မြေလတ်အသံ၊ ဒီဇင်ဘာ ၁၃၊ ၂၀၂၄။

ဒီဇင်ဘာ ၁၃ ရက် သောကြာနေ့ညမှာ ကျင်းပတဲ့ ONE Friday Fights 91 ပြိုင်ပွဲမှာ ဒုခေါင်ပွဲအဖြစ်ထိုးသတ်ခွင့်ရခဲ့တဲ့ မွန်ဖိုက်တာဆွန်ရက်ဟာ ပြိုင်ဘက်ဖြစ်သူ ထိုင်းနိုင်ငံသား ပက်ဝီချစ်ကို အမှတ်အဆုံးအဖြတ်နဲ့ အနိုင်ရရှိခဲ့ပါတယ်။ 

ပထမအချီအစမှာပဲ ဆွန်ရက်ဟာ ဘက်ခြေကန်ချက်ကိုစတင်အသုံးပြုခဲ့ပြီး ပက်ဝီချစ်ကလည်း ခြေကန်ချက်နဲ့ပြန်လည်တုံ့ပြန်ခဲ့ပါတယ်။ ပထမအချီမှာ နှစ်ယောက်စလုံးသတိထားကစားနေကြပြီး ပက်ဝီချစ်ရဲ့ကန်ချက်တွေက ပိုထိရောက်တာကိုတွေ့ရကာ အရပ်နဲ့လက်တံကွာဟချက်က ဆွန်ရက်အတွက် အနည်းငယ်အခက်တွေ့စေခဲ့တယ်လို့ ယူဆရပါတယ်။ ဒါကြောင့် အနိမ့်ကန်ချက်နဲ့ ဘယ်ညာတွဲလုံးတွေကို အားပြုကစားခဲ့ပြီး ပက်ဝီချစ်ကလည်း တံတောင်ရိုက်ချက်ကိုအသုံးပြုခဲ့တာတွေ့ရပါတယ်။

ဒုတိယအချီမှာတော့ ပက်ဝီချစ်ဟာ ညာခြေကန်ချက်ကိုအားပြုလာခဲ့ပြီး ဆွန်ရက်ကိုအနားကပ်မခံဖို့ကြိုးစားခဲ့ပါတယ်။ ဆွန်ရက်က အခွင့်ကောင်းစောင့်ရင်း အနိမ့်ကန်ချက်နဲ့ ဘယ်ညာတွဲလုံးကိုပဲ ထိရောက်အောင် အသုံးပြုသွားတာကြောင့် ပက်ဝီချစ်ဒေါသထွက်ပြီး ရှေ့တိုးလာချိန် ပက်ဝီချစ်ရဲ့ခါးလည်ကိုဖြတ်ကန်တာနဲ့ လူချင်းပူးလာရင် တံတောင်ရိုက်တာကိုပါ သေချာအသုံးပြုသွားပါတယ်။ 

တတိယအချီမှာတော့ နှစ်ယောက်စလုံးကပွဲကိုဖြတ်ဖို့ကြိုးစားလာကြပြီး ဆိုင်ထိုးပြိုင်ထိုးလုပ်လာကြကာ ဆွန်ရက်က အမြင့်ကန်ချက်တွေကိုပါအသုံးပြုလာပါတယ်။ ဆွန်ရက်ရဲ့ဘယ်လက်သီးချက်တွေက ထိရောက်ခဲ့ပြီး ပက်ဝီချစ်ကတော့ အတင်းဖိထိုးရင်း လက်သီးချက်တွေအလေအလွင့်များတာကြောင့် တံတောင်ရိုက်ချက်ကိုတွဲသုံးခဲ့ပါတယ်။ ဒါပေမယ့်လည်း ဆွန်ရက်ရဲ့ ဘယ်ညာတွဲလုံးတွေ ဆက်တိုက်ထိသွားတာကြောင့် ပြိုင်ပွဲအပြီးမှာတော့ ဒိုင်တွေရဲ့ဆုံးဖြတ်ချက်နဲ့ ပက်ဝီချစ်ဟာ ရှုံးနိမ့်သွားပါတယ်။ 

ဆွန်ရက်ဟာ ဒီပွဲနိုင်လိုက်တာကြောင့် ထိုင်းဖိုက်တာတွေကို ဆက်တိုက်ရှုံးထားတဲ့အခြေအနေကနေ ရုန်းထွက်နိုင်ခဲ့ပြီဖြစ်သလို ONE ရဲ့ဒေါ်လာ ၁ သိန်းတန်စာချုပ်ကိုလည်း မျှော်လင့်လို့ရပြီဖြစ်ပါတယ်။ 

Photo – SS from One Championship Live

မြေလတ်အသံ၊ ဒီဇင်ဘာ ၁၃၊ ၂၀၂၄။

ဒီဇင်ဘာ ၁၃ ရက်၊ ဒီနေ့ညမှာ ကျင်းပသွားမယ့် One Friday Fights 91 မှာ မွန်ဖိုက်တာဆွန်ရက် ပါဝင်ထိုးသတ်သွားမှာ ဖြစ်ပါတယ်။ 

၂၀၂၄ ခုနှစ်အတွင်း ထိုးသတ်ခဲ့တဲ့ပွဲတွေမှာ ရှုံးပွဲမရှိသေးဘဲ ၃ ပွဲဆက်နိုင်ထားတဲ့ဆွန်ရက်ဟာ ဒီပွဲမှာတော့ ထိုင်းဖိုက်တာ ပက်ဝီချစ် နဲ့ ယှဉ်ပြိုင်ထိုးသတ်သွားရမှာဖြစ်ပြီး သူတို့ပွဲကို ဒုခေါင်ပွဲအဖြစ်သတ်မှတ်ထားပါတယ်။ 

ပက်ဝီချစ်ကတော့ အသက် ၂၃ နှစ်အရွယ်ကစားသမားတဦးဖြစ်ပြီး One ရဲ့မှတ်တမ်းတွေအရ ၆ ပွဲထိုး၊ ၃ ပွဲနိုင် ၃ ပွဲရှုံးရလဒ်ပိုင်ဆိုင်ထားကာ နောက်ဆုံးပွဲ ၂ ပွဲဆက် ရှုံးနိမ့်ထားတာကိုတွေ့ရပါတယ်။ သူဟာ ဘယ်ညာလက်သီးတွဲလုံးတွေထွက်သလို ညာလက်သီးထိုးချက်ကိုအားကိုးအသုံးပြုတာတွေ့ရပြီး ဆွန်ရက်ထက် အရပ်နဲ့လက်တံ ပိုရှည်ပါတယ်။ အမြင့်ကန်ချက်တွေ့ရနည်းပြီး လူချင်းပူးကပ်ချိန်မှာ မွေထိုင်းဖိုက်တာတွေရဲ့တံတောင်ရိုက်ချက်မျိုး သူ့မှာသိပ်မတွေ့ရတာတော့ အားနည်းချက်တွေဖြစ်လာနိုင်ပါတယ်။ 

ဆွန်ရက်ကတော့ ၂၀၂၄ ဟာ သူ့ရဲ့နှစ်လို့ပြောရလောက်အောင် အစွမ်းပြထားနိုင်ပြီး ရလဒ်ကောင်းတွေကြောင့် ဒီပွဲကိုလှလှပပနဲ့နိုင်ခဲ့ရင် ဒေါ်လာ ၁ သိန်းတန်စာချုပ်ကိုမျှော်လင့်ခွင့် ရလာနိုင်ပါတယ်။ ဒါပေမယ့် One ရဲ့မှတ်တမ်းတွေအရ ၂၀၂၃ ခုနှစ်အတွင်းက ပြိုင်ပွဲတွေမှာ ထိုင်းဖိုက်တာတွေကို ၄ ပွဲဆက်ရှုံးနိမ့်ထားတာကြောင့် သတိထားကစားသွားဖို့လိုပါမယ်။ ဘယ်ခြေ၊ ဘယ်လက်အားပြုကစားတဲ့ ဆွန်ရက်ဟာ အနိမ့်ကန်ချက်ခပ်ပြင်းပြင်းကိုပိုင်ဆိုင်ထားပြီး အနီးကပ်တံတောင်ရိုက်ချက်တွေကိုလည်း အသုံးချတတ်သူဖြစ်ပါတယ်။ သူ့ရဲ့အားနည်းချက်ဖြစ်တဲ့ လက်သီးတွဲလုံးနဲ့ ခြေကန်ချက်အထွက်လေးတာကို ပြင်ဆင်လာနိုင်မလား၊ သူ့ထက် အရပ်နဲ့လက်တံအားသာတဲ့ပြိုင်ဘက်ကို ဘယ်လိုထိန်းချုပ်ဖို့ကြိုးစားလာမလဲဆိုတာ ဒီပွဲမှာကြည့်ရပါတော့မယ်။ 

ဆွန်ရက် ပါဝင်ယှဉ်ပြိုင်ထိုးသတ်သွားမယ့် ONE Friday Fights 91 ပွဲစဉ်တွေကို ဒီဇင်ဘာ ၁၃ ရက်၊ သောကြာနေ့ ဒီနေ့ ညနေ ၇ နာရီအချိန်မှာ စတင်ကျင်းပသွားမှာဖြစ်ပါတယ်။ 

Photo – One Lumpinee FC.

မြေလတ်အသံ၊ အောက်တိုဘာ ၂၅၊ ၂၀၂၄။

အောက်တိုဘာ ၂၅ ရက်၊ ဒီနေ့ညပိုင်းမှာကျင်းပတဲ့ One Friday Fights 84 မှာ မြန်မာဖိုက်တာတွေဖြစ်တဲ့ “အဲမွီ”နဲ့ “ဆွန်ရက်”တို့ ပါဝင်ထိုးသတ်ခဲ့ပြီး ၁ ဦးအနိုင်ရရှိခဲ့ကာ ၁ ဦးရှုံးနိမ့်ခဲ့ပါတယ်။ 

မြန်မာကစားသမား ၂ ဦးမှာ ပထမဆုံးထိုးသတ်ရတဲ့ဖိုက်တာကတော့ ဆွန်ရက်ဖြစ်ပါတယ်။ 

ဆွန်ရက်နဲ့ ယူကီကာဆာဟာရာတို့ပွဲမှာ ဆွန်ရက်က သူ့ပုံစံအတိုင်း အနိမ့်ကန်ချက်တွေနဲ့စတင်ခဲ့ပြီး ‌ဖြေးဖြေးမှန်မှန်ချဉ်းကပ်ရင်း ထိုးပါတယ်။ ကာဆာဟာရာကတော့ အစပိုင်းမှာ သွက်လက်ခဲ့ပေမယ့် ဆွန်ရက်ရဲ့ညာထောက်လက်သီးထိပြီးချိန်မှာတော့ အတင်းတိုးဝင်ထိုးကာ လူချင်းပူးကပ်သွားရင်လည်း ဆွန်ရက်ရဲ့တံတောင်ရိုက်ချက်တွေ မ‌ရှောင်နိုင်တာကြောင့် ဆွဲလှဲဖို့ကိုသာကြိုးစားပါတော့တယ်။ 

ပထမအချီပြီးခါနီးမှာ ထွက်လာတဲ့ဆွန်ရက်ရဲ့ဘယ်ဝိုက်လက်သီးဟာ ဂျပန်ကစားသမားမေးရိုးကို တည့်တည့်ထိမှန်ပြီး အမှတ်စဉ်ရေတွက်ခံရပါတယ်။ ဒုတိယအချီမှာလည်း ဆွန်ရက်အသာရပြီး ဂျပန်ကစားသမားရဲ့ထိုးချက်ကန်ချက်တွေဟာမထိရောက်ဘဲ ဥပဒေပကစားတာမျိုးအထိ အခြေအနေဆိုးသွားပါတယ်။ 

တတိယအချီမှာပါ ဆွန်ရက်ရဲ့ ထောက်လက်သီးတွေ၊ လူချင်းပူးကပ်ချိန် တံတောင်ရိုက်ချက်တွေဟာ ကောင်းမွန်တိကျခဲ့ပြီး ပူးကပ်ချုပ်လှဲဖို့ကြိုးစားနေတဲ့ ဂျပန်ကစားသမားကတော့ ဒုတိယအကြိမ် အမှတ်စဉ်ရေတွက်ခံလိုက်ရပါတော့တယ်။

ပွဲအပြီးမှာတော့ ဒိုင်တွေအားလုံးရဲ့တညီတညာတည်း အနိုင်ပေးမှုနဲ့အတူ ဆွန်ရက်ဟာ ပွဲကိုအနိုင်ရရှိ သွားပါတယ်။

အဲမွီနဲ့ အိုမာကင်တပ်တို့ပွဲမှာတော့ အဲမွီဟာ ဘယ်ဝိုက်လက်သီးနဲ့စသလို အိုမာကတွဲလုံးတွေ ပြန်လာပါတယ်။ အဲမွီဟာ ပြိုင်ဘက်ရဲ့ခန္ဓာကိုယ်အကာကွယ်မဲ့မှုကိုအခွင့်ကောင်းယူနိုင်ပြီး ဘယ်ဝိုက်လက်သီး ညာထောက်လက်သီးအပြင် အမြင့်ကန်ချက်အချို့ကိုပါ အသုံးပြုခဲ့ပါတယ်။ ပထမအချီမှာ အိုမာအတွက်ကစားတဲ့ပုံစံပါပြောင်းခဲ့ရပြီး ဘယ်ခြေအမြင့်ကန်ချက်တွေကို ပြောင်းသုံးခဲ့ရကာ အဲမွီကိုထိအောင် ကန်နိုင်ခဲ့ပါတယ်။ 

ဒုတိယအချီမှာလည်း အဲမွီနဲ့အိုမာဟာ သူတို့အသာရထားတဲ့ ကစားပုံတွေနဲ့ပဲ ဆက်လက်တိုက်ခိုက်ခဲ့ပါတယ်။ ဒုတိယအချီပြီးခါနီးမှာတော့ အိုမာဟာတိုက်စစ်ပိုဖွင့်လာခဲ့ပြီး ဖိအားပေးထိုးသတ်နိုင်ခဲ့သလို လူချင်းပူးကပ်ချိန်မှာတော့ တံတောင်ရိုက်ချက်တွေကို အပြန်အလှန်အသုံးပြုခဲ့ကြပြီး အိုမာရဲ့တံတောင်ရိုက်ချက်တွေက ပိုပြီးထိရောက်တာကို တွေ့ရပါတယ်။ 

တတိယအချီမှာတော့ အိုမာဟာတိုက်စစ်ပိုဖွင့်လာခဲ့ပြီး ဒူးတိုက်ချက်တွေ၊ ပတ်တံတောင်ရိုက်ချက်တွေနဲ့အတူ ကစားပုံစုံစုံလင်လင်နဲ့ အသာသီးရအောင်ကစားသွားခဲ့ပြီး အဲမွီကတော့ကစားပုံပြောင်းလဲနိုင်ခြင်းမရှိဘဲ ပုံမှန်အတိုင်းပဲထိုးသတ်နေကာ သတ်လုံကျသွားပုံလည်း တွေ့ရပါတယ်။  

ပွဲအပြီးမှာတော့ ထိုးသတ်ပုံစုံလင်ထိရောက်တဲ့ အိုမာကို ဒိုင်တွေအားလုံးက အနိုင်ပေးခဲ့ပါတယ်။

One Friday Fights 84 မှာ ပါဝင်ယှဉ်ပြိုင်ခဲ့တဲ့မြန်မာကစားသမား ၂ ဦးမှာတော့ ဆွန်ရက်အနိုင်ရခဲ့ပြီး အဲမွီကရှုံးနိမ့်ခဲ့ပါတယ်။ သူတို့နှစ်ဦးစလုံးဟာ ကစားပုံကောင်းမွန်တဲ့ ကစားသမားတွေဖြစ်တာကြောင့် နောက်ထပ်ပွဲတွေ မကြာခင်မှာပြန်တွေရမယ်လို့ထင်ပါတယ်။

Photo – SS from OneFridayFightsLive

s 

မြေလတ်အသံ၊ အောက်တိုဘာ ၂၅၊ ၂၀၂၄။

အောက်တိုဘာ ၂၅ ရက်၊ ဒီနေ့ညပိုင်းမှာကျင်းပသွားမယ့် One Friday Fights 84 မှာ မြန်မာဖိုက်တာတွေဖြစ်တဲ့ “အဲမွီ”နဲ့ “ဆွန်ရက်”တို့ ပါဝင်ထိုးသတ်သွားကြမှာပါ။ 

အဲမွီဟာ One Friday Fights မှာ ဒုတိယမြောက်ပွဲကိုကစားမှာဖြစ်ပြီး သူ့ရဲပြိုင်ဘက်ကတော့ ဂမ်ဘီယာနဲ့ဆွစ်ဇာလန်နိုင်ငံနှစ်ခုကို ကိုယ်စားပြုကစားတဲ့ အိုမာကင်တပ်ဖြစ်ကာ ဖလိုင်းဝိတ်တန်းမှာ ထိုးသတ်သွားကြမှာပါ။ 

အဲမွီနဲ့အိုမာတို့ဟာ ပထမပွဲတွေမှာ ပြိုင်ဘက်တွေကိုအနိုင်ရပြီး ဘောနပ်စ်တွေရယူထားကြသူတွေ ဖြစ်ပါတယ်။ အသက် ၂၂ နှစ်အရွယ်ကစားသမားတွေဖြစ်ပြီး အိုမာကတော့ အရပ်အနည်းငယ်ပိုရှည်ကာ လက်တံထိရောက်မှုမှာတော့ အဲမွီကပိုသာတာကို တွေ့ရပါတယ်။ 

အိုမာဟာ ဘယ်ညာလက်သီးတွဲလုံးတွေကောင်းမွန်တဲ့ဖိုက်တာတယောက်ဖြစ်ပြီး နောက်မဆုတ်တမ်း ထိုးသတ်တတ်သူဖြစ်ပါတယ်။ ခြေကန်ချက်အသုံးပြုမှုနည်းပြီး မွေထိုင်းနည်းစနစ်ကြေညက်ပေမယ့် သူ့ရဲ့အားနည်းချက်ကတော့ ခန္ဓာကိုယ်အောက်ပိုင်း အကာအကွယ်လွတ်နေတတ်တာ ဖြစ်ပါတယ်။ 

အဲမွီကတော့ ဘယ်ခြေအနိမ့်ကန်ချက် ညာထောက်လက်သီးတို့နဲ့ ပြိုင်ဘက်ကိုဖိအားပေးတတ်ကာ ရုတ်တရက်ထုတ်သုံးတဲ့ ဘယ်ဝိုက်လက်သီးက အားပါပြင်းထန်တာကိုတွေ့ရပြီး ပြိုင်ဘက်ကို တိုက်စစ်ဆင်ထိုးသတ်ရတာကို အားသန်သူဖြစ်ပါတယ်။ 

ဒီပွဲဟာ တိုက်စစ်ကစားသမားနှစ်ယောက်တွေ့တဲ့ပွဲဖြစ်တာကြောင့် ကြည့်ကောင်းမယ့်ပွဲတပွဲဖြစ်မှာ သေချာပြီး ဘယ်သူက ဘယ်သူ့ရဲ့အားနည်ချက်ကိုအသုံးချပြီးအနိုင်ရသွားမလဲဆိုတာ စောင့်ကြည့်ရပါမယ်။ 

ဒီနေ့ညမှာထိုးသတ်သွားမယ့် နောက်ထပ်မြန်မာဖိုက်တာ အသက် ၂၇ နှစ်အရွယ် ဆွန်ရက်ကတော့ ထိုင်းနိုင်ငံမှာနေထိုင်ပြီး One Friday Fights ပွဲတွေတော်တော်များများထိုးသတ်ဖူးကာ ၄ ပွဲဆက်တိုက်ရှုံးပြီးမှ နိုင်ပွဲ ၂ ပွဲဆက်တိုက်ရယူကာ ဘောနပ်စ်တွေလည်းရရှိထားသူဖြစ်ပါတယ်။

ဆွန်ရက်ဟာ ဘယ်ခြေအနိမ့်ကန်ချက်အားပါပြင်းထန်ပြီး ဘယ်ထောက်လက်သီးနဲ့ အနီးကပ်တံတောင်ရိုက်ချက်တွေကို ကောင်းကောင်းအသုံးပြုနိုင်ပါတယ်။ သူ့ရဲ့အားနည်းချက်ကတော့ လက်သီးတွဲလုံးတွေနဲ့ ခြေကန်ချက်တွေ အနည်းငယ် အထွက်လေးတာ ဖြစ်ပါတယ်။

သူ့ရဲ့ပြိုင်ဘက်ကတော့ အသက် ၂၃ နှစ်အရွယ် ဂျပန်နိုင်ငံသား ယူကီကာဆာဟာရာဖြစ်ပြီး ဆွန်ရက်ထက် အရပ်အမောင်းနဲ့ လက်တံထိရောက်မှု အားသာပါတယ်။ ဘယ်ခြေအနိမ့်ကန်ချက်ရော အမြင့်ကန်ချက်ပါ ထုတ်သုံးနိုင်ပြီး တိုက်စစ်ဆင်ကစားတတ်တဲ့ဖိုက်တာဖြစ်ကာ ဆွန်ရက်ထက် အနည်းငယ်ပိုသွက်တာကိုလည်း တွေ့ရပါတယ်။ 

အဲမွီနဲ့ ဆွန်ရက်တို့ ပါဝင်ယှဉ်ပြိုင်ထိုးသတ်သွားမယ့် ONE Friday Fights 84 ပွဲစဉ်တွေကို အောက်တိုဘာ ၂၅ ရက်၊ သောကြာနေ့ ဒီနေ့ ညနေ ၇ နာရီအချိန်မှာ ကျင်းပသွားမှာဖြစ်ပြီး One Championship ရဲ့ Facebook Page နဲ့ Youtube Channel တို့မှာ ကြည့်ရှုနိုင်မှာပါ။ 

Photo – One Lumpinee FC