နိုင်ကျဉ်း

မြေလတ်အသံ၊ ဇွန် ၁၉၊ ၂၀၂၅။

မကွေးတိုင်း၊ ထီးလင်းမြို့မရဲစခန်းအချုပ်မှာ ဖမ်းဆီးခံထားရတဲ့ နိုင်ငံရေးအကျဥ်းသား ၁၃ ဦး ထွက်ပြေးနိုင်လွတ်မြောက်ခဲ့ပြီး ထွက်ပြေးစဥ်မိုင်းနင်းမိတာကြောင့် ၁ ဦး သေဆုံးခဲ့တယ်လို့ ဒေသတွင်းPDF တပ်ရင်း ၇ ခုနဲ့ ဖွဲ့စည်းထားတဲ့ ထီးလင်းပြည်သူ့ကာကွယ်ရေးတပ်ရင်းများထံက သိရပါတယ်။

လွတ်မြောက်လာသူ နိုင်ငံရေးအကျဥ်းသား ၁၃ ဦးမှာ အမျိုးသား ၁၂ ဦးနဲ့ အမျိုးသမီး ၁ ဦးတို့ဖြစ်ပြီး ဇွန် ၁၇ ရက်ညပိုင်းမှာ အချုပ်ရဲ့သံတိုင်တွေကို ထွက် ပေါက်ဖြစ်အောင်လုပ်ပြီး ထွက်ပြေးလာခဲ့ကြတာလို့ ဆိုပါတယ်။

” သူတို့ ၁၃ ဦးက အချုပ်ကနေ ပြင်ဆင်နေတာကြာပြီပေါ့လေ။ ထွက်ပေါက်ရအောင် သူတို့ သံတိုင်စိုက်ထားတဲ့ဟာတွေကို ဂဟေတွေကို လက်အားနဲ့ပဲလုပ်ပြီးနေကြတယ်။ ကြိုးစားနေကြတယ်။ အဲ့လိုအပေါက်ဖြစ်အောင် ပွင့်နိုင်အောင် ကြိုးစားနေကြတာ ၃၊ ၄ လကြာခဲ့တယ်။”လို့ ကူညီစောင့်ရှောက်ပေးထားတဲ့ ထီးလင်းမြို့ နယ်ပြည်သူ့ကာကွယ်ရေးတပ်ရင်းများမှ တာဝန်ရှိသူတဦးက မြေလတ်အသံကို ပြောပါတယ်။

၎င်းတို့ ၁၃ ဦးမှာ ထီးလင်းမြို့ပေါ်နဲ့ အနီးတဝိုက်ရွာတွေကနေ နိုင်ငံတော်အကြည်ညိုပျက်စေမှုပုဒ်မ ၅၀၅ (က)၊ ၅၀၅ (ခ)၊ ဆက်သွယ်ရေးဥပဒေပုဒ်မ၊ အကြမ်း ဖက်မှုတိုက်ဖျက်ရေးပုဒ်မ၊ နိုင်ငံတော်ပုန်ကန်မှုပုဒ်မ စတာတွေနဲ့ တရားစွဲခံထားရသူတွေဖြစ်ပြီး ၎င်းတို့အနက် အစောဆုံးဖမ်းဆီးခံရသူမှာ ၂၀၂၁ က ဖြစ်ကာ အထက်ပါပုဒ်မတွေနဲ့ အမှုဖွင့်ထားပေမယ့် ရုံးထုတ်စစ်ဆေးတာမရှိဘဲ ရဲစခန်းထဲမှာပဲ ချုပ်နှောင်ခံထားရသူတွေဖြစ်တယ်လို့ ဆိုပါတယ်။

ထွက်ပြေးလွတ်မြောက်လာသူတွေရဲ့ အသေးစိတ်အချက်အလက်တွေကိုတော့ ၎င်းတို့ရဲ့လုံခြုံရေးအရ ပြောဆိုလို့မရကြောင်း အထက်ပါတာဝန်ရှိသူက ပြောပါတယ်။

ရဲစခန်းအချုပ်ကနေ ထွက်ပြေးလာစဥ် လမ်းပိုင်းတနေရာမှာ အသက် ၅၇ နှစ်အရွယ် အကျဥ်းသူအမျိုးသမီးဟာ စစ်ကောင်စီတပ်ထောင်ထားတဲ့ မြေမြှုပ်မိုင်းနင်းမိတာကြောင့် ဒဏ်ရာအပြင်းအထန်ရရှိခဲ့ကာ မိုင်းနင်းမိပြီး ၁ နာရီအကြာမှာ သေဆုံးသွားခဲ့တယ်လို့ သိရပါတယ်။

” မိုင်းနင်းမိတာက သူတို့သားမိ ၃ ဦးပါတဲ့ အုပ်စု၊ လူ ၅ယောက်ပါတဲ့အုပ်စု။ အဲ့ချိန်မှာ နောက်ဆုံးမှကျန်ခဲ့တဲ့အမေဖြစ်သူက မိုင်းကိုနင်းမိတယ်။ ဒဏ်ရာတွေက တကိုယ်လုံးမှာ ပြင်းပြင်းထန်ထန်ရပြီး သေဆုံးသွားတယ်”လို့ ၎င်းက ပြောပါတယ်။

သေဆုံးသူရဲ့ ရုပ်အလောင်းကို ဇွန် ၁၈ ရက်မနက်ပိုင်းအချိန်မှာ ထီးလင်းမြို့နယ်ပြည်သူ့ကာကွယ်ရေးတပ်ရင်းများမှ တပ်ဖွဲ့ဝင်တွေက ကောက်ယူသင်္ဂြိုဟ်ပေးလိုက်တယ်လို့ သိရပါတယ်။

စာတည်း – ဟိန်းစံ

မြေလတ်အသံ၊ ဇွန် ၁၅၊ ၂၀၂၅။

မန္တလေး၊ အိုးဘိုထောင်မှာ ဆေးကုသခွင့်မရရှိတာကြောင့် နိုင်ငံရေးအကျဉ်းသူ CDM ကျောင်းအုပ်ဆရာမ ၁ ဦးသေဆုံးခဲ့တယ်လို့ ဇွန် ၁၄ ရက်မှာ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် – PPNM က ထုတ်ပြန်ပါတယ်။

သေဆုံးသူမှာ အလယ်တန်းကျောင်းအုပ် ဒေါ်မြင့်မြင့်သန်းဖြစ်ပြီး တီဘီရောဂါဝေဒနာကို ခံစားနေရကာ ထောင်ပြင်ပဆေးရုံမှာကုသခွင့်မရခဲ့ဘဲ မေ ၇ ရက်မှာသေဆုံးခဲ့တာလို့ ဆိုပါတယ်။

“ဆရာမကြီးက သွေးကြောပေါက်ချိန်မှာ ပြင်ပဆေးရုံကို ပို့ဆောင်ကုသခွင့်မရခဲ့ဘူး။ သွေးကြောပေါက်တယ်ဆိုတဲ့အခြေအနေကတော့ နောက်ပိုင်းမှာမှကြားသိရတာပါ။ တကယ်တော့ တီဘီရောဂါအခံကြောင့်မို့လို့ ကိုယ်ခံအားကျဆင်းပြီး ကျဆုံးရတဲ့အခြေအနေ ပိုပြီးဖြစ်ဖို့များပါတယ်။”လို့ PPNMမှ ဦးဆောင်ကော်မတီဝင် ကိုသိုက်ထွန်းဦးက ပြောပါတယ်။

ဒေါ်မြင့်မြင့်သန်း သေဆုံးရတာတဲ့ အဓိကအကြောင်းအရင်းမှာ သွေးကြောပေါက်ပြီးသေဆုံးတာလို့ စုံစမ်းသိရှိရပေမယ့် ဆေးမှတ်တမ်းကို ရယူကြည့်ခွင့်မရှိခဲ့တဲ့အတွက် တီဘီရောဂါအခံအပါအဝင် ကိုယ်ခံအားကျဆင်းလာမှုကြောင့် တခြားရောဂါတွေဝင်လာခဲ့ချိန် ဆေးပြင်းတွေ၊ ဆေးဝါးမျိုးစုံသောက်သုံးရတဲ့အတွက် သေဆုံးရတာလို့ ကိုသိုက်ထွန်းဦးက ယူဆပါတယ်။

ဒေါ်မြင့်မြင့်သန်းဟာ ပြီးခဲ့တဲ့ ၂၀၂၃ ဇူလိုင် ၂၇ ရက်မှာ ဖမ်းဆီးခံရပြီးနောက် ပုဒ်မ – ၅၂(က)နဲ့ အိုးဘိုထောင်မှာ ထောင်ဒဏ် ၅ နှစ်ချမှတ်ခံရသူ ဖြစ်ပါတယ်။

အလားတူ ပြီးခဲ့တဲ့ဇွန် ၁၃ ရက်မှာလည်း အိုးဘိုထောင်မှာ ထောင်ဒဏ် ၁၈ နှစ်ကျခံနေရတဲ့ နိုင်ငံရေးအကျဥ်းသား ဦးမော်ထူးဟာ ငလျင်ကြောင့်ရရှိခဲ့တဲ့ လည်ပင်းနဲ့ ဦးခေါင်းဒဏ်ရာတို့ကို ခွဲစိတ်ကုသချိန် ကိုမာဝင်ပြီး သေဆုံးခဲ့တယ်လို့ သိရပါတယ်။

PPNM ရဲ့မှတ်တမ်းအရ အကျဉ်းထောင်အသီးသီးမှာ ဆေးဝါးလုံလောက်စွာနဲ့ ဆေးကုသခွင့်မရရှိတာကြောင့် ဖေဖော်ဝါရီ ၁ ရက်ကနေ ဇွန် ၁ ရက်အထိ သေဆုံးသူ နိုင်ငံရေးအကျဉ်းသား/အကျဉ်းသူ ၁၁ ဦးရှိတယ် လို့သိရပါတယ်။

စာတည်း – လင်း

ကသာ၊ မေ ၆၊ ၂၀၂၅။

စစ်ကိုင်းတိုင်း၊ ကသာမြို့အကျဉ်းထောင်မှာ ထောင်ဒဏ် ၁၅ နှစ်ချမှတ်ခံထားရတဲ့ နိုင်ငံရေးအကျဉ်းသား ကိုဟိဏ်းမင်းသူ ဧပြီ ၂၆ ရက်မှာ သေဆုံးခဲ့ရတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် – PPNM က မေ ၅ ရက်မှာ ထုတ်ပြန်ပါတယ်။

အသက် ၃၃ နှစ်အရွယ်ရှိ ကိုဟိဏ်းမင်းသူ ဟာ အတက်ရောဂါကြောင့် အကျဉ်းထောင်အတွင်းမှာသတိမေ့မြောသွားချိန် ထောင်ပြင်ပဆေးရုံကိုသွားရောက်ကုသခဲ့ပေမယ့် သတိပြန်မရလာဘဲ အသက်ဆုံးရှုံးခဲ့တာလို့ ဆိုပါတယ်။

“အကျဉ်းထောင်မှာ သတိမေ့မြောတဲ့အခြေအနေမှာမှ ပြင်ပဆေးရုံတွေကို ပို့ဆောင်ခဲ့တယ်။ ထောင်ပြင်ပဆေးရုံမှာလည်း သတိပြန်မလည်လာဘဲနဲ့ ဆုံးသွားတာဖြစ်ပါတယ်။” လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် – PPNM မှ ဦးဆောင်ကော်မတီဝင် ကိုသိုက်ထွန်းဦး က ပြောပါတယ်။

ကိုဟိဏ်းမင်းသူမှာ အတက်ရောဂါကြောင့်ဆေးရုံပို့ချိန်နဲ့ သေဆုံးသွားတဲ့အချိန်အထိ မိသားစုတွေနဲ့အဆက်အသွယ် လုံးဝမရရှိခဲ့ဘူးလို့ ကိုသိုက်ထွန်းဦးက ဆက်ပြောပါတယ်။

အကျဉ်းထောင်တွေမှာ အရေးပေါ်ဖြစ်နေတဲ့အခြေအနေမျိုးမှာတောင် ဆရာဝန်မရှိတာ၊ အိုးဘိုအကျဉ်းထောင်လိုမျိုးကြီးမားတဲ့ထောင်တွေမှာတောင်မှ ဆရာဝန် ၃ ဦးကနေ ၅ ဦးဝန်းကျင်လောက်ပဲရှိတာ၊ ထောင်အာဏာပိုင်တွေနဲ့ ဆရာဝန်တွေစီမံခန့်ခွဲမှု ညံ့ဖျင်းတာ၊ ထောင်တွင်းဆေးဝါးလုံလောက်စွာမရရှိတာ၊ အဟာရလျော့နည်းတဲ့ အစားအသောက်တွေကို စားရတာတွေကြောင့် နိုင်ငံရေးအကျဉ်းသားတွေသေဆုံးမှု ပိုပြီးမှဖြစ်ပေါ်စေတယ်လို့ ဆိုပါတယ်။

“ထောင်ငယ်တွေမှာ ဆရာဝန်လုံးဝမရှိတဲ့အခြေအနေမျိုးဖြစ်တဲ့အတွက် နိုင်ငံရေးအကျဉ်းသားသေဆုံးမှုတွေ၊ ထောင်ဆရာဝန် ထောင်အာဏာပိုင်တွေရဲ့ စီမံခန့်ခွဲမှုညံ့ဖျင်းတဲ့အတွက် နိုင်ငံရေးအကျဉ်းသားသေဆုံးရတဲ့ကိစ္စတွေ များနေတာ”လို့ ကိုသိုက်ထွန်းဦး က ပြောဆိုလိုက်ပါတယ်။

ကိုဟိဏ်းမင်းသူဟာ CDM ကျောင်းဆရာတဦးဖြစ်ပြီး ပြီးခဲ့တဲ့ ၂၀၂၃ ဇွန် ၅ ရက်မှာ စစ်ကောင်စီတပ်ရဲ့ဖမ်းဆီးတာခံခဲ့ရပြီး ၂၀၂၄ မတ် ၂၈ ရက်မှာ စွဲဆိုထားတဲ့ ပုဒ်မ ၅၀ (ည)၊ ၅၂ (က)၊ ၅၂ (ခ) စတဲ့ပုဒ်မ ၃ ခုနဲ့ ထောင်ဒဏ် ၁၅ နှစ်ချမှတ်ခံထားရသူဖြစ်တယ်လို့ သိရပါတယ်။

စာတည်း – လင်း

ချောက်၊ ဧပြီ ၁၇၊ ၂၀၂၅။

မြန်မာနှစ်ဆန်း ၁ ရက်နေ့ ဧပြီ ၁၇ ရက် ဒီကနေ့မှာ စစ်ကောင်စီရဲ့လွတ်ငြိမ်းအဖြစ် မကွေးမြို့ ဒေါင်းနေထောင်က အကျဥ်းသား ၁၁၅ ဦးလွတ်မြောက်ခဲ့တယ်လို့ အကျဥ်းထောင်နဲ့နီးစပ်သူ ဆီကသိရပါတယ်။

လွတ်မြောက်လာသူတွေမှာ အမျိုးသား ၇၃ ဦးနဲ့ အမျိုးသမီး ၄၂ ဦးဖြစ်ပြီး အဲ့ဒီထဲမှာနိုင်ငံရေး အကျဥ်းသား ၂ ဦးနဲ့ နိုင်ငံရေးအကျဥ်းသူ ၉ ဦး စုစုပေါင်း နိုင်ငံရေးအကျဉ်းသား ၁၁ ဦးသာပါဝင်တယ်လို့ ဆိုပါတယ်။

“သူတို့က ပုဒ်မ ၅ ခုနဲ့ထောင်ချခံရတာ၊ ၅၀၅ လည်းပါတယ်၊ မီးရှို့ဖျက်ဆီးမှု၊ အကြမ်းဖက်မှု စတဲ့ ပုဒ်မ ၅ ခုနဲ့ ထောင်ချခံရတာ၊ သူတို့ကို ထောင် ၈ နှစ်ချတာ၊ ရက်လျှော့ပြီးလွတ်လာတာ၊ ချုပ်ခံရတာက ၁ နှစ်ကျော်လောက်ရှိတယ်၊ ချောက်ကနေ နိုင်ငံရေးပုဒ်မနဲ့ ထောင်ချခံရပြီး မလွတ်တဲ့သူ ကျန်သေးတယ်” လို့ အကျဥ်းထောင်နဲ့နီးစပ်သူကပြောပါတယ်။

အဆိုပါ နိုင်ငံရေးအကျဥ်းသားတွေထဲက အမျိုးသား ၂ ဦးနဲ့ အမျိုးသမီး ၆ ဦးက ချောက်မြို့ကဖြစ်ပြီး ကျန်တဲ့ ၃ ဦးနဲ့ပတ်သက်တာကိုတော့ မသိရဘူးလို့ဆိုပါတယ်။

နိုင်ငံတဝန်းအကျဉ်းထောင်တွေကနေ အကျဉ်းသား ၅ ထောင်နီးပါးကို ပြန်လွှတ်ပေးမယ်လို့ ဧပြီ ၁၇ ရက် ဒီနေ့မှာ စစ်ကောင်စီကထုတ်ပြန်ပါတယ်။

၂၀၂၁ စစ်အာဏာသိမ်းချိန်ကနေ ၂၀၂၅ ဧပြီ ၁၁ ရက်အထိ ဖမ်းဆီးခံထားရသူစုစုပေါင်း ၂၉,၀၃၀ ဦးရှိပြီး အဲ့ဒီထဲက ၂၂,၁၉၇ ဦး ထိန်းသိမ်းခံနေရဆဲဖြစ်တယ်လို့ နိုင်ငံရေးအကျဥ်းသားများကူညီစောင့်ရှောက်ရေးအသင်း – AAPP က ထုတ်ပြန်ပါတယ်။

စာတည်း – လင်း

မြေလတ်အသံ၊ ဇူလိုင် ၁၀၊ ၂၀၂၂။

ကရင်ပြည်နယ် ဘားအံအကျဉ်းထောင်က နိုင်ငံရေးအကျဉ်းသား ၆၀ဝန်းကျင်နဲ့ တိုက်ပိတ်ခံထားရသူ ၈ဦးကို မနေ့က ပဲခူးတိုင်း သာယာဝတီအကျဉ်းထောင်ကို ပြောင်းရွှေ့လိုက်တယ်လို့ ထောင်ဝန်ထမ်းတဦးဆီက သိရပါတယ်။

ထောင်ကြီးရဲ့ပြင်ပ သီးသန့်အဆောင်တွေကနေ အကျဆောင်ကို ရောက်လာတဲ့ ၁လပြည့် နေ့မှာပဲ သူတို့အားလုံးကို သာယာဝတီထောင်ကို မနေ့က ပို့လိုက်တာဖြစ်တယ်လို့ ထောင်ဝန်ထမ်းတဦးက ပြောပါတယ်။

” နိုင်ကျဉ်းတွေချည်းပဲ အကျဆောင်မှာ ချခံထားရတာ အားလုံး ၅၇ယောက်ရှိတယ်၊ တိုက်ပိတ်ခံရတဲ့ အကျဉ်းသား ၈ဦးပါတယ်၊ သူတို့ကတော့ ဘာပုဒ်မတွေဆိုတာ မသိရဘူး” လို့ ပြောပါတယ်။

သာယာဝတီထောင်ကို ပြောင်းရွှေ့ခံလိုက်ရတဲ့ အကျဆောင်(၄) က နိုင်ကျဉ်း ၅၇ ယောက်မှာ ပုဒ်မ ၅၂( က) နဲ့ ဆက်နွယ်ပြီး အမှုဖွင့်ခံထားရတဲ့ အကျဉ်းသားက ၃၇ယောက်၊ ပုဒ်မ ၁၂၄(က) နဲ့ ၁၄ယောက်၊ ၅၁(ဂ) ၃ယောက်၊ ၄၉(က) ၁ယောက်၊ ၅၀(စျ) ၁ယောက်အပါအဝင် ၅၀၅(က)/ ၁၉ (စ) နဲ့ ၁ယောက် စုစုပေါင်း ၅၇ ယောက်အပြင် တိုက်ပိတ်ခံရသူ ၈ယောက်တို့ဖြစ်ပါတယ်။

အခုပြောင်း‌ရွှေ့လိုက်တဲ့ သာယာဝတီအကျဉ်းထောင်က ခေတ်အဆက်ဆက် နိုင်ငံရေးအကျဉ်းသားတွေကို ဖိနှိပ်မှုအများဆုံးထောင်တွေထဲက တခုလည်းဖြစ်ပါတယ်။

အခုလို ဘားအံထောင်မှာ နိုင်ကျဉ်းတွေကို ထောင်ပြောင်းရွှေ့တာ ၂ကြိမ်ရှိပြီဖြစ်သလို ထောင်ဆူပူမှုလည်း ၂ကြိမ်ဖြစ်ခဲ့ဖူးပြီး နိုင်ကျဉ်း ၁၇ဦးအရေးယူခံရဖူးပါတယ်။