ပဲခူး၊ မတ် ၁၉၊ ၂၀၂၅။

ပဲခူးတိုင်း၊ ပဲခူးမြို့နယ်၊ ဝမ်းဘဲအင်းကျေးရွာအနီးမှာ ဆီဘောက်ဆာနဲ့ဘုရားဖူးယာဥ်တိုက်မိပြီး ၂ ဦးသေ ၇ ဦးဒဏ်ရာရတယ်လို့ ကူညီကယ်ဆယ်ရေးလုပ်ဆောင်ပေးခဲ့သူတွေဆီက သိရပါတယ်။

မတ် ၁၈ ရက်မနက် ၈ နာရီ ၃၀ မိနစ်ခန့်က ရန်ကုန်-မန္တလေးကားလမ်းဟောင်းပေါ်မှာ ရန်ကုန်ဘက်ကနေ ဒိုက်ဦးဘက်ကိုမောင်းလာတဲ့ ဆီဘောက်ဆာယာဥ်နဲ့ လားရာတူရှေ့ကနေမောင်းနှင်လာတဲ့ ဘုရားဖူးလိုက်ထရပ်ယာဥ်တို့ ဒေးစွန်ပါဘုရားမုခ်ပေါက်ဝအနီးမှာ တိုက်ခဲ့တာလို့ဆိုပါတယ်။

“လိုက်ထရပ်က ဘုရားထဲအဝင် နောက်ကာပါလာတဲ့ဆီဘောက်ဆာက ဖြတ်တိုက်လိုက်ကော။ ဒရွတ်တိုက်ပါသွားပြီးတော့ အပင်နားမှာ သွားရပ်တာ။ “လို့ ကူညီကယ်ဆယ်ရေးလုပ်ဆောင်ပေးခဲ့သူတဦးက ပြောပါတယ်။

ယာဥ်တိုက်မှုကြောင့် လိုက်ထရပ်ယာဥ်ခေါင်းခန်းပါ ယာဥ်မောင်း အသက် ၅၀ ကျော်နဲ့ ၆၀ အရွယ် အမျိုးသား ၂ ဦး နေရာမှာတင်သေဆုံးခဲ့တယ်လို့ ဆိုပါတယ်။

ဒါ့အပြင် ယာဥ်နောက်ခန်းပါ အသက် ၁၈ နှစ်ကနေ ၅၀ ကြားရှိ အမျိုးသမီး ၂ ဦးဒဏ်ရာရပြီး အဲဒီအထဲက ဒေါ်တင်တင်ခိုင်ဆိုသူမှာ စိုးရိမ်ရတယ်လို့ သိရပါတယ်။

ထိခိုက်သေဆုံးသူတွေက ကဝမြို့ကနေ ဒေးစွန်ပါဘုရားဖူးလာကြသူတွေဖြစ်ပြီး ဒေသကူညီကယ်ဆယ်ရေးအဖွဲ့ဝင်တွေက ပဲခူးဆေးရုံကို ပို့ဆောင်ပေးခဲ့တယ်လို့ ဆိုပါတယ်။

မတ် ၁၆ ရက်မနက်ပိုင်းကလည်း ကျောက်တံခါးမြို့နယ်၊ ရန်ကုန်-မန္တလေး အမြန်လမ်းပေါ်မှာ လူုကူညီရေးအသင်းယာဥ် တိမ်းမှောက်ပြီး လူနာနဲ့ လူနာရှင် ၂ ဦး၊ လူမှုကူညီရေးအသင်းဝင် ၁ ဦး စုစုပေါင်း ၃ ဦးသေဆုံးပြီး ၂ ဦးဒဏ်ရာရသွားတယ်လို့ သိရပါတယ်။

စာတည်း – လင်း

ပဲခူး၊ မတ် ၁၆၊ ၂၀၂၅။

ပဲခူးတိုင်း၊ ပဲခူးမြို့၊ စိန်ထွန်းရပ်ကွက်၊ လက်ဝဲသုန္ဒရလမ်းမှာ ဇနီးဟောင်းဖြစ်သူကို ဓားနဲ့ထိုးခဲ့ပြီး သေဆုံးသွားတာကြောင့် ထွက်ပြေးတိမ်းရှောင်နေတဲ့ အမျိုးသား လာရောက်အဖမ်းခံခဲ့တယ်လို့ ဒေသခံတွေဆီကသိရပါတယ်။

မတ် ၁၆ ရက်နေ့မနက် ၁၀ နာရီခန့်မှာ ထွက်ပြေးနေတဲ့ အမျိုးသားဖြစ်သူ ကိုအောင်မြင့်မြတ်ဟာ ပဲခူးမြို့မရဲစခန်းမှာ သူကိုယ်တိုင်လာအဖမ်းခံခဲ့တယ်လို့ ဆိုပါတယ်။

“သူကိုယ်တိုင်လာအဖမ်းခံတာလို့တော့ သိထားရတယ်။ သူတို့ရပ်ကွက်က အမှတ် ၁ စခန်းအပိုင်ဆိုတော့ အဲမှာဘဲလာအဖမ်းခံတာ။ ရဲစခန်းမှာချုပ်ထားတယ်လို့တော့ သိရတယ်”လို့ ဒေသခံတဦးကပြောပါတယ်။

လာရောက်အဖမ်းခံခဲ့တဲ့ ကိုအောင်မြင့်မြတ်ကို ဖြစ်စဉ်စဖြစ်တဲ့ရက်ကတည်းက ပဲခူးမြို့မရဲစခန်းမှာ ရာဇသတ်ကြီးပုဒ်မ ၃၀၂ နဲ့ အမှုဖွင့်ထားတာကြောင့် အဆိုပါပုဒ်မနဲ့ တရားရုံးတင်သွားဖွယ်ရှိတယ်လို့ ဆိုပါတယ်။

မတ် ၁၂ ရက်၊ မနက် ၁ နာရီကျော်ခန့်မှာ အသက် ၃၀ ဝန်းကျင်အရွယ် မလင်းလင်းကျော်ဟာ နေအိမ်မှာရှိနေချိန် ခင်ပွန်းဟောင်းဖြစ်သူ ကိုအောင်မြင့်မြတ်က နေအိမ်ကိုရောက်လာပြီး စကားများကြရာမှ ကိုအောင်မြင့်မြတ်က မလင်းလင်းကျော်ကို ဓားနဲ့ထိုးပြီး ထွက်ပြေးသွားခဲ့ပါတယ်။

ဓားနဲ့ထိုးခံရလို့ မလင်းလင်းကျော်မှာ ဝမ်းဗိုက်ထိုးသွင်းဒဏ်ရာရပြီး ပဲခူးဆေးရုံမှာ ဆေးကုသမှုခံယူနေစဥ် မနက် ၅ နာရီခန့်မှာ သေဆုံးသွားပြီး သူ့ရဲ့ရုပ်အလောင်းကိုတော့ မတ် ၁၂ ရက် နေ့လယ် ၁ နာရီကျော် စင်ဖြူကွင်းသုဿာန်မှာ နေ့ချင်းသင်္ဂြိုဟ်ခဲ့တယ်လို့ သိရပါတယ်။

ကိုအောင်မြင့်မြတ်နဲ့မလင်းလင်းကျော်တို့က လွန်ခဲ့တဲ့ နှစ်နှစ်ခန့်ကတည်းက တရားဝင်ကွာရှင်းထားသူတွေဖြစ်ပြီး မလင်းလင်းကျော်မှာ သားနှစ်ဦးကျန်ခဲ့တယ်လို့ သိရပါတယ်။

စာတည်း – ကိုချမ်း

ပဲခူး၊ မတ် ၁၂၊ ၂၀၂၅။

ပဲခူးတိုင်း၊ ပဲခူးမြို့၊ စိန်ထွန်းရပ်ကွက်၊ လက်ဝဲသုန္ဒရလမ်းမှာ ခင်ပွန်းဟောင်းက သူ့ရဲ့ဇနီးဟောင်းကို ဓားနဲ့ထိုးလို့ သေဆုံးသွားတယ်လို့ ဖြစ်စဥ်ကိုသိရှိထားတဲ့ ဒေသခံတွေထံက သိရပါတယ်။

ဓားနဲ့ထိုးခံရသူဟာ အသက် ၃၀ ဝန်းကျင်အရွယ် မလင်းလင်းကျော်ဆိုသူဖြစ်ပြီး မတ် ၁၂ ရက် မနက် ၁ နာရီကျော်ခန့်က နေအိမ်မှာရှိနေချိန် ခင်ပွန်းဟောင်းဖြစ်သူ ကိုအောင်မြင့်မြတ်က ဓားနဲ့ထိုးခဲ့တာလို့ ဆိုပါတယ်။

“ယောကျာ်းဖြစ်သူက နေအိမ်ထဲဝင်လာပြီး ဓားနဲ့ထိုးသွားတာလို့တော့ သိထားရတယ်။ ဓားထိုးခံရလို့ ဒဏ်ရာတွေရနေလို့ဆေးရုံကိုပို့ပြီး ဆေးကုမှုလုပ်နေချိန်မှာ ဒီမနက်မှာဘဲဆုံးသွားတာ”လို့ ဖြစ်စဥ်ကိုသိရှိထားတဲ့ ဒေသခံတဦးက ပြောပါတယ်။

ဓားနဲ့ထိုးခံရလို့ မလင်းလင်းကျော်မှာ ဝမ်းဗိုက်မှာ ထိုးသွင်းဒဏ်ရာရပြီး ပဲခူးဆေးရုံမှာ ဆေးကုသမှုခံယူနေစဥ် မနက် ၅ နာရီခန့်မှာ သေဆုံးသွားတယ်လို့ ဆိုပါတယ်။

သေဆုံးသူ မလင်းလင်းကျော်ရဲ့အလောင်းကို ဒီနေ့လယ် ၁ နာရီကျော်မှာ စင်ဖြူကွင်းသုဿာန်မှာ သင်္ဂြိုဟ်လိုက်တယ်လို့သိရပြီး ဓားနဲ့ထိုးသွားတဲ့ ကိုအောင်မြင့်မြတ်ကတော့ မတ် ၁၂ ရက် ညနေပိုင်းထိ ဖမ်းဆီးနိုင်ခြင်းမရှိသေးဘဲ ထွက်ပြေးလွတ်မြောက်နေဆဲလို့ ဒေသခံတွေက ပြောပါတယ်။

ကိုအောင်မြင့်မြတ်နဲ့မလင်းလင်းကျော်တို့ဟာ လွန်ခဲ့တဲ့ နှစ်နှစ်ခန့်ကတည်းက တရားဝင်ကွာရှင်းထားတာဖြစ်ပြီး မလင်းလင်းကျော်မှာ သားနှစ်ဦးကျန်ရစ်ခဲ့တယ်လို့ သိရပါတယ်။

ပြီးခဲ့တဲ့ ဇန်နဝါရီ ၈ ရက်နေ့ကလည်း ပဲခူးမြို့နယ်၊ ဇောင်းတူကျေးရွာမှာ လင်မယားနှစ်ယောက် စကားများရန်ဖြစ်ရာမှ လင်ဖြစ်သူက မယားဖြစ်သူကို ဓားနဲ့ခုတ်လို့ သေဆုံးသွားတယ်လို့ သိရပါတယ်။

စာတည်း – ကိုချမ်း

ပဲခူး၊ မတ် ၅၊ ၂၀၂၅။

ပဲခူးတိုင်း၊ ပဲခူးနဲ့ ပန်းတောင်းမြို့နယ်အတွင်းမှာ ကျပ်ဘီလီယံဆယ်နဲ့ချီတန်ဖိုးရှိတဲ့ မူးယစ်ဆေးဝါးတွေ ဖမ်းဆီးရမိခဲ့တယ်လို့ မတ် ၄ ရက်နဲ့ ၅ ရက်ထုတ် စစ်ကောင်စီလက်အောက် မြန်မာ့အလင်းသတင်းစာတွေမှာ ဖော်ပြပါတယ်။

ဖေဖော်ဝါရီ၂၈ ရက်က ပန်းတောင်းမြို့နယ်၊ ဘူးဘက်ရွာစစ်ကောင်စီစစ်ဆေးရေးဂိတ်မှာ ပိတ်ဆို့စစ်ဆေးရာက SOJEN နဲ့ Probox ယာဉ်တွေမှာ စက္ကူပုံး ၆ ပုံးနဲ့ တင်ဆောင်လာတဲ့ စိတ်ကြွဆေးပြား ၁၀ ဒသမ ၂ သိန်း (ကာလတန်ဖိုးကျပ် ၁ ဒသမ ၅၃ ဘီလီယံခန့်) ကို ဖမ်းဆီးရမိခဲ့တာလို့ ဆိုပါတယ်။

ဒါ့အပြင် စိတ်ကြွဆေးပြားတွေကို ကားနဲ့မောင်းနှင်သယ်ဆောင်လာတဲ့ အမျိုးသား ၅ ဦးနဲ့ အမျိုးသား ၁ ဦး ကိုဖမ်းဆီးရမိခဲ့ပြီး ဖမ်းဆီးရမိသူတွေနဲ့ ထွက်ဆိုချက်အရ မူးယစ်ဆေးဝါးတွေနဲ့ ဆက်စပ်သူနောက်ထပ်အမျိုးသား ၂ ဦးကို ပြည်မြို့၊ ရွာဘဲရပ်ကွက်မှာ ထပ်မံဖမ်းမိခဲ့တယ်လို့ ဖော်ပြပါတယ်။

အဆိုပါမူးယစ်ဆေးဝါးတွေဟာ ရန်ကုန်မြို့ကတင်ဆောင်လာတဲ့ စိတ်ကြွဆေးပြားတွေဖြစ်ပြီး ပန်းတောင်းမြို့နယ်ကတဆင့် ရခိုင်ပြည်နယ်အတွင်း ပို့ဆောင်ဖို့ သယ်ဆောင်လာစဉ် ဖမ်းမိခဲ့တာလို့ စစ်ကောင်စီကသတင်းဖော်ပြပါတယ်။

အလားတူ ဖေဖော်ဝါရီ ၁၆ ရက်မှာ ပဲခူးမြို့နယ်၊ ဘောနတ်ကြီးရွာအနီး အမြန်လမ်းမိုင်တိုင် ၃၉/၄ ယာဉ်ရပ်နားဝန်းအတွင်းရပ်တန့်ထားတဲ့ Alphard ယာဥ်ပေါ်မှ အိုက်စ်(မက်သ်အဖက်တမင်း) ကီလို ၄၄၀ နဲ့ အမျိုးသား ၁ ဦးဖမ်းမိခဲ့ပြီး ဖမ်းမိသူကိုစစ်ဆေးချက်အရ ရန်ကုန်မြို့၊ မရမ်းကုန်းမြို့နယ်၊ ဘုရင့်နောင် ကုန်စည်ကားဝန်းအတွင်းက နောက်ထပ် အိုက်စ် ကီလို ၂၆၀ နဲ့ ဘိန်းဖြူဘလောက်တုံး ၁၆၈ ကီလို ထပ်မံဖမ်းဆီးရမိခဲ့တယ်လို့ စစ်ကောင်စီက သတင်းထုတ်ပြန်ပါတယ်။

ပဲခူးနဲ့ မရမ်းကုန်းမြို့နယ် နေရာ ၂ ခုကနေ စုစုပေါင်း အိုက်စ် ကီလို ၇၀၀ နဲ့ ဘိန်းဖြူဘလောက်တုံး ၁၆၈ ကီလိုကို ဖမ်းမိခဲ့ပြီး အဲ့ဒီမူးယစ်ဆေးတွေရဲ့ ကာလတန်ဖိုးဟာ ကျပ် ၂၅ ဒသမ ၅၈ ဘီလီယံ တန်ဖိုးရှိတယ်လို့ ဖော်ပြပါတယ်။

ဒါ့အပြင် အဆိုပါမူးယစ်ဆေးတွေနဲ့ဆက်စပ်သူ အမျိုးသား ၁၁ ဦးနဲ့ မူးယစ်ဆေးတွေတင်ဆောင်လာတဲ့ ယာဉ်မျိုးစုံ ၅ စီးကို ပဲခူး၊ ရန်ကုန်၊ မန္တလေး၊ ဧရာဝတီတိုင်းနဲ့ ရှမ်းပြည်နယ်တွေက မြို့နယ် ၇ ခုကနေ ဖမ်းဆီးသိမ်းဆည်းရမိခဲ့တယ်လို့ ဆိုပါတယ်။

အဆိုပါမူးယစ်ဆေးတွေဟာ ရှမ်းပြည်နယ်(တောင်ပိုင်း)၊ ဝမ်ဟိုင်းမြို့မှ တင်ဆောင်လာတာ ဖြစ်ပြီး ရန်ကုန်နဲ့ ပဲခူးမြို့နယ်တွေကတဆင့် မြဝတီမြို့ကို ပို့ဆောင်မှာဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။