နတ်တလင်း၊ မေ ၉၊ ၂၀၂၅။

ပဲခူးတိုင်းအနောက်ခြမ်း၊ နတ်တလင်းမြို့နယ်မှာ စစ်ကောင်စီတပ်သတင်းပေးဆိုသူ အမျိုးသား ၁ ဦး သေနတ်ပစ်ခံရပြီးသေဆုံးသွားတယ်လို့ ဒေသခံကာ ကွယ်ရေးအဖွဲ့တွေထံက သိရပါတယ်။

သေဆုံးသူဟာ ကျွန်းလေးပင်ကျေးရွာနေထိုင်သူ အသက် ၄၅ နှစ်ဝန်းကျင် ကိုစောလှိုင် ဖြစ်ပြီး မေ ၈ ရက် ယမန်နေ့မွန်းတည့် ၁၂ နာရီခန့်မှာ သူ့ရဲ့နေအိမ်မှာပဲ သေနတ်နဲ့ပစ်ခတ်ခံရပြီး သေဆုံးသွားတာလို့ ဆိုပါတယ်။

“ သူက စစ်**တွေနဲ့ကင်းပတ်တယ်။ စစ်မှုထမ်းကြေး ရွာသူရွာသားတွေဆီက အဓမ္မလိုက်ကောက်ပေးတယ်။ ပြည်သူကို အာဏာပါဝါအရမ်းပြနေတာ။” လို့ နတ်စစ်သည်တပ်ဖွဲ့မှူး ကိုအောင်က ပြောပါတယ်။

သေနတ်နဲ့ ၄ ချက်ပစ်ခံရတာကြောင့် ကိုစောလှိုင်ဟာ နေရာမှာပဲသေဆုံးသွားပြီး ယမန်နေ့ ညနေပိုင်းမှာ ၎င်းရဲ့အလောင်းကို နတ်တလင်းဘက်ကလာတဲ့ လူနာတင်ကားနဲ့ သယ်ဆောင်သွားတယ်လို့ သိရပါတယ်။

ကိုစောလှိုင်ဟာ ရွာမှာမနေဘဲ စစ်ကောင်စီတပ်ဖွဲ့နဲ့အတူ သွားလာလှုပ်ရှားနေသူဖြစ်ပြီး ယမန်နေ့ကမှ ကျွန်းလေးပင်ရွာကိုရောက်ရှိနေကြောင်း သတင်းရတာကြောင့် နတ်စစ်သည်တပ်ဖွဲ့နဲ့ Burma Revolution Army – BRA တပ်ဖွဲ့တို့ ပူးပေါင်းလုပ်ဆောင်ခဲ့တာဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။

မေ ၄ ရက်မွန်းလွဲ ၂ နာရီလောက်မှာလည်း မင်းလှမြို့နယ်၊ ဘန့်ဘွေးကုန်းရွာနေ ပျူစောထီးဆိုသူ အသက် ၅၀ ဝန်းကျင် ဒေါ်ယူပီနဲ့ ၎င်းရဲနောက်လိုက် ကိုမြဇော်ဦးတို့ကို သာယာဝတီခရိုင် တပ်ရင်း ၃၈၀၂၊ တပ်ခွဲ ၅ က သေနတ်နဲ့ပစ်ခတ်ရာက သေဆုံးခဲ့တယ်လို့ သိရပါတယ်။

သတင်း – မောင်ဆွေအင်း၊ စာတည်း ဟိန်းစံ

ညောင်ဦး၊ ဧပြီ ၂၀၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ မြေနီကျေးရွာမှာ ကျေးရွာအုပ်ချုပ်ရေးမှူးနဲ့ သမက်ဖြစ်သူတို့ ပစ်သတ်ခံရပြီးသေဆုံးခဲ့တယ်လို့ ဒေသကာကွယ်ရေးအဖွဲ့ဝင်တဦးဆီက သိရပါတယ်။

ပစ်ခတ်ခံရသူတွေဟာ မြေနီကျေးရွာအုပ်ချုပ်ရေးမှူး အသက် ၇၀ အရွယ် ဦးရဲတင့်နဲ့ သမက်ဖြစ်သူ အသက် ၃၃ နှစ်အရွယ် ဦးဇော်မင်းမြတ်တို့ဖြစ်ပြီး ဧပြီ ၁၉ ရက် မနက် ၁ နာရီခန့်မှာ လက်နက်ကိုင်အဖွဲ့တခုက ဝင်ရောက်ပစ်ခတ်သွားတာလို့ ဆိုပါတယ်။

“ရွာထဲမှာ ဝင်ရှင်းခံရတာတော့သိတယ်။ အိမ်ခြံဝန်းထဲ ခေါ်ထုတ်ပြီးရှင်းခံရတယ်လို့ သိရတယ်။ အုပ်ကြီးကတော့ စစ်ကောင်စီခန့်အုပ်ချုပ်ရေးမှူးပဲ။”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

ဦးရဲတင့်ဟာ စစ်ကောင်စီခန့်အုပ်ချုပ်ရေးမှူးဖြစ်တာကြောင့် ပစ်ခတ်ဖို့စီစဥ်သေးပေမယ့် ကျေးရွာအပေါ် ဒုက္ခပေးတာမရှိသလို သူကြောင့်ဖမ်းဆီးခံရသူတွေလည်းမရှိတဲ့အတွက် ကျေးရွာခံတွေကတားမြစ်တဲ့အတွက် ပစ်ခတ်မှုမလုပ်ဖြစ်ခဲ့ဘူးလို့ အထက်ပါဒေသကာကွယ်ရေးအဖွဲ့ဝင်က ဆက်ပြောပါတယ်။

ဒီပစ်ခတ်မှုကို ဘယ်လက်နက်ကိုင်အဖွဲ့က လုပ်ဆောင်ခဲ့တယ်ဆိုတာကိုတော့ အတည်မပြုနိုင်သေးပါဘူး။

ဧပြီ ၆ ရက်ကလည်း ညောင်ဦးမြို့နယ်၊ ငါ့သရောက်မြို့၊ အမှတ် ၃ ရပ်ကွက်နေ ကြံခိုင်ရေးပါတီ ရပ်ကျေးဥက္ကဌတဦး နေအိမ်မှာပစ်သတ်ခံရပြီး သေဆုံးသွားသေးတယ်လို့ သိရပါတယ်။

စာတည်း – လင်း

အုတ်ဖို၊ ဧပြီ ၂၀၊ ၂၀၂၅။

ပဲခူးတိုင်းအနောက်ခြမ်း၊ အုတ်ဖိုမြို့နယ်က လက်ပစ်ဗုံးကိုင်ဆောင်တဲ့ အုပ်ချုပ်ရေးမှူး ၁ ဦးကို ဧပြီ ၂၀ ရက် ဒီနေ့မနက် ၆ နာရီကျော်လောက်မှာ သေနတ်နဲ့ပစ်ခတ်ရာသေဆုံးခဲ့တယ်လို့ မြေအောက်ပြောက်ကျားတပ်ဖွဲ့က သတင်းထုတ်ပြန်ပါတယ်။

အုတ်ဖိုမြို့အနောက်ဘက် ၁ မိုင်ခန့်အကွာ ငရှဥ့်ရိုးအုပ်စုက အသက် ၄၅ နှစ်ဝန်းကျင် အုပ်ချုပ်ရေးမှူး နိုင်ဦးကို ငရှဥ့်ရိုးရွာလယ်မှာ သေနတ်နဲ့အနီးကပ်ပစ်ခဲ့တာလို့ ဆိုပါတယ်။

“ကျည်ကုန်မခံဘူး ၁ ချက်ထဲပဲဆော်ခဲ့တာ ပွဲသိမ်းပဲ။ အုတ်ဖိုအနောက်ဘက်ကို PDF တွေ မလာရဲဘူးထင်နေတာ။ အနောက်ဘက်က အုပ်ကြီးတွေ မခန့်လေးစားနဲ့ ပြည်သူကို ရက်စက်လွန်းတယ်”လို့ မြေအောက်ပြောက်ကျားတပ်ဖွဲ့တာဝန်ခံ ရဲဘော်ဒေဝက ပြောပါတယ်။

တိုက်ခိုက်မှုအပြီးမှာပဲ အုတ်ဖိုမြို့စောင့်တပ်က စစ်သားနဲ့ ရဲအင်အား ၄၀ ဦးလောက်က အလောင်းကို ကိုနိုင်ဦးနေထိုင်တဲ့ ကျောင်းစုရွာကို ပြန်သယ်သွားတယ်လို့ ရဲဘော်ဒေဝက ဆက်ပြောပါတယ်။

ပစ်ခတ်ပြီးနောက် လက်ပစ်ဗုံး ၂ လုံး၊ မိုလ်ဘိုင်းဖုန်း ၁လုံး၊ ငွေ ၁ သိန်းကျပ် နဲ့ မှတ်ပုံတင် ၁ ခု သိမ်းဆည်းခဲ့တယ်လို့ ဆိုပါတယ်။

အုပ်ချုပ်ရေးမှူး နိုင်ဦးဟာ စစ်ကောင်စီကထုတ်ပေးထားတဲ့ သေနတ်နဲ့လက်ပစ်ဗုံးပြပြီး ပြည်သူတွေဆီက စစ်မှုထမ်းကြေးလို့ဆိုကာ ခြိမ်းခြောက်ငွေတောင်းတာ၊ လူငယ်တွေကိုအဓမ္မပေါ်တာဆွဲ ဖမ်းဆီးရုံသာမက အသက် ၆၀ ကျော်အရွယ် အမျိုးသားတွေကိုပါ ပေါ်တာဆွဲဖမ်းဆီးပြီး ခြိမ်းခြောက် ငွေညစ်တာတွေလုပ်တယ်လို့ ထုတ်ပြန်ချက်မှာဖော်ပြပါတယ်။

မြေအောက်ပြောက်ကျားတပ်ဖွဲ့အနေနဲ့ တော်လှန်ရေးတပ်ဖွဲ့တွေကို ဒုက္ခပေးနေကြတဲ့ စစ်ကောင်စီနဲ့ ထောက်တိုင်တွေကို အရှိန်မြှင့် တိုက်ခိုက်သွားမှာဖြစ်လို့ ပြည်သူတွေအနေနဲ့ ၎င်းတို့ အနီးဝန်းကျင်မှာ သွားလာနေထိုင်တာတွေ မပြုလုပ်ဖို့ကိုလည်း အသိပေးထားပါသေးတယ်။

ပြီးခဲ့တဲ့ ဧပြီ ၈ ရက် မွန်းလွဲ ၁ နာရီခွဲဝန်းကျင်ကလည်း အုတ်ဖိုမြို့နယ်၊ သရက်နှစ်ဖျားလိမ်အုပ်စု ပေါင်းတည်စုရွာက လက်ပစ်ဗုံးကိုင်ဆောင်တဲ့ ရာအိမ်မှူးဖိုးဖြူကို မြေအောက်ပြောက်ကျားတပ်ဖွဲ့က သေနတ်နဲ့ ပစ်ခတ်ရှင်းလင်းခဲ့ပါသေးတယ်။

ပုံစာ – သိမ်းဆည်းရမိသည့် လက်ပစ်ဗုံး ငွေ ၁ သိန်းကျပ်နှင့် ဖုန်း။

သတင်း – မောင်ဆွေအင်း၊ စာတည်း – လင်း

ဝက်လက်၊ ဧပြီ ၁၉၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ ရှိန်းမကားကျေးရွာအနီး ဧရာဝတီမြစ်အတွင်းမှာ ပစ်ခတ်ခံရပြီး အမျိုးသား ၁ ဦးသေဆုံးကာ ၁ ဦးဒဏ်ရာရတယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

ဧပြီ ၁၈ ရက် နေ့လယ် ၁၂ နာရီကျော်မှာ ကျေးရွာအနီး ဧရာဝတီမြစ်အတွင်းသွားလာနေတဲ့ ခရီးသည်တင်စက်လှေ ၁ စီးပေါ်က အရပ်သားတွေ ပစ်ခတ်ခံရပြီးထိမှန်သေဆုံးခဲ့တာလို့ ဆိုပါတယ်။

“စကစဘက်က သူတို့နားကပ်လာတဲ့ သံခွန်လှေကို လှမ်းပစ်တာလို့တော့ သိရတယ်။ သံခွန်လှေကိုမထိဘဲ ခရီးသည်မော်တော်ပေါ်က လူတွေကိုထိတာ။ ၁ ယောက်သေတယ်လို့တော့ သိရတယ်။”လို့ ဒေသကာကွယ်ရေးအဖွဲ့တာဝန်ရှိသူတဦးက ပြောပါတယ်။

ပစ်ခတ်မှုကြောင့် စက်လှေပေါ်မှာလိုက်ပါလာတဲ့ မတ္တရာမြို့နယ်၊ ရှင်လှကျေးရွာနေ အသက် ၃၁ နှစ်အရွယ် ကိုသန်းမြတ်စိုး ရင်ဘတ်နဲ့ပေါင်မှာ ကျည်ထိဒဏ်ရာနဲ့ နေရာမှာတင်သေဆုံးပြီး အသက် ၂၇ နှစ်အရွယ် ကိုဇင်ဝေဖြိုး ကတော့ ခြေထောက်ကျည်ထိမှန်ဒဏ်ရာရခဲ့တယ်လို့ ဆိုပါတယ်။

ကျည်ထိပြီး ထိခိုက်သေဆုံးသူတွေကိုတော့ မတ္တရာဆေးရုံကို ပို့ဆောင်ခဲ့ကြတယ်လို့ ဆိုပါတယ်။

ဒီပစ်ခတ်မှုကို ရှိန်းမကားရဲစခန်းအတွင်းက စစ်ကောင်စီတပ်ဖွဲ့ဝင်တွေက ပစ်ခတ်တာလို့ပြောပေမယ့် ဘယ်လက်နက်ကိုင်အဖွဲ့အစည်းက ပစ်ခတ်တယ်ဆိုတာကိုတော့ မြေလတ်အသံက သီးခြားအတည် မပြုနိုင်သေးပါဘူး။

ရှိန်းမကားရဲစခန်းအတွင်းက စစ်ကောင်စီအဖွဲ့တွေဟာ ဧရာဝတီမြစ်ကြောင်းအတိုင်းသွားလာနေတဲ့ ကုန်တင်လှေ၊ ခရီးသည်တင်မော်တော်၊ သံခွန်လှေ၊ ဝါးဖောင်၊ သစ်ဖောင်တွေကို ကမ်းကပ်ခိုင်းပြီး ငွေတောင်းယူလေ့ရှိတယ်လို့ သိရပါတယ်

၂၀၂၁ စစ်အာဏာသိမ်းချိန်ကနေ ၂၀၂၅ ဧပြီ ၁၁ ရက်အထိ စစ်ကောင်စီနဲ့ ၎င်းတို့ရဲ့လက်ပါးစေတွေကြောင့် သေဆုံးခဲ့တဲ့အရပ်သားပြည်သူစုစုပေါင်း ၆,၄၉၉ ဦးရှိခဲ့တယ်လို့ နိုင်ငံရေးအကျဥ်းသားများကူညီစောင့်ရှောက်ရေးအသင်း – AAPP က ထုတ်ပြန်ပါတယ်။

စာတည်း – လင်း

မင်းလှ၊ ဧပြီ ၁၂၊ ၂၀၂၅။

ပဲခူးတိုင်းအနောက်ခြမ်း၊ မင်းလှမြို့နယ်မှာ စစ်မှုထမ်းကြေးအဓမ္မကောက်တဲ့ အုပ်ချုပ်ရေးမှူး ၁ ဦးကို သေနတ်နဲ့ပစ်ခတ်ရာသေဆုံးခဲ့တယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၃ က သတင်းထုတ်ပြန်ပါတယ်။

မင်းလှမြို့နယ်၊ သင်တောကန်အုပ်စု၊ သင်တောကန်ရွာက အသက် ၅၀ နှစ်ဝန်းကျင် အုပ်ချုပ်ရေးမှူး ကြည်လှိုင်ကို ဧပြီ ၁၁ ရက် မွန်းလွဲ ၂ နာရီလောက်က စစ်ကွင်းမြို့ အနောက်ဘက်အထွက် လမ်းပေါ်မှာ သေနတ်နဲ့ ၇ ချက် ပစ်ခတ်ရှင်းလင်းခဲ့တာလို့ဆိုပါတယ်။

“သူ့ကို ရှင်းလင်းဖို့ ချောင်းနေတာကြာပြီ။ သူက ဆိုင်ကယ်နောက်မှာ မိန်းမတယောက်က အမြဲပါနေလို့ မလုပ်ရဘူး။ မနေ့ကတော့ သူကတယောက်တည်းဆိုင်ကယ်နဲ့ ရွာကိုပြန်လာတုန်း ဆော်တာ ပွဲချင်းပြီး”လို့ သာယာဝတီခရိုင် တပ်ရင်း ၃၈၀၂ တပ်ခွဲ ၃ က တာဝန်ရှိသူတဦးက ပြောပါတယ်။

အဲဒီတိုက်ခိုက်မှုကို သာယာဝတီခရိုင် တပ်ရင်း ၃၈၀၂ တပ်ခွဲ ၃ နဲ့ မင်းလှမြို့နယ်ပြည်သူ့ကာကွယ်ရေး အဖွဲ့ တို့ ပူးပေါင်းလုပ်ဆောင်ခဲ့တာလို့ ဆိုပါတယ်။

အုပ်ချုပ်ရေးမှူး ကြည်လှိုင်ဟာ ရဲဝန်ထမ်းဟောင်းတဦးလည်းဖြစ် စစ်တပ်အမာခံထောက်တိုင်ဖြစ်ပြီး တော်လှန်ရေးတပ်ဖွဲ့ဝင်တွေရဲ့သတင်းတွေကို စစ်ကောင်စီဆီကိုပေးပို့တာ၊ စစ်မှုထမ်းကြေးလစဥ် ကောက်တာ၊ လူငယ်တွေကို စစ်မှုထမ်းဖို့အတွက်စုဆောင်းတာတွေ လုပ်တဲ့အတွက် အခုလိုပစ်ခတ်တာလို့ ထုတ်ပြန်ချက်မှာပါရှိပါတယ်။

ပြီးခဲ့တဲ့ ဧပြီ ၈ ရက် မွန်းလွဲ ၁ နာရီကလည်း အုတ်ဖိုမြို့နယ် သရက်နှစ်ဖျားလိမ်အုပ်စု ပေါင်းတည်စုရွာက လက်ပစ်ဗုံးဆောင်တဲ့ ရာအိမ်မှူးတဦးကိုလည်း အုတ်ဖိုမြေအောက် ပြောက်ကျားတပ်ဖွဲ့က သေနတ်နဲ့ပစ်ခတ်လို့ သေဆုံးခဲ့ပါသေးတယ်။

သတင်း – မောင်ဆွေအင်း၊ စာတည်း – လင်း

စေတုတ္တရာ၊ ဧပြီ ၅၊ ၂၀၂၅ ။

မကွေးတိုင်း၊ စေတုတ္တရာမြို့နယ်၊ စေတုတ္တရာ-ငဖဲလမ်းပိုင်းမှာ အရပ်ဖက်ယာဉ်တွေ ပစ်ခတ်ခံရပြီး လူသေဆုံးမှုတွေရှိတယ်လို့ စစ်ကောင်စီသတင်းထုတ်ပြန်ချက်တွေနဲ့ ဒေသကာကွယ်ရေးအဖွဲ့တာဝန်ရှိသူတွေထံက သိရပါတယ်။

ဧပြီ ၃ ရက် ည ၉ နာရီကျော်မှာ ငဖဲဘက်ကနေ စေတုတ္တရာဘက်ကို အထက်ပါလမ်းအတိုင်းမောင်းနှင်လာတဲ့ အရပ်ဖက်ယာဉ် ၂ စီးဟာ အောက်ဝေါကျေးရွာအနီးမှာ ပစ်ခတ်ခံခဲ့ရတာလို့ ဆိုပါတယ်။

” စစ်ရေးအခြေနေကြောင့် အသွားအလာကန့်သတ်ထားတာတဲ့အချိန်မှာ စကစတွေယာဉ်တန်းက တက်လာတာ။ မွန်တော်တို့ ပေါက်ပင်လေးရွာဘက်ကို လာတာ။ ရန်သူကရှေ့ကပါတယ်။ ကြားထဲကသူတို့ဒေါက်တိုင်တွေ အဲဒီဘုန်းကြီးကလည်း မဘသဘုန်းကြီး။ အဲဒီမှာပစ်ကြ၊ခတ်ကြရာမှာ ထိခိုက်သွားတာ။ ကန့်သတ်ထားတဲ့အချိန်မှာ သူတို့က စကစယာဉ်တန်းနဲ့ ကပ်ပါလာတော့ ရန်သူလို့ သတ်မှတ်ခံရပြီး ပစ်ခတ်ခံရတာ။ အမှန်ဆို တော်လှန်ရေးအင်အားစုတွေနဲ့ ချိတ်(ဆက်ပြီး)တက်မယ်ဆိုရင် ခွင့်မပြုစရာမရှိပါဘူး” လို့ မင်းဘူးခရိုင်အခြေစိုက် ဒေသကာကွယ်ရေးအဖွဲ့တာဝန်ရှိသူတဦးက ပြောပါတယ်။

အဆိုပါပစ်ခတ်မှုအတွင်း စစ်ကောင်စီပညာရေးဝန်ထမ်း ၁ ဦး၊ သံဃာ ၁ ပါးသေဆုံးကာ ၇ ဦး ဒဏ်ရာရရှိထားကြောင်းသိရပြီး အသေးစိတ်ကိုတော့ စုံစမ်းနေဆဲဖြစ်တယ်လို့ ၎င်းက ဆိုပါတယ်။

ထိခိုက်သေဆုံးသူတွေက စစ်ကောင်စီနဲ့ပတ်သက်နေသူတွေ၊ ပညာရေးဝန်ထမ်းတွေဖြစ်ပြီး သေဆုံးတဲ့သံဃာတော်ကလည်း စစ်ကောင်စီထောက်ပို့၊ ပျူစောထီးသင်တန်းပေးရမှာ အကူအညီပေးသူဖြစ်ကြောင်း စုံစမ်းသိရှိထားရတယ်လို့ အဆိုပါ PDF တာဝန်ရှိသူက ပြောဆိုပေမယ့် အဲ့ဒီအချက်တွေကိုတော့ မြေလတ်အသံက သီးခြားအတည်မပြုနိုင်ပါဘူး။

စစ်ကောင်စီသတင်းထုတ်ပြန်ရေးတယ်လီဂရမ်တွေမှာတော့ ဧပြီ ၃ရက် ည ၉ နာရီ ၁၅ မိနစ်မှာ အောင်နိုင်ကုန်းရွာဘုန်းကြီးကျောင်းဆရာတော်အပါ လူ ၁၁ ဦးဟာ မကွေးမြို့ကိုဘုန်းကြီးကျောင်းအလှူအတွက် မော်တော်ယာဉ် ၂ စီးနဲ့သွားလာစဉ် အောက်ဝေါကျေးရွာအနီးအရောက်မှာ PDF တွေဘက်က မိုင်းဖောက်ခွဲပစ်ခတ်ခဲ့လို့ ၄ ဦး သေဆုံးပြီး ၇ ဦး ဒဏ်ရာရရှိတယ်လို့ ဖော်ပြကြပါတယ်။

စေတုတ္တရာမြို့နယ်အတွင်း ပြည်သူတွေအနေနဲ့ စစ်ကောင်စီစခန်းတွေ၊ ယာ​ဉ်တန်းတွေနဲ့ စစ်ကောင်စီတပ်သားတွေရဲ့ အနီးဝန်းကျင်တွေမှာ သွားလာနေထိုင်တာတွေမပြုလုပ်ဖို့၊ လမ်းပိုင်းတွေကို မနက် ၅ နာရီကနေ ည ၇ နာရီအတွင်းသာအသုံးပြုကြဖို့နဲ့ လိုက်နာမှုမရှိခဲ့လို့ ဖြစ်ပေါ်လာတဲ့အခြေအနေတွေကို တာဝန်ယူမှာမဟုတ်ကြောင်း မတ် ၁၉ ရက်မှာ စေတုတ္တရာပကဖက သတိပေးထုတ်ပြန်ထားပါတယ်။

” ကပစ ၂၀ က ဗိုလ်ကြီးကျော်စွာမင်း စစ်ကြောင်းမှူးကလည်း စစ်ကြောင်းထိုးတဲ့အခါတွေမှာ ယာဉ်တန်းတွေကြားထဲကနေ ကားလေးနဲ့လိုက်တတ်တော့ တော်လှန်ရေးအင်အားစုတွေဘက်ကလည်း ဒါကလူကြီးကားဆိုပြီးတော့ ပစ်မှတ်ထားပစ်ခတ်တာပေါ့။ ခုက မှားယွင်းပစ်ခတ်တာလို့ ပြောရမယ်။ စစ်ယာဉ်တန်းနဲ့ ကပ်ပါလာတယ်ဆိုတော့ ဒါက မလွှဲသာ၊ မရှောင်တာဖြစ်သွားတာမျိုး” လို့ အထက်ပါတာဝန်ရှိသူက ဆက်ပြောပါတယ်။

ဓာတ်ပုံ – စစ်ကောင်စီတယ်လီဂရမ်မှာဖော်ပြထားတဲ့ ပစ်ခတ်ခံခဲ့ရသည့်ယာဉ့်များ။

စာတည်း – ဟိန်းစံ