ရေစကြို၊ ဧပြီ ၄၊ ၂၀၂၅။

မကွေးတိုင်း၊ ရေစကြိုမြို့၊ အမှတ် ၃၊ ပန်းတော်တင်ရပ်ကွက်က ကုန်စုံဆိုင်ကြီးတဆိုင် မီးလောင်ပျက်စီးခဲ့တယ်လို့ ဒေသခံတွေဆီကသိရပါတယ်။

ဧပြီ ၄ ရက်ဒီညနေ ၃ နာရီလောက်မှာ ပန်းတော်တင်ရပ်ကွက်ရှိ ‘ဒေါ်ဆယ်သန်း’ ကုန်စုံဆိုင်က စတင်ပြီးမီးလောင်ခဲ့ရာ ဘေးချင်းကပ်နေအိမ် ၁ လုံးလည်း မီးကူးစက်ခဲ့တယ်လို့ ဆိုပါတယ်။

“ဒေါ်ဆယ်သန်း ဆီဆိုင်မီးလောင်တာ၊ ပေါ့ဆမီးလို့ပြောတယ်၊ အိမ်မှာတင်ရောင်းတဲ့ ဆီဆိုင်ပါ၊ သူက စားဆီကော ဒီဇယ်၊ ဓါတ်ဆီရောင်းတယ်၊ ကုန်စုံဆိုင်လည်းဖွင့်ထားတယ်၊ ဒေါ်ဆယ်သန်းအိမ်နဲ့ ဘေးကအိမ်လည်း မီးလောင်တာ၊” လို့ ဒေသခံတဦးကပြောပါတယ်။

ဒါ့အပြင်မီးလောင်နေချိန် မီးငြှိမ်းသတ်ဖို့သွားတဲ့အမျိုးသားတဦးကိုလည်း မီးလောင်တဲ့နေရာအနီးမှာ ရောက်နေတဲ့ စစ်ကောင်စီတပ်ဖွဲ့ဝင်တွေက သေနတ်နဲ့ပစ်ခတ်ခဲ့တဲ့အတွက် ဒဏ်ရာရခဲ့တယ်လို့ အထက်ပါဒေသခံကဆက်ပြောပါတယ်။

ရေစကြိုမြို့ မြို့နယ်မီးသတ်တပ်ဖွဲ့နဲ့ မြို့မဈေး အရံမီးသတ်တပ်ဖွဲ့တို့က မီးငြှိမ်းသတ်ခဲ့ကာ မီးလောင်ပြီး နာရီဝက်လောက်အကြာမှာ မီးငြှိမ်းနိုင်ခဲ့တယ်လို့ ဆိုပါတယ်။

ဒီမီးလောင်မှုအတွင်း လူထိခိုက်မှုမရှိဘဲ ငွေကျပ်သိန်း ၁၀၀ ဝန်းကျင်လောက်တော့ ဆုံးရှုံးနိုင်တယ်လို့ ဒေသခံတွေက ခန့်မှန်းထားပေမယ့် မြေလတ်အသံကသီးခြားအတည်မပြုနိုင်သေးပါဘူး။

စာတည်း – လင်း

ရေစကြို၊ မတ် ၂၅၊ ၂၀၂၅။

မကွေးတိုင်း၊ ရေစကြိုမြို့နယ်၊ ရေလယ်ကျွန်းဒေသမှာ မတ် ၂ ရက်ကနေ မတ် ၂၄ ရက်အထိ နေအိမ် ၇၀၀ ကျော်မီးရှို့ခံရပြီး တော်လှန်ရေးတပ်ဖွဲ့ဝင် ၁ ဦးနဲ့ ဒေသခံ ၁၆ ဦးအသတ်ခံခဲ့ရတယ်လို့ ရေစကြိုမြို့နယ် ပြည်သူ့ကာကွယ်ရေးအဖွဲ့ဆီက သိရပါတယ်။

ဖေဖော်ဝါရီနောက်ဆုံးပတ်လောက်မှာ ရေစကြိုမြို့နယ်ထဲကိုရောက်လာတဲ့ စစ်ကောင်စီစစ်ကြောင်းဟာ မတ် ၁ ရက်မှာ မြေစွန်းတော်ရွာကို စတင်ဝင်ရောက်ပြီးနောက် ဇရပ်နီ၊ မာလကာခြံရွာ၊ သာဂေါင်ရွာလေး၊ သာဂေါင်ရွာကြီး၊ ပန်းညို၊ မြေတော်၊ ဘိစပ်ကုန်း၊ ငသရော်၊ တောင်ကုန်း၊ ကံဦးရွာတွေကို စစ်ကြောင်းထိုးဝင်ရောက်ခဲ့ပြီးနောက် မီးရှို့ သတ်ဖြတ်ခဲ့ကြတာလို့ ဆိုပါတယ်။

“တိုက်ပွဲဖြစ်လို့ မီးရှို့တာမဟုတ်ဘူး။ ဒီကောင်တွေက ရွာတွေကိုဝင်ရင် ညဘက်ဝင်တယ်။ သေနတ်တွေ ဖောက်တယ်။ လူတွေဖမ်းတယ်။ သတ်တယ်။ မီးရှို့တယ်။ အိမ်ခြေပဲ ၇၀၀ ဝန်းကျင်လောက်ရှိပြီး။ ဒေသခံတွေသေတာလည်းရှိတယ်”လို့ ရေစကြိုမြို့နယ် ပြည်သူ့ကာကွယ်ရေးအဖွဲ့ ပြန်ကြားရေး တာဝန်ခံကပြောပါတယ်။

စစ်ကောင်စီတပ်ဖွဲ့ဝင်တွေက မီးရှို့လို့ မြေစွန်းတော်ကျေးရွာ အိမ်ခြေ ၂၆၆ လုံး၊ ဇရပ်နီကျေးရွာက အိမ်ခြေ ၆၈ လုံး၊ သာဂေါင်လေးကျေးရွာက ၂၀ လုံး၊ မြေတော်ကျေးရွာက ၂၇၂ လုံး၊ ဘိစပ်ကုန်းနဲ့ ငသရော်ကျေးရွာက တဲတိုက်အလုံး ၂၀ ခန့် စုစုပေါင်း ၆၄၆ လုံး မီးလောင်ပျက်စီးတာကို စာရင်းကောက်ယူထားနိုင်ပြီး စာရင်းမကောက်နိုင်သေးတာတွေလည်းရှိနေသေးတယ်လို့ ဆိုပါတယ်။

ဒါ့အပြင် မြေစွန်းတော်ရွာက အသက် ၃၅ ကနေ ၈၈ အရွယ် အမျိုးသား ၇ ဦး၊ အသက် ၆၀ နဲ့ ၈၆ နှစ်အရွယ်အမျိုးသမီး ၂ ဦး၊ မာလကာခြံရွာက အသက် ၅၀ နဲ့ ၇၀ အရွယ်အမျိုးသား ၂ ဦး၊ သာဂေါင်လေးရွာက ၆၅ နှစ်အရွယ်အမျိုးသား ၁ ဦး၊ သာဂေါင်(ရွာမ)က အသက် ၄၂ နှစ်နဲ့ ၉၁ နှစ်အရွယ် အမျိုုးသား ၂ ဦး၊ အသက် ၇၀ အရွယ် အမျိုးသမီး ၁ ဦး၊ အချက်အလက် အတည်မပြုနိုင်သေးတဲ့ အမျိုးသား ၁ ဦး နဲ့ ရေလယ်ကျွန်းစစ်ကြောင်းက တပ်ဖွဲ့ဝင် မျိုးစစ်သည် တို့လည်း အသတ်ခံခဲ့ရတယ်လို့ သူကဆက်ပြောပါတယ်။

စစ်ကောင်စီစစ်ကြောင်းထိုးဝင်ရောက်ခဲ့တဲ့ ကျေးရွာ ၇ ရွာနဲ့ နီးစပ်ရာကျေးရွာက စုစုပေါင်း ၁၃ ရွာက ဒေသခံပြည်သူ ၁၀,၀၀၀ ကျော် တိမ်းရှောင်နေရတယ်လို့ ဆိုပါတယ်။

မတ် ၂၅ ရက်ဒီနေ့အထိ စစ်ကြောင်းဟာ ရေစကြိုမြို့နယ်ထဲက ကံဦးနဲ့ တောင်ကုန်းရွာတို့အနီး တပ်စွဲနေတယ်လို့ သိရပါတယ်။

စာတည်း – လင်း

ရေစကြို၊ မတ် ၁၄၊ ၂၀၂၅။

မကွေးတိုင်း၊ ရေစကြိုမြို့နယ်၊ သာဂေါင်ရွာမှာအထိုင်ချနေတဲ့ စစ်ကောင်စီတပ်ဖွဲ့ဝင်တွေက ဒေသခံ ၆ ဦးကိုသတ်ဖြတ်ခဲ့ပြီး ရွာကထွက်ချိန်မှာလည်းနေအိမ်တွေကိုမီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

တပ်မ ၁၀၁ လက်အောက် အင်အား ၃၀၀ ဝန်းကျင်ပါ ခလရ ၂၅၆၊ ခလရ ၂၅၇၊ ခလရ ၂၅၈ စစ်ကြောင်းဟာ မတ် ၇ ရက်ကနေ ၁၂ ရက်အထိ သာဂေါင်ရွာမှာအထိုင်ချနေထိုင်ခဲ့ပြီး မတ် ၁၂ ရက် မနက်ပိုင်းမှာရွာကပြန်ထွက်ချိန် နေအိမ်တွေကိုမီးရှို့ခဲ့တာပါ။

စစ်ကြောင်းပြန်ထွက်သွားချိန်မှာတော့ ဒေသခံတွေက ခေါင်းဖြတ်၊ မီးရှို့သတ်ခံထားရတဲ့ အလောင်း ၆ လောင်းကိုတွေ့ခဲ့ရတာလို့ ဆိုပါတယ်။

“သူတို့ပြန်ထွက်သွားတဲ့အချိန်မှာ နှိပ်စက်ဖမ်းဆီးမီးရှို့သတ်ဖြတ်သွားတဲ့ ရုပ်အလောင်း ၆ လောင်းကိုတွေ့ရတယ်၊ သတ်တာတော့ ဘယ်အချိန်သတ်တယ်ဆိုတာတော့ မသိရဘူး၊ သူတို့ အထိုင်ချသွားတဲ့ ရက်အတွင်းမှာ အားလုံး ၆ ဦးအသတ်ခံရတယ်၊ ၁ ဦးကတော့ ခေါင်းဖြတ်ပြီးတော့ မီးရှို့ထားတယ်၊ ခေါင်းကိုတော့ အိမ်ခြံစည်းရိုးမှာ ချိတ်ထားတာ၊” လို့ ဒေသခံတဦးကပြောပါတယ်။

သာဂေါင်ရွာက အသက် ၆၅ နှစ် အရွယ် ဦးချစ်မောင်၊ အသက် ၄၂ နှစ် အရွယ် ဦးသန်းမင်းလှိုင်၊ အသက် ၉၁ နှစ် အရွယ် ဦးအုန်း၊ အသက် ၇၀ အရွယ် ဒေါ်ခင်စန်းဝေ တို့အသတ်ခံရပြီး ကျန် ၂ ဦးကတော့ လူသားဒိုင်းအဖြစ်ဖမ်းဆီးခေါ်ဆောင်လာသူတွေဖြစ်တယ်လို့ ဆိုပါတယ်။

လက်ရှိမှာ ဒေသခံတွေလည်းနေရပ်ကနေထွက်ပြေးတိမ်းရှောင်နေကြပြီး ပျက်စီးဆုံးရှုံးတဲ့ နေအိမ်အရေအတွက်ကိုတော့ အတည်မပြုနိုင်သေးဘူးလို့ သူကဆက်ပြောပါတယ်။

“အိမ်အရေအတွက်တော့ မသိရသေးဘူး၊ သူတို့ကတော့ နေအိမ်ကတွေ့သမျှပစ္စည်း အကုန်ယူတယ်၊ လက်ဝတ်လက်စား ရွှေ၊ ဖွက်ထားတဲ့ပစ္စည်းကအစ မကျန်ယူသွားကြတာ”လို့ ရေစကြိုမြို့ခံတဦးက ပြောပါတယ်။

သာဂေါင်ရွာကထွက်ခွာသွားတဲ့စစ်ကြောင်းဟာ မတ် ၁၄ ရက်ဒီနေ့မှာ မြေတော်ရွာ၊ ဘီးစပ်ကုန်းရွာက နေအိမ်တွေကို မီးဆက်ရှို့နေတယ်လို့ သိရပါတယ်။

သာဂေါင်ကျေးရွာဟာ အိမ်ခြေ ၅၀၀၊ လူဦးရေ ၂,၀၀၀ ဝန်းကျင်ရှိပြီး ဒေသခံအားလုံးနီးပါး တိမ်းရှောင်နေကြရသလို ဇရပ်နီရွာ၊ ရွှေလှံရွာ၊ မြေစွန်းတော်ရွာ၊ ဆင်ချီရာရွာ၊ သာဂေါင်ရွာ၊ နမော့ရွာ၊ မိဖုရားရွာ၊ မီးလောင်ကျွန်းရွာ တို့က ဒေသခံ ၂၀,၀၀၀ ကျော်လည်း စစ်ဘေးရှောင်နေရပြီး သူတို့အတွက် ဆေးဝါး၊ စားနပ်ရိက္ခာလို‌အပ်နေတယ်လို့ အထက်ပါဒေသခံကပြောပါတယ်။

စာတည်း – လင်း

ရေစကြို၊ မတ် ၈၊ ၂၀၂၅။

မကွေးတိုင်း၊ ရေစကြိုမြို့ကနေ ပခုက္ကူမြို့ကိုထွက်တဲ့ ယာဉ်လိုင်း ၃ လိုင်းက စပါယ်ယာ ၁၄ ဦးကို စစ်ကောင်စီတပ်ဖွဲ့ဝင်တွေက ဖမ်းဆီးထားတယ်လို့ ရေစကြိုမြို့ခံတွေဆီက သိရပါတယ်။

မတ် ၇ ရက်မှာ ‌ရေစကြိုမြို့ကနေ ပခုက္ကူမြို့ကိုထွက်တဲ့ ချင်းတွင်းဧရာ၊ သလ္လာဝတီ၊ ရွှေသလ္လာမန်း ကားလိုင်းတွေက အသက် ၂၀ နဲ့ ၃၀ ကြား စပါယ်ယာ ၁၄ ဦးကို အပြာရောင်ဝတ်စုံတွေဝတ်ထားတဲ့ ပခုက္ကူမြို့ စီမံကောင်စီနဲ့ မြို့စောင့်တပ်ဖွဲ့ဝင်တွေက ပခုက္ကူမြို့အဝင် ရွှေချောင်းတံတား၊ မြို့ပတ်လမ်း၊ မြသီတာဂိတ်နဲ့ စက်မှုဇုန်ဂိတ်တွေမှာ ဖမ်းဆီးသွားတယ်လို့ ရေစကြိုမြို့ခံတဦး ပြောပါတယ်။

“ရေစကြိုမြို့ကနေ ပခုက္ကူမြို့ကိုထွက်တဲ့ ကားက ၄ လိုင်းရှိတာ။ တနေ့ကို ကားအစီးရေ ၃၀ ကျော်လောက်ထွက်တယ်။ ပေါင်မုန့်ကားလေးတွေပါ။ မြို့မေတ္တာ၊ ရွှေသလ္လာမန်း၊ ချင်းတွင်းဧရာ၊ သလ္လာဝတီ ကားလိုင်းတွေထဲက ချင်းတွင်းဧရာ၊ သလ္လာဝတီ၊ ရွှေသလ္လာမန်း ကားတွေပေါ်က စပယ်ယာ ၁၄ ဦးကို စစ်ကောင်စီက ဖမ်းဆီးထားတယ်။”လို့ ရေစကြိုမြို့ခံတဦး ပြောပါတယ်။

စစ်ကောင်စီတပ်ဟာ စစ်ကြောင်းထွက်ရင် ဖမ်းဆီးထားတဲ့လူတွေကို ရှေ့ကသွားခိုင်းတာမျိုး လုပ်လေ့ရှိပြီး ယခုဖမ်းဆီးခံရသူလူငယ်တွေကိုလည်း မိသားစုဝင်တွေက လိုက်ရွေးတဲ့အခါမှာ ၅ ရက်အတွင်းလိုက်မရွေးဖို့ အကြောင်းပြန်ခဲ့တာကြောင့် စစ်ကြောင်းမှာအသုံးချနိုင်တယ်လို့ သူကဆိုပါတယ်။

“စစ်ကြောင်းထိုးတဲ့နေရာမှာ သူတို့ကိုလိုအပ်တဲ့နေရာမှာခိုင်းဖို့ လူသားဒိုင်းလုပ်မှာပေါ့ဗျာ။ ရေလယ်ကျွန်းဘက်ကို မနေ့က အင်အား ၁၅၀ လောက်ထပ်ဖြည့်တယ်။ ဟိုဘက်မှာ အင်အား ၂၀၀ ရှိတာကို ၁၅၀ ထပ်ဖြည့်တဲ့အခါမှာ အဲ့ဒီလူတွေကိုရှေ့ကသွားခိုင်းပြီးတော့ လူသားဒိုင်းလုပ်တာ။ သူတို့ဖမ်းထားတဲ့ လူတွေမှန်သမျှ စစ်ကြောင်းထွက်ရင် ရှေ့ကသွားခိုင်းတာ။ ၅ ရက်လောက်ခေါ်ခိုင်းပြီးရင်တော့ ပြန်လာပြီးထုတ်လို့ရတယ်တဲ့။ ၅ ရက်အတွင်းတော့ လိုက်လည်းမလိုက်နဲ့ ရွေးလည်းမရွေးနဲ့ ခေါ်လို့လည်းမရဘူးလို့ပြောတယ်။” လို့ အထက်ပါ ဒေသခံကပြောပါတယ်။

ရေစကြိုကနေ ပခုက္ကူမြို့ကိုပြေးဆွဲနေတဲ့ ယာဉ်လိုင်း ၄ လိုင်းရှိကာ တနေ့ကို ကားအစီးရေ ၃၀ ကျော်ထွက်လေ့ရှိပြီး ယခုအခါ စပါယ်ယာ ၁၄ ဦးဖမ်းဆီးခံလိုက်ရတာကြောင့် ယာဉ်လိုင်းတွေမှာ ပြေးဆွဲနေတဲ့ကားတွေ ရပ်နားထားရတယ်လို့ ဆိုပါတယ်။

ပြီးခဲ့တဲ့ မတ် ၁ ရက်ကလည်း မြေစွန်းတော်ရွာက ဒေသခံ ၁၃ ဦးကို စစ်ကောင်စီကဖမ်းဆီးသွားပြီး စစ်ကြောင်းနဲ့အတူ လူသားဒိုင်း လုပ်ခဲ့တယ်လို့ သိရပါတယ်။

စာတည်း – ကိုချမ်း

ရေစကြို၊ မတ် ၇၊ ၂၀၂၅။

မကွေးတိုင်း၊ ရေစကြိုမြို့နယ် ခလရ ၂၅၈ တပ်မှာ တာဝန်ကျနေတဲ့ စစ်ကောင်စီတပ်ဖွဲ့ဝင် ၁ ဦး သေနတ် ၁ လက်ယူပြီး ဘက်ပြောင်းခိုလှုံလာတယ်လို့ ပြည်သူ့ကာကွယ်ရေးတပ်ဖွဲ့-ရေစကြိုမြို့နယ် အဖွဲ့ဆီက သိရပါတယ်။

ဘက်ပြောင်းခိုလှုံလာတဲ့စစ်ကောင်စီတပ်ဖွဲ့ဝင်ဟာ အသက် ၂၃ နှစ်အရွယ်ရဲရင့်အောင်ဆိုသူဖြစ်ကာ ပြည်သူ့ကာကွယ်ရေးတပ်ဖွဲ့ဝင်တွေနဲ့ချိတ်ဆက်ပြီး မတ် ၅ ရက်နေ့ ည ၉ နာရီအချိန်မှာ တာဝန်ကျနေတဲ့ ခလရ ၂၅၈ တပ်ကနေ လက်နက်ယူကာ ထွက်ပြေးလာတာလို့ သိရပါတယ်။

“သူ့ကို ၂၀၂၄ နိုဝင်ဘာလလောက်မှာ ဖမ်းဆီးခံခဲ့ရတာ။ အဲ့ဒီကတဲ့ကနေ သူ့ကို စစ်မှုထမ်းဖို့ သင်တန်းပို့လိုက်တာ သူက ဟိုပုံးမှာ သင်တန်း ၈ ပတ်အကြာ တက်ခဲ့ရတယ်။ ပြီးခဲ့တဲ့ လထဲမှာ ရေစကြို ခလရ ၂၅၈ တပ်ကိုရောက်တာပါ”လို့ ပြည်သူ့ကာကွယ်ရေးတပ်ဖွဲ့ – ရေစကြိုမြို့နယ် သတင်းနှင့်ပြန်ကြားရေးတာဝန်ခံက ပြောပါတယ်။

ဘက်ပြောင်းခိုလှုံလာသူရဲရင့်အောင်ဟာ စစ်ကိုင်းနယ်ထဲကဖြစ်ကာ စစ်ကိုင်းတံတားပေါ်မှာ စစ်ကောင်စီတပ်ရဲ့ ဖမ်းဆီးတာ၊ မှတ်ပုံတင်သိမ်းဆည်းတာခံရပြီး စစ်မှုထမ်းခဲ့ရတာလို့ သိရပါတယ်။

ရဲရင့်အောင်ထွက်ပြေးလာချိန်မှာ MA 1 ၁ လက်ပါယူဆောင်လာနိုင်တာကြောင့် ပြည်သူ့ကာကွယ်ရေးတပ်ဖွဲ့-ရေစကြိုမြို့နယ်အနေနဲ့ ကျပ်သိန်း ၃၀ ချီးမြှင့်ပေးခဲ့တယ်လို့ အထက်ပါတာဝန်ခံက ပြောပါတယ်။

မကွေးတိုင်း၊ ရေစကြိုမြို့နယ်အခြေစိုက် ပြည်သူ့ကာကွယ်ရေးတပ်ဖွဲ့-ရေစကြိုမြို့နယ်အဖွဲ့ဆီကို စစ်မှုထမ်းဥပ‌ဒေနဲ့အဖမ်းဆီးခံရပြီး တာဝန်ကျရာတပ်တွေကနေ ဘက်ပြောင်းခိုလှုံလာသူ စစ်ကောင်စီတပ်ဖွဲ့ဝင် ၇ ဦးနဲ့ ဖမ်းဆီးရမိသူ ၁ ဦးရှိတယ်လို့ သိရပါတယ်။

စာတည်း – ကိုချမ်း