စဉ့်ကူး

မြေလတ်အသံ၊ ဇူလိုင် ၃၀၊ ၂၀၂၅။

မန္တလေးတိုင်း၊ စဉ့်ကူးမြို့နယ်၊ လက်ပန်လှရဲစခန်းနဲ့ ရွှေပန်းတောရွာ ဗုံးကြဲတိုက်ခိုက်ခံရတာကြောင့် အကျဉ်းသားတွေအပါအဝင် လူ ၂၄ ဦးသေဆုံးခဲ့တယ်လို့ ပြည်သူ့ကာကွယ်ရေးတပ်မတော် (မန္တလေး) က ဇူလိုင် ၃၀ ရက် ဒီနေ့မှာထုတ်ပြန်ပါတယ်။

ဇူလိုင် ၂၉ ရက်ညမှာ စစ်ကောင်စီတပ်က တိုက်ခိုက်ရေးလေယာဉ်နဲ့ လက်ပန်လှရဲစခန်းကို ဗုံးကြဲတိုက်ခိုက်ခဲ့ရာ ပြစ်ဒဏ်ကျအကျဉ်းသားတွေနဲ့ စစ်ဆေးနေဆဲ သံသယတရားခံ အမျိုးသား ၂၁ ဦး၊ အမျိုးသမီး ၁ ဦးသေဆုံးပြီး ၃၀ ခန့်ဒဏ်ရာရရှိခဲ့ပါတယ်။

အလားတူ ရွှေပန်းတောကျေးရွာကိုတိုက်ခိုက်မှုမှာ ပြည်သူအမျိုးသား ၁ ဦးနဲ့ အမျိုးသမီး ၁ ဦး တို့သေဆုံးခဲ့တယ်လို့ ထုတ်ပြန်ချက်က ဖော်ပြပါတယ်။

ပြီးခဲ့တဲ့ဇွန် ၉ ရက်ကလည်း စဉ့်ကူးမြို့ နယ်၊ ကျည်တောက်ပေါက်ကျေးရွာရှိ တိုက်နယ်ဆေးရုံကို စစ်ကောင်စီတပ်က တိုက်ခိုက်ရေးလေယာဉ် ၁ စီးနဲ့ဗုံးကြဲခဲ့တာကြောင့် အမျိုးသမီး ၁ ဦးသေဆုံးကာ ၃ ဦး ဒဏ်ရာရရှိခဲ့တယ်လို့ သိရပါတယ်။

ပြီးခဲ့တဲ့ ဇူလိုင် ၂၁ ရက်ကနေ ၂၄ ရက်အတွင်း မတ္တရာမြို့နယ် ထန်းပင်ကုန်းကျေးရွာ၊ ပုသိမ်ကြီးမြို့နယ် သရက်ကိုင်းကျေးရွာ၊ မြကန်သာကျေးရွာတို့ကို စစ်ကြောင်းထိုးလာတဲ့ စစ်ကောင်စီတပ်တွေကို တိုက်ခိုက်ခဲ့ရာ တိုက်ပွဲအတွင်း စစ်ကောင်စီတပ်တပ်ဖွဲ့ဝင် ၇ ဦး ရုပ်အလောင်းနဲ့အတူ လက်နက်ခဲယမ်းတွေ သိမ်းဆည်းရမိခဲ့တယ်လို့ သိရပါတယ်။

စာတည်း – လင်း

စဉ့်ကူး၊ ဧပြီ ၂၈၊ ၂၀၂၅။

မန္တလေးတိုင်း၊ စဉ့်ကူးမြို့ပေါ်က ဘုန်းတော်ကြီးကျောင်းနဲ့ စာသင်ကျောင်းဆောင်တို့ကို စစ်ကောင်စီတပ်က ဧပြီ ၂၇ ရက်မနက် ၁၀ နာရီကျော်မှာ လေကြောင်းက နေဗုံးကြဲတိုက်ခိုက်ခဲ့တယ်လို့ စဉ့်ကူးမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

မြို့ပေါ်ရှိ အထက်တန်းကျောင်းစာသင်ကျောင်းဆောင်နဲ့ မဟာဝေယံဘုံသာဘုန်းတော်ကြီးကျောင်းဆောင်တို့ကို ပေါင် ၂၅၀ ဗုံးသီး ၂ လုံးကြဲချခဲ့တာကြောင့် စာသင်ဆောင် ၁ ခုနဲ့ ဘုန်းကြီးကျောင်းထဲက သိမ်ခန်း ၂ ခု ပျက်စီးခဲ့တယ်လို့ ဆိုပါတယ်။

“သပ်သပ် ဘလိုင်းကြီးလာကြဲတာ။ ရဲဘော်တွေလည်းမရှိဘူး။ ဘာမှမရှိဘူး။ အဓိကဘုန်းကြီးကျောင်းနဲ့ စာသင်ကျောင်းမှာ ဘာဆိုဘာမှမရှိဘူး။ ပြည်သူတွေပဲရှိတာဗျ။ ပြည်သူတွေကို သတ်ချင်တာကြောင့် သပ်သပ်ကိုလာကြဲတာ”လို့ စဉ့်ကူးမြို့နယ်ပြည်သူ့ကာကွယ်ရေးအဖွဲ့မှ တာဝန်ခံက ပြောပါတယ်။

အထက်ပါဘုန်းတော်ကြီးကျောင်းနဲ့ စာသင်ကျောင်းဆောင်တို့မှာ မီတာ ၈၀၀ ခန့်ကွာဝေးပြီး ဗုံးကြဲတိုက်မှုအတွင်း လူအထိအခိုက်မရှိခဲ့ဘူးလို့သိရပါတယ်။

ပြီးခဲ့တဲ့ဧပြီ ၂၁ ရက်ကလည်း စဉ့်ကူးမြို့နယ်၊ အောက်ဇီးကုန်းကျေးရွာကို တိုက်ခိုက်ရေးလေယာဉ် ၁ စီးနဲ့ ဗုံးကြဲတိုက်ခိုက်ခဲ့ရာ ၅ လအရွယ်ကလေးငယ် ၁ ဦးနဲ့ အသက် ၆၀ အရွယ်အမျိုးသမီး ၁ ဦးတို့ အပါအဝင် ၄ ဦးဒဏ်ရာရရှိခဲ့ပြီး နွား ၁ ကောင်၊ ဝက် ၁ ကောင်သေဆုံးကာ လူနေအိမ် ၃လုံး ပျက်စီးခဲ့ပါသေးတယ်။

စာတည်း – လင်း