စစ်ကြောရေး

ပဲခူး၊ မေ ၂၉၊ ၂၀၂၃။

ပဲခူးတိုင်း၊ ဒိုက်ဦးနဲ့ပဲခူးမြို့အကြားရှိ ကျိုက်စကောအကျဉ်းထောင်ကနေ စစ်ကောင်စီတပ်က ခေါ်ထုတ်သွားတဲ့ နိုင်ငံရေးအကျဉ်းသားတွေထဲက ပဲခူးမြို့ပြည်သူ့ကာကွယ်ရေးတပ်ဖွဲ့-BDF လေ့ကျင့်စုဆောင်းရေးတာဝန်ခံ သေဆုံးသွားတယ်လို့ သိရပါတယ်။

သေဆုံးသွားသူဟာ အသက် ၃၀ နှစ်ဝန်းကျင် ပဲခူးပကဖ လေ့ကျင့်စုဆောင်းရေးတာဝန်ခံ ကိုသန့်ဇင်ဝင်း ဆိုသူဖြစ်ပြီး မေလ ၂၅ ရက်နေ့က သူနဲ့အတူနိုင်ကျဉ်း ၃ ဦးကို ခေါ်ထုတ်သွားပြီးနောက် မေလ ၂၈ ရက် မနေ့မှာ သေဆုံးသွားတာကို အတည်ပြုနိုင်ခဲ့တယ်လို့ Bago Region PDF ပြန်ကြားရေးတာဝန်ခံက မြေလတ်အသံကို ပြောပါတယ်။

“ကိုသန့်ဇင်ဝင်း ကျဆုံးသွားတယ်ဆိုတာ အတည်ပြုနိုင်တာက မနေ့ကပါ။ စစ်တပ်ဘက်က သူ့မိသားစုကို အပူရှပ်သေတယ်ဆိုပြီး အကြောင်းကြားတယ်လို့သိရတယ်။ ဒါပေမယ့်ကျနော်တို့ ဖရဲသီးဆီက ပြန်သိရတဲ့သတင်းအရတော့ ဦးခေါင်းကျည်ဖောက်ဝင်ဒဏ်ရာနဲ့သေတယ်လို့ သိရတယ်။ အလောင်းကိုလည်း မိသားစုက ပြန်မရဘူး” လို့ ပြောပါတယ်။

မေလ ၂၅ ရက်နေ့မှာ ကျိုက်စကောထောင်ကနေ ကိုသန့်ဇင်ဝင်းပါ နိုင်ကျဉ်း ၃ ဦးကို စစ်ဆေးစရာရှိတယ်ဆိုကာ စစ်တပ်ဘက်က ခေါ်ထုတ်သွားခဲ့ပြီးနောက် ကိုသန့်ဇင်ဝင်း သေဆုံးသွားခဲ့ပြီး ဘာကြောင့်သေဆုံးခဲ့တယ်ဆိုတာကိုတော့ မြေလတ်အသံက အတည်မပြုနိုင်သေးသလို ကျန် နိုင်ကျဉ်း ၂ ဦးရဲ့အခြေအနေကိုတော့ မသိရသေးပါဘူး။

ကိုသန့်ဇင်ဝင်းသေဆုံးမှုနဲ့ပတ်သက်ပြီး ပဲခူးမြို့နယ်ပြည်သူ့ကာကွယ်ရေးတပ်ဖွဲ့-BDF က မေလ ၂၇ ရက်စွဲနဲ့ သဘောထားထုတ်ပြန်ထားပြီး ကျိုက်စကောထောင်ကနေ စစ်တပ်ခေါ်ထုတ်သွားတဲ့ နိုင်ငံရေးအကျဉ်းသားတွေ အသက်အန္တရာယ်ရင်ဆိုင်နေရကာ စိုးရိမ်ရတယ်လို့ဆိုပါတယ်။

ကိုသန့်ဇင်ဝင်းဟာ ၂၀၂၁ ခုနှစ်၊ ဒီဇင်ဘာလ ၁၄ ရက်နေ့က ပဲခူးမြို့နယ်အတွင်းမှာပဲ အခြားပဲခူးပကဖအဖွဲ့ဝင်တွေနဲ့အတူ စစ်ကောင်စီတပ်တွေရဲ့ ဖမ်းဆီးတာခံလိုက်ရပြီးတဲ့နောက် အကြမ်းဖက်မှုတိုက်ဖျက်ရေး ဥပဒေပုဒ်မ ၅၁၊ ၅၂၊ ၅၄ တွေအပါအဝင် အခြားပုဒ်မတွေနဲ့ ထောင်ဒဏ် နှစ် ၈၀ ကျော် ချမှတ်ခံထားရသူ ဖြစ်ပါတယ်။

မေလ ၂၅ ရက်ကစတင်လို့ ကျိုက်စကောအကျဉ်းထောင်နိုင်ငံရေးအကျဉ်းသားတွေကို စစ်တပ်က ခေါ်ထုတ်စစ်ဆေးမှုတွေလုပ်ဆောင်နေတာဟာ ၂၀ ဦးထက်မနည်းရှိပြီဖြစ်ပြီး အဲ့ဒီနိုင်ကျဉ်းတွေလည်း အကျဉ်းထောင်ကို ပြန်မရောက်သေးတဲ့အပြင် ဘယ်နေရာမှခေါ်ယူစစ်ဆေးနေတယ်ဆိုတာကိုလည်း အဆက်အသွယ်မရလို့ အသက်အန္တရာယ်စိုးရိမ်နေရတယ်လို့ ဆိုပါတယ်။

စာတည်း – ရင်ငြိမ်း

ပဲခူး၊ မေ ၂၇၊ ၂၀၂၃။

ပဲခူးတိုင်းဒေသကြီး၊ ဒိုက်ဦးမြို့နယ်နဲ့ ပဲခူးမြို့နယ်ကြားမှာရှိတဲ့ ကျိုက်စကောအကျဥ်းထောင်ကနေ ပကဖနဲ့ ဆက်စပ်နေတယ်ဆိုတဲ့ နိုင်ငံရေးအကျဥ်းသား ၂၀ ခန့်ကို စစ်တပ်ကခေါ်ထုတ်သွားလို့ အသက်အန္တရာယ်စိုးရိမ်နေကြပါတယ်။

ယနေ့ မေလ ၂၇ ရက် နေ့လည်ပိုင်းမှာ ပဲခူးမြို့နယ်ပကဖနဲ့ဆက်စပ်နေတယ်ဆိုပြီး ဖမ်းဆီးခံထားရသူ ၂၀ ဦးကို စစ်ကောင်စီဘက်က ခေါ်ထုတ်သွားသေးတယ်လို့ ပဲခူးတိုင်းပြည်သူ့ကာကွယ်ရေးတပ်ဖွဲ့ထံက သိရပါတယ်။

“ဘယ်ခေါ်သွားမှန်းလည်း ဘယ်သူမှ မသိရဘူးဆိုတော့ သူတို့ရဲ့ အသက်အန္တရာယ်အတွက် မိသားစုဝင်တွေက စိုးရိမ်နေရသလို ကျနော်တို့ဘက်ကလည်း စိုးရိမ်နေရတယ်။ သူတို့ဘယ်တွေရောက်ပြီး ဘယ်လိုတွေ နှိပ်စက်ခံနေရလဲဆိုတာသိရဖို့တော့ စုံစမ်းနေဆဲပါ” လို့ ပဲခူးတိုင်းပြည်သူ့ကာကွယ်ရေးတပ်ဖွဲ့ ပြန်ကြားရေးတာဝန်ရှိသူက ပြောပါတယ်။

မေလ ၂၀ ရက်လောက်ကစတင်ကာ စစ်ကောင်စီတပ်ဘက်က ကျိုက်စကောအကျဥ်းထောင်ထဲက နိုင်ငံရေးအကျဥ်းသားတွေကို ရက်ခြားဆိုသလိုခေါ်ထုတ်သွားပြီး အကျဥ်းထောင်ထဲပြန်ရောက်မလာလို့ မိသားစုဝင်တွေနဲ့အတူ စိုးရိမ်နေကြရတာပါ။

“တောင်ငူထောင်က ထွက်ပြေးတဲ့ဖြစ်စဥ် ဖြစ်ပြီးကတည်းက ရက်ခြားဆိုသလို စကစဘက်က စစ်ကြောရေးဆိုပြီး မတရားဖမ်းဆီးခံထားရတဲ့ နိုင်ငံရေးအကျဥ်းသားတွေကို လာခေါ်သွားတယ်။ ခေါ်သွားခံရတဲ့ သူတွေကလဲ ခုထိထောင်ကို ပြန်ရောက်မလာကြဘူး။” လို့ ပြန်ကြားရေးတာဝန်ရှိသူက ပြောပါတယ်။

အခုလို စစ်ကောင်စီဘက်က အကျဥ်းသားအခွင့်အရေးကို ချိုးဖောက်နေလို့ လက်ခံနိုင်စရာမရှိသလို နှိပ်စက်သတ်ဖြတ်ခံရမှာကို စိုးရိမ်နေရပြီး စစ်ကောင်စီဘက်က ခေါ်ထုတ်သွားသူတွေဟာ ထောင်ဒဏ်ချမှတ်ခံထားရပြီးသား အမျိုးသားနိုင်ငံရေးအကျဉ်းသားတွေ ဖြစ်ပါတယ်။

ကျိုက်စကောအကျဥ်းထောင်မှာ နိုင်ငံရေးအကျဥ်းသား ၁၀၀ ကျော်ရှိနေပြီး အများစုမှာ စစ်ကောင်စီဘက်က နှစ်ရှည်ထောင်ဒဏ်ချမှတ်ခံထားရသူတွေဖြစ်တယ်လို့ သိရပါတယ်။

အလားတူ မြင်းခြံထောင်က ပြစ်ဒဏ်ချမှတ်ခံရပြီးသား နိုင်ငံရေးအကျဉ်းသား ၁၀ ဦးထက်မနည်းကိုလည်း စစ်ကောင်စီတပ်က အင်အားသုံးခေါ်ထုတ်ပြီး စစ်ကြောရေးပို့ဆောင်ထားလို့ အသက်အန္တရာယ်စိုးရိမ်နေ ရတယ်လို့ သိရပါတယ်။

ဒါ့အပြင် တောင်ငူထောင်က အကျဥ်းသားတွေထွက်ပြေးသွားတဲ့ ဖြစ်ရပ်ကြောင့် ထောင်တွေမှာ အကျဥ်းသားတွေကို စည်းကမ်းတင်းကြပ်တာတွေ ပြန်လုပ်လာတယ်လို့ ဆိုပါတယ်။

စာတည်း – 007

ပြည်၊ မတ် ၁၃၊ ၂၀၂၃။

ပဲခူးတိုင်းဒေသကြီး(အနောက်ပိုင်း)၊ ပြည်မြို့၊ မင်းကြီးတောင်ပေါ်ရှိ စစ်ဘက်ဆိုင်ရာလုံခြုံရေးတပ်ဖွဲ့ရုံးမှာ ဗုံးပေါက်ကွဲမှုဖြစ်ပွားပြီး၊ တပ်ဖွဲ့ဝင် ၄ ဦးသေဆုံးခဲ့တယ်လို့ ဌာနဆိုင်ရာဝန်ထမ်းတချို့ထံက သိရသည်။

ပြီးခဲ့တဲ့ မတ်လ ၁၂ ရက်နေ့ ညနေပိုင်းက ပြည်မြို့၊ မင်းကြီးတောင်ပေါ်မှာ ရှိတဲ့ စစ်ဘက်ဆိုင်ရာလုံခြုံရေးတပ်ဖွဲ့ရုံးမှာ ပေါက်ကွဲမှုဖြစ်ပွားခဲ့တာဖြစ်ပြီး အဲဒီနေရာဟာ စစ်အာဏာရှင်အဆက်ဆက် စစ်ကြောရေးလုပ်ရာနေရာဖြစ်ပြီး ဒကစ အကြီးပိုင်းများ လာရောက်လေ့ရှိကာ စစ်တပ်မိသားစုလိုင်းခန်းများ ပတ်လည်ဝိုင်းထားရာ နေရာလည်း ဖြစ်တယ်လို့ ဆိုပါတယ်။

“မနေ့ကညနေက ပေါက်ကွဲမှု ဖြစ်တယ်။ သူတို့ဗုံးနဲ့သူတို့ပေါက်ကွဲတယ်လို့ ကနဦးသိထားတယ်။ ၃ ဦးကတော့ ချက်ချင်းသေပြီး ၁ ဦးကတော့ ဆေးရုံရောက်မှ သေတယ်လို့ ကြားတယ်။ အခုလောလောဆယ်တော့ အဲအပေါ်ကို တက်ခွင့်ပိတ်ထားတယ်။” လို့ နီးစပ်သူများထံက သိရပါတယ်။

အဲဒီနေရာကို ယခင်ကတည်းက တက်ရောက်ခွင့်ပိတ်ပင်ထားပြီး စစ်အာဏာသိမ်းမှုဖြစ်ပြီးနောက် လာရောက်ခွင့် ပိုမိုတင်းကျပ်ထားတဲ့အတွက် ပါဆယ်ဗုံးလာပို့တာ မဖြစ်နိုင်ဘူးလို့ ယင်းနေရာအနီး ရပ်ကွက်နေထိုင်သူများက ဆိုပါတယ်။

“မနေညကတော့ ဖြစ်ပြီး တင်းတင်းကျပ်ကျပ် ပိတ်ထားတယ်။ ဘယ်သူမှ တက်မရဘူး။ အဲရုံးကိုသွားတဲ့လမ်းက ဆင်စုရပ်ကွက်နဲ့ နဝဒေးတံတားကိုသွားတဲ့ ဖြတ်လမ်းပေါ့။ မြန်မာ့အသံ ထပ်ဆင့်လွှင့်ရုံလည်း ရှိတယ်။ ကျန်တာကတော့ သူတို့ ဝန်ထမ်းတွေပဲနေတာ စစ်ကြောရေးက အဲမှာလည်းလုပ်တယ်။ နာမည်ကြီးနေရာပေါ့” ဟု မြို့ခံတဦးက ဆိုပါတယ်။

ဒဏ်ရာရသူတွေကိုတော့ နွားမယံကျေးရွာ အုပ်စုမှာရှိတဲ့ ကုတင် ၁၀၀ စစ်ဆေးရုံမှာ တက်ရောက်ကုသနေရတယ်လို့ သိရပါတယ်။

ပေါက်ကွဲမှုနဲ့ပတ်သက်ပြီးတော့ “မြေပြင်သတင်းစုံစမ်းချက်အရတော့ သူတို့ရုံးကို PDF၊ UG တွေဘက်က လုပ်တာမျိုးမရှိဘူး။ သိရတဲ့ သတင်းအရတော့ သူတို့ တပ်ဖွဲ့ဝင်တွေ အချိန်းအပြောင်းလုပ်တဲ့ အချိန် လက်နက်တွေပါ ရွှေ့ပြောင်းရာကနေ မတော်တဆဖြစ်ပြီး ပေါက်ကွဲတာလို့တော့ သိရတယ်။” လို့ ပြည်ခရိုင် တော်လှန်ရေးအင်အားစု ပြန်ကြားရေးတာဝန်ရှိသူက ပြောပါတယ်။

မြင်းမူ၊ မတ် ၁၃၊ ၂၀၂၃။

စစ်ကိုင်းတိုင်း၊ မြင်းမူမြို့နယ်၊ လက္ကပင်ကျေးရွာထဲမှာ စစ်ကောင်စီတပ်သားတွေရဲ့ဖမ်းဆီးတာကို ခံလိုက်ရတဲ့ ပြည်ကြီးတံခွန်ဆရာတော်ဦးအဂ္ဂ မှာ တပ်မ(၃၃)ထဲ စစ်ကြောရေးခံနေရပြီး ရွာခံသား ၄ ဦးမှာ သတင်းအစအနမရဘဲ ပျောက်ဆုံးနေဆဲ ဖြစ်တယ်လို့ သိရပါတယ်။

ပျောက်ဆုံးနေတဲ့ လက္ကပင်ရွာခံသား ၄ ဦးမှာ ကိုစိုးတေ (၁၇နှစ်)၊ မင်းမင်းထက် (၃၀နှစ်)၊ ကိုရဲလင်း (၃၀နှစ်)၊ ဖိုးထောင် (၅၃နှစ်) တို့ဖြစ်ပြီး သူတို့ဟာ သတင်းမရဘဲ ပျောက်ဆုံးနေတာ ဒီကနေ့နဲ့ဆို ၉ ရက်ရှိပြီ ဖြစ်တယ်လို့ မြင်းမူအခြေစိုက် Knight Commanders PDF မှ တာဝန်ခံ ဘယ်သန်ကြီးက ပြောပါတယ်။

“ဆရာတော်ကို လူဝတ်လဲပြီးတော့ ဖမ်းသွားတာ။ ဒီနေ့အချိန်ထိတော့ အသက်ရှင်ပြီး စစ်ကြောရေးခံနေရတယ်လို့ သတင်းအတိအကျ ရထားတယ်။ ဒေသခံ ၄ ယောက်ကိုတော့ ဘာမှသတင်းမရဘူး။ သေပြီလား ဆိုတာလည်း မသိရသေးဘူး” လို့ ဆိုပါတယ်။

ပြီးခဲ့တဲ့ မတ်လ ၅ ရက်နေ့က အင်အား ၁၀၀ ကျော်ပါတဲ့ စစ်ကောင်စီစစ်ကြောင်း တခုဟာ လက္ကပင်ကျေးရွာကို ဝင်ရောက်လာပြီး ဆရာတော် ဦးအဂ္ဂ၊ PDF ရဲဘော် ၅ ဦး၊ ရွာခံအမျိုးသား ၄ ဦးတို့ကို ဖမ်းဆီးပြီးနောက် အဲဒီထဲက PDF ရဲဘော် ၅ ဦးကို သတ်ဖြတ်ပြီး အလောင်းတွေကို မြစ်ထဲမျောခဲ့ကြတယ်လို့ သိရပါတယ်။

ပြည်ကြီးတံခွန်ဆရာတော် ဦးအဂ္ဂမှာ အာဏာသိမ်းပြီးချိန်မှစတင်ပြီး အာဏာရှင်ကို ရရာနေရာက ဦးဆောင်တော်လှန်နေပြီး၊ စစ်ကောင်စီနဲ့ ပျူစောထီးတပ်ဖွဲ့တို့ရဲ့ ဖျက်ဆီးခံရတဲ့ ပြည်သူတွေရဲ့ ဒုက္ခဆင်းရဲအပူကို အေးမြသောမေတ္တာ စာနာသောကရုဏာနှလုံးသား ရဲရင့်သောသတ္တိတို့နဲ့ ဦးဆောင်ဦးရွက်ပြုကာ ပြည်သူကို ကျေးဇူးပြုနေသော တော်လှန်ရဟန်းတော်တပါး ဖြစ်တယ်လို့ သံဃသမဂ္ဂ (မန္တလေး)မှ ထုတ်ပြန်ထားပါတယ်။

ပြည်သူကို ကျေးဇူးပြုကာ မတရားမှုကို အစွမ်းကုန် တော်လှန်သော ပြည်ကြီးတံခွန်ဆရာတော် ဦးအဂ္ဂရဲ့ အသက်အန္တရာယ်ဖြစ်ပေါ်ခဲ့ပါက စစ်ကောင်စီတပ်အနေနဲ့ ရာနှုန်းပြည့် တာဝန်ရှိပြီး တာဝန်ခံရမည်ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။

စာတည်း – 007

ပဲခူး၊ ဒီဇင်ဘာ ၂၅၊ ၂၀၂၂။

ပဲခူးတိုင်း၊ ကြို့ပင်ကောက်မြို့မှာ ကမ္ဘောဇတိုင်းအယ်ဒီတာချုပ် ဦးကျော်ဇေယျ အဖမ်းခံရပြီး စစ်ကြောရေးရောက်သွားပြီလို့ သိရပါတယ်။

ဒီဇင်ဘာလ ၂၅ ရက်ဒီနေ့မနက်အစောပိုင်း ၃ နာရီက ကြို့ပင်ကောက်မြို့ကနေအိမ်မှာ စစ်ကောင်စီ တပ်သားတွေနဲ့ရဲတွေက ဦးကျော်ဇေယျကို လာဖမ်းသွားတယ်လို့ မိသားစုနဲ့ နီးစပ်သူတဦးက ပြောပါတယ်။

“ကြို့ပင်ကောက်ကအိမ်မှာ ဖမ်းခံရတာ။ သူကရှောင်နေရတာကြာပြီ။ ခု စရဖလက်ထဲ လွှဲလိုက်ပြီဆိုတော့ စစ်ကြောရေးတော့ ရောက်သွားလောက်ပြီ”လို့ ပြောပါတယ်။

ဦးကျော်ဇေယျကို စစ်ကောင်စီက ၂၀၂၁ ခုနှစ်၊ မတ်လကတည်းက ပုဒ်မ- ၅၀၅ (က)နဲ့ ဖမ်းဝရမ်းထုတ်ထားတာကြောင့် ထွက်ပြေးတိမ်းရှောင်နေရင်း ဖမ်းဆီးခံလိုက်တာရတာဖြစ်တယ်လို့ ဆိုပါတယ်။

ကမ္ဘောဇတိုင်းက အယ်ဒီတာချုပ် ဦးကျော်ဇေယျ အပြင် ထုတ်ဝေသူ၊ အယ်ဒီတာအဖွဲ့တွေကိုပါ စစ်ကောင်စီဘက်က ၅၀၅ (က) နဲ့ ဖမ်းဝရမ်းထုတ်ခဲ့တာဖြစ်တယ်လို့ သိရပါတယ်။

၂၀၂၁ ခုနှစ်၊ မတ်လ ၂၄ ရက်မှာတော့ ဦးကျော်ဇေယျရဲ့ဇနီး တာဝန်ခံအယ်ဒီတာ နန်းနန်းတိုင်နဲ့ မောင်ဖြစ်သူ စိုင်းစည်သူအပါအဝင် ထုတ်ဝေသူ ကိုတင်အောင်ကျော်နဲ့ သတင်းထောက် နန်းဝင်းရီတို့ဟာ တိမ်းရှောင်နေစဥ်မှာပဲ ဖမ်းဆီးခံလိုက်ရပါတယ်။

အဲ့ဒီနောက် ၈ လကျော်အကြာ ဒီဇင်ဘာလ ၁၀ ရက်မှာတော့ ဖမ်းဆီးခံထားရတဲ့ နန်းနန်းတိုင်၊ စိုင်းစည်သူ၊ ကိုတင်အောင်ကျော်နဲ့ နန်းဝင်းရီတို့ကို နိုင်ငံတော်ဆူပူအောင် လှုံ့ဆော်မှုပုဒ်မနဲ့ စွပ်စွဲပြီး ညောင်ရွှေအကျဉ်းထောင် အထူးတရားရုံးကနေ ထောင်ဒဏ် ၃ နှစ်စီ အမိန့်ချခဲ့တယ်လို့ ဆိုပါတယ်။

အဆိုပါ ၄ ဦးမှာ ၂၀၂၂ ခုနှစ်၊ နိုဝင်ဘာလမှာတော့ စစ်ကောင်စီရဲ့ ပြစ်ဒဏ်လွတ်ငြိမ်းခွင့်နဲ့ ၄ ဦးစလုံး ပြန်လည် လွတ်မြောက်ခဲ့တယ်လို့လည်း သိရပါတယ်။

ပဲခူး၊ မတ် ၂၂၊ ၂၀၂၂။

နတ်တလင်းမြို့ PDFဒုတပ်ခွဲမှူးတဦး မတ်လ၁၂ရက်က ဇီးကုန်းရဲစခန်းမှာ လက်နက်ချပြီးနောက် ဖမ်းဆီးခံရသူတွေထဲက ဆေးတပ်ဗိုလ်ကြီးဟောင်း တဦးဟာစစ်ကြောရေးမှာ နှိပ်စက်လို့ ဆေးကုသနေရပါတယ်။

ဒဏ်ရာရ PDFရဲဘော်တဦးကို ဆေးကုပေးတယ်ဆိုကာ ဆေးတပ်ဗိုလ်ကြီး‌ဟောင်းကို ဖမ်းဆီးတာဖြစ်တယ်လို့ သိရပါတယ်။

“လောလောဆယ် ကွင်းဆက်အနေနဲ့ဖမ်းတာက ဇီးကုန်းမြို့အမှတ်၁ရပ်ကွက် မြို့သစ်၉လမ်းက ဆေးတပ်ဗိုလ်ကြီးဟောင်း ကိုမျိုးလင်းဌေးနဲ့ ဒေါ်တင်မာလာလင်း(ခ)မစိုစိုး တို့ကို PDFတွေကိုကူညီတယ် ဆေးကုပေးတယ် သတင်းရလို့ ဆိုပြီးဖမ်းသွားတယ် အကြမ်းဖက်ပုဒ်မနဲ့ အမူဖွင့်ထားတယ် “လို့ ရဲတပ်ဖွဲ့ဝင်နဲ့ နီးစပ်သူတဦးက မြေလတ်အသံကို ပြောပါတယ်။

တောင်ရေကန်သံဃာတပါး နဲ့ ကန်ဦးရိပ်သာကသံဃာတပါး အပါအဝင်အခြား ပြည်သူ တဒါဇင်ကျော်ကိုလည်း စစ်ကောင်စီက ဖမ်းဆီးထားပြီး ကိုမျိုးလင်းဌေးနဲ့ ဒေါ်တင်မာလာဝင်းတို့ နှစ်ဦးကို အကြမ်းဖက်ပုဒ်မ ၅၂(က)/၅၀(ည) ဒေသခံတဦးကပြောပါတယ်။

လက်နက်ချအဖမ်းခံသူ ကိုမျိုးဝင်းဟာ နတ်တလင်းမြို့နယ်သားတဦးဖြစ်ပေမယ့် ဘယ်PDFအဖွဲ့ကဆိုတာမသိရသေးသလို သူအဖမ်းခံပြီးနောက်ပိုင်းဖမ်းဆီးခံထားရသူဦးရေနဲ့ စွတ်စွဲထားတဲ့ ပုဒ်မတွေအပြင် လက်ရှိသူတို့ရဲ့ ကျန်းမာရေးအခြေအနေတွေကို မြေလတ်အသံက စုံစမ်းနေဆဲဖြစ်ပါတယ်။