မီးရှို့

ဆော၊ မေ ၂၆၊ ၂၀၂၆။

မကွေးတိုင်း၊ ဆောမြို့နယ်၊ ကျောက်ထုမြို့အနီးက ရွာသာရွာကို မေ ၂၆ ရက်ဒီမနက် ၇ နာရီခန့်မှာ စစ်ကော်မရှင်တပ်ဖွဲ့ဝင်တွေကမီးရှို့ခဲ့တယ်လို့ ဒေသခံတွေဆီက သိရပါတယ်။

တပြင်ရွာဘက်ကလာတဲ့ အင်အား ၃၀၀ ခန့်ပါစစ်ကော်မရှင်တပ်တွေက မီးတင်ရှို့နေတာဖြစ်ပြီး အပျက်အစီးများနိုင်တယ်လို့ ဆိုပါတယ်။

“မနေ့ညကတည်းက စစ်ကြောင်းက ရွာထဲရောက်ပြီး ဒီမနက်မီးရှို့နေတာ။ မီးကအခုချိန်ထိ လောင်နေတုန်းပါ။ အပျက်အစီးများနိုင်တယ်။ ရွာကလူတွေလည်း ပြေးနေကြရတယ်။”လို့ ဒေသခံတဦးက ပြောပါတယ်။

ရွာသာရွာမှာ အိမ်ခြေ ၁၅၀ ခန့်ရှိပြီး အိမ်ခြေထက်ဝက်နီးပါးမီးလောင်ပျက်စီးနိုင်ကာ စစ်ကြောင်းမထွက်သေးတာကြောင့် အသေးစိတ်မသိနိုင်သေးဘူးလို့ဆိုပါတယ်။

မေလ ၂၅ ရက်မှာ တပြင်ရွာကနေနောက်ထပ်ထွက်လာတဲ့ အင်အား ၁၅၀၀ ခန့်ပါစစ်ကြောင်းဟာလည်း အင်အားဖြန့်ခွဲပြီးနောက် အကြည်ရွာ၊ နသိုးရွာရောက်နေသလို ကျောက်ထုတပ်ထဲက ထွက်လာတဲ့ အင်အား ၈၀ ခန့်ပါ စစ်ကြောင်းဟာလည်း ငလွန်းကျေးရွာဘက်မှာ တပ်စွဲထားတယ်လို့ ဒေသခံတဦးက ပြောပါတယ်။

မေလ တတိယအပတ်ကစတင်ပြီး ပေါက်မြို့နယ်ကနေတဆင့် ဆက်တိုက်ဝင်လာနေတဲ့ စစ်ကော်မရှင်အဖွဲ့တွေဟာ ကျောက်ထုနယ်တဝိုက်မှာ အင်အား ၂,၀၀၀ ခန့်ထိရောက်ရှိနေပြီး စစ်အင်အားတွေကို ဖြန့်ချထားတယ်လို့ သိရပါတယ်။

ဒါ့အပြင် စစ်ကော်မရှင်စစ်ကြောင်းနဲ့ ဒေသကာကွယ်ရေးတပ်တွေလည်း ထိတွေ့တိုက်ပွဲဖြစ်ပြီး တိုက်ပွဲနဲ့ပတ်သက်တဲ့အခြေနေတွေကိုတော့ အတည်မပြုနိုင်သေးဘူးလို့ဆိုပါတယ်။

စစ်ကြောင်းရောက်နေတာကြောင့် တပြင်၊ ရွာသာ၊ နသို၊ ငလွန်း၊ အကြည်အပါအဝင် ကျေးရွာ ၁၀ ခန့်က ဒေသခံ ၈,၀၀၀ ကျော်ဘေးလွတ်ရာမှာတိမ်းရှောင်နေကြရတယ်လို့ သိရပါတယ်။

စာတည်း – လင်း

ပခုက္ကူ၊ မေ ၁၆၊ ၂၀၂၆။

မကွေးတိုင်း၊ ပခုက္ကူမြို့နယ်၊ မြစ်ခြေဒေသကိုစစ်ကြောင်းထိုးနေတဲ့ စစ်ကော်မရှင်တပ်ဖွဲ့ဝင်တွေဟာ အမျိုးသား ၁ ဦးကိုပစ်သတ်ပြီး ကျေးရွာ ၂ ရွာကိုလည်း မီးထပ်ရှို့ခဲ့တယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

မေလ ၁၄ ရက်မနက် ၁၀ နာရီခန့်မှာ အင်းဝိုင်းရွာထဲကိုဝင်လာတဲ့ စစ်ကော်မရှင်တပ်ဖွဲ့တွေဟာ ရွာထဲမှာရှိတဲ့ အသက် ၃၀ ကျော်အရွယ် အမျိုးသား ၁ ဦးကိုပစ်သတ်ခဲ့တယ်လို့ ဆိုပါတယ်။

“အလောင်းက ခုထိမကောက်ရသေးဘူး။ ရွာထဲမှာ သူတို့ရှိနေတယ်။ နွားစာဝင်ကျွေးတာမှာ ရှေ့ပြေးတွေနဲ့တိုးပြီး ပစ်သတ်ခံရတာ။ အဲ့နေ့မှာတင် ကျေးရွာ ၂ ရွာကို မီးထပ်ရှို့တာ”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

အဆိုပါ အမျိုးသားကိုပစ်သတ်ပြီးနောက် ညနေပိုင်းမှာပဲ အင်အား ၅၀ ခန့်က ရွာထဲမှာကျန်ခဲ့ပြီး ကျန်အင်အားတွေကတော့ မိုးနတ်ကုန်းရွာနဲ့ ထန်းတောခြောက်ကျေးရွာကို ခွဲထွက်ကာ မီးရှို့ခဲ့ကြတယ်လို့ ဆိုပါတယ်။

မီးရှို့ခံရတာကြောင့် အဲ့ဒီကျေးရွာ ၂ ရွာက အိမ်ခြေ ၅၀ ကျော် မီးလောင်ပျက်စီးနိုင်ပြီး မေလ ၁၆ ရက်အထိ ရွာတွေထဲမှာတပ်စွဲထားတာကြောင့် အပျက်အစီးစာရင်းကို မကောက်ယူနိုင်သေးဘူးလို့ ဆိုပါတယ်။

ထန်းတောချောက်ရွာနဲ့မြစ်ခြေမြို့ဟာ ချောင်းတခုသာခြားပြီး ဒေသကာကွယ်ရေးအဖွဲ့တွေက မြို့ကိုကာထားတာကြောင့် စစ်ကြောင်းမဝင်နိုင်သေးတဲ့အခြေအနေရှိနေပြီး မြစ်ခြေမြို့ပေါ်ထိ စစ်ကြောင်းထိုးဖို့ရည်ရွယ်ထားတယ်လို့ သိရကြောင်းလည်း ဒေသကာကွယ်ရေးအဖွဲ့ဝင်တဦးက ပြောပါတယ်။

ရေလမ်းကြောင်းကလာတဲ့ ညောင်ဦးအခြေစိုက် ခလရ ၄၁၅ တပ်က အင်အား ၁၅၀ ကျော်ပါ စစ်ကြောင်းနဲ့ ကုန်းလမ်းကလာတဲ့ ပခုက္ကူ တပ်မ ၁၀၁၊ အောင်လံမြို့ကပျူစောထီး စုစုပေါင်း၂၅၀ ခန့်ဟာ မေ ၁၀ ရက်ကစတင်ပြီး မြစ်ခြေဒေသကိုစစ်ကြောင်းထိုးလာခဲ့တာလို့ ဆိုပါတယ်။

အဲ့ဒီနေ့ကနေ မေလ ၁၄ ရက်မနက်ပိုင်းအထိ လက်ပံကျွန်း၊ ကူကျွန်း၊ နံကပ်၊ ဥယျဥ်ရွာ၊ ညောင်ပင်၊ အင်းဝိုင်းရွာတို့ကိုလည်းမီးရှို့ခဲ့တာကြောင့် အိမ်ခြေ ၁,၀၀၀ နီးပါး မီးလောင်ပျက်စီးခဲ့ရပြီး လက်ပံကျွန်း၊ ကူကျွန်း၊ နံကပ်၊ ဥယျဥ်ရွာ၊ ညောင်ပင်၊ အင်းဝိုင်းရွာတွေအပါအဝင် ကျေးရွာပေါင်း ၁၅ ရွာက ဒေသခံပြည်သူ ၁၀,၀၀၀ ကျော်ထွက်ပြေးနေရတယ်လို့ သိရပါတယ်။

စာတည်း – လင်း

ကနီ၊ မေ ၁၄၊ ၂၀၂၆။

စစ်ကိုင်းတိုင်း၊ ကနီမြို့နယ်အတွင်းက ကျေးရွာတွေကို စစ်တပ်က စစ်ကြောင်းထိုးမီးရှို့နေတယ်လို့ ဒေသခံတွေဆီက သိရပါတယ်။

မေလ ၁၂ ရက်မှာ ကနီမြို့ကနေထွက်ခွာလာတဲ့ အင်အား ၁၅၀ ပါ စစ်ကြောင်းဟာ မင်းကုန်းရွာကို ဝင်ရောက်မီးရှို့ခဲ့ပြီးနောက် မေလ ၁၄ ရက် ဒီကနေ့မနက်ပိုင်းမှာ မုဌောအရှေ့ရွာနဲ့ မုဌောအနောက်ရွာတွေကို ဆက်တိုက်မီးရှို့ခဲ့ပြီး ချောင်းမရွာမှာတပ်စွဲထားတဲ့စစ်ကြောင်းကလည်း မေလ ၁၃ ရက်မှာ သမင်ခြံရွာကို မီးတင် ရှို့ခဲ့တယ်လို့ ဆိုပါတယ်။

“သမင်ခြံ၊ မုဌောအရှေ့(ရွာ)၊ အနောက်(ရွာ)၊ ဘယ်လောက်ပါသွားလဲတော့ မသိရသေးဘူး၊ (မေ ၁၄) မနက်က မုဌောအနောက်ရွာကို ထပ်ရှို့သေးတယ်၊ မနေ့က မနက်ခင်းပိုင်းကတည်းက ရှို့နေတာ၊ အခုမနက်ထိပဲ” လို့ ဒေသခံတဦးက မြေလတ်အသံကို ပြောပါတယ်။

ကနီမြို့နယ်ကို စစ်ကော်မရှင်တပ်က ဧပြီ ၂၃ ရက်ကစလို့ မုံရွာ-ယာကြီး-ကလေးဝ လမ်းတလျှောက် စစ်ကြောင်းထိုးခဲ့တာဖြစ်ပြီး သောင်းနဲ့ချီတဲ့ ဒေသခံတွေလည်း စစ်ဘေးရှောင်နေရကာ မေလ ၁၁ ရက်မှာ ဒေသခံတွေရဲ့ လှည်းနဲ့နွားတွေယူဆောင်ကာ ပြန်လည်ထွက်ခွာခဲ့ပြီး မေလ ၁၂ ရက်မှာ တကျော့ပြန်စစ်ကြောင်းထိုး မီးရှို့နေတာပါ။

မေလ ၁၀ ရက်က ယင်းမာပင်မြို့နယ်၊ ဘန့်ဘွေး ပျူစောထီးရွာကနေ ကနီမြို့နယ်၊ ချောင်းမရွာကို ဦးတည် လာတဲ့စစ်ကြောင်းတွေ မိုင်းဆွဲတိုက်ခိုက်ခံခဲ့ရပြီးနောက် အခုလို တကျော့ပြန်စစ်ကြောင်းထိုးလာတာလည်း ဖြစ်ပါတယ်။

ဆိပ်ဖြူ၊ ဧပြီ ၃၀၊၂၀၂၆။

မကွေးတိုင်း၊ ပခုက္ကူခရိုင်၊ ဆိပ်ဖြူမြို့နယ်၊ ဇီးဖြူကောင်းရွာနဲ့ ရေပုတ်ရွာတွေက နေအိမ်တွေကို စစ်ကော်မရှင်တပ်ကမီးရှို့ခဲ့တာကြောင့် ဒေသခံတွေ အရေးပေါ်အကူအညီတွေလိုအပ်နေတယ်လို့ ဒေသခံတွေဆီက သိရပါတယ်။

ဧပြီ ၂၅ ရက် နေ့လယ် ၁ နာရီဝန်းကျင်ကစတင်ပြီး အင်အား ၁၀၀ ကျော်ပါ စစ်ကော်မရှင်တပ်ဖွဲ့ဝင်တွေက အထက်ပါကျေးရွာတွေကို တပြိုင်တည်းဝင်ရောက်မီးရှို့ခဲ့တာကြောင့် နေအိမ် ၈၇ လုံးခန့် မီးလောင်ပျက်စီးခဲ့တာလို့ ပခုက္ကူခရိုင် အမှတ် ၁၉ တပ်ရင်းရဲ့ တာဝန်ရှိသူက ဆိုပါတယ်။

“အခုလက်ရှိအခြေအနေက အားလုံးရှောင်နေရတယ်၊ ယာယီဖြစ်မလား၊ ရေရှည်ဖြစ်မလားက စစ်ရေးအပေါ် မူတည်နေတယ်၊ အရေးပေါ် (လိုအပ်တာ)က မိုးကာ၊ အိုးခွက်၊ အိမ်သုံးပစ္စည်းတွေနဲ့ ရိက္ခာပေါ့”လို့ အထက်ပါတာဝန်ရှိသူက မြေလတ်အသံကိုပြောပါတယ်။

အဲ့ဒီကျေးရွာ ၂ ရွာက ဒေသခံ ၁,၀၀၀ ခန့်ဟာ မီးမလောင်ဘဲကျန်ခဲ့တဲ့ အိမ်တွေမှာ ယာယီနေထိုင်တာတွေရှိသလို အမိုးအကာမရှိဘဲ ရွာအပြင်တွေမှာနေထိုင်ကြရတဲ့ လူဦးရေအများအပြားရှိနေတယ်လို့ ဆိုပါတယ်။

ဒါ့အပြင် စစ်ကော်မရှင်တပ်ဖွဲ့ဝင်တွေက ကြက်သွန်ဂိုဒေါင်တွေကိုပါမီးရှို့ခဲ့တာကြောင့် ကြက်သွန်တင်း ၇၀,၀၀၀ မြန်မာငွေ သိန်း ၁ ထောင်နီးပါး မီးလောင်ဆုံးရှုံးခဲ့တယ်လို့ဆိုပါတယ်။

“လက်ရှိ နေစရာက ဖြစ်သလိုပဲနေနေရတာပေါ့လေ။ အစားအသောက်ကိုကျ ဘေးရွာတွေက ကူညီကြပါတယ်”လို့ ဒေသခံဖြစ်သူ ကိုဟိန်းက ပြောပါတယ်။

မီးဘေးသင့်ဒေသခံတွေထဲမှာ သက်ကြီးပိုင်းတွေလည်းပါတာကြောင့် ဆေးကုသမှုအကူအညီတွေလည်း လိုအပ်နေတယ်လို့ အထက်ပါဒေသခံကဆိုပါတယ်။

ဆိပ်ဖြူမြို့နယ်၊ ဇီးဖြူကောင်းရွာနဲ့ ရေပုတ်ရွာတွေကို ဆိပ်ဖြူမြို့နယ်အခြေစိုက် အမှတ် ၂၁ ကာကွယ်ရေးပစ္စည်းထုတ်စက်ရုံ၊ အမှတ် ၉ လေကြောင်းရန်ကာကွယ်ရေး စစ်ဆင်ရေးကွပ်ကဲမှုဌာနချုပ်နဲ့ အမှတ် ၂၀၃၆ လေကြောင်းရန်ကာကွယ်ရေးတပ်ရင်းတို့ ပူးပေါင်းထားတဲ့ အင်အား ၁၀၀ကျော်ပါစစ်ကြောင်းက မီးရှို့ခဲ့တာဖြစ်တယ်လို့ ပခုက္ကူခရိုင် အမှတ် ၁၉ တပ်ရင်းက သတင်းထုတ်ပြန်ပါတယ်။

စာတည်း – လင်း

မကွေး၊ ဧပြီ ၂၈၊ ၂၀၂၆။

မကွေးတိုင်း၊ ပခုက္ကူခရိုင်၊ ဆိပ်ဖြူမြို့နယ်၊ ဇီးဖြူကောင်းရွာနဲ့ ရေပုတ်ရွာကနေအိမ်တွေကို စစ်ကော်မရှင်တပ်က မီးရှို့ခဲ့တယ်လို့ ဒေသခံနဲ့ ကာကွယ်ရေးတပ်ဖွဲ့ဝင်တွေဆီက သိရပါတယ်။

ဧပြီ ၂၅ ရက် နေ့လယ် ၁ နာရီဝန်းကျင်ကစတင်ပြီး အင်အား ၁၀၀ ကျော်ပါ စစ်ကော်မရှင်တပ်ဖွဲ့ဝင်တွေက အထက်ပါကျေးရွာတွေကို တပြိုင်တည်းဝင်ရောက်မီးရှို့ခဲ့တာလို့ ဆိုပါတယ်။

“၁ နာရီပတ်ဝန်းကျင်လောက်မှာ မီးရှို့တာပေါ့၊ စရှို့တာမြင်ရတာ ရေပုတ်ကတော့ စပြီးမီးခိုးထွက်တာပေါ့၊ လူကတော့ အထိခိုက်မရှိပါဘူး။ စစ်ကြောင်းက ရေပုတ်နဲ့ ဇီးဖြူကောင်း ၃ နေရာလောက်ခွဲဝင်တာ၊ ရေပုတ်ကအနောက်ဘက်မှာ ဇီးဖြူကောင်းကအရှေ့ဘက်မှာ နီးတယ်။ သူတို့ မဝင်ခင် လက်နက်ကြီး ၁ ချက်ပစ်တယ်”လို့ ဇီးဖြူကောင်းကျေးရွာ ဒေသခံတဦးက ပြောပါတယ်။

မီးရှို့တာကြောင့် ဇီးဖြူကောင်းကျေးရွာက နေအိမ် ၆၉ လုံးနဲ့ ရေပုတ်ကျေးရွာက နေအိမ် ၁၈ လုံး မီးလောင်ပျက်စီးခဲ့ပြီး ဒေသခံတွေထိခိုက်မှုမရှိခဲ့ဘဲ လက်ရှိမှာတော့တိမ်းရှောင်နေကြရတယ်လို့ ပခုက္ကူခရိုင် အမှတ်၁၉ တပ်ရင်းရဲ့ တာဝန်ရှိသူက ပြောပါတယ်။

“တိမ်းရှောင်နိုင်ခဲ့ပါတယ်၊ စစ်ကြောင့် ထိခိုက်မိတာမျိုး မရှိပါဘူး၊ အကုန်ဘေးကင်းပါတယ်၊ အခု လက်ရှိအခြေအနေက အားလုံးရှောင်နေရတယ်၊ ယာယီဖြစ်မလား၊ ရေရှည်ဖြစ်မလားက စစ်ရေးအပေါ် မူတည်နေတယ်”လို့ သူကပြောပါတယ်။

အဲ့ဒီစစ်ကြောင်းဟာ ဆိပ်ဖြူမြို့နယ်အခြေစိုက် အမှတ် ၂၁ ကာကွယ်ရေးပစ္စည်းထုတ် စက်ရုံ၊ အမှတ် ၉ လေကြောင်းရန်ကာကွယ်ရေး စစ်ဆင်ရေးကွပ်ကဲမှုဌာနချုပ်နဲ့ အမှတ် ၂၀၃၆ လေကြောင်းရန် ကာကွယ်ရေးတပ်ရင်းတို့ ပူးပေါင်းထားတာလို့ ပခုက္ကူခရိုင် အမှတ် ၁၉ တပ်ရင်းက သတင်းထုတ်ပြန်ပါတယ်။

ပြီးခဲ့တဲ့ ဧပြီ ၂၀ ကလည်း မကွေးမြို့နယ်၊ ညောင်ပင်ရွာနဲ့ ကျွန်လှရင်ရွာတို့ကို စစ်ကော်မရှင်တပ်က မီးရှိုဖျက်ဆီးခဲ့တာကြောင့် နေအိမ်တွေပျက်စီးခဲ့ပါသေးတယ်။

သတင်း – ဇော်၊ စာတည်း – လင်း

■ နေအိမ် ၅၀၀ ထက်မနည်း ပျက်စီးပြီး ဒေသခံ ၃ ဦးလည်း အသတ်ခံထားရ

မြေလတ်အသံ၊ ဧပြီ ၂၂၊ ၂၀၂၆။

စစ်ကိုင်းတိုင်း၊ ယင်းမာပင်မြို့နယ်နဲ့ ပုလဲမြို့နယ်ထဲကကျေရွာတွေကို စစ်ကော်မရှင်တပ်ကအင်အားသုံး စစ်ကြောင်းထိုးမီးရှို့နေတာကြောင့် ဒေသခံသောင်းနဲ့ချီ ထွက်ပြေးတိမ်းရှောင်နေကြရတယ်လို့ ဒေသခံတွေဆီက သိရပါတယ်။

အင်အား ၆၀၀ ဝန်းကျင်ပါတဲ့ စစ်ကော်မရှင် စစ်ကြောင်းဟာ မတ်လ ပထမပတ်ကနေ ဧပြီ ၂၂ ရက်အတွင်း ယင်းမာပင်မြို့နယ်ထဲက ရွာ ၆ ရွာ ကို စစ်ကြောင်းထိုးမီးရှို့ခဲ့တာလို့ ဆိုပါတယ်။

“မီးရှို့ခံရတဲ့ ရွာတွေလည်းမနည်းဘူး၊ လယ်ငေါက်တို့ တမာပင်ခွတို့ဆို ရွာကြီးတွေပဲ၊ လည်ငေါက်ဆို ရွာလုံးကျွတ် နီးနီးပဲ၊ အရင်တခါကလည်း ရှို့ခံထားရတာ၊ စစ်ရှောင်ရတဲ့ ရွာကလည်း ၃၀ ကျော်လောက် ရှိမှာ၊ ၂ မြို့နယ်စလုံး ရှောင်နေရတာပဲ။” လို့ ဒေသခံတဦးက မြေလတ်အသံကို ပြောပါတယ်။

ဧပြီ ၁၂ ရက်၊ ၁၅ ရက်၊ ၁၆ ရက်နဲ့ ၁၉ ရက်တွေမှာ ယင်းမာပင်မြို့နယ်ထဲက လည်ငေါက်၊ တမာပင်ခွ၊ အေးကုန်း၊ ငါးမောင်း၊ ဗြဟ္မဒက်နဲ့ လက်တောင်းငယ် ရွာတွေကို မီးရှို့ဖျက်ဆီးခဲ့တာကြောင့် စုစုပေါင်းအိမ်ခြေ ၅၀၀ ထက်မနည်း ပျက်စီးနိုင်တယ်လို့လည်း အထက်ပါဒေသခံက ပြောပါတယ်။

ဒါ့အပြင် ပုလဲမြို့နယ်၊ အလယ်ဘုံ၊ ချောင်းကန်နဲ့ ရိုးရွာက သက်လတ်ပိုင်း အမျိုးသား ၃ ဦးကိုလည်း ဧပြီ ၁၀ ရက်မှာ အဆိုပါစစ်ကြောင်းက သတ်ဖြတ်ခုတ်ထစ်ပြီး ချောင်းကန်ရွာမှာ ထားခဲ့သေးတယ်လို့ ပုလဲမြို့နယ်ဒေသခံတွေဆီ သိရပါတယ်။

ဒါ့အပြင် စစ်ကြောင်းဟာ ဧပြီ ၁၂ ရက်မှာ ယင်းမာပင်မြို့နယ်၊ လည်ငေါက်ရွာအနီးကာကွယ်ရေးတပ်တွေနဲ့ တိုက်ပွဲဖြစ်ခဲ့ ပြီး စစ်ကော်မရှင်တပ်ဖွဲ့ဝင်တချို့သေဆုံးခဲ့တယ်လို့လည်း သိရပါတယ်။

“(ဧပြီ ၂၀) ဒီနေ့မှ ရွာနားကပ်ရင်း ရွာအနောက်ဖက်က ၂ လောင်းတွေ့ခဲ့တာ၊ ရေမြောင်းတွေထဲဆိုတော့ ပိန်းရွက်တွေနဲ့ ရှုပ်နေတာ၊ အဲဒီထဲ ပစ်ထားခဲ့တာ၊ ထပ်ရှိဦးမယ်ထင်တယ်၊ အလောင်းတွေတောင် ပြန်သယ်မသွားကြဘူး။” လို့ ဒေသခံတဦးက မြေလတ်အသံကို ပြောပါတယ်။

စစ်ကြောင်းထိုးမီးရှို့နေ့စဥ်အတွင်းမှာလည်း အနောက်မြောက်တိုင်းစစ်ဌာနချုပ် – နမခကနေ ပါရာမော်တာ၊ ဂျိုင်ရိုကော်ပတာ၊ တိုက်ခိုက်ရေး လေယာဉ်တွေနဲ့ လေကြောင်းတိုက်ခိုက်မှုတွေ ပြုလုပ်ခဲ့တယ်လို့ သိရပါတယ်။

အဆိုပါစစ်ကြောင်းကြောင့် ပုလဲမြို့နယ်က ရင်ပေါင်တိုင်၊ ပုထိုးသာအပါ အနီးဝန်းကျင်ရွာတွေနဲ့ ယင်းမာပင်မြို့နယ်က တမာပင်ခွ၊ လည်ငေါက်၊ သရက်ကန်၊ ငါးမောင်း၊ အေးကုန်း၊ လက်တောင်းငယ်၊ ဇီးတောတောင်ရွာ၊ ဇီးတောမြောက်ရွာ၊ ဗြဟ္မဒက်၊ ဆင်တဲ၊ ဆင်စွယ်၊ ဝါးရုံ စတဲ့ရွာတွေအပါ ကျေးရွာပေါင်း ၃၀ ကျော်က ဒေသခံ ၂ သောင်းထက်မနည်း စစ်ဘေးရှောင်နေရတယ်လို့ ဒေသခံ တွေဆီက သိရပါတယ်။

လက်ရှိမှာ အဆိုပါအင်အား ၆၀၀ ဝန်းကျင်ပါစစ်ကြောင်းထဲက တချို့ကတော့ ဧပြီ ၂၁ ရက်မနေ့ကည ၇ နာရီမှာ ပုလဲမြို့နယ်၊ ရင်ပေါင်တိုင်ရွာကနေ ယင်းမာပင်မြို့ထဲကို စစ်ယာဥ်တန်းနဲ့ပြန်ခွဲထွက်သွားတယ်လို့ သိရပြီး ကျန်တပ်ဖွဲ့ဝင်တွေကတော့ ရင်ပေါင်တိုင်ရွာနဲ့ ဆင်စွယ်ရွာမှာပဲ ရှိနေသေးတယ်လို့ သိရပါတယ်။

စာတည်း – လင်း