဗုံးကြဲတိုက်ခိုက်ခဲ့တာကြောင့် ထိခိုက်ပျက်စီးမှုတွေရှိခဲ့တယ်လို့ ရေစကြိုမြို့နယ် ပြည်သူ့ကာကွယ်ရေးအဖွဲ့ဆီက သိရပါတယ်။

ဧပြီ ၁၂ ရက်ဒီနေ့မနက် ၁၀ နာရီလောက်မှာ မတ္ထီလာလေတပ်ဘက်ကလာတဲ့ ဂျက်ဖိုက်တာနဲ့ ဗုံး ၂ လုံးချ တိုက်ခိုက်ခဲ့တာလို့ဆိုပါတယ်။

“ပြည်သူအထိအခိုက် အသေအဆုံးတော့ မရှိခဲ့ဘူး၊ စာသင်ကျောင်းကို ပစ်မှတ်ထားပြီးတော့ ကြဲချ တိုက်ခိုက်သွားတာ၊ စာသင်ကျောင်းတော့ ပျက်ဆီးဆုံးရှုံးသွားတယ်။ ကျောင်းသားတွေနဲ့ ဆရာ၊ ဆရာမတွေကတော့ ကျောင်းပိတ်ရက်ဆိုတော့ ကျောင်းမှာမရှိဘူး၊” လို့ ရေစကြိုပြည်သူ့ကာကွယ်ရေး တပ်ဖွဲ့ သတင်းနဲ့ပြန်ကြားရေးတာဝန်ခံက ပြောပါတယ်။

တိုက်ခိုက်မှုကြောင့် စာသင်ကျောင်းနဲ့ ကျောင်းသုံးပရိဘောဂပစ္စည်းတွေပျက်သွားခဲ့ပြီး ပျက်စီးမှု အတိအကျကိုတော့ အတည်မပြုနိုင်သေးဘူးလို့ ဆိုပါတယ်။

သာဂေါင်ကျေးရွာကို ခုလိုဗုံးကြဲတိုက်ခိုက်ခံရတာ ၃ ကြိမ်မြောက်ဖြစ်ပြီး ပြီးခဲ့တဲ့ ဇန်နဝါရီလနဲ့ ဖေဖော်ဝါရီလထဲမှာလည်း စစ်ကောင်စီကဗုံးကြဲတိုက်ခိုက်ခဲ့သေးတယ်လို့ ဆိုပါတယ်။

ပြီးခဲ့တဲ့ ဇန်နဝါရီ ၁၆ ရက်မနက်အစောပိုင်းမှာ သာဂေါင်ကျေးရွာကို လေကြောင်းကနေ ပေါင် ၅၀၀ ဗုံး ၂ လုံး ကြဲချတိုက်ခိုက်ခဲ့တဲ့အတွက် အသက် ၁၆ နှစ်နဲ့ အသက် ၅၅ နှစ်အရွယ် အမျိုးသား ၂ ဦးတို့ သေဆုံးခဲ့ပါတယ်။

ဒါ့အပြင် ဖေဖော်ဝါရီ ၁၃ ရက် မနက်အစောပိုင်း ၂ နာရီခန့်မှာ ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာကြောင့် ကျေးရွာအနီးကျရောက်ပေါက်ကွဲပြီး အမျိုးသား ၁ ဦးဒဏ်ရာရကာ နေအိမ်တွေထိမှန် ပျက်စီးခဲ့တယ်လို့ ဒေသခံတွေဆီကသိရပါတယ်။

စာတည်း – လင်း

ရေစကြို၊ ဧပြီ ၄၊ ၂၀၂၅။

မကွေးတိုင်း၊ ရေစကြိုမြို့၊ အမှတ် ၃၊ ပန်းတော်တင်ရပ်ကွက်က ကုန်စုံဆိုင်ကြီးတဆိုင် မီးလောင်ပျက်စီးခဲ့တယ်လို့ ဒေသခံတွေဆီကသိရပါတယ်။

ဧပြီ ၄ ရက်ဒီညနေ ၃ နာရီလောက်မှာ ပန်းတော်တင်ရပ်ကွက်ရှိ ‘ဒေါ်ဆယ်သန်း’ ကုန်စုံဆိုင်က စတင်ပြီးမီးလောင်ခဲ့ရာ ဘေးချင်းကပ်နေအိမ် ၁ လုံးလည်း မီးကူးစက်ခဲ့တယ်လို့ ဆိုပါတယ်။

“ဒေါ်ဆယ်သန်း ဆီဆိုင်မီးလောင်တာ၊ ပေါ့ဆမီးလို့ပြောတယ်၊ အိမ်မှာတင်ရောင်းတဲ့ ဆီဆိုင်ပါ၊ သူက စားဆီကော ဒီဇယ်၊ ဓါတ်ဆီရောင်းတယ်၊ ကုန်စုံဆိုင်လည်းဖွင့်ထားတယ်၊ ဒေါ်ဆယ်သန်းအိမ်နဲ့ ဘေးကအိမ်လည်း မီးလောင်တာ၊” လို့ ဒေသခံတဦးကပြောပါတယ်။

ဒါ့အပြင်မီးလောင်နေချိန် မီးငြှိမ်းသတ်ဖို့သွားတဲ့အမျိုးသားတဦးကိုလည်း မီးလောင်တဲ့နေရာအနီးမှာ ရောက်နေတဲ့ စစ်ကောင်စီတပ်ဖွဲ့ဝင်တွေက သေနတ်နဲ့ပစ်ခတ်ခဲ့တဲ့အတွက် ဒဏ်ရာရခဲ့တယ်လို့ အထက်ပါဒေသခံကဆက်ပြောပါတယ်။

ရေစကြိုမြို့ မြို့နယ်မီးသတ်တပ်ဖွဲ့နဲ့ မြို့မဈေး အရံမီးသတ်တပ်ဖွဲ့တို့က မီးငြှိမ်းသတ်ခဲ့ကာ မီးလောင်ပြီး နာရီဝက်လောက်အကြာမှာ မီးငြှိမ်းနိုင်ခဲ့တယ်လို့ ဆိုပါတယ်။

ဒီမီးလောင်မှုအတွင်း လူထိခိုက်မှုမရှိဘဲ ငွေကျပ်သိန်း ၁၀၀ ဝန်းကျင်လောက်တော့ ဆုံးရှုံးနိုင်တယ်လို့ ဒေသခံတွေက ခန့်မှန်းထားပေမယ့် မြေလတ်အသံကသီးခြားအတည်မပြုနိုင်သေးပါဘူး။

စာတည်း – လင်း