မြေလတ်အသံ၊ ဇူလိုင် ၂၂၊ ၂၀၂၅။

မကွေးတိုင်း၊ အထက်မင်းလှမြို့နယ်၊ ပုသိမ်-မုံရွာလမ်းက ကန်တုပ်စခန်းနဲ့ ငဖဲမြို့နယ်၊ နတ်ရေကန်စခန်း အနီးက စစ်ကြောင်းတွေကို တိုက်ခိုက်ခဲ့တာကြောင့် စစ်ကောင်စီတပ်ဖွဲ့ဝင် ၁၀ ဦးခန့်သေဆုံးပြီး လက်နက်၊ ခဲယမ်းတွေသိမ်းဆည်းရရှိခဲ့တယ်လို့ ဇူလိုင် ၂၁ ရက်မှာ SF/SAF ကထုတ်ပြန်ပါတယ်။

စစ်အင်အား ၃၀ ကျော်ရှိတဲ့ ကန်တုပ်စခန်းကို ဇွန် ၁၀ ရက်မှာ စီးနင်းတိုက်ခိုက်တာဖြစ်ပြီး နတ်ရေကန်စခန်းအနီးရှိ ပဇီရွာအနီးကစစ်ကြောင်းကိုတော့ မေ ၁၄ ရက်မှာ မိုင်းဆွဲ တိုက်ခိုက်ခဲ့တာလို့ ဆိုပါတယ်။

“ပဇီရွာနားက စစ်ကြောင်းကို မိုင်းဆွဲ တိုက်ခိုက်တာမှာတော့ ရန်သူဖက်က မျက်မြင် ၁ ဦးသေဆုံး ပြီးတော့ ၄ ဦးဒဏ်ရာရတာရှိတယ်။ ကန်တုပ်စခန်းကိုတိုက်တဲ့အခါမှာတော့ ရန်သူ့ဖက်က ၉ ယောက်၊ ၁၀ ယောက်လောက်တော့ကျတယ်လို့ အတွင်းသတင်းအရသိရတယ်။ ဒဏ်ရာရတဲ့သူတွေကိုတော့ သေချာအတည်မပြုနိုင်ပါ” လို့ ကျောင်းသားတပ်ဦး/ ကျောင်းသားလက်ရုံးတပ်တော် (SF/SAF) မှ အထွေထွေအတွင်းရေးမှူး-၂ ကိုနွေညိမ်းက ပြောပါတယ်။

ငဖဲမြို့နယ်၊ ပဇီရွာအနီးတိုက်ပွဲကို SF/SAF နဲ့ CDF- Asho တို့ ပူးပေါင်းတိုက်ခိုက်ခဲ့တာဖြစ်ပြီး တိုက်ပွဲအတွင်း MA-1 ၁လက်၊ ကျည်ဘောက် ၄ ဘောက်၊ ကျည်ကာဦးထုပ် ၁ လုံး၊ equip ment ၁ စုံနဲ့ ၅.၅၆ ကျည် ၈၄ တောင့်တို့ကို သိမ်းဆည်းရမိခဲ့တယ်လို့ ကိုနွေညိမ်းက ဆိုပါတယ်။

အထက်မင်းလှမြို့နယ်က ကန်တုပ်စခန်းမှာ ပုသိမ်-မုံရွာလမ်းမပေါ်မှာတည်ရှိပြီး နတ်ရေကန် ဗျူဟာကုန်းစခန်းရဲ့အရှေ့ဖက် ၃၀ ကီလိုမီတာကွာဝေးကာ ငဖဲမြို့ နယ်၊ ပဇီကျေးရွာကတော့ နတ်ရေကန် ဗျူဟာကုန်းရဲ့အရှေ့မြောက်ဘက် ၅ ကီလိုမီတာမှာတည်ရှိတာပါ။

လက်ရှိမှာ စစ်ကောင်စီတပ်က ပဇီရွာနဲ့ ဂုတ်ကြီးကျေးရွာအနီးက နေရာတွေမှာ နတ်ရေကန် ဗျူဟာကုန်းစခန်းအတွက် ကာကင်းစခန်းအနေနဲ့ စစ်အင်အားဖြည့်တင်းတာ၊ နေရာယူနေတာတွေရှိနေပြီး ကန်တုပ်ရွာမှာတော့ နေအိမ် ၂၀ ကိုမီးရှို့ကာ စခန်းလုံခြုံရေးအတွက်ဆိုပြီး ရွာခံပြည်သူတွေကို ရွာကနေအတင်းနှင်ထုတ်တာတွေပြုလုပ်နေတယ်လို့ ကိုနွေညိမ်းကပြောပါတယ်။

ဒါ့အပြင် ဇူလိုင် ၈ ရက်မှာ စစ်ကောင်စီတပ်က စစ်အင်အား ၂၀၀ ကျော်နဲ့ ပုသိမ်-မုံရွာလမ်းအနီးရှိ ငဖဲမြို့နယ်၊ ကျောက်ဆုံကျေးရွာကို စစ်ကြောင်းထိုးကာ နေအိမ် ၇ လုံးကို မီးရှို့ပြီး အသက် ၂၅ နှစ်အရွယ်အမျိုးသမီး ၁ ဦးနဲ့ အသက် ၄၀ အ ရွယ် အမျိုးသား ၁ ဦးကို သတ်ဖြတ်ကာ နေအိမ်တွေနဲ့ အတူ မီးရှို့ထားခဲ့တယ်လို့ ကိုနွေညိမ်းက ဆိုပါတယ်။

အထက်မင်းလှ၊ ပဒါန်းနဲ့ ငဖဲမြို့နယ်အနီးရှိ ပုသိမ်-မုံရွာလမ်းမကြီးတလျောက်ကို စစ်ကောင်စီတပ်က စစ်ကြောင်းထိုးတာတွေ တောက်လျောက်လုပ်ဆောင်နေတဲ့အတွက် ဇူလိုင် ၂၂ ရက်ဒီကနေ့အထိ တိုက်ပွဲတွေဖြစ်ပွားလျှက်ရှိနေတယ်လို့သိရပါတယ်။

စာတည်း – လင်း

မြေလတ်အသံ၊ ဇွန် ၁၃၊ ၂၀၂၅။

မကွေးတိုင်း၊ ငဖဲမြို့နယ်အပိုင် အမ်း-ပဒါန်းလမ်းရှိ နတ်ရေကန်တောင်ဗျူဟာကုန်းစခန်းကနေ ထွက်ပြေးလာတဲ့ စစ်ကောင်စီတပ်သား ၂၃ ဦးကိုဖမ်းမိထားတယ်လို့ ချင်းကာကွယ်ရေးတပ် – အရှို (CDF – Asho)ဆီက သိရပါတယ်။

အဆိုပါ ၂၃ ဦးကို ဇွန် ၈ ရက်ကနေ ဇွန် ၁၂ ရက်အတွင်းဖမ်းမိခဲ့တာဖြစ်ပြီး နတ်ရေကန် လေကြောင်းရန်ကာကွယ်ရေးတပ်စခန်း (ဗျူဟာကုန်း)အနီး မီတာ ၁၅၀၀ ပတ်လည် နတ်ရေကန်လမ်းဟောင်းကို ဖြတ်တောက်တိုက်ခိုက်ရေးလုပ်ဆောင်နေစဉ် ဖမ်းမိခဲ့တာလို့ဆိုပါတယ်။

“ကျနော်တို့ ဖမ်းဆီးရမိတဲ့သူတွေကိုတော့ သူတို့သွားလိုရာနေရာတွေကို တန်းပြီးတော့ပို့ဆောင်ပေးတာကိုတော့ ဘယ်တော့မှမလုပ်ပါဘူး။ ဒီလိုပဲစစ်သုံ့ပန်းအတိုင်းပဲ ဖမ်းဆီးချုပ်နှောင်ထားမှုမျိုး လုပ်ထားပါတယ်”လို့ ချင်းကာကွယ်ရေးတပ် – အရှိုမှ တာဝန်ခံ ဆလိုင်းရိုးချင်းက ပြောပါတယ်။

ဖမ်းခံထားရသူတွေဟာ စစ်မှုထမ်းဥပဒေနဲ့ အဓမ္မပေါ်တာဆွဲခံရပြီးနောက် စစ်မှုထမ်းနေရသူတွေဖြစ်တယ်လို့သိရပြီး သူတို့ဆီကနေ MA 1 ၅ လက်၊ MA 3 ၃ လက်နဲ့ ခဲယမ်းအချို့ သိမ်းဆည်းရမိခဲ့တယ်လို့ ဆလိုင်ရိုးချင်းက ဆိုပါတယ်။

အလားတူ နတ်ရေကန်ဗျူဟာကုန်းစခန်းမှ ရှေ့တန်းကာကင်းတာဝန်ထမ်းဆောင်နေချိန် ထွက်ပြေးလာတဲ့ စစ်ကောင်စီတပ်သား ၃ ဦးကိုလည်း လက်နက်ခဲယမ်းတွေနဲ့အတူ ဇွန် ၄ ရက်မှာ ချင်းကာကွယ်ရေးတပ် – အရှိုက ဖမ်းမိခဲ့သေးတယ်လို့ သိရပါတယ်။

စစ်ကောင်စီတပ်မ ၈၈ နဲ့ ၉၉ တပ်တွေ အထိုင်ချထားတဲ့ နတ်ရေကန်ဗျူဟာကုန်းကို အာရက္ခတပ်တော်-AAနဲ့ ပူးပေါင်းတပ်ဖွဲ့တွေက ထိုးစစ်ဆင်တိုက်ခိုက်နေပြီး ဇွန် ၁၂ ရက်နဲ့ ၁၃ ရက်တွေမှာ ထိတွေ့တိုက်ပွဲတွေဖြစ်ပွားခဲ့တယ်လို့ သိရပါတယ်။

စာတည်း – လင်း

ငဖဲ၊ ဖေဖော်ဝါရီ ၂၆၊ ၂၀၂၅။

မကွေးတိုင်း၊ ငဖဲမြို့နယ်၊ အမ်း-ပဒါန်းလမ်းပိုင်းရှိ နတ်ရေကန်ကာကင်းစခန်းတွေကနေ ထွက်ပြေးလာတဲ့ စစ်ကောင်စီတပ်ဖွဲ့ဝင် ၂၃ ဦး ကို အရှင်ဖမ်းမိထားတယ်လို့ Chin Defence Force-Asho ချင်းကာကွယ်ရေးတပ်-အရှိုက ဒီကနေ့ ဖေဖော်ဝါရီ ၂၆ ရက်မှာ ထုတ်ပြန်ပါတယ်။

ဖေဖော်ဝါရီ ၂၄ ရက်ကနေ ၂၆ ရက်အထိ ၃ ရက်တာအတွင်း နတ်ရေကန် ဆက်သွယ်ရေးတာဝါတိုင်ရဲ့မြောက်ဘက် မီတာ ၂,၀၀၀ ခန့်အကွာ တောတွင်းနေရာအသီးသီးတွေကနေ စစ်ကောင်စီတပ်သား ၂၃ ဦးကို လက်နက်ခဲယမ်းတွေနဲ့အတူ ဖမ်းဆီးမိခဲ့တယ်လို့ ဆိုပါတယ်။

စစ်ကောင်စီတပ်သား ၂၃ ဦးထံကနေ MA 1 ၁၃ လက်၊ MA 2 ၁ လက်၊ MA 3 ၃ လက်၊ MA 11 ၂ လက်၊ MA 5 ၁ လက်၊ စုစုပေါင်း လက်နက်ငယ် ၂၀ လက်၊ လက်ပစ်ဗုံး ၁၈ လုံး၊ အီနာဂါ ဗုံးသီး ၁၂ လုံး၊ လက်နက်ငယ် ကျည်မျိုးစုံ ၄,၀၀၀ ကျော်နဲ့ အခြားစစ်အသုံးအဆောင်ပစ္စည်းတွေ သိမ်းဆည်းရမိခဲ့တယ်လို့ ဖော်ပြပါတယ်။

နတ်ရေကန်ဒေသအနီးတဝိုက်အတွင်း တာဝန်ထမ်းဆောင်နေတဲ့ စစ်ကောင်စီတပ်ဖွဲ့ဝင်တွေအနေနဲ့ တော်လှန်ရေးတပ်ဖွဲ့ဝင်တွေနဲ့ ချိတ်ဆက်ပြီးပူးပေါင်းကြဖို့လည်း ထုတ်ပြန်ချက်မှာ တိုက်တွန်းထားပါတယ်။

ပြီးခဲ့တဲ့ ဖေဖော်ဝါရီ ၂၂ ရက်ကလည်း နတ်ရေကန်လေကြောင်းရန်ကာကွယ်ရေးတပ်ကနေ လက်နက်ခဲယမ်းတွေသယ်ဆောင်လာပြီး ဆုတ်ခွာလာတဲ့ အင်အား ၁၀၀ ကျော်ပါ စစ်ယာဉ်တန်း ၄ စီးကို Chin Defence Force-Asho က ကြားဖြတ်တိုက်ခိုက်ခဲ့ရာ စစ်ကောင်စီဘက်က ၇ ဦးသေဆုံးခဲ့ပါသေးတယ်။