“ပခုက္ကူတပ်မ ၁၀၁ ကထွက်လာတာက စစ်ကြောင်းက ၂ ခုပေါင်း အင်အား ၅၀၀ ကျော် လောက်ရှိ မယ်။ ၁ ခုက ၂၈ ရက်နေ့ကတည်းက အောင်သာဘက်ကိုထွက်လာတာ ခုစစ်ကြောင်းက (ဧပြီ ၃၀) ညကမှခြေလျင်အင်အား ၁၅၀ လောက် စိုတွင်းဘက်ကို ထပ်ထွက်လာကြတာ။”လို့ အညာမြေ အရပ်ဖက် အဖွဲ့အစည်း (မြိုင်)မှ တာဝန်ရှိသူက ပြောပါတယ်။

ဧပြီ ၂၈ ရက်မှစတင်ထွက်လာတဲ့ပခုက္ကူတပ်မ ၁၀၁ မှကားတန်း ၁၅ စီး၊ အင်အား ၃၀၀ ပါ စစ်ကြောင်းက မနက် ၈ နာရီ ဝန်းကျင်မှာ ပခုက္ကူမြို့နယ်၊ အောင်သာရွာကို စစ်ကြောင်းထိုးဝင်ရောက် ခဲ့တဲ့အတွက် အောင်သာရွာအပါအဝင် ညောင်ပင်လှ၊ ဆယ်ပင်စု၊ ကမ္မရွာနဲ့ မြစ်ခြေရွာက ဒေသခံ ၁ သောင်းနီးပါး စစ်ရှောင်ခဲ့ကြရတယ်လို့ ဆိုပါတယ်။

မေ ၂ ရက်မနက်ပိုင်းမှာတော့ ခြေလျင်စစ်ကြောင်းက မြိုင်မြို့နယ်၊ သင်းပေါင်းကန်ရွာ အနောက်တောင်ဘက်မှာ တပ်စွဲနေကြပြီး ပခုက္ကူမြို့နယ်ထဲက စစ်ကြောင်းကတော့ အောင်သာရွာရဲ့ မြောက်ဘက်ကို ဆက်ထွက်နေပြီး ပြန်ပေါင်းမယ့်အနေအထားမရှိသေးဘူးလို့ သိရပါတယ်။

ဒါ့အပြင် မြိုင်မြို့နယ်အတွင်း ဒေသခံကာကွယ်ရေးတပ်တွေနဲ့ စစ်ကောင်စီတပ်တို့ ထိတွေ့တိုက်ပွဲတွေဖြစ်နေတယ်လို့ သိရပြီး စစ်ကောင်စီတပ်စွဲထားတဲ့ နေရာအနီးကနေလည်း လက်နက်ကြီးသံတွေကြားနေရတယ်လို့ ဒေသခံတဦးဆီကသိရပါတယ်။