မြေလတ်အသံ၊ ဒီဇင်ဘာ ၂၀၊ ၂၀၂၂။

မကွေးတိုင်းနဲ့ ပဲခူးတိုင်းထဲက CDM လုပ်ထားတဲ့ ဝန်ထမ်းတွေအနေနဲ့ ရှေ့ဆက်ရပ်တည်ဖို့ အခက်အခဲတွေနဲ့ ရင်ဆိုင်နေရတာကြောင့် စားဝတ်နေရေးအတွက် ကျောက်ကပ်ထုတ်ရောင်းဖို့အထိတောင် စဥ်းစားလာကြတယ်လို့ သိရပါတယ်။

စစ်တပ်ကအာဏာသိမ်းတာကို လက်မခံကြတဲ့ဝန်ထမ်းတွေဟာ အကြမ်းမဖက် တော်လှန်တဲ့နည်းလမ်းနဲ့ CDM လုပ်ခဲ့ကြပေမယ့် အခုအချိန်မှာ အကူအညီမဲ့နေပြီး စားဝတ်နေရေးအတွက် အဆင်မပြေကြတော့ဘူးလို့ CDM အရေးကူညီနေသူတဦးက ပြောပါတယ်။

“အခုအချိန်မှာ လက်နက်ကိုင်တော်လှန်ရေးကိုပဲ လူတွေကအာရုံစိုက်နေကြတော့ CDM တွေရဲ့ဘဝက အမေ့လျော့ခံဖြစ်လာကြတယ်။ တချိန်ကတော့ ရုံးမသွားတဲ့ဝန်ထမ်းတွေအိမ်မှာနေပါ၊ ဇိမ်နဲ့ဇိမ်နဲ့ဆိုတဲ့ စကားတွေ၊ ပြည်သူတွေက ကျွေးထားမှာဗျဆိုတဲ့စကားတွေက လေထဲမှာ ပျောက်သွားပြီ။ ဘယ်သူမှ သတိမရကြတော့ဘူး။ ခုချိန်ထိ CDM ဝန်ထမ်းတွေက သူတို့ဘဝရပ်တည်ဖို့ ကြိုးစားကြပေမယ့် ဘက်ပေါင်းစုံက အတိုက်အခိုက်တွေကြောင့် စားဝတ်နေရေးအဆင်မပြေကြဘူး”လို့ ပြောပါတယ်။

CDM အရေးကူညီနေသူတွေအနေနဲ့လည်း ပြည်သူတွေရဲ့ထောက်ပံပေးမှုနည်းလာလို့ CDM ဝန်ထမ်းအများစုရဲ့ အကူအညီတောင်းခံမှုတွေကို မကူညီနိုင်တော့တဲ့အနေအထားရှိလာနေတယ်လို့လည်း ဆိုပါတယ်။

ကူညီပေးသူတွေအနေနဲ့လည်း လက်ရှိအချိန်ထိ CDM ၁၀၀ ဦးဝန်းကျင်လောက်ကို ကူညီထောက်ပံ့ပေးခဲ့ပြီး လစဥ်ထောက်မှုမျိုးတော့မလုပ်ပေးနိုင်ဘူးလို့လည်း သိရပါတယ်။

“ကျနော်အသိ ပညာရေး CDM ဝန်ထမ်းတဦးဆို အလုပ်အကိုင်က အဆင်မပြေတဲ့ကြားထဲ ကျန်းမာရေးကမကောင်းတော့ ကြံရာမရတဲ့အဆုံး ကျောက်ကပ်ထုတ်ရောင်းဖို့ထိ စဥ်းစားလာတယ်။ အဆက်အသွယ်ရှိရင် ချိတ်ပေးပါလားဆိုတာထိ ဖြစ်လာတယ်။ ကျနော်ကိုယ်တိုင်လည်း ပညာရေး CDM ဝန်ထမ်း။ စကစ ကို တော်လှန်နေတဲ့သူဆိုတော့ သူတို့အတွက် ကူညီပေးနိုင်တဲ့ အင်အားမရှိဖြစ်နေတယ်”လို့ CDM ဝန်ထမ်းတဦးကပြောပါတယ်။

CDM ဝန်ထမ်းတွေအနေနဲ့ ဘဝရပ်တည်ဖို့အတွက် ကြုံရာအလုပ်လုပ်ပြီး စားဝတ်နေရေးအတွက် ရုန်းကန်နေကြပေမယ့် စစ်ကောင်စီလက်အောက်ခံအချို့ရဲ့ ခြိမ်းခြောက်မှု၊ အလုပ်ရှင်တွေရဲ့ ခွဲခြားဆက်ဆံမှုတွေကြောင့် စားဝတ်နေရေးအဆင်မပြေကြဘူးလို့ ဆိုပါတယ်။

အဲဒီအပြင် CDM လုပ်ထားလို့ နေရပ်မှာမနေရဲဘဲ ရွေ့ပြောင်းနေထိုင်နေရတာကြောင့် အပိုကုန်ကျငွေတွေရှိနေတဲ့အတွက် ပိုပြီးအခက်အခဲတွေနဲ့ ရင်ဆိုင်နေကြတာဖြစ်ပါတယ်။

မကွေးနဲ့ပဲခူးတိုင်းထဲမှာ ပညာရေးဝန်ထမ်း CDM တွေက အများဆုံးဖြစ်ပြီး၊ CDM ဝန်ထမ်း ထောင်ချီရှိနေတာ ဖြစ်တယ်လို့ သိရပါတယ်။

ပဲခူး၊ ဒီဇင်ဘာ ၇၊ ၂၀၂၁။

ပဲခူးတိုင်းအနောက်ခြမ်း၊ မိုးညိုမြို့နယ်ရွေးကောက်ပွဲကော်မရှင်က နယ်မြေရဲစခန်းတွေအထိ သွားရောက်ပြီး မဲနှစ်ကြိမ်ပေးခဲ့တယ်ဆိုပြီး ပြည်သူအချို့ကို အမှုဖွင့်နေကြောင်း ဒေသခံတွေက ပြောပါတယ်။

အမှုဖွင့်ခံရသူ ၈ ဦးလောက်ရှိပြီး၊ အချို့ဟာ စစ်ကောင်စီရဲ့ခြိမ်းခြောက်ငွေတောင်းခံတာကို ခံရကြောင်း သိရပါတယ်။

“ကျနော်တို့ကြားမိသလောက်က အမူဖွင့်ခံရသူ ၈ ဦးလောက်ရှိတယ်လို့ သိရတယ် မိတ်ဆွေတဦးရဲ့သား CDM ဝန်ထမ်းကိုလည်း အရင်က ခြိမ်းခြောက်ငွေတောင်းတာတွေရှိခဲ့တယ်ပေးလည်းပေးခဲ့ရတယ်။ အခုလည်း မဲနှစ်ကြိမ်ပေးတယ်ဆိုပြီး အမှုဖွင့်နေပြန်ပြီ ဖြစ်ပုံက သူ့နာမည်က အခြားအုပ်စုထဲမှာလည်းပါနေတာ အဲဒါနဲ့သူ့ကို မဲနှစ်ကြိမ်ပေးတယ်ဆိုပြီးစွပ်စွဲတာ တမင်သက်သက်လုပ်တာ” လို့ အမှုဖွင့်ခံရတဲ့ CDM ဝန်ထမ်းနဲ့ နီးစပ်သူတဦးက ပြောပါတယ်။

အမူဖွင့်ခံရသူထဲမှာ CDM ဝန်ထမ်း တဦးလည်းပါဝင်တာမှန်ကန်ကြောင်း စခန်းမှူးနဲ့ နယ်ထိန်းကမေးမြန်းစုံစမ်းတာတွေ ပြုလုပ်ခဲ့သေးကြောင်း၊ ရပ်ကျေးရွေးကောက်ပွဲကော်မရှင်ဥက္ကဌတဦးက မြေလတ်အသံကို ပြောပါတယ်။

စစ်ကောင်စီခန့် ဗဟိုရွေးကောက်ပွဲကော်မရှင်က မဲနှစ်ကြိမ်ပေးသူတွေကို အမူဖွင့်ဖို့အောက်ခြေကော်မရှင်တွေကို ခိုင်းစေထားပြီး ပြစ်ဒဏ်အနေနဲ့ ထောင်ဒဏ်တနှစ် ဒါမဟုတ်ဒဏ်ငွေ တသိန်း သတ်မှတ်ထားတယ်လို့ သိရပါတယ်။