တပ်သား ၁၂၀ ဦး

မြင်းခြံ၊ မတ် ၂၅၊ ၂၀၂၃။

၂၀၂၃ ခုနှစ်မှာ တိုက်ပွဲတွေကို အရှိန်မြင့်မယ်လို့ ဆိုထားတဲ့ မြင်းခြံခရိုင် Zero ပြောက်ကျား တပ်မဟာ၊ တပ်ရင်း ၇ က စစ်ကိုင်းတိုင်းထဲမှာ ဇန်နဝါရီလ ၁ ရက်ကနေ မတ်လ ၂၂ ရက် ၃ လဝန်းကျင်အတွင်း တိုက်ပွဲတွေမှာ စစ်ကောင်စီတပ်သား ၁၂၀ ဦး ဝန်းကျင် သေဆုံးပြီး အများအပြား ထိခိုက်ဒဏ်ရာရခဲ့တယ်လို့ Zero ပြောက်ကျားတပ်မဟာ တပ်ရင်း ၇-မြင်းခြံခရိုင် အဖွဲ့ဆီက သိရပါတယ်။

စစ်ကောင်စီနဲ့ ၃ လအတွင်း တိုက်ပွဲတွေမှာ မိုင်းဆွဲတိုက်ခိုက်မှု ၅ ကြိမ် နဲ့ ထိတွေ့တိုက်ပွဲ ၉ ကြိမ်နဲ့ ဝင်ရောက်စီးနင်းတိုက်ခိုက်မှု ၄ ကြိမ် ပြုလုပ်ခဲ့ပြီး စစ်ကောင်စီတပ်စွဲထားတဲ့နေရာတွေ၊ စစ်ကြောင်းတွေနဲ့ ဆက်ကြေးကောက်တဲ့နေရာတွေကို ဒရုန်းနဲ့ပါ တိုက်ခိုက်ခဲ့ရမှာ ထိခိုက်သေဆုံးခဲ့ကြတာ ဖြစ်တယ်လို့ Zero ပြောက်ကျားတပ်မဟာ တပ်ရင်း ၇-မြင်းခြံခရိုင် ဗိုလ်သက်ကြီးက ပြောပါတယ်။

တိုက်ပွဲအတွင်း စစ်ကောင်စီဘက် သေဆုံးစာရင်းကိုတော့ မျက်မြင်သက်သေနဲ့ တပ်တွင်း ဖရဲသီးတွေရဲ့ ပြောပြချက်အရသိရတာလို့ ပြောပါတယ်။ စစ်ကောင်စီဘက်က သေဆုံးတဲ့အထဲမှာ တပ်မ ၉၉ ဘီလူးစစ်ကြောင်းက စစ်ကြောင်းမှူးအပါအဝင် စစ်သားတွေနဲ့ ပျူးတွေပါ သေဆုံးခဲ့တာလို့ ဗိုလ်သက်ကြီးဆီက သိရပါတယ်။

အဲဒီတိုက်ပွဲတွေမှာ မဟာမိတ်အဖွဲ့ဖြစ်တဲ့ ဆားတောင်မိုးကြိုးအဖွဲ့ထဲက ရဲဘော် ၂ ယောက် ကျဆုံးသွားတာရှိပြီး Zero ပြောက်ကျားအဖွဲ့က ထိခိုက်ဒဏ်ရာရ ရဲဘော်အနည်းကျင်း ရှိခဲ့ပေမယ့် သက်သာပျောက်ကင်းနေပြီလို့ ဆိုပါတယ်။

Zero ပြောက်ကျားအဖွဲ့အနေနဲ့ ၂၀၂၃ နှစ်ဦးပိုင်းကစလို့ မတ်လအတွင်း စစ်သုံးစရိတ်ပေါင်း သိန်း ၁၀၀၀ ဝန်းကျင် ကုန်ကျစရိတ်ရှိ‌တယ်လို့ သိရပါတယ်။ ပြီးခဲ့တဲ့ ဖေဖော်ဝါရီလအတွင်းမှာလည်း စစ်ကောင်စီတပ်က သူတို့စခန်းကို လျှပ်တပျက် ဝင်စီးခဲ့လို့ လက်နက်တချို့ကို ဆုံးရှုံးခံလိုက်ရပါတယ်။