သဲကုန်း၊ ဧပြီ ၇၊ ၂ဝ၂၅။

ပဲခူးတိုင်းအနောက်ခြမ်း၊ သဲကုန်းမြို့နယ်မှာ သစ်ပင်ပေါ်ကပြုတ်ကျပြီး လူသေဆုံးမှု ၂ ရက်ဆက် ဖြစ်ခဲ့တယ်လို့ ဒေသခံတွေဆီကသိရပါတယ်။

ဧပြီ ၆ ရက် မနက် ၁၁ နာရီခွဲလောက်က သဲကုန်းမြို့၊ ရပ်ကွက် ၁ မိုးကောင်းဘုရားအနီးမှာ အသက် ၅၅ နှစ်အရွယ် အမျိုးသမီး ၁ ဦး မန်ကျည်းရွက်တက်ခူးရာက ပြုတ်ကျခဲ့တယ်လို့ ဆိုပါတယ်။

“အမျိုးသမီးက သစ်ပင်တက်နေကြ အမျိုးသမီး၊ အပျိုကြီးလို့ သိရတယ်။ ဦးခေါင်းဒဏ်ရာရပြီး သေဆုံးတာပါ။ ဘယ်လိုဖြစ်ပြီး ပြုတ်ကျတယ်တော့မသိရဘူး၊ ဒီနေ့(ဧပြီ ၇ ) မွန်းလွဲပိုင်းမှာ သူနေတဲ့ သဲကုန်းမြို့ ကျောင်းကုန်းရပ်ကနေ မြို့မသုဿန်မှာပဲ သင်္ဂြိုဟ်မှာပါ” လို့ သဲကုန်းမြို့က ဒေသခံတဦးက ပြောပါတယ်။

အလားတူ ဧပြီ ၅ ရက်မနက် ၈ နာရီလောက်မှာလည်း သဲကုန်းမြို့နယ်၊ အုပ်ဆွဲရွာထိပ်မှာ လျှပ်စီးမီးကြိုးနဲ့မလွတ်တဲ့ ဘောစကိုင်းပင်ကိုတက်ခုတ်တဲ့ အသက် ၄၀ အရွယ် လျှပ်စစ်ဝန်ထမ်း ကိုထွန်း အပင်ပေါ်ကပြုတ်ကျခဲ့တယ်လို့ဆိုပါတယ်။

အဲ့ဒီနောက်ဘောစကိုင်းပင်အကိုင်းပဲ့ပြီး ခန္ခာကိုယ်ပေါ်ပြုတ်ကျတဲ့အတွက် နံရိုးကျိုးဒဏ်ရာနဲ့သေဆုံးခဲ့တာဖြစ်ပြီး ဧပြီ ၆ ရက် မနေ့မွန်းလွဲပိုင်းက သူ့ရဲ့ဇာတိ ပုတီးကုန်းမြို့မှာ သင်္ဂြိုဟ်ခဲ့တယ်လို့ အထက်ပါဒေသခံက ပြောပါတယ်။

၎င်းတို့ဟာ ခန့်မှန်းအမြင့်ပေ ၂၀ လောက်ရှိတဲ့ သစ်ပင်တွေပေါ်က ပြုတ်ကျခဲ့တာဖြစ်ပြီး သဲကုန်း ဆေးရုံကနေ ပြည်ကုတင် ၅၀၀ ဆေးရုံကို ပြောင်းရွှေ့ပို့ဆောင်ခဲ့ပေမယ့် ၂ ဦးစလုံးက ဆေးရုံအရောက်မှာ သေဆုံးခဲ့တာလို့ ဆိုပါတယ်။

သစ်ပင်ပေါ်ကပြုတ်ကျတဲ့အတွက် ရဲမှုခင်းဖြစ်တာကြောင့် ၎င်းတို့ ၂ ဦးကို သဲကုန်းရဲစခန်းက သေမှုသေခင်းနဲ့ အမှုဖွင့်ထားတယ်လို့လည်း သိရပါတယ်။

သတင်း – မောင်ဆွေအင်း၊ စာတည်း – လင်း

ပုံစာ – သေဆုံးသူအမျိုးသမီးအလောင်း။

ပန်းတောင်း၊ ဧပြီ ၅၊ ၂၀၂၅။

ပဲခူးတိုင်းအနောက်ခြမ်း၊ ပန်းတောင်းမြို့နယ်၊ ဥသျှစ်ပင်မြို့မှာ နေအိမ်ကိုဖောက်ကာ ကျပ်သိန်း ၅ ထောင်ကျော်တန်ဖိုးရှိ ရွှေထည်ပစ္စည်းတွေခိုးယူခံရပြီး ခိုးသူတွေကိုလည်း ဧပြီ ၅ ရက် ဒီနေ့အထိ ဖမ်းမမိသေးဘူးလို့ ဒေသခံတဦးဆီကသိရပါတယ်။

ဥသျှစ်ပင်မြို့၊ ရတနာပုံရပ်ကွက် ဧကရာဇ်၂ လမ်းနေ ဦးမောင်နုရဲ့နေအိမ်အခန်းထဲရှိ National အမျိုးအစား မီးခံသေတ္တာအတွင်းက ကျပ်သိန်း ၅ ထောင်ကျော်တန်ဖိုးရှိ ရွှေထည်ပစ္စည်းမျိုးစုံ ၂ဝ မျိုး နဲ့ ငွေကျပ် ၈ သိန်းခွဲတို့ ပျောက်ဆုံးကြောင်းကို ဧပြီ ၃ ရက်မနက်မှာ အိမ်ရှင်တွေကသိရှိခဲ့ကြတာလို့ ဆိုပါတယ်။

“သူတို့က ရွှေဆိုင်ဖွင့်တာမျိုးမဟုတ်ဘူး။ ဆောက်လုပ်ရေးအငြိမ်းစားလင်မယား အိမ်မှာ ၂ ယောက်ထဲနေတာကို ဝင်ခိုးသွားတာ။ သား ၂ ယောက်ကလည်း အိမ်ခွဲနေကြတာ။ အခုထိတော့ သူခိုးကိုမမိသေးဘူး” လို့ ဒေသခံတဦးက ပြောပါတယ်။

အဲဒီလင်မယားဟာ ဧပြီ ၂ ရက် ည ၉ နာရီလောက်က နေအိမ်အခန်းထဲရှိ မီးခံသေတ္တာကိုဂဏန်း နံပါတ်နဲ့မပိတ်ဘဲ သော့ခတ်ခဲ့ပြီး အဲဒီသော့ကိုလည်း မီးခံသေတ္တာအနီးမှာပဲထားခဲ့တာလို့ ဒေသခံတွေရဲ့ပြောပြချက်ကို သူကဆက်ပြောပါတယ်။

ပျောက်ဆုံးသွားတဲ့ပစ္စည်းတွေထဲမှာ အလေးချိန် ၆ ကျပ်သားခန့်ရှိတဲ့ ရွှေဆွဲကြိုး ၂ ကုံး၊ အလေးချိန် ၄ ကျပ်သားခန့်ရှိ MC ရွှေဆွဲကြိုး ၁ ကုံး၊ အလေးချိန် ၇ ကျပ်သားခန့်ရှိ ရွှေလက်ကောက် ၁၄ ကွင်းပါဝင်တဲ့အပြင် ငွေကျပ် ၈ သိန်း ခွဲလည်း ပျောက်ဆုံးသွားတယ်လို့ ပြောပါတယ်။

အမှုကို ဥသျှစ်ပင်နယ်ရဲစခန်းက ဧပြီ ၃ ရက်နေ့မှာပဲ ရာဇသတ်ကြီးပုဒ်မ ၃၈၀ ဖောက်ထွင်းခိုးယူမှုနဲ့ အမှုရေးဖွင့်ထားတယ်လို့ သိရပါတယ်။

ပြီးခဲ့တဲ့ ဇန်နဝါရီ ၃၀ ရက်ညကလည်း ပန်းတောင်းမြို့နယ်၊ ဥသျှစ်ပင်နယ်မြေရဲစခန်းအပိုင် ကျောက်ဖူးအုပ်စု၊ ကံကူရွာက ဒေါ်မြင့်ကြည်ရဲ့ နေအိမ်အတွင်းက အပ်ချုပ်စက် ခေါင်း ၁ လုံးကို တရွာတည်းနေသူ အမျိုးသား ၂ ဦးက ခိုးယူခဲ့တဲ့အတွက် ဖမ်းဆီးခံခဲ့ရပါသေးတယ်။

သတင်း – မောင်ဆွေအင်း၊ စာတည်း – လင်း

ပြည်၊ ဧပြီ ၅၊ ၂၀၂၅။

ပဲခူးတိုင်း၊ ပြည်မြို့၊ ကန်သုံးဆင့်ဘုန်းကြီးကျောင်း(ရိပ်သာ)အနီးမှာ အိုးဝေ(သုံးဘီးတက္ကစီ)မောင်းတဲ့ အမျိုးသားတဦးအသတ်ခဲ့ရတယ်လို့ ဒေသခံတွေဆီကသိရပါတယ်။

အသတ်ခံရသူက ပြည်မြို့၊ ရွှေတံခါးရပ်ကွက်နေသူ အသက် ၆၀ ကျော်အရွယ် ဦးဖိုးလုံးဖြစ်ပြီး ဧပြီ ၄ ရက် ညနေ ၃ နာရီကျော်မှာ ကန်သုံးဆင့်ဘုန်းကြီးကျောင်းအနီးမှာ ဓားဒဏ်ရာနှစ်ချက်နဲ့ သေဆုံးနေတာကိုတွေ့ခဲ့ရတာလို့ဆိုပါတယ်။

“အိုးဝေနဲ့အလောင်းက ကိုက် ၂၀၀ လောက်ကွာတယ်။ အလောင်းမှာဓားဒဏ်ရာနှစ်ချက်ရထားတယ်။ သွေးတွေကတော့ လမ်းမှာတလျောက်ကျကျန်ခဲ့တာ။ ဓားဒဏ်ရာက လည်ပင်းတချက်၊ နောက်ကျောဘက်မှာ တချက်တွေ့ရတယ်။ သုံးဘီးကတော့ လမ်းဘေးချောက်ထဲကျနေတယ်။ “လို့ ကူညီမှုလုပ်ပေးခဲ့သူတဦးက ပြောပါတယ်။

အသတ်ခံရသူဟာ ရန်ပြုခံရလို့ ပြန်လည်ခုခံရင်း ထွက်ပြေးရာကနေသေဆုံးသွားတာဖြစ်နိုင်ပြီး သေဆုံးသူလက်ထဲမှာ သံတုတ်တချောင်းကိုတွေ့ရသလို အိုးဝေပေါ်မှာတော့ သွေးစွန်းနေတဲ့ ကြက်သွန်လှီးဓားအသစ်တချောင်းကို တွေ့ရတယ်လို့ဆိုပါတယ်။

အိုးဝေ၊ ဖုန်း၊ ပိုက်ဆံနဲ့ပစ္စည်းတွေကတော့ ပျောက်ဆုံးနေတာမျိုးမရှိဘဲ အခင်းဖြစ်တဲ့နေရာမှာပဲရှိနေပြီး သတ်တဲ့သူကိုတော့ ဧပြီ ၅ ရက်ထိ ဖမ်းမိတာမျိုးမရှိသေးဘူးလို့ သူကဆက်ပြောပါတယ်။

မိသားစုဝင်တွေရဲ့ပြောပြချက်အရ ဦးဖိုးလုံးဟာ စိတ်သဘောထားကောင်းမွန်ပြီး ပတ်ဝန်းကျင်နဲ့ ရန်ဖြစ်တာမျိုး၊ ပြသနာရှိဖူးတာမျိုးလည်းမရှိဘူးလို့ သိရပါတယ်။

ဦးဖိုးလုံးရဲ့အလောင်းကိုတော့ ဒေသလူမှုကူညီရေးအသင်းတွေက ပြည်ဆေးရုံကိုပို့ဆောင်ကာ စစ်ဆေးမှုတွေလုပ်ပြီးနောက် မိသားစုဝင်တွေက နေအိမ်ပြန်သယ်ပြီး နာရေးပြုလုပ်နေတယ်လို့ ဆိုပါတယ်။

စာတည်း – လင်း