ရန်ပုံငွေ

မန္တလေး၊ မေ ၂၅၊ ၂၀၂၅။

လူငယ်တွေ‌‌‌‌‌‌‌‌ဦးစီးပြုလုပ်တဲ့ မန္တလေးက ငလျင်ရန်ပုံငွေပန်းချီပြပွဲကို စစ်ကေင်စီတပ်က ဝင်စီးနင်းပြီး ပန်းချီပညာရှင်တွေကိုဖမ်းဆီးသွားတယ်လို့ ဒေသခံတွေဆီက သိရပါတယ်။

မန္တလေး ၇၉ လမ်း၊ ၂၇ လမ်းနဲ့ ၂၈ လမ်းကြားက လက်ဖက်ရည်ဆိုင်အပေါ်ထပ်မှာပြုလုပ်မယ့် “နမ္မတီး” ငလျင်ဒဏ်သင့် ပြည်သူများကူညီရေးပန်းချီပြပွဲ၊ ပြိုင်ပွဲနဲ့ စာအုပ်ရောင်းချပွဲအတွက်ပြင်ဆင်နေချိန် မေ ၂၂ ရက်ညနေပိုင်းမှာ စစ်ကောင်စီတပ်က ဝင်ရောက်စီးနင်းပြီး ပြပွဲဦးဆောင်သူနဲ့ ပန်းချီဆရာတွေကို ဖမ်းဆီးသွားတာလို့ သိရပါတယ်။

“ငလျင် ဘေးသင့်ပြည်သူတွေကို ယာယီအိမ်တွေဆောက်ပေးဖို့ ပြုလုပ်တဲ့ပွဲပါ။ ပထမဆုံး ဖိတ်ထားတဲ့သူတွေကို ပွဲက ခွင့်ပြုချက်မရဘူးလို့ သတင်းကြားတာ။ အဲ့ဒီကနေ ‌‌‌‌‌‌‌‌‌‌‌‌‌‌‌‌‌‌‌‌‌‌ဆက်တိုက် အကုန်လိုက်ဖမ်းတာတဲ့။ အခု တော်တော်များများ အဖမ်းခံထားရတယ်။” လို့ ဖြစ်စဥ်ကိုသိရှိသူနဲ့ နီးစပ်သူတဦးက ပြောပါတယ်။

အဆိုပါပွဲကို မေ ၂၃ ရက်ကနေ ၂၈ ရက်အထိပြုလုပ်ဖို့ စီစဥ်ထားတာဖြစ်ပြီး အခုလိုစီးနင်းဖမ်းဆီးခံရတာကြောင့် ပွဲကိုဖျက်လိုက်ရတယ်လို့လည်း သိရပါတယ်။

စစ်ကောင်စီချန်နယ်တွေမှာတော့ ဒီပြပွဲနဲ့ပတ်သက်ပြီး နိုင်ငံတော်အလံပုံတူပန်းချီပေါ်မှာ နိုင်ငံတော်အကြည်ညိုပျက်စေတဲ့ပုံတွေ ရေးဆွဲကြောင်းသတင်းရတဲ့အတွက် အမှတ် ၈ ရဲစခန်းကိုခေါ်ဆောင်စစ်ဆေးရာ နောက်ဆက်တွဲအကြမ်းဖက်တွေကို ဖမ်းမိတယ်ဆိုပြီး ဖော်ပြထားပါတယ်။

လက်ရှိမှာ အမျိုးသား၊ အမျိုးသမီး ၆ ဦးဝန်းကျင်လောက် အမှတ် ၈ ရဲစခန်းမှာ ဖမ်းဆီးခံထားရတယ်လို့သိရပြီး နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေပါတယ်။

ဒါ့အပြင် ဒီဖမ်းဆီးမှုကြောင့် မေလနောက်ဆုံးပတ်ထဲမှာပြုလုပ်ဖို့စီစဥ်ထားတဲ့ ရန်ပုံငွေ ဂီတဖျော်ဖြေပွဲလည်း ရပ်နားလိုက်ရတယ်လို့ ဒေသခံတွေဆီကသိရပါတယ်။

မြေလတ်အသံ၊ မတ် ၂၃၊ ၂၀၂၃။

အာဏာသိမ်းပြီးနောက်ပိုင်းဖြစ်ပျက်ခဲ့တဲ့ ဖြစ်ရပ်အကြောင်းတရားတွေကို အခြေခံပြီးရိုက်ထားတဲ့ တော်လှန်ရေးရုပ်ရှင် ၂ ကားကို အမေရိကန်နိုင်ငံအပါအဝင် နိုင်ငံတကာမှာပြသပြီး အာဏာရှင်ဆန့်ကျင်ရေး ရန်ပုံငွေ ရှာဖွေသွားမှာ ဖြစ်ပါတယ်။

“မပြီးသေးဘူး ငါတို့အလှည့်ကျန်သေးတယ်” ရုပ်ရှင်နဲ့ “ရှိခဲ့သည်” ရုပ်ရှင်တွေကို ရိုက်ကူးခဲ့တဲ့ ဒါရိုက်တာ ဏကြီးနဲ့ ဂီဒေါင်တို့က မတ်လ ၂၃ ရက် ဒီနေ့မှာ စာနယ်ဇင်းတွေ့ဆုံပွဲ ပြုလုပ်ခဲ့ပါတယ်။

ဒါရိုက်တာဏကြီးရဲ့ “မပြီးသေးဘူး ငါတို့အလှည့်ကျန်သေးတယ်” ရုပ်ရှင်ဟာတော်လှန်ရေးထဲက ထိခတ်ရတဲ့ တကယ့်အဖြစ်ပျက်တွေကိုစုပြီး ပြန်လည်ရိုက်ကူးခဲ့တာဖြစ်ပြီး မီးလောင်ပြင်အခန်းအပါအဝင် အခန်းတိုင်းဟာ ရိုက်ကူးရတာ ခက်ခဲခဲ့ပေမယ့် လူတော်လူကောင်းတွေက ကူညီပေးလို့ ဒီရုပ်ရှင်ဖြစ်လာခဲ့တာလို့ ဒါရိုက်တာဏကြီးက ပြောပါတယ်။

ဒါရိုက်တာ ဂီဒေါင်ကတော့ ”ရှိခဲ့သည်” ဇာတ်ကားဟာ တကားလုံးကို Sony Xperia ဖုန်းတလုံးတည်းနဲ့ပဲ ရိုက်ကူးခဲ့ပြီး ပါဝင်သရုပ်ဆောင်ကြသူအားလုံးက Cobra Column က PDF ရဲဘော်တွေ ဖြစ်တယ်လို့ ပြောပါတယ်။

“ရှိခဲ့သည်” ရုပ်ရှင်ထဲမှာ ကရင်ပြည်နယ် ဖလူး သုံးထပ်ကွေ့ တိုက်ပွဲတပွဲကို အခြေခံထားပြီး ရဲဘော်တွေရဲ့ခံစားချက်တွေနဲ့ တိုက်ဆိုင်တဲ့ကဗျာတွေကိုပါ ထည့်သွင်းရိုက်ကူးထားတာ ဖြစ်တယ်လို့လည်း ဆိုပါတယ်။

အဲ့ဒီရုပ်ရှင်တွေကို အခုလ မတ်၂၆ ရက်ကစလို့ အမေရိကန်နိုင်ငံ ဖို့ဒ်ဝိန်းမြို့မှာ ပထမဆုံးပြသမှာဖြစ်ပြီး ကနေဒါ၊ ပြင်သစ်၊ ယူကေ၊ ဂျာမနီ၊ ဆွီဒင်၊ သြစတြေးလျ၊ ဂျပန်၊ တောင်ကိုရီးယား၊ ထိုင်ဝမ်၊ မလေးရှား စတဲ့ နိုင်ငံတွေအပြင် နိုင်ငံတကာမြို့ကြီးအချို့မှာ ပြသနိုင်ဖို့ စီစဥ်နေကြပြီ ဖြစ်ပါတယ်။

ရုပ်ရှင်တွေက ရလာမယ့် ဝင်ငွေအားလုံးကို အာဏာရှင်ဆန့်ကျင်ရေးအတွက် တိုက်ပွဲဝင်နေကြတဲ့ ပြည်သူ့ကာကွယ်ရေးတပ်ဖွဲ့တွေကို တိုက်ရိုက်ခွဲဝေ ထောက်ပံ့သွားမယ်လို့ သိရပါတယ်။

စာတည်း – ဇို