မန္တလေး၊ ဧပြီ ၁၉၊ ၂၀၂၅။
စစ်ကိုင်းတိုင်း၊ အင်းတော်မြို့သိမ်းတိုက်ပွဲကပြန်လာတဲ့ စစ်ဒေသ (၁) ပြင်ဦးလွင်ခရိုင် တပ်ရင်း ၅၀၉၊ တပ်ရင်း ၅၁၀၊ တပ်ရင်း ၅၁၂၊ ပြင်ဦးလွင်ခရိုင်တပ်ရင်း ၁ နဲ့ တပ်ရင်း ၂ တို့ကို ဒေသခံပြည်သူတွေက ကြိုဆိုခဲ့ကြတယ်လို့ တပ်ရင်း ၅၁၂ ဆီကသိရပါတယ်။
အဆိုပါတပ်ရင်း ၅ ရင်းကတပ်ဖွဲ့ဝင်တွေဟာ အင်းတော်မြို့ကနေ မိခင်တပ်ရင်းကို ပြန်ချိန် ဧပြီ ၁၇ ရက်မှာ လမ်းတလျှောက်ရှိဒေသခံပြည်သူတွေက ကြိုဆိုခဲ့တာလို့ ပြင်ဦးလွင်ခရိုင် တပ်ရင်း ၅၁၂ တာဝန်ရှိသူတဦးက ပြောပါတယ်။
၇ လကျော်ကြာခဲ့တဲ့ အင်းတော်မြို့သိမ်းတိုက်ပွဲအတွင်းမှာ တပ်ရင်း ၅၁၂ က တပ်ဖွဲ့ဝင် ၄ ဦးကျဆုံးခဲ့တယ်လို့လည်းသူကဆက်ပြောပါတယ်။
မိခင်တပ်ရင်းဆီပြန်လာတဲ့ တပ်ရင်း ၅၁၂ က တပ်ဖွဲ့ဝင်တွေကိုပြည်သူတွေက ကြိုဆိုနေတဲ့ ရုပ်သံအတွင်းမှာလည်း ကျဆုံးတပ်ဖွဲ့ဝင် ၄ ဦးရဲ့ ဓာတ်ပုံတွေကို ကိုင်ဆောင်ကာ ဂုဏ်ပြုခံနေကြတာကိုလည်း တွေ့ရပါတယ်။
အင်းတော်မြို့က ရဲစခန်း၊ ထွေအုပ်ရုံးနဲ့ မြို့တွင်းရှိစစ် ကောင်စီကင်းစခန်းတွေကို တော်လှန်ရေးတပ်ဖွဲ့တွေက ၂၀၂၄ ဩဂုတ် ၂၄ ရက်မှာသိမ်းပိုက်နိုင်ခဲ့တာဖြစ်ပြီး ၇လကျော်အကြာ ၂၀၂၅ ဧပြီ ၇ ရက်ညပိုင်းမှာ မြို့ရဲ့နောက်ဆုံးလက်ကျန်စခန်းဖြစ်တဲ့ ဂျပန်လှိုဏ်ဂူစခန်းကုန်းကို သိမ်းပိုက်နိုင်ခဲ့တာ ဖြစ်ပါတယ်။
တည်းဖြတ် – HP